Zenden Ken Iwanger I I Lu Tan Seer A Seer ne
Zenden Ken Iwanger I I Lu Tan Seer A Seer ne
“Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha sha tembe.”—ANZAAKAA 4:18.
1, 2. Iwanger i ken jijingi i Yehova a lu seer tan ne ngi wasen ior nav nena?
OR MÔM u nana fatyô u pasen er iwanger i hembe ime tahav er Yehova je kpa nan ngu ga, gadia ka hen a na iwanger i dugh ye. (Pasalmi 36:9) Aôndo kaa ér ‘sev ka mbu a av a kôr sha akighir a tar yô, i gema u er inyandor i i ver ikyav sha mi nahan; akaa cii a due ken igbar er ikondo yô.’ (Yobu 38:12–14) Iyange ka ia kôndon sha tembe yô, iwanger i ta sha akaa nahan a due tseer tseer er ka a kume inyatyuu a maa kwagh a mi ve a doo kenger nahan.
2 Yehova te iwanger i ken jijingi kpaa. (Pasalmi 43:3) Tar ngu ken angôghime, nahan kpa Aôndo ngu tan ior nav iwanger. Iwanger shon wase ve nena? Bibilo kaa ér: “Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha sha tembe.” (Anzaakaa 4:18) Iwanger i Yehova a lu seer tan ior nav ne ngi wanger gbenda ve. Ngi sôron nongoior na man atesen a ve kua aeren a ve kpaa.
Iwanger I ken Jijingi i I lu Tan Seer a Seer Ne Ngi Wasen u Sôron Nongo u Yehova
3. Ka ityendezwa i nyi i er ken Yesaia 60:17?
3 Yehova ôr kwagh sha ikyev i profeti Yesaia ér: “Me va a zenaria sha ityough ki togula, shi Me va a azurfa sha ityough ki iyôgh, togula sha ityough ki kon, iyôgh sha ityough ki awen.” (Yesaia 60:17) U tôôn kwagh u a lu a inja kpishi veren sha ityough ki kwagh u a yen la tese mzehemen, nahan Mbashiada mba Yehova mba zuan a mzehemen sha akaa a i lu sôron ken nongo ve sha shighe u ‘mkurtar’ shin “ayange a masejime” ne.—Mateu 24:3; 2 Timoteu 3:1.
4. Kanyi yange i sôr ken inyom i 1919 laa, man kwagh ne wase nena?
4 Sha shighe u ayange a masejime hii la, i yilan Mbashiada mba Yehova ér Mbahenen Bibilo. Hen shighe la, í eren ishangen ken atôônanongo í tsuan mbatamen man udiakon. Nahan kpa, mbatamen mbagenev lu a gbashima u eren tom u pasen kwagh ga. Mbagenev yange ve soo u eren tom u pasen kwagh la ga, shi ve lu yangen mbagenev kpaa u pasen kwagh. Nahan mba ker ken inyom i 1919 yô, i ver orhemen u nengen sha tomshiren ken hanma tiônnongo. Yange í eren ishangen man í tsuan orhemen u nengen sha tomshiren ken tiônnongo ga, kpa lu afishi a branci a ior mba Aôndo a tsua nan er Aôndo a tese la ye. Or u nengen sha tom u pasen kwagh la yange nan tese er a er tom shon shi nan tese uharegh mba a pase kwagh kpaa, shi nan taver anmgbianev asema ér ve duen kwaghpasen. Nahan, er anyom gba karen yô, i pase kwagh kpen kpen.
5. Kanyi yange i sôr ken kwavanyom u 1920 laa?
5 Ken inyom i 1922 la, Mbahenen Bibilo kumba mkohol u vesen ken gar u Cedar Point, ken ipaventar i Ohio ken tar u Amerika. Yange i taver hanma or ken tiônnongo ishima ér nana ‘yôô angwe u Tor man tartor na’ kpaa. Ken inyom i 1927 la i hide i sôr tom u pasen kwagh, nahan i tsua iyange i Lahadi ér ka iyange i i hembe doon u pasen kwagh sha uya uya yô. Er nan ve lu iyange la keng i tsuaa? Lu sha ci u ior kpishi hemban lun hen ya sha iyange i Lahadi. Nyian kpa, Mbashiada mba Yehova mba hembe zan sha uyaav mba iorov sha ashighe a ve hembe lun her, er aikighe man sha mbee u sati nahan.
