Ú Kav Ikyav i M-ande u Yesu La Kpa?

OR MÔM tsô soo ér nana gba angev kpoghuloo shin ma aahe a tser nan ga. Nahan, orfankwagh ka nana nenge a akav a tesen ér kwaghbo ngu van yô, nan er kwagh sha mi fefa. Yesu Kristu yange ôr kwagh u ikyav igen i í gbe u se fa i yô. Ikyav shon ia yisa tar cii shi ia bende a uumace cii, kua we man tsombor wou kpaa.

Yesu ôr kwagh u Tartor u Aôndo u ua kar a ifer kera shi ua gema tar cii ua hingir paradiso la. Nahan gba mbahenen nav ishima kpishi u fan shighe u Tartor shon ua va yô. Tsô ve pine un ér: “Ka nyi ia lu ikav i sha mve [shin m-ande] Wou la man i mkurtara?”—Mateu 24:3.

Yesu yange fa ér a wua un shi a nder un shin ku. A nderen un yô una kegh anyom uderi imôngo cii ve una hingir Tor, una hemen uumace jimin cii ye. Uumace vea nenge er a ver Yesu tor ga, sha nahan yô a tese mbadondon un ikyav i ia wase ve vea kav m-ande na shi vea fa shighe u ‘mkurtar’ kpaa yô. Ikyav shon ne ngi a akaa ker kpishi a a kohol cii a lu ikyav i môm yô—ka ikyav i m-ande u Yesu je la.

Orngeren ivangeli Mateu man Marku man Luka cii nger mlumun u Yesu na mbahenen nav sha mpin u ve pine un la vighe vighe. (Mateu ityough 24 man 25; Marku ityough 13; Luka ityough 21) Mbangeren Bibilo mbagenev kpa ôr akaa agen a a lu ikyav ne yô. (2 Timoteu 3:1–5; 2 Peteru 3:3, 4; Mpase 6:1–8; 11:18) Ian yina se i ôron kwagh u ikyav ne vighe vighe, nahan se lu ôron akaa ataan tseegh a Yesu yange ter kwagh sha mi ken ikyav i m-ande na ne yô. A lu ú tôv sha ikyav na ne doo doo yô, ú lumun wer ngi a inja hen a we kpaa.—Nenge akwati u sha peeji 5 la.

“Mgem u A Ve a Iaven i He Yô”

“Ikurior igen ia mough ityav a ikurior igen; tartor ugen kpaa ua mough ityav a tartor ugen.” (Mateu 24:7) Pipaabaver i ken tar u Jamani i i yer ér Der Spiegel la kaa ér, cii man inyom i 1914 la yô, ior “na jighjigh ér ken hemen yô tar ua doo kpishi, mkighir una kera lu ga, a lu mzehemen man mkpeyol tseegh.” Kpa kwagh va kôr gema. Magazin u i yer ér GEO la kaa ér, “ityav mbi yange i nôngo ken uwer u Agusutu, inyom i 1914 zan zan uwer u Novemba, inyom i 1918 la yange mbi cier iyol kpen kpen. Mbi gema mlu u uumace, mbi va a iaven i he.” Ushoja mba hemban miliôn 60 mba ken avegher-a-tar ataan yange ve nôngo ityav mbi vihin tsung mbin. Hanma iyange yô, ushoja lu kpen ken utya je lu kuman er 6,000 nahan. Hii shighe la je, mbatôvon sha akaa a mbayiase mba sha ashighe kposo kposo, mba ve lu a mbamhen kpa kposo kposo yô nenge ér, “inyom i 1914 zan zan i 1918 la lu shighe u mgem u a ve a iaven i he yô.”

Ityav mbi Tar cii Mbi sha Môm la yange mbi va a mgem ken akaa a eren a uumace. Ka mgem u a fatyô u sôron mayange ga yô.  Nahan uumace mba ken ayange a masejime a tar ungun. Hii shighe la je, i mem ityav mbi nôngon ken derianyom u sha ikyundu la ga, shi ior mba eren tswam kpoghuloo. Ken derianyom u se nyer ker i kom anyom ataan hegen ne kpa kwagh ngu a gema kposo ga. Kpa ka ityav mbi nôngon tseegh ga, akaa agen kpa nga eren a a lu ikyav i mkurtar yô.

Ijen, Angev man Ityartenger

‘Ijen ia gba.’ (Mateu 24:7) Ijen yange i gba ken Yuropa shighe u i lu nôngon ityav mbi tar cii mbi sha môm la, man hii shighe la je ijen ngi a mem uumace ga. Ortôvon sha akaa a mbayiase Alan Bullock kaa ér ken inyom i 1933 la ijen gba ken tar u Russia man Ukraine, “ior lu zenden gengee shi ve kande je ndôhôr ishima . . . I haa akom a ior sha gbenda wue wue.” Ken inyom i 1943 la, ortôônabaver T. H. White nenge er ijen kaa kwagh a ior ken ipaventar i Henan, ken tar u China yô. A kaa ér: “Ijen ka ia gba yô, hanma kwagh kpa a hingir ior kwaghyan. Ior ka ve wua kwagh u ve soo u yan la sha nase, ve ya ve zua a agee. Kpa sha mimi yô, saa or a nenge a ku ashe ve nana kôr cio u yan kwagh u ior ve ye ga ye.” Kwagh er vihi yô, ken Afrika kpa ijen mem ior ken anyom a a sember karen ne ga cii. Tar ngu a kwaghyan ngee je kuma u hanma or nana yaan hanma shighe kpa una yina ga, nahan kpa gbaatom u Mzough u Ityar Cii u i yer ér UN Food and Agriculture Organization la ker ahaba ér iorov miliôn 840 sha tar mba ye kwagh ka kom ve ga.

