Ú Suur Sha Aôndo A Ishima I Môm Kpa?
Ú Suur Sha Aôndo A Ishima I Môm Kpa?
“Kpa vande keren nen tartor Na”—MATEU 6:33.
1, 2. Kanyi kwagh gumor ugen yange er sha kwagh u tomo, man er kwagh ne sha ci u nyi?
GUMOR ugen soo ér ma un seer lun a iwasen ken tiônnongo na. Kpa mzeyol u gema lu a mi yô, tom na yangen un u zan mbamkombo hanma shighe. Yange sôr mzeyol ne nena? A pande akaa a a wa ave kpishi la, shi a de tom na la kpaa. Shighe karen yô, a zua a tom ugen u u kera yangen un u eren akaa ken tiônnongo u Kristu ga yô. Mba kera kimbin un inyaregh kpishi er ngise nahan ga, kpa nengen sha tsombor na her shi hemba ngun a ian i eren akaa ken tiônnongo kpaa.
2 U fa er i hii ve gumor ne yange er kwagh nahan kpa? Luun er ka we nahan, ma u er kwagh er gumor ne nahan kpa? Mbakristu kpishi er kwagh er gumor ne nahan, man ieren ve la i kuma iwuese, shi i tese vangertiôr ve ken ityendezwa i Yesu a er wener: “Vande keren nen tartor Na man perapera Na, man akaa ne cii á seer ne a ye” la. (Mateu 6:33) Ve suur sha Yehova ér a kura ve, kwagh gba ve u suur sha tar ne ga.—Anzaakaa 3:23, 26.
3. Hii nan ve alaghga mbagenev vea hen ér ka a inja u vanden keren Tartor u Aôndo nyian ga?
3 Ashighe a se lu ker ne taver kpishi, nahan mbagenev vea hen ér gumor ne yange tsua kwagh u sha mi ga. Uumace kpishi nyian mba yan ican kpoghuloo, kpa mbagenev mba yan tar. Mba ve lu ken ityar i i lu a kwagh ave ga yô, hanma ian i ka ia due cii ve ngohol i ave ahar sha er vea nôngo uma ve a wa lun guda yô. Kpa mba ve lu ken ityar i i lu yôughyôugh yô, ka ve nôngon ér ma ve kor inyaregh ki ve lu a mi la shighe u inyaregh ki yen kpishi, ityom i eren kpa i ban, shi mbavesen mba sha tom kpa ve ver ishima ér mbatomov vev ve seer shighe u ve eren tom la yô. Er i taver kpishi u keren kwaghyan yô, mbagenev vea pine ér, ‘Shi ka a inja u vanden keren Tartor je kpa’? Se fa ior mba Yesu yange lu lamen a ve la tsô se zua a mlumun sha mpin ne.
‘Asema a̱ De Nyian Ne Ga’
4, 5. Yesu yange tese ér doo u ishima ia nyian ior mba Aôndo sha mbamgbe vev mba ayange ayange ga nena?
4 Yesu yange lu ken Galilia lu lamen a ikpelaior i i due sha ajiir kposo kposo yô. (Mateu 4:25) Mbanyarev yange vea lu her kpa, vea vese ga. A shi nan kpa mbaatsanev hemba iyenge. Nahan kpa, Yesu wa ve kwagh ér kwagh a de hembe gban ve u keren yôughyôugh ga, kpa ve hemba veren ishima sha u koson akaa a ken jijingi a a hembe lun a inja cii la sha ci ve sha. (Mateu 6:19–21, 24) A kaa a ve ér: “Asema a̱ de nyian ne sha ci u uma wen, sha kwagh u né ya man sha kwagh u né ma, shin sha ci u iyol yen, sha kwagh u né zer la, ga. Uma hemba kwaghyan gaa, man iyol kpaa i hemba akondo gaa?”—Mateu 6:25.