6. Ka iceghzwa i nyi yange i er ken inyom i 1931, man kwagh ne na yô, i er tom u yôôn angwe u Tartor nana?
6 Sha iyange i Lahadi, Julai 26, 1931 la, i er kwagh u vesen u na ve tom u yôôn angwe u Tartor ne za ikyura yô. Yange i er iceghzwa sha mkohol u vesen u i kumba ken gar u Columbus, Ohio ken tar u Amerika la. Hanma or lumun iceghzwa ne, mba been yô shi i er i̱ tar sha won cii. Iceghzwa shon kaa ér: “Se mba mbatomov mba Yehova Aôndo, i wa se tom sha ikyev ér se er ken iti na shi se kura tindi na, se er shiada sha kwagh u Yesu Kristu, shi se pase ior ser Yehova ka Aôndo u mimi man u Hemban tswen; sha nahan yô, se lumun ser se ngohol iti i Ter Aôndo a ne se sha zwa na ne saan saan, se soo ser i yilan se ér Mbashiada mba Yehova.” (Yesaia 43:10) Iti i he la yange i pase tom u hanma or u i yer nan sha í la nana er yô. Sha mimi yô, Yehova yange na hanma or u civir un cii tom ér nana er. Man hanma or yange nan er tom ne sha ishimatseen.
7. Kanyi yange i sôr ken inyom i 1932, man lu sha ci u nyi?
7 Mbatamen kpishi yange ve hide a iyol ijime ve er tom u pasen kwagh. Kpa, sha ajiir agen yô, mbatamen mbagenev mba i er ishangen i tsua ve la venda mhen u i due a mi ér gba u hanma or ken tiônnongo nana pasen kwagh la. Kpa, ica i gbe ga yô, i va ta iwanger sha kwagh ne. Mba ker ken inyom i 1932 yô, i wa atôônanongo cii kwagh ken Iyoukura ér a de u eren ishangen tsuan mbatamen man udiakon. Kpa, a eren ishangen a tsuan kômatii u nengen sha tomshiren, kômatii ne lu ior mba vian ken jijingi mba ve eren tom u pasen kwagh yô. Nahan, lu ior mba ve eren tom u pasen kwagh kpoghuloo tseegh gema hemen tiônnongo ye, kwagh ne na yô, tom u pasen kwagh za hemen kpen kpen.
Iwanger i I Lu Tan Seer a Seer Ne Wase u Sôron Akaa
8. Ka kwagh ugen u nyi yange i sôr ken inyom i 1938?
8 Iwanger ne lu tan “seer a seer,” nahan mba ker ken inyom i 1938 yô i de ishangen i eren. Nahan lu “wanakiriki u jighjigh man u fan kwagh” gema veren ior sha tom ken tiônnongo er Ruamabera a tese la ye. (Mateu 24:45–47) Hanmaor ken tiônnongo u Mbashiada mba Yehova nôngo u lumun gbenda u veren ior sha tom ne, nahan i za hemen u pasen kwagh doo doo.
9. Ka mhen u nyi yange i due a mi ken inyom i 1972, man kwagh ne lu mzehemen nena?
9 Sha mhii u uwer u Oktoba 1, 1972 la, i due a mhen ugen sha kwagh u hemen tiônnongo. Yange i ver mzough u mbatamen ken atôônanongo a Mbashiada mba Yehova tar sha won cii ér a hemen, kera lu or môm tseegh hemen tiônnongo ga. Gbenda u he u tsuan mbahemen ne wase anmgbianev mba ve via ken jijingi kpishi kuma u hemen tiônnongo. (1 Timoteu 3:1–7) Kwagh ne na yô, anmgbianev kpishi zua a mfe u eren ityom i ken tiônnongo tsembelee. Anmgbianev mban wase mbahev kpishi mba ve ngohol mimi u ken Bibilo la kpen kpen!