‘Ubombauangev vea lu sha ajiir kposo kposo.’ (Luka 21:11) Ipipaabaver i i yer ér Süddeutsche Zeitung la kaa ér, “angev mbu haan ahenga yange mbu wua ior ken inyom i 1918 je kuma er miliôn 20 zan zan miliôn 50 nahan. Angev mbun wua ior hemba angev mbu i yer ér black death la, shi hemba ior mba yange ve kpe ken ityav mbi tar cii mbi sha môm la kpaa.” Hii shighe la je, iangev kposo kposo er iyolhian man agina man houghbar man akpiti kua nyia-awambe nahan er kwagh a ior je doo ato ga. Shi tar ngu kenger sha lanshima er angev mbu AIDS mbu lu samber kpoghuloo nahan. Shin er tom tweregh u lu zan ikyura nahan kpa, iangev mbigen kera mbi ungwan icigh ga. Cimin ior zan zan hegen er i hii ve kwagh a lu nahan yô. Kpa, kwagh ne gema tese ér shighe wase ne kaha kposo a hanma shighe ugen cii.

‘Ityartenger.’ (Mateu 24:7) Tar tenger wua ior udubu deri imôngo ken atô u anyom deri môm a a kar ken ijime la. Ibaver igen kaa ér, hii ken inyom 1914 je hanma inyom yô, tar ka u tenger i kuma er kwa 18  nahan, ka i lu mtenger u a kom u hemben ayou shi paven inya kpaa yô. Shi hanma inyom yô, tar ka u tenger sha agee u wua ior shi u hembe ayou kpishi. Er mfe a seer sha kwagh u iwavaren nahan je kpa, tar tenger ngu wuan ior kpishi. Kwagh ngu eren nahan sha ci u ugeri mba vesen kpishi mba sha ajiir a tar u tenger yô.

Loho u Dedoo!

Akaa kpishi a a lu ikyav i mkurtar ne ka a van ior a ican i yan. Kpa Yesu yange ôr kwagh u loho u dedoo kpaa.

‘Loho u Dedoo u tartor ne yô, á ôr u á tser tar, sha u u̱ lu mpase hen akuraior cii.’ (Mateu 24:14) Ior vea er tom u pasen loho u dedoo u Tartor u Yesu iyol na yange hii eren u ne ken ayange a masejime ne kpoghuloo. Man ka kwagh u a lu zan hemen vough je ne. Mbashiada mba Yehova mba pasen ior loho u Bibilo shi mba tesen ior mba ve keghen ato a ve la u eren tom sha kwagh u ve lu henen la ayange ayange. Mbashiada mba hemban iyenge miliôn ataratar mba pasen kwagh hegen ken ityar 235 man ken ijô hemba 400.

Fa wer Yesu yange kaa ér ior vea de akaa a ve a eren sha ci u mtaver u ayange a masejime ne ga. Shi yange dugh uwegh sha kwagh môm ken akaa a a lu ikyav i mkurtar la ér ka un tseegh una yisa tar cii ga. Kpa a tsengaôron kwagh u akaa kposo kposo a a lu ikyav i mkurtar, a ior vea nenge a mi sha tar cii yô.

We yô ú ngu nengen a akaa a a kohol cii a lu ikyav i vesen sha tar jimin cii ne je kpa? Akaa a a lu eren sha tar ne nga benden a we kua tsombor wou kpaa. Kpa alaghga se pine ser, er nan ve i lu ior kpuaa tseegh ve ver ishima sha akaa nee?

Ior Mba Hemban Wan Ayol a Ve Ikyo

“De Gbe Iyol Heen Ga!,” “De Ze Ikyua a Usu u Latriki Ne Ga!,” “Pande Ayem.” Asember ne cii ka akav a tan ior icin a se nengen a mi hanma iyange yô. Kpa ior mba we a  ikyo ga. Er nan ve ior ve we akaa ne ikyo ga? Ka sha ci u mba hembe soon u eren kwagh sha asema a ve. Ikyav i tesen yô, alaghga a lu ú pe yevese a kwaghhendan hemban er tindi a tese la, shin a sar ú tsung u gban iyol pe i vende ér i de gbe iyol ga yô. Kpa u wan ikyav i tan se icin sha kwagh ikyo ga la ka kwaghbo.