5 Alaghga kwagh u Yesu ôr la yange una lu ior kpishi mba ve lu ungwan a na la ibumekwagh. Gadia ve fa ér aluer ve er tom taveraa ga yô, icombor ve ia ya ican. Kpa Yesu umbur ve kwagh u inyon. Hanma iyange yô, inyon ka i ker a ker kwaghyan man ijiir i tsan, nahan kpa Yehova koson i. Shi Yesu ôr ve er Yehova a nengen sha uimondon mba ken toho, man er ve doo ashe ve hembe Solomon a iengem na cii yô. Aluer Yehova nengen sha inyon man uimondon yô, hile se ve una nenge sha a vese ga yee? (Mateu 6:26–30) Er Yesu kaa nahan, uuma asev hemba kwaghyan u se ye ser se lu uma la man akondo a se zeren sha u cirin ayol a ase la. Aluer se ver ishima yase cii u keren kwaghyan man ikyondo i zeren, kwagh kera gba se u civir Yehova ga yô, awashima wase u lun uma cii una lu gbilin kwagh.—Orpasenkwagh 12:13.
Mnenge u Vough
6. (a) Ka ityom i nyi i gbe u Mbakristu vea erene? (b) Mbakristu mba suur a ishima ve cii sha ana?
6 U ngu wer Yesu lu kaan a mba ve lu ungwan a na mbara ér ve de tom u eren, ve gba teman tsô, Aôndo a koson icombor ve ga. Inyon je kpa ka i gba u ia ker kwaghyan sha ci ve man ônov vev. Nahan lu u Mbakristu kpa vea er tom ve vea zua a kwaghyan ye. Shi lu u vea er ityom ve i hen tsombor kpaa. Mbakristu mba yange i tôô ve tom kua mba ve shiren mbagenev cii lu u vea eren mbavesen vev tom a ishima i môm. (2 Mbatesalonika 3:10–12; 1 Timoteu 5:8; 1 Peteru 2:18) Apostoli Paulu kpa yange eren tenti sha u suen iyol na. (Aerenakaa 18:1–4; 1 Mbatesalonika 2:9) Nahan kpa, Mbakristu mban ver ishima ve cii sha ityom i ve eren la ga, ve suur sha Yehova. Sha nahan yô, ve lu a bemshima u mbagenev lu a mi ga yô. Orpasalmi kaa ér: “Ve mba ve suur sha TER yô, mba er uwo u Shion nahan, u u tenger ga, u gbe lun gbem sha won yô.”—Pasalmi 125:1.
7. Or u nan suur sha Yehova taveraa ga yô, ka mnenge u nyi nana lu a mi?
7 Or u nan suur sha Yehova taveraa ga yô, mnenge u nan una kaha kposo. Ior kpishi nenge ér inyaregh ka kwagh u vesen u van a mkpeyol. Nahan mbamaren kpishi wa mbayev vev kwagh ér ve za imakeranta i vesen er ve lu iyev la, sha er vea zua a ityom i a kimbin ve inyaregh kpishi yô. Kpa kwagh ka a er i vihi yô, icombor i i lu Mbakristu kpishi mase kaven ér u wan mbayev ken makeranta nahan la ka kwaghbo, gadia mbayev vev mbara ka vea zaan makeranta yô, kwagh a kera gba ve sha akaa a ken jijingi ga, ve hemba veren ishima sha u eren akaa a vea zua a inyaregh kpishi ken hemen yô.
8. Mbakristu mba eren kwagh akuma akuma nena?
8 Mbakristu mba ve lu tsev tsev yô ka ve nôngo u eren kwagh akuma akuma, gadia ve kav ér kwaghwan u Yesu la ngu a inja sha ayange ase ne vough er sha derianyom u hiihii la nahan. Aluer gba u vea er tom ahwa imôngo sha u kuren ityom i i we ve ken Ruamabera la kpa, mba den ér isharen i zuan a inyaregh la i yange ve u hemban veren ishima sha akaa a ken jijingi a a hembe lun a inja la ga.—Orpasenkwagh 7:12.
Mayange Je ‘Asema A̱ De Nyian Ne Ga’
9. Yesu yange taver mba ve suur sha Aôndo a ishima i môm la asema nena?
9 Zum u Yesu lu tesen ior kwagh sha Uwo la, a kaa a ve ér: “Asema a̱ de nyian ne, kaan nen ner: Sé ya nyi? Shin: Sé ma nyi? Shin: Sé zer nyi? ga. Gadia akaa ne cii atôatyev nga keren a, kpa Ter wen u Sha fa er kwagh a gbe ne sha akaa ne cii yô.” (Mateu 6:31, 32) Mkaanem man ka ma taver ishima kpen kpen! Aluer se mba suur sha Yehova a ishima i môm yô, una wasen se hanma shighe cii. Shi mkaanem ma Yesu man ka ma kôron ken ishima kpaa. Ma umbur se ér aluer se mba keren uyôughyôughmbaakaav “kpoghuloo” yô, mhen wase ngu er u “akuraior” nahan, ka mba ve lu Mbakristu mba mimi ga je la.
