Iemberyolough I Vough I I Ne Se Myôhôryol la
Iemberyolough I Vough I I Ne Se Myôhôryol la
“Aluer nea yaan kwagh, shin nea maan kwagh shin nea eren nyityô kwagh kpaa, eren nen akaa cii sha ci u icivir i Aôndo.”—1 MBAKORINTE 10:31.
1, 2. Er nan ve se fatyô u kaan ser akaa a nan se iember ka “iwua i Aôndo,” kpa Bibilo gema ta se icin wang ér nyi?
KA SAREN se u eren akaa a nan se msaanyol, man isharen ne ka i sha gbaaôndo je. Yehova, Aôndo wase u sar sar soo ér se ember, nahan a na se akaa kpishi sha er se ember yô. (1 Timoteu 1:11 NW; 6:17) Ngise Tor u fan kwagh Solomon nger ér: “M fa ma kwagh u hemban doon . . . ngu ga, saa u ember . . . Man shi er hanma or nana̱ ya kwagh, nana̱ ma kwagh, i doo nan iyol ken tom u nan ye ican sha mi la cii; kwagh ne ka iwua i Aôndo je.”—Orpasenkwagh 3:12, 13.
2 Sha kpôô yô, iember shon i or ka nana nenge tom u nan er ve nan ember la ka kwagh u nan myôhôryol kpen kpen, hemban je yô shighe u nan lu ember a tsombor u nan shin ahuraior a nan la. Se fatyô u kaan ser imba iember ne ka “iwua i Aôndo” je. Kpa, iyua i Orgban se a ne se mgbeghaa ne gema na se ian i gban eren ugurgur kpii tsô ga. Bibilo venda msôrom ma hunden man hua kua ijimba kpaa. I kaa ér mba ve eren akaa ne cii “vea ya dyako u tartor u Aôndo ga.”—1 Mbakorinte 6:9, 10; Anzaakaa 23:20, 21; 1 Peteru 4:1–4.
3. Kanyi ia wase se u lun per ken jijingi shi umbur iyange i vesen i Yehova laa?
3 Hegen u se lu ken ayange a masejime a ican ne, taver Mbakristu kpishi u eren akaa ken tar u ú hôngor ne aa u nyôron iyol ken aeren a u shio. (Yohane 17:15, 16) Er yange i tsengaôron nahan, ior mba ainge hingir “mba iember i iyolough i hembe doon ve a Aôndo” yô, nahan ve “fa” ikyav i i tese ér “zegecan” ngu se ken hemen ikyua ikyua la “ga.” (2 Timoteu 3:4, 5; Mateu 24:21, 37–39.) Yesu yange ta mbadondon un icin ér: “Ver nen ishima sha ayol a en, asema a en a̱ de yoho sha hua u sha kwaghyan man sha ihyundugh man sha akaa a nyian ishima a uma ne ga, iyange la i de va bulun ne er kwaghhônon nahan ga.” (Luka 21:34, 35) Er se lu mbatomov mba Aôndo yô, se kange ishima ser se er sha icintan i Yesu ne. Se mba er ior mba ken tar u u vende Aôndo ne nahan ga, gadia se mba nôngon ser se lu per ken jijingi shi se umbur iyange i vesen i Yehova la kpaa.—Sefania 3:8; Luka 21:36.
4. (a) Er nan i lu kwagh u ican kpishi u eren ugurgur mba dedoo? (b) Ka kwaghwan u ken Mbaefese 5:15, 16 u nyi i doo u se er tom sha mini?
4 U palegh aeren a hôngorough a tar ne ka kwagh u ican kpishi, gadia Diabolo gema aeren ne hingir kwagh u doon ashe shi a dumbur kpaa. Ka hembe lun se ican u palegh a zum u se lu eren ugurgur yô. Tar ne ngu hembe eren akaa a kenden “asaren a iyolough” ken ior. (1 Peteru 2:11) Iemberyolough i bo samber wuee; ken uya mbaiorov je kpa a fatyô u nengen a mi ken ityakerada man sha Televishen man Intanet kua icer i vidio kpaa. Nahan, Mkaanem ma Aôndo wa Mbakristu kwagh sha inja ér: “Nenge nen vighe vighe er ne zenden yô, i de lu er mbalanenkwagh nahan ga, kpa i lu er mbafankwagh nahan. Man waan nen ian yen ikyo, gadia ayange ne ka a bo je.” (Mbaefese 5:15, 16) Saa se er sha kwaghwan ne vough ve se tume ityough ken iemberyolough i bo cou cou je se de ser kwagh ne a vihi mlu wase vea Yehova zan zan a mase kuusu a vese ken mtim ga ye!—Yakobu 1:14, 15.
