Zenden Sha Jighjigh U Nan, I De Lu Sha Mnenge A Nenge ga!

“Ka sha jighjigh u nan se lu zenden ye, ka sha mnenge a nenge ga.”—2 MBAKORINTE 5:7.

1. Ka nyi i tese ér apostoli Paulu zenden sha jighjigh u nan, lu sha mnenge a nenge ga?

 SAULU ngise tôvon Mbakristu a ican, kpa va hingir Orkristu, i hingir u yilan un ér apostoli Paulu. Er hingir Orkristu anyom kar kuma er 20 nahan kpa, mayange je lumun ér kwagh môm tsô a tule jighjigh u na Aôndo la a hide a mi ijime ga. Shi er lu a vande nengen a akaa a sha ga nahan kpa, lu a jighjigh u nan her dông. Va ngur ngeren Mbakristu mba i shighe ve mkurem, ve lu a ishimaverenkeghen i yemen sha la washika ken inyom i sha 55 yô, á kaa ér: “Ka sha jighjigh u nan se lu zenden ye, ka sha mnenge a nenge ga.”—2 Mbakorinte 5:7.

2, 3. (a) Se tese ser se mba zenden sha jighjigh u nan nena? (b) Inja i u zenden sha mnenge a nenge la ér nyi?

² Gba u se suur sha Aôndo a ishima yase cii ser una fatyô u kôôm se, ka nahan man se zenden sha jighjigh u nan ye. Shi se fa dedoo ser a fa kwagh u a hembe doon sha ci wase yô. (Pasalmi 119:66) Ka se ver ishima sha “akaa a i nengen a mi ga” la zum u ka sea tsua kwagh u se soo u eren shi sea er sha mi yô. (Mbaheberu 11:1) Akaa a se nengen a mi ga la kua ‘Usha mba hev man tar u he’ u Aôndo a tende zwa ér una va a mi la. (2 Peteru 3:13) U zenden sha mnenge a nenge yô, ka u veren ishima yase cii sha akaa a se nengen a mi tseegh la. Doo u se ver ishima sha akaa a se nengen a mi la ga, sha ci u aa na, se de u eren ishima i Aôndo kuaa.—Pasalmi 81:12; Orpasenkwagh 11:9.

³ Sea lu ken “anikumuile u kpeghee,” u í tsough un u yemen sha la, shin sea lu ken “iyôngo igen,” i i lu a ishimaveren i va yan dyako u tar la kpaa, doo u se cii se dondo kwaghwan u i we se ér se zenden sha jighjigh u nan, i de lu sha mnenge a nenge ga la. (Luka 12:32; Yohane 10:16) Nahan se time nen sha kwaghwan ne se nenge er una kura se sha ‘mdoom ma isholibo ma sha anyangem kpeghee,’ man sha u zendan uyôughyôughmbaakaav ityô kpaa yô. Shi se nenge er una wase se se hunde ishima sha kwagh u mkur u tar ne ga yô. Shi se hen kwagh sha akaabo a aa tser se aluer se mba zenden sha mnenge a nenge tseegh yô.—Mbaheberu 11:25.