10. Wanyekwaor ugen yange va ér Yesu a wa un kwagh, nahan Yesu pase kwagh u hemba doon un ishima la nena?
10 Sha shighe ugen la wanyekwaor ugen u lun a inyaregh kpishi va pine Yesu kwagh u una er ve una zua a uma u tsôron yô. Yesu umbur un kwagh u Tindi a kaa yô, gadia sha shighe la ve lu sha ikyev i tindi her. Nahan wanyekwaor la kaa a Yesu ér: “Angan cii, m kura a, shi ka nyi i shimi?” Yesu na un mlumun u alaghga una lan ior kpishi ishima yô. A kaa ér: “A lu u ka lun vough yô, za za tôô akaa a u lu a mi, tee, na mbaatsanev, tsô ú lu a kwagh u injaa Sha; yô, hide va dondo sha a Mo.” (Mateu 19:16–21) Wanyekwaor la maa yem a ishima i vihin, sha ci u soo ér inyaregh nagh ki saa ga. Yehova yange una doo un ishima nan nan kpa, inyaregh nagh hemba doon un ishima.
11, 12. (a) Ka mkaanem ma kpilighyol ma nyi Yesu yange ôr sha kwagh u inyara? (b) Inyaregh kia yange or u civir Yehova nena?
11 Kwagh la na yô Yesu ôr kwagh ugen u kpilighyol kpishi yô, a kaa ér: “Ka ican u ornyar a̱ nyôr sha tartor u Sha. . . . Guda u rakumi á kar ken ihura i anura, a u ornyar nana nyôr sha tartor u Sha.” (Mateu 19:23, 24) Yesu lu kaan ér mbanyarev vea nyôr Tartor ga shinii? Ei, gadia a za hemen ér: “Kpa Aôndo yô, fa akaa cii ityô.” (Mateu 19:25, 26) Sha kpôô yô, Yehova yange wase mbanyarev mbagenev sha ayange a tsuaa la ve hingir Mbakristu mba i shigh ve mkurem yô. (1 Timoteu 6:17) Nahan, Yesu yange ôr mkaanem ma kpilighyol mara sha ityôkyaa. Lu sha u tan ior icin.
12 Aluer inyaregh doo or ishima tsung er wanyekwaor u lun a inyaregh kpishi la nahan yô, kia yange nan u civir Yehova a ishima i nan cii. Kwagh ne una fatyô u eren mba ve vande lun a inyaregh kera man mba i “sar ve pe lun mbanyarev” la kpaa. (1 Timoteu 6:9, 10) Aluer or suur sha uyôughyôughmbaakaav kpishi yô, nana kera kav er nan ‘lu ibanave ken jijingi’ ga. (Mateu 5:3) Nahan nana hen ér ka a inja u keren iwasen hen Yehova ga. (Duteronomi 6:10–12) Nana ver ishima ér ma i naan nan icivir ken tiônnongo. (Yakobu 2:1–4) Shi nana hemba veren ishima sha taryan, kwagh a gba nan u civir Yehova ga.
Lu a Mnenge u Vough
13. Ka mnenge u kpeegh u nyi Mbakristu mba ken Laodishia lu a mini?
13 Nongo ugen u yange u lu a mnenge u kpeegh sha kwagh u uyôughyôughmbaakaav yô, lu mba ken tiônnongo u ken Laodishia u sha derianyom u hiihii la. Yesu ôr kwagh ve ér: “U ngu kaan wer, m ngee a akaa, m hingir u lun a kwagh ave kpishi, ma kwagh kera banem ga, kpa u kera fa er u gbe kera, u lu mhôônom mhôônom, u kungu ican, u pir ashe, u lu idyelegh kpaa ga.” Lu inyaregh ki mba ken Laodishia lu a mi la ki na ve ve lu mhôônom mhôônom ga. Ityôkyaa yô, ve de u suur sha Yehova ve gema ve lu suur sha inyar. Sha nahan yô, ve sagh a sagh ken jijingi, nahan Yesu wa iyol u ‘haan ve ken zwa Na kera.’—Mpase 3:14–17.
