Gbenda U Aôndo A Ser Akaa Sha U Kuren Awashima Na yô

“[Aôndo] eren akaa cii sha mhen u awashima Na.” —MBAEFESE 1:11.

1. Atôônanongo a Mbashiada mba Yehova cii aa kumba sha iyange i Aipor 12, 2006 sha ci u nyi?

 IOROV er miliôn 16 nahan vea kumba mkombo u Kwaghyan u Ter u Aikighe sha iyange i Tomatar aikighe, Aipor 12, 2006. Hanma ijiir i a kumba mkombo ne cii, a ver bredi u a lu a kwa ga, u a lu ikyav i iyol i Kristu la sha tebur kua wain u nyian u lun ikyav i awambe a Kristu la. Ken mkur u kwaghôron u a lu nan u pasen inja i Mkombo u Umbur ku u Yesu la, a tôô bredi u a lu ikyav la a ningir a mi sha, a been yô, a ningir a wain kpaa. Ka ken hanma tiônnongo u Mbashiada mba Yehova cii ior vea ya bredi shi vea ma wain la ga. Ken atôônanongo a ior a ya bredi shi vea ma wain la je kpa a lu or môm shin iorov kpuaa tseegh. Er nan ve i lu Mbakristu kpuaa, mba ve lu a ishimaveren i yemen sha la tseegh ve ye bredi shi ve me wain, kpa ikpelaior i i lu a ishimaveren i lun shin tar la yô i̱ ye bredi shi i me wain la ga?

2, 3. (a) Yehova yange hii gban akaa sha awashima na nena? (b) Yehova gba tar man or sha ci u nyi?

² Yehova ka Aôndo u lun a awashima. “Eren akaa cii sha mhen . . . Na,” sha u kuren awashima na. (Mbaefese 1:11) Yange hii gban Wan na u môm môm la. (Yohane 1:1, 14; Mpase 3:14) Nahan va gba ônov nav mba ve lu tsombor u ken jijingi la sha ikyev i Wan na la, ken masejime yô, va gba sha man tar, shi gba or ér nana lu sha ú.—Yobu 38:4, 7; Pasalmi 103:19–21; Yohane 1:2, 3; Mbakolose 1:15, 16.

³ Yehova gba tar ér u lu ijiir i una karen ior sha er una fa mba ve kom u una yem a ve ve za kohol ônov nav mba ken jijingi mba ve lu tsombor u vesen sha la, er Mbakristu Mbaaiev ve tesen nahan la ga. Kpa á gba tar ér “ior ve̱ tema sha u.” (Yesaia 45:18) Aôndo gba tar sha ci u or, nahan gba u or nana lu sha tar. (Pasalmi 115:16) Lu u tar cii ua hingir paradiso, mbaperapera vea lu sha u, vea kahan sule shi vea sôron ú kpaa. Mayange je Aôndo kaa a nom man kwase u hiihii la ér ve lu shin tar sha anshighe kpuaa maa ve yem sha ga.—Genese 1:26–28; 2:7, 8, 15.

Satan Gba Ahon sha Awashima u Yehova

4. Yange i gba ahon sha ian i Yehova i hemen la sha mhii u tsombor u uumace nena?

⁴ Wan u Aôndo u ken jijingi ugen yange hemba Yehova ato shi soo wener una vihi awashima na kpaa, sha nahan yô a nzughul a ian i Aôndo na un i eren kwagh sha ishima na la. Shi a yange mba ve lumun hementor u Yehova a ishima i môm la u lun ken bem. Satan  hemen nom man kwase u hiihii la gbenda ve venda hemen u Aôndo, ve gema ve tsua u lun sha tseeneke ve. (Genese 3:1–6) Yange nyiman agee a Yehova ga, kpa gema gba ahon sha hementor u Yehova man ian na i hemen la. Lu sha mhii u tsombor u uumace shin tar la je Satan er kwagh ne ye.

5. Ka ikyaa i sha uhar i nyi yange i duee, man í bende a an man ana?

⁵ Dugh ikyaa i Satan va a mi sha kwagh u or u nan kom u hemen sha won cii la kera yô, Satan shi va a ikyaa igen sha shighe u Yobu lu uma la. Yange gba ahon sha ityôkyaa i akaa a Yehova a gbe la a ongo Un shi a civir Un yô. Ahon a na la tese ér ior mba civir Yehova sha ci u akaa a dedoo a a eren a ve la, gadia aluer i kar ve yô, vea de u civir Aôndo. (Yobu 1:7–11; 2:4, 5) Lu mbacivir Yehova mba shin tar ne Satan gba ahon ne sha kwagh ve ye, kpa ônov mba Aôndo mba ken jijingi kua Wan u Yehova u ishima ishima la kpaa kwagh ne bende a ve.

