Dondo Ishimawan I Yehova la
Dondo Ishimawan I Yehova la
“Ter ngu eren negh negh sha ityendezwa Na la . . . ga, kpa we ishima a ven.”—2 PETERU 3:9.
1. Ka iyua i hemban cii i nyi Yehova a ne uumacee?
YEHOVA na se kwagh u orgen môm nana fatyô u nan se ga yô. Ka kwagh u doon tsung, u lun a inja kpishi, u or nana fatyô u yamen shin zuan a mi sha ci u nan kuma u a na nan yum ga. Kwagh shon ka uma u tsôron. Se kpishi, ka ken tar u paradiso la se zua a uma u tsôron ne ye. (Yohane 3:16) A doo se je a zua ga! Akaa a a ne se ijungwen kpishi er ayôôso man ipila man ibanave man ifer man angev nahan aa kera lu ga, kua ku je kpaa. Ior vea lu sha ikyev i hemen u Tartor u Aôndo u doon tsung la bem bem shi mzough kpa una lu. Sha mimi yô, paradiso ne sar se je gande!—Yesaia 9:6, 7; Mpase 21:4, 5.
2. Er nan ve Yehova a lu a tim tar u Satan ne ga?
2 Yehova kpa ngu veren ashe keghen shighe u una gema tar cii ua hingir paradiso la. Kera je kpa, perapera doo un ishima kua kwagh u mimi. (Pasalmi 33:5) Ka una nenge er tar ne u soo atindiakaa a na a perapera ga shi hemen na kpa u bee u kwagh ga, shi u lu tôvon ior nav a ican nahan, i vihi un kpishi. Kpa, ngu a atôakyaa a injaa a a ne ve a lu a tim tar u bo u Satan ne ga yô. Atôakyaa ne zua sha kwagh u hemen na u sha won cii, u yange i huna u la. Yehova ngu a ieren igen i doon tsung, i a lu yaren tom a mi u kuren ikyaa ne yô; ka ieren i ior kpishi nyian ve lu a mi ga yô. Ieren shon ka ishimawan.
3. (a) Inja i ishember i ken zwa Grika man zwa Heberu i i gem ken Bibilo ér “ishimawan” la ér nyi? (b) Ka mbampin mba nyi se tôv sha mini?
3 Ishember i ken zwa Grika man zwa Heberu i i gem ér “ishimawan” la tese ieren i or gban ishima ikyôr man i nyoon ishima fefa ga. Ishimawan i Yehova ngi a inja hen avese nena? Ishimataver na man ishimawan na kua i mbatomov nav mba jighjigh la tese se nyi? Er nan ve se fe ser ishimawan i Yehova ngi a ikighiri? Se tôv nen sha mbampin mban.
Hen Kwagh u Ishimawan i Yehova La
4. Kanyi apostoli Peteru yange nger sha kwagh u ishimawan i Yehova?
4 Apostoli Peteru ôr kwagh u ishimawan i Yehova kaa ér: “Kpa ne mbadoon mo ishima, kwagh môm ne tsô yô, a̱ de hungur ne ga, hen Ter yô, iyange i môm ngi er anyom dubu nahan, anyom dubu di gema nga er iyange i môm nahan. Ter ngu eren negh negh sha ityendezwa Na la er mbagenev ve nenge er ngu eren negh negh nahan ga, kpa we ishima a ven, mayange sar Un u mbagenev ve̱ tim ga, kpa ior cii ve̱ gema asema.” (2 Peteru 3:8, 9) Ivur ne ter atôakaa ahar a a wase se u kaven ishimawan i Yehova yô.