5. Se mba zough a mmem u vesen sha u eren nyi?
5 Er Mbakristu ve ngee a ityom ave kpishi yô, ashighe agen ka i lu ve pe eren ugurgur mba vea na ve msaanyol yô. Sha kpôô yô, Orpasenkwagh 3:4 ôr kwagh u “shighe u ahan a sen” man “shighe u yaren kwan.” Nahan Bibilo nenge u eren akaa a nan se iember ér ka shighe u vihin ga. Kpa akaa a nan se iember a se eren la a̱ lu a nan se myôhôryol, a̱ de lu a vihin a vihi mlu wase u ken jijingi shin yan se shighe u eren akaa a ken jijingi ga. Mbakristu mba ve vie ken jijingi yô fa ér or ka nana eren mbagenev iyua yô nan zua a msaanyol u vesen. U eren ishima i Yehova ka kwagh u hiihii ken uma ve, nahan mba zough a ‘mmem ken asema a ve’ gadia ve ngohol igbur i Yesu i leghem la.—Mateu 11:29, 30; Aerenakaa 20:35.
Tsua Iemberyolough i Dedoo
6, 7. Kanyi ia wase u u fa iemberyolough i vough man i vough ga?
6 Se er nan man se fa iemberyolough i í doo sha ci u Orkristuu? Mbamaren mba wasen mbayev vev sha gbaa ne, shi mbatamen kpa mba ne iwasen. Kpa jighilii yô, saa or nana kaa a vese ér takerada ungun shin tser u vidio ne shin iniumbe ingin gayô amar angan shin icam ingin nahan doo ga ve se mase fan ga. Paulu kaa ér, “mbaganden ka ve . . . er tom sha mkav u ken ishima, hoghor ve u paven kwagh u dedoo a kwagh u bo.” (Mbaheberu 5:14; 1 Mbakorinte 14:20) Bibilo ngi a atindiakaa a tesen se kwagh u se er yô. Imoshima you i Mkaanem ma Aôndo ma tsaase i la ia wase u aluer u dondo i yô.—1 Timoteu 1:19.
7 Yesu kaa ér “ka sha atam a kon man i fe u min ye.” (Mateu 12:33) Nahan gba u se venda nyityô iemberyolough i bo i mgbeghan or ér nana er ipila man ijimba shin nana civir akombo. Shi iemberyolough i gbihin uma u or ken kwaghbo shin i vihin or iyol shin van or a ibanave man ishimayinan kpa doo ga. Shi doo u se er ugurgur mba vea na mbagenev gbev mbu nôngon ga. Apostoli Paulu ta se icin ér aluer se vihi imo i ken ishima i anmgbian wase yô, ka kwaghbo je se lu eren ye. A kaa ér: “Aluer ne er anmgbianev kwaghbo, ne vihi imo ve i ken asema i i taver ga la yô, ka Kristu je ne lu eren Un kwaghbo ye. Nahan yô, aluer kwaghyan una hingir ityôkwagh i nan anmgbian wam gbev mbu nôngon yô, mayange me kera ya inyam ga, sha u i̱ de ne anmgbian wam gbev mbu nôngon ga yô.”—1 Mbakorinte 8:12, 13.
8. Ka akaabo a nyi or nana fatyô u tagher a mi zum u nan lu eren anumbe a sha kômputa shin nan lu nengen icer i vidio?
8 Icer i vidio kua í i yer ér DVD la man anumbe a sha kômputa de ishar ken kasua. Akaa a nan se msaanyol ne agen nga a kwaghbo ker ga; nga sha ci u hômon a hôm kwagh tseegh, kpa ayange ne anumbe a sha kômputa kua icer i vidio man í DVD ngi tesen akaa a Bibilo i vende seer a seer. Sha mimi yô, aluer or ngu eren inumbe man gba u nana er kwagh inja er nan ngu vihin ior iyol shin nan ngu wuan ve gayô nan ngu eren ma dang ugen u vihin tsung nahan shi ka kwaghhômon tseegh je kpa? Yehova kôr mba “ipira i doo” ve ishima la ihyom. (Pasalmi 11:5; Anzaakaa 3:31; Mbakolose 3:5, 6) Aluer u ngu eren inumbe man ngi jiren hua ken a we shin tswam, shi ngi nan we ishimavihin gayô ngi yan we shighe yô, fa wer inumbe la ngi vihin mlu wou u ken jijingi, nahan de i faa je.—Mateu 18:8, 9.