10. Kanyi yange i sôr ken inyom i 1976?
10 Yange i pav Mbahemenev mba Shin Tine ken ukômatii ateratar, nahan sha mhii u uwer u Janawari 1, 1976 la, ukômatii mban hii u nengen sha ityom í í eren ken nongo ne man í ken atôônanongo a sha tar cii la. Er i lu “mbawasenmhen imôngo” ve lu hemen hanma vegher u tom u Tartor ne yô, kwagh ne wase kpishi je!—Anzaakaa 15:22; 24:1–34.
11. Kanyi yange i sôr ken inyom i 1992, man lu sha ci u nyi?
11 Ken inyom i 1992 la i sôr kwagh ugen u a zough sha kwagh u Mbaiserael mough ken Babilon hide ken tar ve ve er la. Hen shighe la, Mbalevi mba eren tom ken tempel vese iyenge ga. Nahan i seer mbasôrontempel mba ve lu marnya u Iserael ga la tom ér ve wasen Mbalevi. Nahan, ken inyom i 1992 la kpaa í seer mbagen ken “iyôngo igen” tom ér ve wasen nongo u wanakiriki u jighjigh man u fan kwagh la u seer nengen sha tom u Tartor u i eren shin tar ne. Yange i tsua ve ér ve wasen ukômatii mba Mbahemenev mba shin Tine la.—Yohane 10:16.
12. Yehova ‘ver bem ér a̱ lu orkurantar’ nena?
12 Akaa a i sôr ne cii wase nena? Yehova kaa ér, “me ver bem a̱ lu orkurantar wou man perapera a̱ lu ityoor wou.” (Yesaia 60:17) Ior mba Yehova mba ken “bem” nyian, shi “perapera” doo ve ishima, nahan ngu “ityoor” ve, ka un a lu mgbeghan ve u civir Aôndo ye. Mba ken mzough mba eren tom u pasen kwagh u Tartor shi geman ior hingir mbahenen la.—Mateu 24:14; 28:19, 20.
Yehova Ta Iwanger sha Atesen
13. Yehova yange ta iwanger sha atesen a ior nav ken kwavanyom u 1920 la nena?
13 Yehova ngu tan ior nav iwanger sha atesen a ve kpaa. Mpase 12:1–9 tese er Yehova a lu eren kwagh ne yô. Avur ne ôr kwagh u akaa a sha ikyav atar—A ôr kwagh u “kwase” u lun iyav u a mar yô man “zegedarakon” kua “wan u nomso.” Ú fa kwagh u akaa ne a til sha mi kpa? Yange i pase kwagh u akav ne ken Iyoukura [zwa Buter] i Maaci 1, 1925 sha itinekwagh i i kaa ér “Birth of the Nations” la. Ngeren la ta ior mba Aôndo iwanger sha akaaôron a profeti a sha kwagh u m-mar u Tartor; mkav u ior mba Aôndo zua a mi ne wase ve u fan ér iniongo ngi ihiar—nongo u Yehova man u Satan. Mba ker ken inyom i 1927 man 1928 yô, ior mba Aôndo shi kav er Ruamabera a vende Kirimishi i ember man iyange i mar yô, nahan ve de u ember uiniongo mban.