5. Gbenda u Yehova a nengen shighe la bende a gbenda u a eren kwagh nena?
5 Hiihii yô gbenda u Yehova a nengen shighe la kaha a u wase. Er Un a lu gbem sha won yô, anyom dubu nga un er iyange i môm nahan. Kwagh hembe un u eren sha ci u shighe ban un ga, kpa gem eren kwagh negh negh ga. Er Yehova a lu a kwaghfan u hemban cii yô, a fa shighe u a hembe doon u una er kwagh sha ci u mtsera wase cii yô, man a wa ishima ngu keghen shighe shon. Kpa, doo u se hen ser kwagh gba Yehova sha ican i mbatomov nav ve lu yan sha shighe u á lu keghen ne ga ze. Ngu Aôndo u lun a “mhôônom ma zungwen,” shi ngu dooshima jim jim je. (Luka 1:78; 1 Yohane 4:8) Ngu a tahav mbu been hanma kwagh u bo u a tser se sha shighe u á ne ian ér ican i yan i za hemen ne; man una bee a mi gbekeke kpaa.—Pasalmi 37:10.
6. Doo u se hen ser Aôndo una er nyi ga, man ka sha ci u nyi?
6 Sha kpôô yô, kwagh ka una sar se man sea zua a mi fese ga nahan ishima i za se iyol kpen kpen. (Anzaakaa 13:12) Ka nahan ve, or ka nana ngôôr u kuren ityendezwa i nan yô, mbagenev ve kaa ér ka nan pe eren kwagh u nan tende zwa la ga ye. Kpa ka shami u henen ser Aôndo una er kwagh nahan ga! Aluer se hen ser Aôndo ngu eren negh negh, ngu wan a wa ishima ga yô, se gba akperan ken ishima fese shi ishima ia yina se kpaa, nahan se gba mnyam ken jijingi. U hemban vihin je yô, alaghga mbanahantar mba banen a jighjigh, mba Peteru a vande tan icin sha kwagh ve la vea tsume a vese. Mbanahantar mban mba nahan tar kaan ér: “Ityendezwa i m-ande Na ngi hana? Gadia hii sha shighe u uter kpe kera la akaa cii nga her di er a lu sha mhii u igbetar la nahan.”—2 Peteru 3:4.
7. Ishimawan i Yehova la zua sha isharen na i ior ve gema asema la nena?
7 Kwagh u sha uhar u se zua a mi ken mkaanem ma Peteru mara yô ka un ne: Yehova we ishima sha ci u sar un u ior cii ve gema asema. Mba ve vende u undun igbenda ve i bo cii Yehova una tim ve. Nahan kpa, ku u iferor doo Aôndo ishima ga. Hemba saren un u ior ve gema asema, ve undu igbenda ve i bo, ve̱ lu uma. (Esekiel 33:11) Ka nahan ve, a lu wan ishima shi a tindi mbatomov nav ér ve pase loho u dedoo sha tar cii sha er ior vea zua a ian i lun uma ye.
8. Gbenda u Aôndo ngise waan ishima a ikyurior i Iserael sha kwagheren na a ve la tese se nyi?
8 Shi se nenge a ishimawan i Aôndo sha gbenda u ngise er kwagh a ikyurior i Iserael la. Er ve lu hemban un ato nahan kpa, a wa ishima a ve anyom uderi imôngo. Yange wa ve kwagh sha ikyev i uprofeti nav acin imôngo ér: “Gema nen, undu nen aferakaa a en, waan nen atindi a Am man akaawan a Am iko sha gbenda u atindiakaa cii a M wa uter enev man shi a M tindi ne a mi sha ikev i mbayev Av, uprofeti la.” Nahan ve er nena? Kwagh ka er i vihi yô, “ve venda u ungwan” kwaghwan na ne kuaa.—2 Utor 17:13, 14.
9. Yesu yange waan ishima vough er Ter na nahan nena?
9 Ken mase ijime yô, Yehova tindi Wan na hen Mbayuda; a nôngo sha afatyô na ér una hime ve a Aôndo. Ishimawan i Yesu la lu er i Ter na nahan vough. Yesu yange fa ér ica a gba tsô a wua un, nahan a vaa iyol, wener: “Yerusalem, Yerusalem, we u u woo uprofeti man u te mba i tindi ve her a we, awen ne; ka acin a me je man i lum pe kohol ônov ou er ngôikegh ka a kohol ônov nav shin akper a na nahan, kpa ne rumun ga!” (Mateu 23:37) Mkaanem nam man kôr ken ishima kpen kpen. Yesu ôr kwagh er Orjir u vihin kwagh u i hange nan u tsahan orgen ga, kpa a ôr kwagh er huror u lun a dooshima u nan we ishima a ior nahan. A er kwagh er Ter na nahan, gadia á soo ér ior ve gema asema, ve war mtim. Mbagenev ken ve ungwa icintan i Yesu la, nahan ve war mtim u Yerusalem ken inyom i 70 la.—Luka 21:20–22.
