Me Nger Tindi U Dooshima Ken Asema Ve
Me Nger Tindi U Dooshima Ken Asema Ve
“Me ver atindi Am ken atô ve je man shi Me nger a ken asema a ve kpaa.”—Yeremia 31:33.
1, 2. (a) Kanyi se time shami hegene? (b) Yehova yange tese tahav nav sha Uwo u Senai nena?
SE HEN ken kwaghhenen u hiihii man u sha uhar la ser, zum u Mose za hungwa sha Uwo u Senai la, ishigh nagh mondo iengem i Yehova. Shi se time sha kwagh u ikyondo i Mose cir sha ishi la kpaa. Hegen yô, de se time nen sha kwagh ugen u a gbe a zough sha akaa a se vande henen la, shi a lu Mbakristu a inja nyian yô.
2 Mose yange hungwa sha uwo a ikpande awen ihiar. Mbaiserael cii kohol shin kpe u Uwo u Senai, nahan ve nenge akav a kpilighyol a Aôndo iyolna er yô. “Idyuran man inyiar kua ibeenegh ki iligh kpaa lu sha uwo la, man imo i ikpamkor lu kaan taver taver; ior mba hen afo cii gbidye akarkase iyol. . . . Uwo u Senai cii gba duen mnyim sha ci u TER A sen sha u ken usu yô; mnyim mara gba kôndon er ka mnyim ma duen ken atse yô, uwo la cii tenger kpishi.”—Ekesodu 19:16–18.
3. Yehova yange na Mbaiserael Atindi a Pue la sha nyi gbenda, man ikyurior la va kav ér nyi?
3 Yehova maa tindi ortyom na va lam a ikyurior ne, shi na ve atindi a í yer nyian ér Atindi a Pue la kpaa. (Ekesodu 20:1–17) Nahan hanma or fa doo doo ér ka Uhembansha a ne atindi la ye. Yehova va mase ngeren atindi la sha ikpande i awen, ka ikpande shon je Mose gema ta inya, í hembe avur avur shighe u nenge Mbaiserael lu civir wanbua u sha zenaria la ye. Yehova shi hide nger atindi ne sha ikpande i awen igen. Kwa ne yô, Mose tee ikpande la hongo sha uwo yô, kwav u ishigh nagh engem. Lu hen shighe ne hanma or mase fan er atindi la a lu a inja tsung ye.—Ekesodu 32:15–19; 34:1, 4, 29, 30.
4. Er nan ve Atindi a Pue la lu a inja kpishi?
4 Tsô i tôô ikpande i ihiar i í nger Atindi a Pue sha mi la i wa ken areki u ikyuryan, u lu ken Icighankpar u ken atô u tabernakel la. Mba va maan tempel yô, i gema veren un ken Icighankpar u Hemban la. Atindi a i nger shami la pase atindiakaa a a lu ken Tindi u Mose u ikyuryan la, shi a tese gbenda u Aôndo una hemen Mbaiserael kpaa. Shi a tese ér Yehova ngu eren kwagh a ikyurior i a tsough yô.
5. Atindi a Aôndo na Iserael la tese ér ve doo un ishima nena?
5 Atindi ne pase mlu u Yehova kpishi, hemban je yô, mdoo u ior nav doo un ishima la. Shi a lu mba ve kuran á la iyua i injaa kpen kpen! Orfantakerada ugen nger wener: “I gbe je orumace ngu a due a gbenda u eren aeren a wang, . . . u u mgbôghom shin u lu kwagh môm shin u hembe atindi a Aôndo a pue la ga.” Yehova yange ôr kwagh u Tindi u Mose la ér: “Aluer né veren ato sha kwaghôron Wam mimi je, shi né waan ikuryan Yam iko kpaa yô, nahan akuraior a sha won cii, ka ne né hingir kwagh Wam iyol Yam je ye; gadia tar cii, ka u Wam je. Ka ne né lum tartor u upristi kua icighanikurior ye.”—Ekesodu 19:5, 6.