Gbenda u Se Er Akaa a Nan Se Msaanyol sha Inja Yô
9, 10. Mbakavenkwagh vea fatyô u eren akaa a nan ve msaanyol nena?
9 Ashighe agen Mbakristu ka ve pine ér: “Ka iemberyolough i nyi nahan i lu i voughloo? Iemberyolough i tar ne u eren kpishi zua sha atindiakaa a Aôndo ga.” Nahan kpa fa wer, ugurgurmbaakaav mba dedoo mba nan se msaanyol mbá mba se fatyô u eren yô, kpa taver u fan ve tsô. Nahan gba u se vande wan agoyol tsuaa sha kwagh ne, hemban je yô mbamaren. Mbagenev kpishi zua a igbenda i dedoo i man ahumbe a tsombor ve man mba ken tiônnongo kpaa. Ka sea tema vea mbagenev sea yaan kwagh sea lamen sha akaa a a er ken iyange shin sha akaa a ken Bibilo nahan i doo kpishi shi kwagh ne ka a wase u maan se kpaa. Shi se fatyô u sôron ian veren sha u duen kera za yan kwagh imôngo shin eren anumbe a injaa shin za nengen ajiir a dedoo kpaa. Iemberyolough ingin nahan ngi ne se msaanyol man mkpeyol.
10 Ortamen u ken tiônnongo ugen, u un vea kwase na yange ve yese ônov utar yô nger ér: “Hii shighe u ônov asev lu iyev la je, sea soo u zan memyol mape yô se pine ve pe se za yô. Ashighe agen, yange se kaa a hanma ve ser nana lôhô ijende i nan i shima shima, nahan memyol la a hôm kpen kpen. Shi kwagh u doon una er ve yô se ember a ve imôngo. Ashighe agen yange se lôhô anngôôv asev kua azende a ase a ken tiônnongo iwer hen ya wase. Yange se za yôr mape se ya her shi se er anumbe kpaa. Shi ashighe agen yô se naha mato se yem sha iwo, nahan i lu se shighe u henen kwagh u akaa a Yehova a gbe la.”
11, 12. (a) Hanma shighe u ú soo u eren iniongo cii, ú fatyô u lôhôn mbagenev nena? (b) Se mbagenev kpishi, ka nyi iniongo nahan ka i hungur se mayange ga?
11 Aluer ú soo u eren iniongo shin a̱ lu tsombor wou kpaa, ú nenge wer doo u ú lôhô mbagenev kpaa ga he? Lôhô mbagenev er kwasecôghol shin orukwa shin tsombor u lun a ter tseegh shin ngô tseegh nahan, sha er ishima ia taver ve yô. (Luka 14:12–14) Shi mba ve hii a hii u van mbamkombo kpa u fatyô u lôhôn ve, nahan kpa ver ishima, ieren ve i de benden a mbagenev sha gbenda u bo ga. (2 Timoteu 2:20, 21) Aluer orbeenyol u lun uange de u zenden sha yô, se fatyô u eren kwaghyan za yan vea nan hen ya u nan.—Mbaheberu 13:1, 2.
12 Se mbagenev kpishi, ka sea za iniongo, a̱ yôr sea tema sea yaan, shi hanma or nana ôron er yange nan hingir Orkristu man kwagh u a wase nan u civir Aôndo sha jighjigh a uwer gba shio nahan, iniongo la i hungur se sha won ga. Se fatyô u ôron akaa a ken Bibilo a hanma or cii zum u se ze imba iniongo la yô. Mbayev kpa a fatyô u nan ve ian ér ve ôr kwagh. Akaaôron angan nahan doo kpishi; nga a wase se u taver ayol a ase asema, shi hanma or kpa ka nan ôr kwagh a ashe a cian shio.