10. Ishimawan i Aôndo wase se sha nyi gbenda?
10 Sha mimi yô ishimawan i Aôndo la kpilighyol ga he? Er uumace ve hembe Yehova ato je i lu kwagh u ôron a ôr ga nahan kpa, Yehova na hanma wase ian, kua mbagenev umiliôn imôngo ér se fa un shi se lu a ishimaverenkeghen i myom kpaa. Peteru yange nger anmgbianev nav mba ken Kristu, wener: “Fa nen er shima i wan i Ter wase la i lu myom yô.” (2 Peteru 3:15) Doo se er ishimawan i Yehova la i̱ ne se ian i zuan a myom ga zee? Se mba eren msen ser, Yehova a̱ za hemen u wan ishima a vese er se civir un ayange ayange ga he?—Mateu 6:12.
11. Aluer se fa kwagh u ishimawan i Yehova yô, kwagh ne una mgbegha se se er nyi?
11 Aluer se fa er i hii ve Yehova a we ishima yô, mayange je se kure ikyaa ser ngu eren negh negh sha uityendezwa nav ga, kpa kwagh ne una wase se u keghen myom na. (Ukwelegh 3:26) Er se eren msen ser Tartor u Aôndo u̱ va nahan kpa, se na jighjigh ser Aôndo fa shighe u a hembe doon u una ungwa msen wase ne yô. Shi kwagh ugen yô, ishima mgbegha se u dondon Yehova sha u wan ishima a anmgbianev asev man mba se pasen ve kwagh la, er Yehova kpa a we ishima a ve nahan. Se kpa sar se u i tim or môm môm ga; se soo ser ior ve gema asema shi ve lu a ishimaverenkeghen ér vea zua a uma u tsôron, er se kpa se lu a mi nahan.—1 Timoteu 2:3, 4.
Hen Kwagh u Ishimawan i Uprofeti La
12, 13. Profeti Yesaia yange wa ishima er tom na vough er i nger ken takerada u Yakobu 5:10 la nena?
12 Se tôv sha ishimawan i Yehova, nahan kwagh ne wase se u soon ieren ne shi ka se pe lun a i kpaa. Ka i taver uumace mba ve lu vough ga ne kpishi u wan ishima, kpa se fatyô u lun mba wan ishima. Se hen ieren ne hen mbatomov mba Aôndo mba tsuaa mbara. Orhenen Yakobu nger wener: “Uprofeti mba ve lu ôron kwagh ken iti i Ter yô, ve̱ lu ne ikav sha ican i yan man ishima i wan kpaa.” (Yakobu 5:10) Ka sea nenge er mbagenev yange ve tagher a mbamzeyol mba se kpa se tagher a mi, kpa ve yina ishima ga nahan, kwagh ne a sur se ishima shi a taver se ishima kpaa.
13 Ikyav i tesen yô, yange gba u profeti Yesaia una wa ishima ve una er tom u i na un la ye. Yehova pase kwagh ne zum u a kaa a na ér: “M-ongo yô, ungwan nen, kpa de kaven nen ga; mnenge kpaa, nengen nen, kpa de kaven nen ga. Er, ishima i ior ne i wa ahôm, man ato a ve a̱ yuhwa, cir ve ashe, sha er ve̱ de nengen sha ashe ve ga, ve̱ de ongo sha ato ve kpaa ga, shi ve̱ de kaven ken ishima, ve̱ gema man i̱ bee ve angev kpaa ga.” (Yesaia 6:9, 10) Shin er ior lu ungwan Yesaia ga nahan kpa, a wa ishima, a ôr ve ilyoho i Yehova tindi ér a ta ve icin la je kuma anyom 46 shin hemba nahan! Se kpa, ishimawan ia wase se se taver ishima ken tom wase u pasen ior loho u dedoo la, shin er ior kpishi ve lumun u ga nahan.
