Aluer Se Mba Keren Perapera Yô, Una Kura se
Aluer Se Mba Keren Perapera Yô, Una Kura se
“Kpa vande keren nen . . . perapera u [Aôndo.]”—MATEU 6:33.
1, 2. Ka nyi kwagh gumkwase Kristu ugen yange ere, man er nan ve er kwagh nahana?
GUMKWASE Kristu ugen ken tar u Ashia lu akawe ken afishi a gomoti agen. Yange ver ishima sha tom na kpen kpen, yaren tom tsuaa shi eren hwev kpaa ga. Nahan kpa er i tôô un a tôô tom la jighilii ga yô, gba u a kar un a nenge a lu pe una za hemen a ú shin a dugh un sha kpaa. Orvesen u hen ijiirtom la kaa a gumkwase ne ér una tôô un tom shi una ver un sha ian i vesen kpaa, kpa saa gumkwase la una yav a na cii ve una tôô un tom ye. Kwase ti venda a na inyigh i môm, shin er fa er a de un tom nahan kpaa.
2 Kwagh u gumkwase Kristu ne er la ka ibumekwagha? Ei, yange dondo mkaanem ma Yesu ma ma kaa ér: “Kpa vande keren nen . . . perapera u [Aôndo]” la. (Mateu 6:33) Yange hemba doon gumkwase ne u dondon atindiakaa a perapera, a u eren idya ér i tôô un tom la.—1 Mbakorinte 6:18.
Mluainja u Perapera
3. Perapera ka nyi?
3 “Perapera” yô, ka u dondon atindiakaa a sha kwagh u aeren a wang. Ken zwa Grika man zwa Heberu yô, inja i ishember ne tese ér ka u eren kwagh “vough” shin “jighilii.” Kpa u ngu wer ka u or nengen iyol i nan ér nan ngu perapera ga. (Luka 16:15) Kpa ka u or eren kwagh jighilii sha u dondon atindiakaa a Yehova. Ka perapera u Aôndo je la.—Mbaromanu 1:17; 3:21.
4. Hii nan ve i lu a inja kpishi u Orkristu nana dondo ieren i perapera?
4 Hii nan ve perapera a lu a inja kpishi? Ka sha ci u ka i doo Yehova, “Aôndo u perapera” la a ior nav zum u ve er kwagh u perapera yô. (Pasalmi 4:1; Anzaakaa 2:20–22; Habaku 1:13) Hanma or u nan eren perapera ga cii nana fatyô u yan ikyar a na kangenaa ga. (Anzaakaa 15:8) Ka nahan man apostoli Paulu wa Timoteu kwagh ér: “Yevese asaren a sha inja i mbayevikaior la, gema dondo perapera ityô,” kua aeren a injaa agen ye. (2 Timoteu 2:22) Shi ka nahan ve Paulu ter ‘perutya u perapera’ zum u a lu ôron kwagh u ikyav yasev mbi utyaav mbi ken jijingi la ye.—Mbaefese 6:14.
5. Uumace mba ve yen ne vea ker perapera nena?
5 Jighilii yô, orumace môm kpa nan ngu perapera za bee ga. Ior cii ya dyako u myen hen Adam, i mar ve cii a isholibo iyol, nahan mba perapera ga. Nahan kpa, Yesu kaa ér se ker perapera. Kwagh a fatyô u eren nahan je kpa? Kwagh a fatyô u eren nahan sha ci u Yesu na nagh a uma na u vough la sha u paan se, nahan aluer se na nagh kura jighjigh yô, Yehova una de se asorabo ase. (Mateu 20:28; Yohane 3:16; Mbaromanu 5:8, 9, 12, 18) Zum u se hen atindiakaa a perapera a Yehova, se lu nôngon kpoghuloo ser se kura á, shi se lu eren msen ser a wase se se hemba mbamyen asev yô, ka nagh kura kua na ve Yehova una lumun mcivir wase ye. (Pasalmi 1:6; Mbaromanu 7:19–25; Mpase 7:9, 14) Kwagh ne ka kwagh surun ishima kpen kpen!