Vendá “Mdoom ma Isholibo ma Ma Lu sha Anyangem Kpeghee” La

4. Ka kwagh u nyi Mose tsua ér una eree, man lu sha ci u nyi?

⁴ Mose, wan u Amram yange vese hen tsombor u tor, ken tar u Igipiti u sha ashighe a tsuaa la. Nenge ase er yange ma kpe Mose iyol sha wono. Yange una soo yô, ma lu or u ageegh shi ma lu shagbaor shi ma za iti kpaa. Nahan ma hen ér: ‘M ngu a mfe u Mbaigipiti kpishi, shi m hingir or u ageegh ken akaaôron a am kua sha aeren kpaa. Aluer m saa a tsombor u tor ne yô, me lu a tahav, nahan me due a anmgbianev av Mbaheberu ken kpan kera!’ (Aerenakaa 7:22) Nahan kpa, Mose er nahan ga, gema soo ér “i̱ er a na dang a nongoior u Aôndo imôngo.” Sha ci u nyi? Er nan ve Mose venda hanma kwagh u tar u Igipiti ma na un ciilii? Bibilo kaa ér: “Ka sha jighjigh u nan man [Mose] undu Igipiti ye, iyugh i tor kpaa, a kera cia ga, gadia a taver ishima er ngu nengen a u i nengen a Na ga la nahan.” (Mbaheberu 11:24–27) Mose na Yehova jighjigh ér mayange je una ta or u nan civir un sha mimi kera ga, nahan vangertiôr ne wase un u palegh isholibo man akaa a nan un msaanyol sha anshighe kpuaa la.

5. Ikyav i Mose la taver se ishima nena?

 ⁵ Se kpa ashighe kpishi ka i taver se u tsuan akaa a se er yô. Ka se pine ayol a ase ser: ‘M de u eren akaa shin aeren agen a Bibilo i vende laa? M er tom u ua nam inyaregh kpishi, kpa ua gema a yangem u vesen ken jijingii?’ Doo u se dondo ikyav i dedoo i Mose la, nahan se tsua u eren kwagh u a tese ér se mba nengen kwagh ikyum ikyum er tar u nengen nahan la ga, kpa se na Yehova Aôndo jighjigh, un u i “nengen a Na ga,” u a tsenge fan akaa a ken hemen la. Mayange je, akaa a tar ne ua na se la a de doon se ishima je hemban ikyar i se ye vea Yehova ga, di vough er Mose kpa er nahan.

6, 7. (a) Isou yange tese ér hemba doon un u zenden sha mnenge a nenge nena? (b) Ieren i Isou la ngi se icintan nena?

⁶ Mose lu inja kposo a Isou, wan u tertamen Isaka. Isou lu or u soon u pirin isharen na ave ave. (Genese 25:30–34) Isou yange laha dyako na u waniunda la nahan tee tamen na sha ‘ankwaghyan ityô i môm tseegh.’ (Mbaheberu 12:16) Mayange je, hen er una tee dyako na u waniunda la ve kwagh la una bende a ikyaryan na vea Yehova ga, shi hen er ieren na la ia va tsombor na a iti i bo kpaa ga. Isou henen kwagh sha gbenda u ken jijingi ga. Kwagh tsô gba un sha uityendezwa mba dedoo mba Aôndo er la ga. Nahan, zenden sha mnenge a nenge, lu sha jighjigh ga.

⁷ Ieren i Isou la hingir icintan hen a vese nyian. (1 Mbakorinte 10:11) Nahan, zum u se soo u tsuan kwagh u vesen shin u kiriki u se er yô, mayange je se de ser konjo u tar u Satan u gbidi ér se pir isharen yase ave ave la a tsume a vese ga. Nahan, doo u se pine ayol a ase ser: ‘M henen kwagh ihyen i Isou nahanaa? Aluer m ngu eren sha akaa a a sarem u eren hegen nahan, m ngu tesen mer akaa a ken jijingi ngam kwagh u vesen kpa? Akaa a m tsough u eren la nga vihin ikyaryan yam vea Aôndo kua injar i me va zua a mi ken hemen laa? Ka ikyav i nyi m lu veren mbageneve?’ Aluer akaa a se we ishima ser se er la tese ér akaa a injaa a ken jijingi gba se ishima yô, Yehova una ver se doo doo.—Anzaakaa 10:22.