I Nger Tindi ken Asema a Ve
6. Ka tindi u nyi a hembe lun a inja a atindi a yange i nger sha iwen laa?
6 Sha mimi yô, atindi la lu a inja kpen kpen je. Nahan kpa, u fa er Mbakristu mba i shigh ve mkurem mbara ve lu a kwagh u hemban atindi a i nger sha iwen la i yem zende zende kpa? Yehova tsengaôron kwagh u ikyuryan igen i i kaha a i̱ vande yan a Mbaiserael la. A kaa ér: “Me ver atindi Am ken atô ve je man shi Me nger a ken asema a ve kpaa.” (Yeremia 31:31–34) Yesu u a lu orhimen u ikyuryan i he ne yange nger ma tindi na mbahenen nav ér ve kuran ga. Kpa, yange tese mbahenen nav atindi a Yehova sha mkaan man sha ieren kpaa, sha er vea kôr a saa a mi ken asema a ve yô.
7. Ka unô yange i hii nan ve “tindi u Kristu” laa, man ka unô ve va ngohol un ken masejime?
7 Mba yer tindi ne ér “tindi u Kristu.” Ka Mbaiserael mba sha iyol mba ve lu tsombor u Yakob la i hii nan ve tindi ne ga, kpa lu “Iserael u Aôndo,” ikyuior i ken jijingi la i hii nan ve ye. (Mbagalatia 6:2, 16; Mbaromanu 2:28, 29) Ka Mbakristu mba i shigh ve mkurem la ve kohol cii ve lu Iserael u Aôndo la ye. Ken masejime yô, “zegeikpelaior” due ken akuraior a sha won cii va kohol ve, ér vea civir Yehova imôngo. (Mpase 7:9, 10; Sekaria 8:23) Er ve lu “ikum i môm” sha ikyev i “Orkuran môm” yô, ve ngohol “tindi u Kristu” ne ave ahar, shi hemen ve ken akaa a ve eren cii.—Yohane 10:16.
8. Tindi u Mose la kaha a tindi u Kristu nena?
8 Hanma Oriserael u sha marami cii yange nan lu sha ikyev i Tindi u Mose la, kpa Mbakristu yô ka nahan ga, ve na ayol a ve sha ikyev i tindi u Kristu ne sha asema a ve. Shi kwagh gba sha kwavyolough shin ape or dugh shin ijiir i i mar nan kpaa ga. Ve hen kwagh u Yehova man igbenda na ve fa, nahan sar ve tsung u eren ishima na. Er Aôndo a ver tindi ne “ken atô” u Mbakristu mba i shigh ve mkurem la, inja er i nger un a nger ken “asema a ve” yô, mba ongo Aôndo sha ci u tsahan mba ve hembe un ato yum ga, shin gba pe vea ungwan un keng yô ve fa kwagh u vea er ga ze. M-ongo u ve ongo imo i Aôndo ne har sha kwagh u a hembe lun kwagh u vesen shi a hembe gbanger shi a hembe taver cii yô, man kape iyôngo igen la kpa i ongo imo i Aôndo sha ci u tindi na ngu ve ken asema je la.
Atindi Ne Har sha Dooshima
9. Yesu yange tese ér dooshima ka tamenkwagh ken atindi a Yehova nena?
9 A fatyô u kaan ér atindi a Yehova man akaawan a na cii har sha ishemberti i môm tseegh, ishemberti shon ka dooshima. Kera je kpa ka dooshima a lu itine i mcivir u wang ye, man kape una za hemen u lun kpaa je la. Orgen yange pine Yesu ér a ôr un tindi u a lu Tindi u tamen yô, Yesu gema kaa a na ér: “Ter Aôndo wou A̱ doo u ishima a ishima you cii man a uma wou cii man a mfe wou cii.” U sha uhar yô: “Or u nan we ndor a we yô, nana̱ doo u ishima er we iyol you nahan.” A mase kuren wener: “Ka atindi ahar ne je man atindi kua mbaprofeti cii ve har sha mi ye.” (Mateu 22:35–40) Kwagh u Yesu ôr ne tese wang ér Atindi a Pue la kua Ruamabera u Mbaheberu la jimin cii har sha dooshima.