Lu Nen Mbaeren Perapera ken Tar u Perapera a Ban Yum Ne
6. Hii nan ve tar lu Mbakristu mba tsuaa mbara ijiir i bo?
6 Zum u Yesu tindi mbahenen nav ér ve pase kwagh ‘zan zan ve ar ikighir i tar’ la, ve tagher a mbamtaver kpishi. (Aerenakaa 1:8) Uharegh mba yange gba u vea pase kwagh her cii lu “sha ikyev i Orbo,” Satan. (1 Yohane 5:19) Tar yange u iv a jijingi u bo u Satan lu suen un ken ijime yô, man lu u Mbakristu kpa akaa a bo a jijingi shon a ve a mi la aa bende a ve. (Mbaefese 2:2) Nahan tar lu ve ijiir i bo kpen kpen. Lu sha u keren perapera u Aôndo tseegh vea fatyô u wan ishima shi tilen sha mimi her dông ye. Mbakristu kpishi yange ve wa ishima, kpa mbagenev kaha undu “gbenda u perapera” la.—Anzaakaa 12:28; 2 Timoteu 4:10.
7. Ka akaa a nyi nahan a ne ve i gbe u Mbakristu vea hendan a jijingi u tar nee?
7 Tar ngu Mbakristu guda nyian kpa? Mayange ga cii! Tar hemba vihin nyian a sha derianyom u hiihii la. Heela tseegh ga, i daa Satan sha i gbihi shin tar, nahan ngu nôngon ityav a Mbakristu mba i shigh ve mkurem, mba ve lu “tsombor [u kwase la] u u shi her u kor atindi a Aôndo shi u lu eren shiada sha kwagh u Yesu kpaa” la. (Mpase 12:12, 17) Shi Satan ngu tan num sha hanma or u nan te ikyaa a “vor” la cii. Nahan kpa, Mbakristu vea fatyô u duen shin tar ne kera ga. Mba ior i tar ga, nahan kpa gba u vea lu shin u. (Yohane 17:15, 16) Shi gba u vea pase kwagh shin u, vea ker mbaasemaamimi vea tese ve ve hingir mbahenen mba Kristu. (Mateu 24:14; 28:19, 20) Nahan er i lu u Mbakristu vea fatyô u palegh jijingi u bo u taregh ne elegh elegh ga yô, gba u vea hendan a mi. De se time sha avegher anyiin a jijingi u taregh a i gbe u vea hendan a mi yô.
To u Ijimbagh
8. Hii nan ve Mbaiserael gema hingir u civir mbaaôndo mba Moabi?
8 Mbaiserael yange ve zende ken taaikyôngo anyom 40, mba za zurum pe ve lu zan la yô, mbakpishiv kaha undu gbenda u perapera. Yange ve nenge a ityom kpishi i Yehova er sha u yiman ve yô, shi lu u ica a gba ga tsô vea nyôr ken Tar u Ityendezwa la. Kpa lu sha shighe ne je ve gema ve hingir u civir mbaaôndo mba Moabi ye. Ve er nahan sha ci u nyi? Ve de “isharen i [iyolough]” ya tor ken a ve. (1 Yohane 2:16) Ngeren la kaa ér: “Ior hii u eren idya a ônkasev mba Moabi.”—Numeri 25:1.
9, 10. Ka akaa a nyi a lu zan hemen nyian ve i gbe u hanma shighe se umbur ser asaren a iyolough a bo nga a tahav mbu vihin se?
9 Kwagh u yange er Mbaiserael la tese ér isharen i yolough ia fatyô vihin mba ve lu tsevaa ga yô. Nahan doo u se hen kwagh sha kwagh u er ve la, hemban cii je yô hegen u ior ve nenge ér ijimba i eren ka kwagh u dedoo ne. (1 Mbakorinte 10:6, 8) Ibaver igen ken tar u Amerika kaa ér: “Cii man inyom i 1970 yô, uipaven mba ken tar u Amerika cii nenge ér aluer nomsoor man kwase mba a vôso ayol a ve ga kpa mba tsan imôngo yô, ka kwaghbo. Kpa hegen yô, ieren ne samber wuee. Ken atô u avese a i er ken tar u Amerika cii, nomso man kasev mba ve hii u tsan imôngo cii ve ve er ivese yô hemba iyenge.” Ieren ne man aeren a bo agen nga zan hemen ken tar môm tseegh ga. Aeren ne samber sha tar wuee, man kwagh ka a er i vihi yô, Mbakristu mbagen dondo ieren ne, nahan i dugh ve ken tiônnongo u Kristu sha.—1 Mbakorinte 5:11.