6. Yehova tese ér un eren kwagh sha awashima na man sha inja i iti na vough nena?

⁶ Yehova hingir Profeti man Oryiman sha u tesen ér un eren kwagh sha awashima na vough shi un eren kwagh er iti na i tese nahan. * A kaa a Satan ér: “Me ver ihom hen atô wou vea kwase, man hen atô u vor wou a vor na kpaa, u ua cagh u ityough, we di kpaa ú cagh u ikishinguhar.” (Genese 3:15) Ka sha ikyev i vor u “kwase” shin nongo u Yehova u sha la una na Satan mlumun sha imbwase na la shi una na tsombor u Adam ua lu a ishimaveren i myom man uma u tsôron ye.—Mbaromanu 5:21; Mbagalatia 4:26, 31.

“Kwaghmyer u Awashima Na”

7. Ka awashima u nyi Yehova yange pase sha ikyev i apostoli Paulu?

⁷ Apostoli Paulu pase ken washika u nger Mbakristu mba ken Efese la wanger wanger er Yehova a sôron akaa sha u kuren awashima na yô. A kaa ér: “A pase se kwaghmyer u awashima Na u A wa ishima ken Kristu sha u sôron akaa cii sha ci u shighe una va kuma vough la yô, Una kohol akaa a a lu Sha man a a lu shin tar kpaa ci ca cii.” (Mbaefese 1:9, 10) Awashima u vesen u Yehova yô ka u kohol akaa a sha won, a a lumun u suen hementor na sha dooshima la cii sha u a lu ken mzough yô. (Mpase 4:11) Hen shighe la a tsegha iti na, a gema a pon Satan ér ngu oraie, nahan a er ishima i Aôndo “shin tar kpaa vough er i eren i Sha nahan.”—Mateu 6:10.

8. Inja i ishember i “sôron akaa” la ér nyi?

⁸ Yehova una sôr akaa sha u kuren awashima na. Ishember i Paulu a yar tom a mi ve í gem ér u sôron akaa la, inja i i kpôghôô yô “ka u nengen sha ya.” (Nenge ngeren u shin kpe u Bibilo i New World Translation of the Holy Scriptures la). Nahan ishember i sôron  akaa la tese ér ka gbenda u nengen sha akaa. Gbenda môm u vesen u Yehova hii u sôron akaa sha u kuren awashima na yô, lu u pasen “kwaghmyer” na kure kure er shighe lu karen yô.—Mbaefese 1:10; 3:9.

9. Yehova pase kwaghmyer u awashima na sha adondo adondo nena?

⁹ Yehova pase awashima na sha kwagh u Vor u á tôndo zwa sha mi ken Eden la kure kure sha uikyurmbayan kposo kposo. Ikyur i Yehova ya a Aberaham la tese ér Vor u ityendezwa la ua due hen tsombor u Aberaham, shi a lu sha ikyev i Vor la man “akuraior a sha won cii” aa zua a iveren ye. Shi ikyuryan la tese ér mbagenev kpaa vea lu imôngo a vor u vesen la. (Genese 22:17, 18) Ikyuryan i Tindi i í ya a Iserael u sha marami la tese ér Yehova wa ishima u lun a “tartor u upristi.” (Ekesodu 19:5, 6) Ikyur i i ya a Davidi la tese ér Vor la ua Hemen Tartor gbem sha won. (2 Samuel 7:12, 13; Pasalmi 89:3, 4) Ikyuryan i Tindi la yange i bugh Mbayuda gbenda u fan Mesiya, nahan Yehova shi seer pasen mbaawashima nav mbagen mba vea kure yô. (Mbagalatia 3:19, 24) Ior mba gba u vea lu imôngo a vor u vesen la vea hingir “tartor u upristi” shi a ya “ikyuryan i he” a ve vea hingir “Iserael” u he, ka Iserael u ken jijingi je la.—Yeremia 31:31-34; Mbaheberu 8:7-9. *

10, 11. (a) Yehova yange pase Vor u ityendezwa la nena? (b) Ka sha ci u nyi Wan u Aôndo u môm môm la va shin tara?