10. Er nan se fe ser dooshima ka tamenkwagh ken tindi u Kristu?
10 Tindi u i nger ken asema a Mbakristu la kpa har sha mdoo u Aôndo a doo se ishima kua mbawanndor a vese laa? Kape i lu vough je la! Tindi u Kristu la wa mdoo u Aôndo a doo se ishima sha mimi la ker, shi ngu a tindi u he u i we Mbakristu ér ve doo ayol a ve tsung la kpaa. Ka u vea doo ayol a ve vough er mbahenen mba Yesu yange ve doo un ishima ve na uma na sha ci ve nahan. Mdoo u Mbakristu ve doo ayol a ve je i lu kwagh u myer ga ne ka kwagh u i fe Mbakristu mba mimi sha mi je la. (Yohane 13:34, 35; 15:12, 13) Yesu yange tese mbahenen nav ér Aôndo a doo ve ishima shi ve doo ayol a ve, er ve doo un ishima nahan. Shi kaa a ve ér mbaihomov vev je kpa ve doo ve ishima.—Mateu 5:44.
11. Yesu yange tese ér Aôndo man uumace doo un ishima nena?
11 Yesu ver ikyav i vough i tesen dooshima. Er lu ortyom u ageegh sha nahan kpa, á lumun u va eren ishima i Ter na shin tar. A na uma na sha u mbagenev ve zua a uma u tsôron, shi tese ior kwagh u vea er a uma ve ve a kpe ve iyol yô. Yange lu or u hiden a iyol ijime, u lun sar sar shi wan mbagenev ikyo, shi wasen mba ikyav yuhwa ve man mba i kighir ve sha ican la kpaa. Shi ôron ior “mkaanem ma uma u tsôron” kpaa, mayange gbaan uwer u wasen ior ér ve fa Yehova ga.—Yohane 6:68.
12. Er nan ve a fatyô u kaan ér mdoo u Aôndo a doo se ishima kua mbawanndor a vese la zua kangenaanaa?
12 Sha mimi yô, mdoo u Aôndo a doo se ishima kua mbawanndor a vese la zua kangenaa je a fatyô u paven veren kposo ga. Apostoli Yohane yange kaa ér: “Dooshima yô, ka her Aôndo a dugh ye; . . . Aluer orgen nana kaa er: Aôndo doom ishima, man nan gema nan ngu kôron anmgbian u nan ihom yô, nan ngu or u aiegh je. Gadia or u anmgbian u nan, u nan nenge a nan la, a doo nan ishima ga yô, Aôndo u nan nengen a Na ga la, A fatyô u doon nan ishima ga.” (1 Yohane 4:7, 20) Ka Yehova je a lu dooshima kua imbor i dooshima kpaa ye. Ka dooshima a mgbeghan un u eren nyityô kwagh i a eren cii ye. Se mba tesen dooshima sha ci u a gba se sha ibeen na. (Genese 1:27) Mbawanndor a vese ka vea doo se ishima yô, kwagh ne a tese ér Aôndo kpa doo se ishima.
Aluer Aôndo Doo Se Ishima yô Se Kuran Atindi a Na
13. Aluer ka u Aôndo una doo se ishima yô, kanyi i gbe u se hii eren keng-ne?
13 A er nan ve Aôndo u se nengen a na ga la una doo se ishima? Kwagh u vesen u i doo u se hii eren yô, ka u fan un. Or u se fe nan ga nana gba doon se ishima fese ga, shin se gba suur sha nan fese tsô ga. Nahan, Mkaanem ma Aôndo wa se kwagh ér se kporom hen a Na sha u ôron Bibilo, shi eren msen shi kohol imôngo a mba ve vande fan un shi a doo ve ishima la kpaa. (Pasalmi 1:1, 2; Mbafilipi 4:6; Mbaheberu 10:25) Ityakerada i ivangeli i inyiin la ngi a inja kpen kpen, gadia i pase se mlu u Yehova, er se nenge ken uma u Yesu Kristu man tom na nahan. Ka sea faan Aôndo shi sea nengen er se doo un ishima nahan yô, isharen i eren ishima na shi dondon ikyav na la i hemba taver a taver ken a vese cii. Sha kpôô yô, aluer Aôndo doo se ishima yô se kuran atindi a na.