10 Shi ajiir a taver ior ishima ér ve er ijimba kpa samber wuee. Akaa agen a i tesen sha usenema man sha televishen la tese ér agumaior man agumaukase aa lu a vôso ayol a ve ga kpa aa fatyô u yaven ayol a ve. Shi ka i tese ér nomsoor a fatyô u yaven a nomsoor ugen kpa a lu kwaghbo ga. Shi ufoto mba sha televishen mba tesen er ior ve lu yaven ayol a ve kpa mba seer a seer. Shi i ver ufoto mban sha Intanet pe ior vea fatyô u nengen a mi fese yô. U tesen ikyav yô, orgen u ngeren abaver nger ér wan na u lun anyom ataankarahar yange hide makeranta va kaa a na saan saan ér ijende na igen ken makeranta nenge a ufoto mba kasev ve lu idyelegh ve lu yaven a ior yô sha Intanet. Kwagh ne kpiligh ter u wan ne iyol kpen kpen, kpa ka mbayev ume ve nengen a amba a foto ne kpa ve bughun mbamaren vev zwa ga? Heela tseegh ga, ka mbamaren ume ve fe akaa a i tesen ken anumbe a sha vidio a mbayev vev ve eren laa? Amba anumbegh ne kpishi ka a tese ijimbagh i hôngorough man ahir a eren kua tswam kpaa.
11. Tsombor ua kura ayol a ve sha ijimba i eren i i samber sha tar wuee ne nena?
11 Tsombor ua hendan a “ugurgur” mba bov mban nena? Ka sha u vanden keren perapera u Aôndo, shi palegh u nyôron iyol ken nyityô ieren i jimbagh cii. (2 Mbakorinte 6:14; Mbaefese 5:3) Aluer mbamaren ver ishima tsembelee sha akaa a mbayev vev ve eren, shi ve tese ve ér Yehova a doo ve ishima, shi ve kuran atindi na a perapera kpaa yô, kwagh la una na ve agee a hendan a isharen i nengen ufoto mba ijimbagh man usenema mba hôngorough shin eren anumbe a ijimbagh a sha vidio, shi hendan a ameen agen kpaa.—Duteronomi 6:4–9. *
Aeren a Ityôô A Bo
12. Ka mzeyol u nyi yange lu sha derianyom u hiihii laa?
12 Zum u Paulu za ken Lisetera ken Ashia u Kiriki yô, a bee orgen angev sha ivande. Ngeren la kaa ér: “Er ikpelaior nenge kwagh u Paulu er la yô, ve gba genger amo kaan ken zwa u Likaonia er: Mbaaôndo sen va her a vese sha inja i iyolough er ior nahan. Ve yila Barnaba er Seuse man Paulu di er Hereme, gadia ka un lu or u hemen a imo sha kwaghôron ye.” (Aerenakaa 14:11, 12) Kpa ica i gbe ga yô, ikpelaior ne gba sendegh ér ia wua Paulu man Barnaba. (Aerenakaa 14:19) Ikyav tese wang ér ikpelaior la de ior mba hen ityô ve tuur ve ken ijime, ka nahan ve ve er kwagh nahan ye. Ka inja er mbagen ken ve yange ve hingir Mbakristu kpa ve de tsav vev mbu civir la ga nahan. Paulu yange nger washika hen Mbakristu mba ken Kolose ta ve icin sha kwagh u “civir mbatyomov.”—Mbakolose 2:18.