Ikyav i tesen yô, mba zenden nengen ajiir ka vea za sha iwo i Alpine i ken tar u France man Italia man Switzerland la yô, ve numbe sha senou u a lu sha iwo shon la. Mbagenev ken ve ka ve sar ku sha ci u ka a ta ve icin ér ve numben sha ajiir a ior ve vanden numben la tseegh kpa i kuma ve ga. Ipipaabaver i i yer ér Süddeutsche Zeitung la kaa ér mba zenden nengen ajiir kpishi mba ve we icintan ikyo ga la ka ve ta cia ér, U cia kwagh, u numbe ga. Kpa kwagh ka a er i vihi yô, ashighe agen or ka nana wa icintan ikyo ga yô, nan kimbi sha uma u nan.

Ka sha ci u nyi ior ve we ikyav i mkurtar i Yesu yange ôr la ikyo ga? Isharen i inyar pir ve ashe a ishima, shin alaghga ve cighir asema nahan kwagh ne bee ve kwagh ga, shin asema nga ve ahar gayô ve uve ityough ken akaa a ve a eren shin mba cian ér aluer ve wa kwagh u Yesu ôr la ikyo yô una pande ve ulum. Ma kwagh ken akaa a i ter sha heen ne ngu yangen we u wan ikyav i m-ande u Yesu la ikyo shinii? Ú nenge wer, hemba doon u ú kav ikyav i m-ande na ne shi ú er kwagh sha mi ga he?

Uma ken Tar u Paradiso

Ior kpishi kav ikyav i m-ande u Yesu la shi mba eren kwagh sha mi kpaa. Kristian ka gumor ken tar u Jamani u a er kwase yô, a nger wener: “Shighe wase ne ka u vihin kpishi. Sha mimi yô se mba ken ‘ayange a masejime.’ ” Un vea kwase na mba pasen ior kwagh u Tartor u Mesiya la kpoghuloo. Frank kpa ka ken tar u Jamani a lu ye. Un vea kwase na di mba taver ior asema sha loho u dedoo u ú lu ken Bibilo la. Frank kaa ér, “akaa a a lu zan hemen shin tar ne na yô ishima ngi nyian ior kpishi ayange ne sha kwagh u kper. Nahan se mba taver ve asema sha akaaôron a profeti a ken Bibilo a a er kwagh u tar u paradiso la.” Kristian man Frank mba wasen u kuren kwagh môm ken ikyav i m-ande u Yesu la—kwagh shon yô ka loho u dedoo u Tartor u i lu pasen ior kwagh u ú la.—Mateu 24:14.

Yesu una tim bo tar ne kua mba ve suen u la cii sha mkur u ayange a masejime ne. Tartor u Mesiya ua hemen tar ne, ua gema ua hingir Paradiso u i tsenge ôron kwagh na la. Angev man ku ua kera za uumace iyol ga, shi a nder mbakpenev vea lu uma shin tar ne. Uityendezwa mba injaav mban cii mba keghen mba ve kav ikyav i ashighe a ase ne la. Nahan ú hen wer doo u ú seer timen sha kwagh u ikyav ne man kwagh u ú er sha er ú war mtim u tar ungun ga zee? Sha kpôô yô, kwagh ne ka kwagh u torough torough u i gbe u hanma or nana er kwagh sha mi yô.—Yohane 17:3.

[Blurb on page 3]

Yesu tsengaôron kwagh u akaa kposo kposo a a lu ikyav i mkurtar, a ior vea nenge a mi sha tar cii yô.

[Blurb on page 5]

Ú ngu nengen a akaa a a kohol cii a lu ikyav i vesen sha tar jimin cii ne je kpa?

[Box/Pictures on page 5]

AKAA A A LU IKYAV I AYANGE A MASEJIME YÔ

Ityav mbi nôngon mbia ngee kpishi.—Mateu 24:7; Mpase 6:4

Ijen ia gba.—Mateu 24:7; Mpase 6:5, 6, 8

Ubombauangev.—Luka 21:11; Mpase 6:8

Mvende u vendan atindi una seer a seer.—Mateu 24:12

Ityartenger.—Mateu 24:7

Ashighe a ican.—2 Timoteu 3:1

Inyaregh kia doo ior ishima kpishi.—2 Timoteu 3:2

Mbayev mba hemban mbamaren vev ato.—2 Timoteu 3:2

Ior mba lun a dooshima ga.—2 Timoteu 3:3

Iember i iyolough hemba doon ior a Aôndo.—2 Timoteu 3:4

Ior mba kôron ayol a ve tsaha ga.—2 Timoteu 3:3

Kwagh u dedoo doo ior ishima ga.—2 Timoteu 3:3

Ior fa kwaghbo u una va tser tar cii la ga.—Mateu 24:39

Mbanahantar mba vendan ikyav i ayange a masejime ne.—2 Peteru 3:3, 4

Mba pasen kwagh u Tartor u Aôndo sha tar cii.—Mateu 24:14

[Picture Credit Lines on page 4]

Ushoja mba yange ve nôngo ityav mbi tar cii mbi sha môm la: I zua a mi ken takerada u i yer ér The World War—A Pictorial History, inyom i 1919; tsombor u lun ken ican: AP Photo/Aijaz Rahi; polio victim: © WHO/P. Virot