Palegh Imeen i Uyôughyôughmbaakaav

8. Ka icintan i nyi yange i ta Mbakristu mba ken Laodishia, man icintan shon ngi a inja hen vese nena?

⁸ Ken mkur u derianyom u hiihii la, i tese apostoli Yohane mpase u sha mnenge. Ken mpase la Yesu Kristu u a lu sha ian i vesen sha la na tiônnongo u ken gar u Laodishia, ken Ashia u Kiriki la loho. Loho shon lu u tan ve icin sha kwagh u uyôughyôughmbaakaav. Mbakristu mba ken Laodishia yange ve lu a kwagh ave kpishi, kpa ve gema ve kungu ican ken jijingi. Yange ve de uyôughyôughmbaakaav yange ve u henen sha akaa a ken jijingi, nahan ve de u zenden sha jighjigh u nan. (Mpase 3:14–18) Nyian kpa, uyôughyôughmbaakaav vea fatyô u yangen se u veren ishima sha akaa a ken jijingi. Vea na jighjigh wase una vôr, shi se de “gesa” u ayem a uma u se lu gban “sha ishima i taver tsung” ne. (Mbaheberu 12:1) Aluer se ver ishima ga yô, “ugurgurmbaakaav mba uma” vea kar vea tôô ian i ityom yase i ken jijingi la, nahan vea “imbishi” í kuaa.—Luka 8:14.

9. Kwaghyan u ken jijingi u se zough a mi mgbeghaa man iwuese i se lu a mi sha mi la ngi kor se nena?

⁹ Kwagh u se er ve una kura se ken jijingi yô ka  u lun ior mba kwagh a kom se yô, shi se lumun ser kwagh môm a zua se a tar ne ga, shi se hanger ser se lu yôughyôugh keng ga. (1 Mbakorinte 7:31; 1 Timoteu 6:6–8) Aluer se de u zenden sha mnenge a nenge, se mba zenden sha jighjigh u nan yô, se zua a msaanyol ken paradiso u ken jijingi u se lu ker hegen ne kpen kpen. Er se ye kwaghyan u dedoo u ken jijingi nahan, ishima mgbegha se u wan ‘icam sha ci u iember i ken ishima’ ga he? (Yesaia 65:13, 14) Shi ka i doo se u kumban imôngo a mba ve um ityamegh ki jijingi u Aôndo la. (Mbagalatia 5:22, 23) Aluer se mba yan kwaghyan u ken jijingi u Yehova a ne la hanma shighe yô, se zua a mkom shi a yôhôr se iyol kpishi!

10. Ka mbampin mba nyi i gbe u se pine ayol ase?

¹⁰ Mbampin mbá mba i gbe u hanma wase nana pine iyol i nan yô, ka mbampin mba shon je ne: ‘Uyôughyôughmbaakaav mbam a inja nan je? M eren iyua sha akaa a m lu a mi la sha u suen mcivir u mimi shin m kur mbamgbe av tseeghele? Kanyi i nem mkom u hemban ciilii? Ka Bibilo i henen shi zan mbamkombo Mbakristu shinii? Shin ka u undun ityom yam i ken Kristu sha mbee u sati yemen akaa am a erene? M hembe eren ugurgurmbaakaav sha iyange i sati shin ka m due kwaghpasen shi m er ityom igen sha u suen mcivir u mimi?’ Aluer se mba zenden sha jighjigh u nan yô, se duen kwaghpasen kpoghuloo, shi se suur sha uityendezwa mba Yehova a er la kpaa.—1 Mbakorinte 15:58.

Fa Wer Mkur Mgbôghom

11. Aluer se mba zenden sha jighjigh yô, kwagh ne una wase se se fa ser mkurtar mgbôghom nena?

¹¹ Mbagenev ka ve hen ér mkurtar ngu a kuma ga, shin ngu van ga kuaa. Nahan kpa, aluer se mba zenden sha jighjigh u nan yô, se hen nahan ga. Mbanyimanakaa ka ve puu akaaôron a profeti a Bibilo i er la, kpa se yô, se fa ser akaa a a lu eren shin tar ne nga kuren kwagh u Mkaanem ma Aôndo ma tsenge ôron yô. (2 Peteru 3:3, 4) U tesen ikyav yô, aeren a ior kpishi nyian tese ér se mba ken “ashighe a ican” ga he? (2 Timoteu 3:1–5) Aluer se nenge akaa a a lu eren hegen ne sha ashe a jighjigh u nan yô, se kure ikyaa ser ka akaa a a vande eren kera tsô a lu kimbir u eren ga. Kpa akaa ne tese ‘ikyav i mve u Kristu la man i mkurtar.’—Mateu 24:1–14.