14, 15. Kanyi yange i wase Yeremia wa ishima a tôvacan shi de u urene?
14 Yange gba u uprofeti vea wa ishima, gadia ior lu vendan loho u ve lu yôôn la; kpa sha kpôô yô, lu sha ingin tseegh ga, yange ve wa ishima a tôvacan kpaa. U tesen ikyav yô, ngise i mande Yeremia igbe shi i wa un ken “gaadi” shi i gbihi un shin ijôr kpaa. (Yeremia 20:2; 37:15; 38:6) Nenge ase yô, lu ior mba sar un tsung u wasen ve ne je ve hide ve tôv un a ican nahan ye. Kpa, ishima gba Yeremia awambe ga, shi a or iyev kpaa ga. A wa ishima anyom anyom.
15 Tôvacan man tarnahan cir Yeremia zwa ga, man se kpa kape i lu je la. Nahan kpa, ashighe agen ka se ure. Yeremia kpa yange ure. A nger wener: ‘Kwaghôron u TER gema hingir u nan mo iheen man tarnahan iyange jimin cii. Tsô m kaa mer: Me kera ter Un ga, me kera ôr kwagh ken iti Na kpaa ga.’ Nahan lu nyi i eree? Yeremia yange de kwaghpasene? A za hemen a kaa ér: “[Mkaanem ma Aôndo] hingir mo ken ishima er usu u hian, u i cir u ken akuhe am yô, m wa ishima je, m vôr, hembam kera.” (Yeremia 20:8, 9) A lu ú nenge yô, Yeremia yange ure sha ci u ishima lu un sha tarnahan u ior lu nahan un la. Kpa zum u kwagh hemba gban un sha mdoom ma loho u a lu pasen la kua mtsera u ú yô, hide saan un iyol. Heela tseegh ga, Yehova lu a Yeremia er “orageegh u cier iyol” nahan, lu taver un ishima sha u a yôô mkaanem ma Aôndo sha gbashima man a vangertiôr kpaa.—Yeremia 20:11.
16. Se er nan ve se lu a iember ken tom wase u pasen loho u dedoo nee?
16 Profeti Yeremia zua a iember ken tom na kpa? Een, a zua a mi! A kaa a Yehova ér: “Ka a zua a akaaôron a Ou yô, m ya a, akaaôron a Ou hingir mo iember man msaanyol ken ishima yam; gadia i yilam sha iti You je, TERE.” (Yeremia 15:16) Yeremia ember kpishi, gadia lu a icivir i tilen sha ityough ki Aôndo u mimi shi pasen mkaanem nam kpaa. Se kpa se fatyô u ember. Shi se mba ember er mbatyomov mba shaav nahan, sha ci u ior kpishi sha tar jimin cii lumun loho u Tartor, ve gema asema shi mba zenden sha gbenda u zan a or ken uma u tsôron la.—Luka 15:10.
“Yobu . . . Taver Ishima”
17, 18. Yobu taver ishima nena, man kanyi i due ken ishimataver na laa?
17 Orhenen Yakobu yange ôr kwagh u uprofeti mba tsuaa la, been yô maa a kaa ér: “Ne ungwa er Yobu a taver ishima yô, man shi ne nenge mkur u Ter kure kwagh na yô, mhôônom ma ker Ter man shi zungu mhôônom kpaa.” (Yakobu 5:11) Inja i ishember i ken zwa Grika i í gem ken ivur ne ér “taver ishima” la nôngo u lun kwagh môm a ishember i “ishima i wan” i Yakobu a nger ken ivur i sha pue la. Orfantakerada ugen pase mkposo u asember a ahar ne, wener: “I̱ hiihii la ka ishima i or we zum u i lu nzughul a nan yô, igen la di ka ishimawan shighe u se lu yan ican sha ci u mbamzeyol mba vihin tsung yô.”