¹⁰ Yange shighe kuma u Vor u í tsengaôron kwagh u ú la ua va shin tar ua va kure awashima u Aôndo. Nahan, Yehova tindi  ortyom Gaberiel va ôr Maria loho ér una mar wan, a ii un iti ér Yesu. Ortyom la kaa a na ér: “Un, Una lu Zegeor, á yilan Un er Wan u Uhembansha; Ter Aôndo kpaa Una na Un ikônough ki torough ki Ter Na Davidi. Una lu tor ken ya u Yakob gbem sha won; tartor Na kpaa ua bee mayange ga.” (Luka 1:32, 33) Nahan i hingir u fan Vor u ityendezwa la wang.—Mbagalatia 3:16; 4:4.

¹¹ Yange gba u wan u Yehova u môm môm la una va shin tar, a va ta un ikyaren i vesen. Lu u ieren i Yesu shin tar la ia na mlumun wang sha ahon a Satan gba la. Tsô Yesu una lu jighjigh hen Ter na kpa? Kwagh ne lu myer her di tsô. Shighe karen yô, apostoli Paulu va pase kwagh u Yesu wener: “Mimi je, kwaghmyer u a lu sha mcivir u se civir Aôndo la, vese tsô. I Pase un ken iyol i or ken igbar, i na Un ishô ken Jijingi, mbatyomov mba shaav nenge a Na, i pase kwagh Na ken atôatyev, i na Un jighjigh sha won, i yem a Na sha ken iengem.” (1 Timoteu 3:16) Yesu tile sha mimi zan zan ku na, nahan a na mlumun wang sha ahon a Satan gba la. Kpa i lu a pase kwaghmyer la cica cii ga.

“Kwaghmyer u Tartor U Aôndo”

12, 13. (a) Kwagh môm ken “kwaghmyer u tartor u Aôndo” la ér nyi? (b) Kanyi Yehova a er sha u tsuan ior kpuaa ér ve yem sha?

¹² Sha shighe ugen la, Yesu lu pasen kwagh ken Galilia, lu tesen ior ér kwaghmyer la zua sha kwagh u Tartor u Mesiya. Á kaa a mbahenen nav ér: “Ne yô, i na ne sha u ne̱ fa akaa a myer a tartor u Sha, [tartor u Aôndo, Mark 4:11].” (Mateu 13:11) Kwagh môm ken kwaghmyer la yô, ka mtsough u Yehova a tsough “anikyumuile u kpeghee,” iorov 144,000 mba ve lu imôngo a vor la sha u ve za tema tor a Wan na sha la.—Luka 12:32; Mpase 14:1, 4.

¹³ I gba uumace ér ve lu shin tar ne, nahan kpa Yehova tsua uumace mbagenev ér ve za lu sha, nahan ka inja er i gba mba vea za lu sha mbara hegh nahan. (2 Mbakorinte 5:17) Apostoli Peteru u lu môm ken mba i tsua ve ér ve yem sha la nger ér: “I̱ wuese Aôndo, Ter u Ter wase Yesu Kristu u A mar ne hegh sha mhôônom Nam ma zungwen ma vesen er se̱ lu a ishimaverenkeghen i i lu uma sha mnder u Yesu Kristu shin mbakpenev la, se̱ lu a dyako u hôôn ga, u fisee kpaa ga, u usen tsô kpaa ga, u i koso un Sha sha ci wen” la.—1 Peteru 1:3, 4.

14. (a) Mba ve lu Mbayuda ga kpa yange ve hingir u lun ken “kwaghmyer u tartor u Aôndo” nena? (b) Ka nyi i wase se ve se kav “akaacimin a Aôndo”?

¹⁴ Kwagh ugen ken kwaghmyer u sha kwagh u Tartor u a va a mi ken hemen la yô ka un ne: Aôndo lumun mba ve lu Mbayuda ga la ér ve kpa ve lu ken iorov kpuaa mba i tsough ér ve za tema tor a Kristu sha la. Paulu pase gbenda u Aôndo a “sôron akaa” shin a kuren awashima na ne ér: “Ken ikyov igen yô, i lu a pase ônov mba iorov kwagh ne er hegen i pase uicighanmbaapostoli Nav kua uprofeti ken Jijingi nahan ga, er atôatyev kpaa a lu mbayandyako imôngo man iyol i môm man nongo môm a vese sha ityendezwa i ken Kristu Yesu sha Loho u Dedoo” la. (Mbaefese 3:5, 6) Yange i pase “uicighanmbaapostoli” vegher u kwaghmyer ne vindi vindi. Nyian kpa luun er ka sha tahav mbu icighan jijingi ga yô, ma se kav “akaacimin a Aôndo” ne ga.—1 Mbakorinte 2:10; 4:1; Mbakolose 1:26, 27.

15, 16. Er nan ve i lu uumace Yehova a tsough ve ér ve za tema tor a Kristu?