12. Mkaanem ma i er ken Luka 21:20, 21 la ma kure ken derianyom u hiihii la nena?

¹² Time sha kwagh u yange er sha derianyom u hiihii, shi a lu zan hemen sha ayange ase ne yô. Yesu yange kaa a mbadondon un shighe u lu shin tar la ér: “Zum u né nenge akumautya aa kase Yerusalem á wa atô yô, fa nen je ner, mtim na kuma ve. Hen zum la mba ve lu ken Yudia, ve̱ yevese ve̱ yem sha iwo; mba ve lu ken atô u gar yô, ve̱ due ken won.” (Luka 21:20, 21) Kwaghôron ne yange kure sha mi vough zum u Cestius Gallus hemen akumautya a Mbaromanu va kase Yerusalem wa atô ken inyom i 66 la. Kpa mbautyaav mbara kar ishima hide yem, kwagh ne lu ikyav i tesen Mbakristu mba ve lu ken gar  la ér gbenda bugh u vea ‘yevese vea yem sha iwo’ yô. Ka ker ken inyom i sha 70 la yô, akumautya a Mbaromanu cin hide, va ta num sha Yerusalem, ve tim un kua tempel na cii. Josephus kaa ér yange i wua Mbayuda hemba miliôn môm, i gema i kôr iorov 97,000 i yem a ve uikyangen. Kwagh ne lu ijir je Aôndo ôr tar u Yuda ye. Ior mba yange ve zende sha jighjigh u nan, ve wa icintan i Yesu ikyo yô, ve war mtim la.

13, 14. (a) Kanyi nahan i shi ica ga tsô ia eree? (b) Er nan ve i gbe u se wa agoyol er se nenge akaaôron a profeti a i er ken Bibilo la a lu kuren yôô?

¹³ Kera shi ica ga tsô, kwagh u yange er sha derianyom u hiihii la una er nyian kpaa. Alegh a Mzough u Ityar Cii agen aa wa uwegh sha mtim u Aôndo una va a mi la. Sha derianyom u hiihii la, i ver akum a uitya a Mbaromanu ér a nengen ér bem ngu ken tar u Mbaromanu, i yilan bem shon ér Pax Romana (Bem u Mbaromanu). Nyian di kpa i ver Mzough u Ityar Cii ér a̱ va a bem. Er akumautya a Mbaromanu a sha derianyom u hiihii la pande sôr tar u hen shighe la nahan kpa, lu ve tsô shi ve hide ve tim Yerusalem ye. Nyian kpa, kwaghôron u profeti u Bibilo i er la tese ér ugomoti mbaageev mba ken Mzough u Ityar Cii vea nenge ér kwaghaôndo ngu uwegh sha mbamzeyol mba tar ne, nahan vea tim kwaghaôndo u a til sha ityough ki Yerusalem u hegen ne, ka Mbakristu Mbaaiev je la, shi vea tim Zegebabilon kpaa. (Mpase 17:12–17) Nahan, shi kpuaa tsô a tim tartor u ukwaghaôndo mbaaiev sha tar cii kera.