14. Ka iwanger i nyi yange i zua a mi sha atesen agen ken kwavanyom u 1930 laa?
14 Ken kwavanyom u 1930 la, Yehova seer tan ior nav iwanger sha atesen a ken Bibilo atar nena? Anyom imôngo cii man shighe ne yô, mbahenen Bibilo fa ér “zegeikpelaior” i̱ í er kwagh u i̱ ken Mpase 7:9–17 la ngi kposo a mba 144,000, mba i tsough ve ér ve za ya tor a Kristu sha shi ve lu upristi kpaa la. (Mpase 7:9–17; 5:9, 10; 14:1–5) Nahan kpa, ve lu a fa kwagh u zegeikpelaior ne i wanger ve ga. Mba ker ken inyom i 1935 yô, i va fa ér zegeikpelaior la ka mba vea war “zegecan,” mba ve lu a ishimaverenkeghen i va lun shin tar gbem sha won la; kwagh ne yange wanger ve vough er sev ka mbua aven ve akaa a duen ken igbar nahan. Shi ken inyom shon i môm i seer zuan a iwanger sha kwagh u wasen mbayev mba Mbashiada mba Yehova ken ityar kposo kposo, mba ve kom u zan makeranta yô. Hen shighe u i wa tindi taveraa sha tar cii ér saa hanma wanyemakeranta nana civir tuta la, Mbashiada mba Yehova zua a iwanger ér tuta u sughun ka di u veren uwegh sha vanger shin sha icugh tseegh tsô ga, ka u civir u jighilii. Ka hurugh inyom igen yô shi i ta iwanger sha ityesen igen ér Kristu kpe sha kon, ka sha terankon ga.—Aerenakaa 10:39.
15. Ka hanma shighe yange i seer zuan a iwanger sha kwagh u awambe, man i zua a i nena?
15 Shighe u Ityav mbi Tar Cii mbi sha Uhar bee ica lu a gba ga la, i eren ushoja mba vihin ayol ken utya twer sha awambe. Hen shighe la ior mba Aôndo seer zuan a iwanger ér awambe ka icighan kwagh. Iyoukura i Julai 1, 1945 la yange i taver “hanma or u civir Yehova, u nan soo ér nana zua a uma u tsôron ken tar u perapera la cii ishima ér nana nyagh awambe, shi nana dondo kwaghwan u Aôndo sha kwagh u awambe la kpaa.”
16. Ka hanma inyom i due a New World Translation of the Holy Scriptures, man ngi a akaa ahar a injaa a nyi?
16 Ken inyom i 1946 la, i nenge ér doo u a gema Bibilo i i hembe wanger shi i̱ lu a atesen a Mbakristu Mbaaiev ker ga yô. I hii u geman i ken uwer u Disemba 1947. Nahan ken inyom i 1950 la, i due a Bibilo i New World Translation of the Christian Greek Scriptures. I gber Ruamabera u ken Zwa Heberu la ken zwa Buter atihi ataan, i lu duen a mi sha adondo adondo, i hii duen a tihi u hiihii la ken inyom i 1953. Anyom nga kar 12, hii shighe u i hii u geman i la yô maa i due a tihi u masetyô la ken inyom i 1960. Mba ker ken inyom i 1961 yô, i gber New World Translation of the Holy Scriptures jimin cii i bee. I gber Bibilo i i lu a akaa a injaa ker kpishi ne ken ijô imôngo hegen. Ngi a iti i Aôndo, ka Yehova je la. Heela tseegh ga, i̱ gema akaa agen a ken zwa u yange i hii ngeren Bibilo ker tsuaa tsuaa la ken Bibilo i New World Translation ne kpôghôô, nahan kwagh ne wase ior u seer kaven Mkaanem ma Aôndo.
17. Ka iwanger i nyi yange i zua a mi ken inyom i 1962?
17 Ken inyom i 1962 la, i zua a iwanger sha kwagh u ‘tahav mbu se lu mbu sha ikyev,’ mbu i er kwagh u mbu ken Mbaromanu 13:1 la, shi i pase er i gbe u Mbakristu vea ungwan imo ve kpaa yô. Yange i time sha Mbaromanu ityough 13 man Titu 3:1, 2 man 1 Peteru 2:13, 17 vindi vindi, nahan i zua a iwanger wang ér ‘tahav mbu se lu mbu sha ikyev,’ mbu i er kwagh u mbu ken avur ne la ka Yehova Aôndo man Yesu Kristu ga, kpa ka gomoti u uumace.