13. Ka aeren agen a nyi i gbe u Mbakristu vea palegha, man ka hana vea zua a tahav mbu hendan a aeren shono?
13 Nyian kpa gba u Mbakristu mba mimi vea palegh aeren a a samber wuee a a har sha atesen a aiegh a ukwaghaôndo shi a zough sha atindiakaa a Mbakristu ga la. U tesen ikyav yô, ken ityar kpishi ior na jighjigh ér or ka nana kpe yô jijingi u nan a war ku, sha nahan yô zum u ka a mar wan shin zum u or ka nana kpe yô, ve er zege iniongo. (Orpasenkwagh 9:5, 10) Aeren a ityôô a ken ityar igen yô, ka i gba kasev iwan shin ityô. * Ieren ne ka i sha tswam shi i tese dooshima u i gbe u mbamaren mba ve lu Mbakristu vea tese ônov vev la ga. (Duteronomi 6:6, 7; Mbaefese 6:4) Mbakristu vea hendan a aeren a ityôô a a kighir ve u eren kwagh u ve we ishima ga la shi vea palegh a nena? Ka sha u suur sha Yehova a ishima ve cii. (Pasalmi 31:6) Mba ve kaan a Aôndo u perapera a ishima ve i môm ér: “U ngu ijiir yam i yeren man iyouutya yam, Aôndo wam u m suur sha a We” cii una na ve agee shi una nenge sha a ve kpaa.—Pasalmi 91:2; Anzaakaa 29:25.
De Hungur Yehova Ga
14. Yehova yange ta Mbaiserael icin ér nyi cii ve ve mase nyôron ken Tar u Ityendezwa laa?
14 Cii ve Mbaiserael mase nyôron ken Tar u Ityendezwa yô, Yehova ta ve icin ér ve de hungur un ga. A kaa ér: “Kura iyol you, TER, Aôndo wou, A̱ de hungur we er ú kera waan atindi Na man akaaôron a Na a jirigh kua akaawan a Na, a m we u kwagh sha mi nyian ne iko ga ze; sha er, zum u ú ya á kuma u man ú maa uya mba doon, ú tema ker, man zum u ibua you man iyôngo you ia seer ngeen man azurfa wou man zenaria wou kpaa vea seer ngeen man kwagh u u lu a mi cii una seer ngeen yô, ú gba moron iyol je, TER, Aôndo wou, u A dugh a we ken tar u Igipiti ken ya u ikpan la Una hungur we.”—Duteronomi 8:11–14.
15. Se er nan ve se lu a vangertiôr ser se hungur Yehova ga?
15 Imba kwagh ne ia fatyô u eren se nyianaa? Een, aluer se ver ishima sha akaa a injaa ga yô. Aluer se vande keren perapera u Aôndo yô, mcivir u wang una lu se kwagh u vesen kpen kpen. Nahan se ‘wa ian yase iko’ er Paulu taver se ishima ér se er nahan, shi se hemba eren tom wase torough torough kpaa. (Mbakolose 4:5; 2 Timoteu 4:2) Kpa aluer ahumbe a man shin taryan hemba doon se ishima a u zan mbamkombo shin duen kwaghpasen yô, se hungur Yehova sha ci u se ver un hiihii ken uma wase ga. Paulu yange kaa ér ken ayange a masejime yô, ‘iember iyolough ia hemba doon ior a Aôndo.’ (2 Timoteu 3:4) Mbakristu mba mimi yô mba karen ayol a ve hanma shighe sha er vea fa aluer imba mhen la nyôr ve ken ishima yô.—2 Mbakorinte 13:5.
Palegh Ieren i Eren Kwagh sha Tseeneke Wou La
16. Ka ieren i sha mi ga i nyi yange Ifa man mbagen sha ayange a Paulu lu a mini?
16 Satan yange mee Ifa ken Eden, sha ci u Ifa lu a isharen i eren akaa sha tseeneke na. Ifa yange soo ér una tsuan kwagh u a lu u bo man u dedoo iyol na. (Genese 3:1–6) Sha derianyom u hiihii la kpa mbagen ken tiônnongo u ken Korinte la lu a imba ieren i eren kwagh sha tseeneke ve la. Yange ve hen ér ve hemba fan kwagh a Paulu, nahan á yila ve ér uihembanmbaapostoli.—2 Mbakorinte 11:3–5; 1 Timoteu 6:3–5.