¹⁴ Kwagh u una tese ér zegecan la hii yô, ka mtim u a hii timin kwaghaôndo u aiegh la. Shighe u zegecan la una zaan u kuusu yô, a mase timin aferaior agen a botar ne. (Mateu 24:29, 30; Mpase 16:14, 16) Aluer se mba zenden sha jighjigh u nan yô, kwagh ne una wase se se wa agoyol er se nenge akaaôron a profeti a i er ken Bibilo a lu kuren yô. Mayange je, se hen ser ka sha ikyev i Mzough u Ityar Cii, u uumace ve ver la Aôndo una va a bem man mkpeyol ga. Nahan, doo u se eren aeren a a tese ér mimi je se fa ser “Iyange i vesen i TER mgbôghom” ga he?—Sefania 1:14.

Ka Kwaghbo u Zenden sha Mnenge a Nenge Nena?

15. Ikyurior i Iserael yange i fa ér Aôndo ngu veren i̱ doo doo, nahan kpa, i̱ gba ken imeen i nyi?

¹⁵ Akaa a yange er Mbaiserael mba sha ayange a tsuaa la tese mbamzeyol mba se zua a mi aluer se de u zenden sha jighjigh u nan, se mba zenden sha mnenge a nenge yô. Mbaiserael yange ve nenge atsan a pue a Aôndo hee mbaaôndo mbaaiev mba Mbaigipiti a mi la, shi ve nenge myom u kpilighyol u i yima ve shin Zegemnger u Nyian la kpaa. Er ve nenge akaa ne nahan cii kpa, ve hemba ato ve er wanbua sha zenaria ve civir. Asema yange yina ve, gadia ve ‘nenge ér Mose tsa sha uwo, hungwa fele ga yum.’ (Ekesodu 32:1–4) Ka ishimayinan yange i na ve ve hingir u civir eev mbu ve nenge a mi la ye. Er ve hemba veren ishima sha akaa a ve nengen a mi la yô, ishima vihi Yehova a ve, nahan a tim iorov “dubu utar.” (Ekesodu 32:25–29) Nyian kpa, aluer or u civir Yehova soo u eren kwagh man nan er kwagh u a tese ér nan suur sha Yehova ga, shin nan ngu a vangertiôr ér Aôndo una fatyô u kuren uityendezwa nav ga yô, a vihi kpen kpen!

16. Mbaiserael yange ve hemba soon u veren ishima sha akaa a ve nengen a mi la, nahan kwagh ne bende a ve nena?

¹⁶ Mbaiserael yange ve hemba soon u veren ishima sha akaa a ve nengen a mi la, nahan kwagh ne bende a ve sha igbenda kposo kposo.  Ishima i ve hemba veren sha akaa a ve nengen a mi la na yô, ve nyôr cian mbaihyomov vev. (Numeri 13:28, 32; Duteronomi 1:28) Shi ve laha Mose, u Aôndo wa un tahav sha ikyev la, shi ve vever un ér ve mba yan ican. Er ve ban a jighjigh u nan yô, kwagh tsô gba ve a Tar u Ityendezwa la ga, kpa ve hemba soon tar u Igipiti u ujijingi mba bov hemen ú la. (Numeri 14:1–4; Pasalmi 106:24) Er ve venda u nan Yehova u lu Tor ve u i nengen a na ga la icivir yô, ishima i vihi un a ve kpen kpen!

17. Kanyi yange i na ve Mbaiserael venda akaawan a dedoo a Yehova waan ve sha ayange a Samuel laa?

¹⁷ Sha ayange a profeti Samuel la kpa, ikyurior i Iserael i Aôndo lumun i̱ la gba ken imeen i zenden sha akaa a ve nengen a mi la. Yange ve sôn ér i na ve tor u vea nengen a nan yô. Er Yehova tese ve ér ka un iyol na un lu tor ve nahan kpa kuma ve ga, sha ci u ve soo u zenden sha jighjigh u nan ga. (1 Samuel 8:4–9) Yange ve er kwagh vihi yô, ve venda akaawan a dedoo a Yehova waan ve la, ve hemba soon u biishi a akuraior a a wa ndor a ve la.—1 Samuel 8:19, 20.