14. Paulu yange wuese Mbakristu mba ve lu Mbaheberu mbara sha ci u nyi?
14 Kpa Paulu gema wuese Mbakristu mba ve lu Mbaheberu mbara sha ieren ve zum u i lu tôvon ve a ican la. A kaa ér: “Mbakwarev kpaa, mhôônom kôr ne a ve; zum u i ya ne ishar kpaa, vihi ne ga ne lu saan saan je gadia ne ayol a en kpaa ne fa er ne lu a kwagh u hembandoon man u lun gbem yô.” (Mbaheberu 10:34) Yange ikyav saa Mbakristu mbara kpa ishima vihi ve ga. Saan ve iyol her gadia ve fa ér mba a “kwagh u hembandoon man u lun gbem.” Yange ve kange ishima ér vea pase ave sha ishimaveren i Tartor la ga, di er or u teen kasua u ken injakwagh i Yesu la kpa yange za zua a tagbede môm u lun ishe kpishi ve tee akaa a a lu a mi cii za yam un nahan. (Mateu 13:45, 46) Ieren la ka i dedoo kpen kpen!
15. Kwase Kristu ugen ken tar u Liberia yange ver akaa a Tartor hiihii nena?
15 Nyian kpa ior kpishi mba a imba ieren i dedoo ne. U tesen ikyav yô, yange i na gumkwase Kristu ugen ken tar u Liberia ian i zan yunivasiti. Ior mba ken tar ka ve nenge imba ian la ér ka gbenda u zuan a mkpeyol ken hemen. Nahan kpa gumkwase ne lu pania, orivangeli u pasen kwagh hanma shighe, shi i sember lôhôn un ér a za er tom u ikpur pania sha anyangem kpuaa. Gumkwase ne tsua u vanden keren Tartor nahan a de tom na u pasen kwagh hanma shighe la ga. A yem hen ijiir i i tindi un ér a za er tom u ikpur pania la, pase kwagh ken atô u iwer itiar tseegh maa a hii u henen Bibilo a iorov 21. Anmgbian u kwase ne man mbagenev udubu imôngo gbihi igbenda i zuan a inyaregh la sha er vea vande keren Tartor yô. Ve er nan ve ve lu a imba mnenge u vough ne ken tar u kwagh a hembe gban ior u keren inyaregh nee? Ka sha ci u mba a aeren a dedoo kpishi. De se time sha aeren shon agen.
16, 17. (a) Hii nan ve i gbe u saa se hide a iyol ijime ve se na Yehova jighjigh? (b) Hii nan ve i doo u se suur sha uityendezwa mba Aôndo?
16 Iyol i hiden a mi ijime: Bibilo kaa ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you. De nengen iyol you wer, u ngu orfankwagh ga.” (Anzaakaa 3:5–7) Ashighe agen or nana tsua u eren kwagh sha mnenge u ior mba ken tar. (Yeremia 17:9) Nahan kpa Orkristu u mimi yô, ka nan suur sha Yehova ér a tese nan kwagh u nana er yô. (Pasalmi 48:14) Ka nan hide a iyol ijime nan suur sha Yehova ‘sha ijende i nan cii,’ er sha akaa a ken tiônnongo man ken makeranta kua hen ijiir i tom, shin sha akaa a nan eren sha ian i nan i memen la shin sha akaa agen nahan.—Pasalmi 73:24.
17 Suur sha uityendezwa mba Yehova: Paulu kaa ér: “Or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.” (Mbaheberu 11:6) Aluer se mba a akperan ser Yehova una kure uityendezwa nav yô, ‘kwagh a lu hemban zuan se a tar ne.’ (1 Mbakorinte 7:31) Kpa aluer jighjigh wase taver yô, se kange ishima ser se ver akaa a Tartor hiihii. Or a er nan ve jighjigh u nan una taveraa? Ka sha u kporom hen Yehova sha u eren msen a ishima i môm hanma shighe shi henen Bibilo nduuruu kpaa. (Pasalmi 1:1–3; Mbafilipi 4:6, 7; Yakobu 4:8) Se kpa se fatyô u eren msen er Davidi nahan ser: “M suur sha a We, TERE; m kaa mer: Ka We, U lu Aôndo wam ye. Kpash! Mdoom Ou vese je.”—Pasalmi 31:14, 19.