14. Er nan ve se fatyô u kaan ser atindi a Aôndo yuhwa ga?
14 Ka se nôngo u fan akaa a ior mba doon se ishima ve soo man a ve soo ga la, shi se eren sha ishima ve kpa vough. Se mba keren u eren kwagh u una vihi mba doon se ishima ga. Apostoli Yohane ngise nger wener: “Gadia ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yohane 5:3) Atindi a Aôndo yuhwa ga, shi a ngee kpishi kpaa ga. Ka dooshima a hemen se u zenden vea Aôndo ye. Ngô ka nan er akaa kposo kposo sha ci u ônov mba nan sha ci u ve doo nan ishima yô. Gba u saa nana hen akaa a nana eren a ve la nana kôr ken ityou ve nana eren a ve doo doo ga; kpa er ve doo nan ishima yô dooshima la una wase nan u eren a ve dedoo. Er se eren akaa a dedoo a mbadoon se ishima saan saan nahan, kape atindi a Aôndo kpa a yoho se u kuran ga je la. Aluer Aôndo doo se ishima yô, a saan se iyol u eren ishima na. Sha nahan yô, Aôndo kpa a doo un a vese, shi se zua a injar, gadia kwaghwan na wasen se hanma shighe cii.—Yesaia 48:17.
15. Kanyi ia mgbegha se se kav Yehova?Pase er i hii ve ú er nahan yô.
15 Er Aôndo a doo se ishima yô, kwagh ne ka a mgbegha se u dondon aeren a na. Kwagh u or ka una doo se ishima yô, aeren a nan kpa a doo se shi se nôngo ser se lu er nan nahan. Nenge ase sha mlu u dedoo u hen atô u Yehova man Yesu la. Yesu lu sha vea Yehova anyom ubiliôn imôngo. Nahan ve doo ayol a ve tsung, lu dooshima u mayange je una bee sha won ga yô. Yesu bee Ter na u sha la vindi vindi, ka nahan ve kaa a mbahenen nav ér: “U nan nenge a Mo yô, nan nenge a Ter je ve” ye. (Yohane 14:9) Er se lu fan Yehova man Wan na se seer yô, a hemba saren se u lun er ve nahan. Mdoo u Yehova a doo se ishima kua icighan jijingi na la una wase se se “dugh tseor kua aeren a na la kera, [se] haa orhe iyol.”—Mbakolose 3:9, 10; Mbagalatia 5:22, 23.
Akav a Tesen Dooshima
16. Se mba tesen sha tom wase u pasen kwagh la ser Aôndo man orwanndor a vese doo se ishima nena?
16 Er se lu Mbakristu yô, ka se de ser mdoo u Aôndo a doo se ishima kua mbawanndor a vese la a mgbegha se se er tom u pasen kwagh u Tartor shi se gema ior ve hingir mbahenen. Ka sea eren nahan yô i doo Yehova Aôndo a vese tsung je, gadia “sar Un u ior cii ve̱ war ve̱ ar sha mfe u fan mimi la.” (1 Timoteu 2:3, 4) Nahan se zua a msaanyol sha u wasen mbagenev sha er ve kpa a nger tindi u Kristu ken asema a ve yô. Man ka sea nenge er mba se wase ve la ve lu nôngon geman mbamlu vev ér ve zua sha aeren a Yehova a dedoo la nahan, i saan se iyol kpen kpen. (2 Mbakorinte 3:18) Sha mimi yô, u wasen ior ser ve fa Aôndo ka iyua i hemban i se fatyô u nan ve je la. Mba ve lumun u yan ikyar a Yehova yô, a saan ve iyol gbem sha won.
17. Er nan ve i lu a inja u Aôndo man orwanndor a vese vea hemba doon se ishima a uyôughyôughmbaakaava?
17 Se mba ken tar u uyôughyôughmbaakaav ve hembe doon ior yô. Kpa uyôughyôughmbaakaav mba tse gbem ga. Alaghga mbaiv vea ii akaa ne shin aa vôngo a sar ishe je kpaa. (Mateu 6:19) Bibilo ta se icin ér: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yohane 2:16, 17) Sha kpôô yô, Yehova ngu lun gbem sha won, man kape mba a doo ve ishima shi ve eren ishima na kpa vea lu gbem sha won je la. Er i lu nahan yô, hemba kan a inja u nôngon ser Aôndo man mbawanndor a vese ve doo se ishima, a u zendan akaa a ica a gba ga tsô aa kar kera la ga he?