18. Ka ityesen i nyi ia wase se u fan kwaghbo u a lu sha u zenden sha mnenge a nenge laa?

¹⁸ Ikyar i se mbacivir Yehova nyian se ye vea na la doo se kpen kpen. Sar se u zuan a ityesen injaa sha akaa a ngise er mbagenev la, shi eren sha mi kpaa. (Mbaromanu 15:4) Zum u Mbaiserael lu zenden sha mnenge a nenge la, ve kera umbur ér ka Aôndo a tindi Mose ér a hemen ve ga. Se kpa aluer se wa ikyo ga yô, se hen ser Yehova Aôndo man Mose u Hemban la, ka Yesu Kristu je la, mba hemen tiônnongo u Kristu nyian ga. (Mpase 1:12–16) Nahan, doo u se wa ikyo tsung sha er se nengen nongo u Yehova ú shin tar la sha mnenge u orumace ga yô. Aluer se er nahan ga yô, se hingir u lamen sha ior mba Yehova a tsough ve la, shi se hingir u lahan kwaghyan u ken jijingi u “wanakiriki u jighjigh man u fan kwagh” a ne se la kpaa.—Mateu 24:45.

Kange Ishima u Zenden sha Jighjigh u Nan

19, 20. U wa ishima wer u za hemen u eren nyi, man ka sha ci u nyi?

¹⁹ Bibilo kaa ér: “Kera ka awambe man inyam se lu nôngon ityav a ve ga, kpa ka mbatarev man mbautahav man mba ve lu utor sha tar cii mba ime ngin ne, man ujijingi mba aferev mba sha ajiir a Sha.” (Mbaefese 6:12) Satan Diabolo ka orihyom wase u vesen. A soo wener una vihi jighjigh u se ne Yehova la. Nahan nyityô kwagh i a fetyô u eren sha u una yange se u civir Yehova cii una er. (1 Peteru 5:8) Kanyi se er ve se lumun ser mdoom ma tar u Satan ne ma kôr se ga? Se de u zenden sha mnenge wase u ashee, se zenden sha jighjigh u nan! Shi aluer se suur sha uityendezwa mba Yehova a er la yô, kwagh ne kpaa una wase se, nahan ‘tso a ur se sha kwagh u jighjigh wase u nan la ga.’ (1 Timoteu 1:19) Nahan se taver nen ishima, se za nen hemen u zenden sha jighjigh u nan, shi se lu nen a vangertiôr sha averen a Yehova a tende zwa ér una va se a mi la kpaa. Shi se eren msen sha er se fatyô u waren akaa á ica a gba ga tsô aa er la kpaa.—Luka 21:36.

²⁰ Kristu ver se ikyav i dedoo i se dondo ve se de u zenden sha mnenge a nenge, se zenden sha jighjigh u nan yô. Bibilo kaa ér: “Kristu kpaa ya ican sha ci wen, A ver ne ikav je sha u né dondo Un ijime yô.” (1 Peteru 2:21) Kwaghngeren u a dondo ne una wase se u fan kwagh u se er ve se za hemen u zenden er Kristu kpa zenden nahan la.

Baver We Kpa?

• Mose yange zende sha jighjigh u nan, Isou di gema zende sha mnenge a nenge, nahan ú hen nyi sha kwagh ve?

• Ka kwagh u vesen u nyi una wase se ve se de u zendan uyôughyôughmbaakaava?

• Aluer se mba zenden sha jighjigh u nan yô, kwagh ne una wase se se de u henen ser mkur ngu ica ga nena?

• Er nan ve u zenden sha mnenge a nenge la i lu kwaghbo?

[Study Questions]

[Picture on page 8]

Mose zenden sha jighjigh u nan

[Picture on page 9]

Anumbe a eren nga vihin we shighe u eren akaa a ken jijingii?

[Picture on page 11]

Aluer ú ngu eren sha Mkaanem ma Aôndo yô, ma a kura ú nena?