17. Se palegh jijingi u eren kwagh sha tseeneke wase la nena?
17 Ior kpishi nyian ka ‘mba taver ityough man mbamoron ayol a ve,’ man Mbakristu mbagenev kpa de mhen ne bende a ve. Mbagenev yô hingir mbahendan a mimi kpaa. (2 Timoteu 3:4; Mbafilipi 3:18) Sha kwagh u mcivir u wang yô, doo u se de Yehova a hemen se, shi se dondo hemen u “wanakiriki u jighjigh man u fan kwagh” kua mbatamen mba ken tiônnongo. Ngun kpa ka gbenda u keren perapera, man ngu wasen se u palegh ieren i eren kwagh sha tseeneke wase la. (Mateu 24:45–47; Pasalmi 25:9, 10; Yesaia 30:21) Tiônnongo u mba ishigh ve mkurem la ka “ityôgh man imagh ki mimi a suur sha mi yô.” Yehova ver tiônnongo ne ér a kura se shi a hemen se. (1 Timoteu 3:15) Aluer se fa tom u injaa u tiônnongo ne a lu eren la yô, kwagh ne una wase se se kera keren icivir i gbilinigh ga, se hide a iyol ijime se de ser mhen u Yehova u perapera la a hemen se.—Mbafilipi 2:2–4; Anzaakaa 3:4–6.
Lu Nen Mbakaven Yesu
18. I wa se kwagh ér se kav Yesu sha nyi gbenda?
18 Kwaghôron u profeti u ken Bibilo ôr kwagh u Yesu ér: “Perapera doo U ishima, kpa iferkwagh yô, vihi U ishima.” (Pasalmi 45:7; Mbaheberu 1:9) Doo u kaven ieren ne kpen kpen! (1 Mbakorinte 11:1) Yesu yange fa di atindi a Yehova a perapera la tseegh tsô ga, atindi ne yange doo un ishima. Ka nahan ve zum u Satan mee un ken taaikyôngo la kpa, a timbir ga a venda a na her wang ér una kaha a undu “gbenda u perapera” ga ye.—Anzaakaa 8:20; Mateu 4:3–11.
19, 20. Aluer se mba keren perapera yô, ka akaa a dedoo a nyi se zua a mini?
19 U ôron kwagh sha mimi yô, asaren a iyolough a bo ka a taver kpishi. (Mbaromanu 7:19, 20) Kpa aluer perapera ngu se kwagh u injaa yô, una na se agee a hendan a iferkwagh. (Pasalmi 119:165) Shi aluer perapera doo se ishima tsung yô, zum u se tagher a isharen i eren kwaghbo kpa una kura se. (Anzaakaa 4:4–6) Umbur wer hanma kwa u se de imeen i hembe se yô, se na Satan ian ser a hemba. Nahan nenge i doo u se hendan a na se gema se na Yehova ian ser a hemba sha wono!—Anzaakaa 27:11; Yakobu 4:7, 8.
20 Mbakristu mba mimi mba keren perapera nahan ve “iv a atam a perapera a a lu sha Yesu Kristu la sha ci u icivir man iwuese i Aôndo.” (Mbafilipi 1:10, 11) Ve haa “orhe iyol u i gbe un sha inja i Aôndo ken perapera u mimi man mtsegh u mimi” la. (Mbaefese 4:24) Ve hingir kwagh u Yehova, nahan mba uma sha u civir un, ka sha u eren ishima ve ga. (Mbaromanu 14:8; 1 Peteru 4:2) Ka kwagh u a lu ve ken ishima shi a mgbegh ve u eren kwagh kpaa je la. Nahan ka ve na i saan Ter ve u sha la iyol kpen kpen!—Anzaakaa 23:24.
[Footnotes]
^ Mbamaren vea seer zuan a akaawan a a wase ve u kuran tsombor ve sha aeren a ijimbagh ken takerada u i yer ér Kwaghmyer u Msaanyol hen Tsombor la. Ka mbashiada mba Yehova ve gber u ye.
^ Mbagenev mba yer ieren i gban kwase iwan shin ityô ne ér icôngo i ukase.
U Fatyô u Pasen Kpa?
• Hii nan ve i lu hange hange u keren perapera?
• Mbakristu mba ve yen ne vea ker perapera nena?
• Ka akaa a ken tar a nyi i gbe u Mbakristu vea palegha?
• Aluer se mba keren perapera yô, una kura se nena?
[Study Questions]
[Picture on page 28]
Tar yange u lu mbadondon Yesu ijiir i bo i lun her
[Picture on page 29]
Mbayev mba i tese ve ér Yehova a doo ve ishima yô, ishima ia hemba taver ve u hendan a ijimba
[Picture on page 30]
Mbaiserael mbagenev yange mba za hingir yôughyôugh ken Tar u Ityendezwa la yô, ve hungur Yehova
[Picture on page 31]
Iferkwagh vihi Mbakristu ishima vough er Yesu nahan