18. Kwase mishen ugen yange tese dooshima u tangen iyol ga la nena?
18 Mba ve tesen dooshima yô mba ne Yehova icivir. Nenge ase kwagh u kwase mishen ugen ken tar u Senegal, u i yer iti na ér Sonia la. Yange hen Bibilo a kwase ugen, mba yer iti i kwase shon ér Heidi. Kwase ne zua a anyigôr u i yer ér HIV la hen nom na u fa Aôndo ga la. Nom u Heidi kpe ayange nga kar yô maa Heidi er batisema, kpa ica gba ga tsô angev mbu AIDS gande un iyol i za kôr un gambe ken iyouci. Sonia pase kwagh u er yô, wener: “Er mbatwerev vese iyenge ga nahan kpa, ve nôngo kwagh ishima i môm. Anmgbianev mba ken tiônnongo kpa na ayol a ve, lu nengen sha Heidi ken iyouci. Sha iyange i sha uhar la yô, m yav sha butu hen kpe gambe ape Heidi yav la m lu nengen sha a na zan zan mase kpen. Ortwer u yange yar sha iyange shon la kaa ér: ‘Zayol u vesen u se lu a mi hen iyouci ne yô, or ka nana va faan ér or u nan ngu a angev mbu AIDS yô maa nan undu nan teghelee nan yem kwagh u nan. Kpa er nan ve we u ú lu tsombor môm a kwase ne kpaa ga, lun kpa ne lu tar môm ga shi kwavyolough wen kpa u lu kposo ne ve ú lumun u yan imba ican nee?’ Nahan m mase kaan a na mer m tôô Heidi mer ka anngôm u kwase, se mba ter môm ngô môm. Doom kpishi u nengen sha a na, gadia m tôô un er ka anngôm nahan.”
19. Er Aôndo a nger se tindi na ken asema yô, doo u se er nyi?
19 U fatyô u zuan a akav kpishi sha kwagh u dooshima u tangen iyol ga la hen atô u ior mba Yehova. Mba fe ior mba Aôndo nyian sha ma tindi u i nger a nger ga. Kpa se mba nengen a mkur u kwaghôron u ken Mbaheberu 8:10 la, ijiir la kaa ér: “Ka ikuryan Yam i Me ya a ya u Iserael je ne, er ayange a ngara aa kar kera yô, kape Ter A kaa la. Me ver atindiakaa Am ken mhen ve shi ka ken asema a ve kpaa Me nger a ye. Me lu Aôndo ve ve di kpaa vea lu nongoior Wam.” Nahan yô, tindi u dooshima u Yehova a nger ken asema ase ne a lu se a inja tsung, shi se tesen dooshima ne sha hanma ian i i dugh cii.
20. Er nan tindi u Kristu a lu kwagh u injaa yumu?
20 Doo se kpishi u lun ken mzough u mbacivir Aôndo sha won cii, mba ve lu tesen imba dooshima ne la! Saan mba i nger tindi u Kristu ken asema a ve la iyol gadia mba a kwagh u injaa ken tar u ú ban a dooshima yum ne. U ngu wer ka dooshima u Yehova a tese ve la tseegh a ne i saan ve iyol ga, mzough u anmgbianev u kangenaa u ve lu ker la kpa ne ka saan ve iyol. “Nenge, aluer anmgbianev vea tema imôngo, ishima ve ia lu i môm yô, á doo yum á hôm kpaa.” Er Mbashiada mba Yehova ve lu ken ityar kposo kposo shi ve lamen ijô kpa kposo kposo shi aeren ve a ityôô a kaha nahan cii kpa, ve zua kwagh môm ken mcivir u Aôndo. Mzough ve ne na yô doo Yehova a ve nahan a lumun ve. Ka nahan ve orpasalmi nger wener: “Ka ker [ken atô u ior mba ve zough sha dooshima la] je TER A ne iveren ye, ka uma u tsôron je la.”—Pasalmi 133:1–3.
U fatyô u Nan Mlumun Kpa?
• Atindi a pue la yange lu a inja nan je?
• Ka hanma tindi i nger ken asema a ioro?
• Dooshima ngu a inja ken “tindi u Kristu” nena?
• Se tese ser Aôndo man mbawanndor a vese doo se ishima nena?
[Study Questions]
[Picture on page 15]
Mbaiserael yange ve lu a atindi a i nger sha ikpande i awen yô
[Pictures on page 16]
Mbakristu mba a tindi u Aôndo ken asema a ve
[Picture on page 18]
Sonia vea wankwase ugen ken tar u Senegal sha mkohol u vesen u ken inyom i 2004