18, 19. (a) Tom u eren kpoghuloo ka u na se hemba suur sha Yehova nena? (b) Hii nan ve i doo u Orkristu a wa iyol u den ér akaa agen a saa nanaa?
18 Civir Yehova a ishima i môm: Paulu wa u suur sha uityendezwa mba Yehova iya i môm a tom u eren kpoghuloo, nahan a nger ér: “Sar se u hanmô wen nana̱ tese imbashima i veren tsung shon la u zan ken mfe u mimi u ishimaverenkeghen yase zan zan mkur je.” (Mbaheberu 6:11) Aluer se mba eren tom u Yehova ngegh yô, una sue se. Hanma kwa u Yehova a sue se yô, se hemba suur sha a na cii, shi se ‘tile dông, se kpoghor ga.’ (1 Mbakorinte 15:58) Jighjigh u nan wase una hemba taver shi akpelan aa lu sha kwagh u ishimaverenkeghen yase ga.—Mbaefese 3:16–19.
19 Wa iyol u den akaa agen a saa: Paulu yange undu ityom i ma va un a inyaregh kpishi yô gema dondo Yesu. Ikyav tese wang ér yange tsua kwagh u vough, shin er ashighe agen yange ican i wa eren un nahan kpaa. (1 Mbakorinte 4:11–13) Yehova tôndo zwa a mbatomov nav ér vea luun ken mkpeyol hanma shighe ga, ashighe agen ka i gba u vea wa ishima a mbamtaver kpishi. Aluer se wa iyol u den ser akaa agen a saa se yô, kwagh la una tese ér mimi je se soo u civir Yehova sha gbashima.—1 Timoteu 6:6–8.
20. Hii nan ve i lu hange hange u or u nan ver akaa a Tartor hiihii nana lu a ishimawana?
20 Ishimawan: Orhenen Yakobu taver Mbakristu asema ér: “Anmgbianev, wa nen ishima zan zan m-ande u Ter.” (Yakobu 5:7) Taver kpishi u lun a ishimawan ken tar u u ior ve eren kwagh ayem ayem ne. Ka se soo ser akaa a eren fele fele. Kpa Paulu taver se ishima ér se hingir mbakaven mba ‘ve ya dyako u uityendezwa sha jighjigh u nan man sha ishima i wan’ la. (Mbaheberu 6:12) Wa ishima keghen Yehova. Sha kpôô yô uma u tsôron ken paradiso shin tar ka kwagh u wan ishima keghen!
21. (a) Ka sea ver akaa a Tartor hiihii yô, se tese ser nyi? (b) Se time sha nyi ken kwaghhenen u a dondo laa?
21 Sha kpôô yô, kwaghwan u Yesu a we se ér se vande keren Tartor la ngu a inja. Aluer se er nahan yô, se tese ser mimi je se suur sha Yehova shi se tsua uma i doo u Mbakristu vea eren yô. Nahan kpa, Yesu shi wa se kwagh ér se “vande keren . . . perapera u [Aôndo.]” Kwaghhenen u a dondon ne una wase se u nengen er kwaghwan ne a lu a inja kpishi nyian yô.
U Fatyô u Pasen Kpa?
• Ka mnenge u vough u nyi Yesu a taver se ishima ér se lu a mi sha kwagh u inyara?
• Se hen nyi sha injakwagh i Yesu ôr sha kwagh u rakumi man ihura i anura laa?
• Ka aeren a Mbakristu a nyi aa wase se u vanden keren Tartor u Aôndo?
[Study Questions]
[Picture on page 23]
Ior kpishi mba yange ve ungwa mkaanem ma Yesu lu mbaatsanev
[Picture on page 25]
Inyaregh hemba doon wanyekwaor u lun a inyaregh la a Aôndo
[Picture on page 25]
Or u teen kasua u ken injakwagh i Yesu la tee akaa a lu a mi cii sha ci u tagbede môm u lun ishe kpishi
[Picture on page 26]
Aluer se mba eren tom u Yehova ngeegh yô, una sue se