13. Yesu man Paulu ver se ikyav i eren erdoo a mbagenev shi lumun erdoo u mbagenev nena?
13 Yesu yange eren erdoo a ior shi vendan erdoo u mbagenev ga, nahan a ver se ikyav i dedoo sha kwagh ne. Yange a̱ lôhô un iniongo yô, a tôô shighe la a ôr ior akaa a ken jijingi. (Luka 5:27–39; 10:42; 19:1–10; 24:28–32) Mbahenen nav mba tsuaa mbara dondo ikyav na ne. (Aerenakaa 2:46, 47) Paulu nger ér: “Gadia hangem pe zuan ishigh a ven sha u ma m ne ne ma iwua i sha mrumun u sha mhôôn sha u taver ne yô. Inja na yô, se cii ma i taver se asema a ven imôngo sha jighjigh wase u nan ayol a ase, u wen kpaa, u wam kpaa.” (Mbaromanu 1:11, 12) Se kpa, aluer se mba eren iniongo yô, i lu i ia wase se u taver ayol a ase asema yô.—Mbaromanu 12:13; 15:1, 2.
Akaa a i Doo u Se Fa shi Se Wa Ikyo sha mi Yô
14. Er nan ve i doo u se er zegeiniongo ga?
14 Ashighe kpishi zegeiniongo ka i taver u nengen sha mi, nahan doo u se er iniongo i vesen keng ga. Icombor kpuaa ia fatyô u eren iniongo imôngo shin eren ma inumbe i gesa u gban a lu ker ga yô. Kpa i de lu shighe u tiônnongo a lu eren mkombo shin shighe u i lu duen kwaghpasen shin i lu eren ma tom ugen ken tiônnongo ga. Mbatamen man udiakon shin anmgbianev mbagenev mba ve taver ken jijingi ka vea lu hen iniongo yô, ieren ve i bende a mbagenev sha gbenda u dedoo nahan iniongo la i hemba kundun iyol cii.
15. Er nan ve i doo u or nana nenge sha iniongo i nan lehe mbagenev la tsembelee?
15 Aluer or ngu eren iniongo yô, i de hungur nan u nengen sha i tsembelee ga, sha er nana fa kwagh u a lu zan hemen her yô. Shin er erdoo u eren a mbagenev i lu kwagh u doon hanma wase nahan kpa, aluer or za iniongo hen ya wou, man u wa ikyo sha i tsembelee ga, nahan nan nôngo gbev sha kwagh u nan nenge a mi hen iniongo la nahan á vihi u ga he? Nenge ase kwaghwan u injaa u a lu ken Duteronomi 22:8 ne. Oriserael yange nana maa iyou i he yô, i gba u nana wa igyar sha haav mbu i sha, ape mbayaav teman a mbavannya la, nana kase cica cii. Sha ci u nyi? “Sha er [nana] va a ibo i awambe sha iyou [i nan] ga, aluer or nana osogh sha nana gba yô.” Nahan we kpa, doo u ú er kwagh u una wase u ú nenge sha mba u lehe ve iniongo la, shi u wa mkpeyol ve u ken jijingi ikyo kpaa yô. Kpa ú ngu wer, ka u ú gema u wa ve atindi hen iniongo shon côu côu ga.
16. Aluer mba nan ior msôrom hen iniongo yô, doo u a er kwagh sha kwaghfan nena?
16 Aluer mba nan ior ikyôhô hen iniongo yô, doo u a er kwagh sha kwaghfan. Mbakristu kpishi ka vea lôhô ior iniongo yô, mba gbe nan ve ikyôhô ér hanma or nana ma sha ishima i nan ga. Doo u se er kwagh u una na mbagenev gbev mbu nôngon, shin una mee or nana ma msôrom kpishi ga. (Mbaefese 5:18, 19) Atôakyaa nga kpishi a mbagenev ve me msôrom hen iniongo ga yô. Ityar kpishi ver anyom a or a kuma ve nana ma msôrom yô. Nahan sea hen ser tindi u i we la doo kuma ga je kpa, ka a inja u Mbakristu vea kura atindi a Shisar.—Mbaromanu 13:5.
17. (a) Aluer or lôhô ior iniongo man gba u a kuhwa ityogholough her yô, doo u nana tsua a tsua ityogholough mbi a kuhwa la sha ci u nyi? (b) Aluer mba vinen amar hen iniongo yô, gba u a vine a akuma akuma nena?