 ¹⁵ Iorov “dubu deri man akunduahar kar unyiin,” mba ve lu a “waniyôngo” imôngo, ve til sha uwo u Shion la ka mba i “paa ve shin tar,” “ken ior, ve lu iyiagh ki tsutswaagh sha ci u Aôndo man sha ci u Waniyôngo,” Kristu Yesu yô. (Mpase 14:1-4) Yehova tsua waniunda na ér a lu vor u vesen ú i tôndo zwa ken Eden la, kpa er nan ve i lu ken uumace a tsough ior ér ve za tema tor a Kristu? Apostoli Paulu pase ér í tsua iorov kpuaa ‘mba i yer ve la sha awashima u Yehova.’—Mbaromanu 8:17, 28-30; Mbaefese 1:5, 11; 2 Timoteu 1:9.

¹⁶ Yehova wa ishima ér una tsegha icighan iti na i i hembe cii la shi una paa hementor na iyol kpaa. Yehova yar tom a gbenda na u “sôron akaa” u hemban cii shin u eren kwagh sha kwaghfan la nahan a tindi Wan iunda na shin tar i va ta un ikyaren i vesen shi i wua un kpaa. Heela tseegh ga, Yehova wa ishima ér uumace mba ve sue hementor na sha mimi zan zan ve ar ken ku la kpaa ve lu ken Tartor u Mesiya u Wan Na la.—Mbaefese 1:8-12; Mpase 2:10, 11.

17. Er nan ve i saan se iyol ser Kristu man mba teman tor a na imôngo mbara vande lun uumace?

¹⁷ Yehova er kwagh a tsombor u Adam sha dooshima kpen kpen. A tindi Wan na shin tar shi a tsua ior ken uumace ér ve za tema tor a Wan na sha Tartor. Uumace mbagen mba ve civir Aôndo sha mimi, hii sha shighe u Abel zan zan hegen la yô, kwagh ne una wase ve nena? I mar uumace ken kpan u isholibo man ku, nahan gba u a bee uumace angev ken jijingi man sha iyol, shi a er ve vea hingir hegh, vough er Yehova vande wan ishima ér uumace ve lu nahan. (Mbaromanu 5:12) Se mba se lu a ishimaverenkeghen i va zuan a uma u tsôron shin tar ne cii, doo se kpishi u fan ser tor wase fa mbamlu asev, nahan una er a vese sha dooshima vough er yange eren a mbahenen nav shighe u lu eren tom na shin tar la nahan! (Mateu 11:28, 29; Mbaheberu 2:17, 18; 4:15; 7:25, 26) Shi ka kwagh u taver se ishima kpishi u fan ser nomso man kasev mba jighjigh mba i tsough ve ér ve za tema tor a Kristu imôngo, shi ve lu upristi kpaa la hemba mbamyen vev shi tagher a mbamtaver kpishi er se nahan!—Mbaromanu 7:21-25.

Awashima u Yehova Una Bunde Ga

18, 19. Mkaanem ma Paulu a er ken Mbaefese 1:8–11 la seer wanger se nena, man se hen nyi ken ngeren u a dondo nee?

¹⁸ Se kav kwagh u Paulu ôr a Mbakristu mba i shigh ve mkurem ken Mbaefese 1:8-11 la wang hegen. A kaa ér Yehova pase ve “kwaghmyer u awashima Na” ér vea “ya dyako” a Kristu shi a pase ve ér “i vande veren [ve] sha awashima u Un u A eren akaa cii sha mhen u awashima Na la.” Se nenge ser kwagh ne zua sha gbenda u kpilighyol u Yehova a “sôron akaa” sha u kuren awashima na u vesen la. Shi kwagh ne wase se u fan er i hii ve i lu Mbakristu kpuaa mba ve ze Mkombo u Umbur ku u Ter la tseegh ve ye bredi shi ve me wain yô.

¹⁹ Ngeren u a dondo ne una wase se u fan er ku u Kristu la u wase Mbakristu mba ve lu a ishimaverenkeghen i yemen sha la yô. Shi una wase se u fan er i gbe u ior umiliôn mba ve lu a ishimaverenkeghen i lun shin tar gbem la vea fa inja i Mkombo u Umbur ku u Yesu la yô.

[Footnotes]

U Hiden Saven a Sav

• Er nan ve Yehova a gbe tar shi a ver or sha u?

• Yange gba u a kar Wan u Yehova u môm môm la shin tar sha ci u nyi?

• Er nan ve Yehova a tsough ior ken uumace ér ve za tema tor a Kristu imôngo?

[Study Questions]