18 Yobu yange ya ican kpishi. Akaa a na saa ishe purututu, ônov nav kpa kpe cica cii, shi gba icôron uange kpaa. Shi tagher a mbaaie mba i lu nôngon ér a bume un ér Yehova ngu tsahan un la. Yobu yange gba teman ving ken ican na i yan ne tsô ga; a vaa iyol sha ican na ne shi a ôr kwagh inja er a hemba Aôndo perapera nahan. (Yobu 35:2) Kpa, mayange je a undu jighjigh na u nan ga shi a tile sha mimi kpaa. A tuhwa Aôndo er Satan kaa ér una er nahan ga. (Yobu 1:11, 21) Kanyi yange i due ken ishimataver na laa? Yehova “ver Yobu ken masejime doo doo, hemba mver u tsuaa la.” (Yobu 42:12) Yehova bee Yobu angev shi na un akaa je hemba ave tse, shi a ver un doo doo, a na un mkpeyol a ior nav imôngo. Er Yobu taver ishima undu jighjigh na ga yô, kwagh ne shi wase un u seer fan Yehova.
19. Ishimataver i Yobu la tese se nyi?
19 Ishimataver i Yobu la tese se nyi? Se kpa angev mbu a fatyô u kôron se shin atsan agen aa tser se er Yobu nahan. Alaghga se fa er i hii ve Yehova a de ér se tagher a ma mzeyol ga. Kpa, kwagh ngu u se fe ser una kar se mayange ga yô: Aluer se undu jighjigh u nan wase ga yô, una ver se doo doo. Yehova ne mba ve lu keren un la injar. (Mbaheberu 11:6) Yesu kaa ér: “Or u nana taver ishima zan zan mkur yô, ka nan á yima nan ye.”—Mateu 10:22; 24:13.
“Iyange i Ter Ia Va”
20. Er nan ve se fe ser iyange i Yehova ia va keng, a bunde ga?
20 Ka mimi Yehova we ishima, kpa er a lu u perapera yô, una za hemen u den aferaior gbem sha won ga. Ishimawan na ngi a ikighir. Peteru nger ér: “Tar u tsuaa la kpaa [Aôndo] tange u ga.” Yehova yange yima Noa man tsombor na, kpa tar u mba vendan Aôndo la yô a tim u sha mngerem ma deemee. Yehova shi tim gar u Sodom man Gomora la, a nande agar ne hingir mtwem. Mtim u a tim aferaior ne gema hingir “ikav hen mba vea va venda Aôndo la cii.” Kwagh ngu môm u se fe ser una er keng yô: ‘Iyange i Ter ia va’ kpee je.—2 Peteru 2:5, 6; 3:10.
21. Se tese ishimawan kua ishimataver nena, man kwaghngeren u dondon ne una tôv sha nyi?
21 Yô, se dondo nen ishimawan i Yehova la sha u wasen mbagenev ve gema asema sha er vea war yô. Er mbagenev ve ongo kwaghpasen wase ga nahan kpa, se dondo nen ikyav i uprofeti sha u wan ishima pasen ior loho u dedoo. Shi aluer se mba yan ican kpa se taver ishima er Yobu nahan yô, se fa tsô ser Yehova una ver se doo doo aluer se tile sha mimi her yô. Ka sea nenge er Yehova a veren ior nav mgbeghaa sha iniôngon ve i pasen loho u dedoo sha tar jimin cii la nahan, se lu a ityôkyaa i eren tom wase ne saan saan. Kwaghngeren u dondon ne una tôv sha kwagh ne.
Ú Umbur Kpa?
• Er nan ve Yehova a we ishima?
• Ishimawan i uprofeti la tese se nyi?
• Yobu yange taver ishima nena, man lu nyi i due ken ishimataver na laa?
• Er nan ve se fe ser ishimawan i Yehova la ngi a ikighiri?
[Study Questions]
[Picture on page 14]
Yesu yange waan ishima vough er Ter na nahan
[Pictures on page 16]
Yehova ver Yeremia doo doo sha ishimawan na nena?
[Pictures on page 17]
Yehova ver Yobo doo doo sha ishimataver na nena?