17 Or u nan lehe mbagenev iniongo la nana ver ishima sha er ityogholough man amar shin nyityô iniumbe i i lu eren hen iniongo shon cii ia zua sha atindiakaa a Mbakristu yô. Ior soo ityogholough kposo kposo, shi ityogholough mbi ngee. Kpa, ityogholough mbi ainge kpishi sue ihyembeato man idya i eren kua ipila kpaa. Nahan yô, doo u se tsua a tsua mbi se ungwa yô. Saa ityogholough mbia lu lugh lugh ken ato keng ve mbia doo ga, nahan kpa mbi de gem kenden a kende isharen i jimbagh ken ior ga shi i de koho mbi genger genger ga. Doo u se na or u nan koho ityogholough genger genger ian ser nana lu ityough sha ityogholough mbi kuhwan hen iniongo ga. Sha mimi yô, nyityô amar a doon ga, a i lu vinen tôndon iwenge shi tsongor atumba sha u kenden isharen i jimbagh ken or cii doo sha ci u Mbakristu ga.—1 Timoteu 2:8–10.
18. Aluer mbamaren mba fan akaa a i lu eren hen uiniongo mba ônov vev ve ze nahan, vea kura ve nena?
18 Mbamaren mba ve lu Mbakristu ve nôngo u fan kwagh u i we ishima u eren hen iniongo i i lehe ônov vev yô, shi doo u ashighe agen yô, vea za i a ve imôngo kpaa. Kpa kwagh er vihi yô, mbamaren mbagenev de ônov vev za iniongo i or môm lu nengen sha mi ga yô, i̱ ior er idya her kua aeren a dang agen kpaa yô. (Mbaefese 6:1–4) Aluer gumor zulum anyom ikyundu shi nan ngu eren kwagh sha gbenda u a fatyô u na nan jighjigh je kpa, doo u a wase nan nana “yevese asaren a sha inja i mbayevikyaior la.”—2 Timoteu 2:22.
19. Kanyi se fa ve ia wase se u veren ishima sha kwagh u i doo u se “vande keren” laa?
19 Ahumbe a man sha ashighe ashighe kua iemberyolough i vough man i kundunyol ka i na se iember kpishi. Yehova yange se iemberyolough ingin nahan ga, kpa sha mimi yô se fa ser akaa angan nahan tseegh yô aa wase se u koson akaa a injaa a ken jijingi sha ga. (Mateu 6:19–21) Ngise Yesu wase mbahenen nav ve kav er u “keren . . . tartor [u Aôndo] man perapera Na” la i lu kwagh u hemban lun a inja ken uma yô, ka kwagh u or nana ya shin nana ma shin nana zer la i hembe lun kwagh u vesen ga, gadia “akaa ne cii atôatyev nga keren a.”—Mateu 6:31–34.
20. Ka akaa a dedoo a nyi mbatomov mba Yehova mba jighjigh vea fatyô u veren ashe ér Uhembancii la una na ve?
20 Sha kpôô yô, aluer sea “yaan kwagh, shin [sea] maan kwagh shin [sea] eren nyityô kwagh kpaa,” se fatyô u “eren . . . akaa cii sha ci u icivir i Aôndo,” shi sughun Uhembancii u a ne se akaa a dedoo a i gbe u se eren kwagh a mi akuma akuma sha ci u iwasen yase la. (1 Mbakorinte 10:31) Ken tar u Paradiso u ica a gba ga tsô se nyôr ker la, uiniongo vea lu kpishi mba se za hemen u eren sha u ember erdoo u Yehova gbem sha won yô, kua shighe u kohol imôngo sha gbenda u vough a mba ve kor atindi a na a perapera la kpaa.—Pasalmi 145:16; Yesaia 25:6; 2 Mbakorinte 7:1.
Ú Umbur Kpa?
• Er nan ve i taver Mbakristu mba ainge kpishi u eren akaa a dedoo a nan ve msaanyoloo?
• Ka iemberyolough i nyi nahan i ne icombor i Mbakristu msaanyoloo?
• Zum u se lu eren iniongo i sha inja yô, ka akaa a nyi nahan i doo u se fa shi se wa ikyo sha mini?
[Study Questions]
[Picture on page 20]
Tsua iemberyolough i dedoo
[Pictures on page 21]
Ka ugurgur mba nyi nahan Mbakristu ve eren ga?