18. Ka akaa a nyi nahan yange i zua a iwanger sha mi ken kwavanyom u 1980 laa?
18 Ken anyom a a dondo la, gbenda u mbaperapera za hemen u wanger a wanger. Ken inyom i 1985 la, i zua a iwanger sha kwagh u a lu u zan a ior ken ishô i nan man “uma” la kua sha kwagh u hingir ikyar i Aôndo i perapera la. (Mbaromanu 5:18; Yakobu 2:23) Mba ker ken inyom i 1987 yô, i zua a iwanger sha kwagh u a lu inyom i Jubili i Mbakristu la vindi vindi.
19. Yehova seer tan ior nav iwanger i ken jijingi ken anyom aa sember karen ne nena?
19 Ken inyom i 1995 la, i seer zuan a iwanger wang sha kwagh u paven “ivo” veren kposo a “iyôngo” la. Ken inyom i 1998 la di i zua a iwanger vindi vindi sha kwagh u tempel u Esekiel nenge a mi ken mpase u sha mnenge la, man mpase ne ngu a kure ga. Ken inyom i 1999 la, i pase shighe u ‘kwaghndôhôrshima la tile ken icighanjiir,’ man er kwagh shon a til kpaa yô. (Mateu 24:15, 16; 25:32) Ken inyom i 2002 di, i fa inja i u civir Aôndo “ken jijingi kua ken mimi” la.—Yohane 4:24.
20. Ka sha akaa agen a nyi nahan i te ior mba Aôndo iwanger sha mini?
20 Dugh akaa a i ser sha kwagh u nongo ne kua atesen kera yô, i sôr akaa sha kwagh u aeren a Mbakristu kpaa. Ikyav i tesen yô, ken inyom i 1973 la i nenge ér taav ka “kwagh u hôngorough . . . ken iyol,” nahan taav u man lu kwaghbo u vesen. (2 Mbakorinte 7:1) Anyom nga karen pue yô, i va ta iwanger ken Iyoukura i Julai 15, 1983 la ér doo u lun a ikyav mbi tswamev ga. Ka akav kpuaa a a tese iwanger i i lu tan sha shighe wase ne je ne.
Za Hemen u Zenden ken Iwanger i I Lu Tan Seer a Seer Ne
21. Ka ieren i nyi ia wase se u zenden ken iwanger i i lu tan seer nee?
21 Anmgbian ugen u a lu ortamen ica i gbe yô, kaa ér: “Ka i taver kpishi u lumun a kwagh u i hidi i ser, shi eren sha mi kpaa.” Anmgbian ne er tom u pasen kwagh anyom 48, nahan lu nyi i wase un u lumun akaa á í sôr ken anyom ne ciilii? A kaa ér: “Kwagh u vesen u wasem yô, ka u lun a mnenge u vough. Aluer or lumun akaa a nongo ne u lu sôron ne ga yô, nongo ne ua yemen hemen kpa nan yô nana gbaan a gba ijime. Yange a̱ taver mo u lumun akaa agen a i ser yô, m hide m gbidye kwar sha mkaanem ma Peteru ôr a Yesu la. A kaa a na ér: ‘Tere, ka hen an je shi sé zaa? Ka We U lu a mkaanem ma uma u tsôron ye.’ Nahan m hide m pine iyol yam mer, ‘Ka han me yemee—ka ken ime i tar nee shinii?’ Kwagh ne wasem u tilen a nongo u Aôndo ne dông.”—Yohane 6:68.
22. Ka iwasen i nyi se zough a mi sha u zenden ken iwangere?
22 Ior mba ve lu civir Aôndo ga cii mba ken angôghime. Yehova ngu tan ior nav iwanger nahan mba hemban lun paleghaa a mba ve lu civir Aôndo ga la cii. Iwanger ne ngi wasen se nena? Di er iwanger ka ia ta shin agber kpa i kar a agber la kera ga nahan, iwanger i Mkaanem ma Aôndo kpaa ngi karen a mbamyen asev kera ga. Kpa iwanger i Aôndo ngi wasen se u nôngon a mbamyen mban sha er se za hemen u zenden ken iwanger i i lu tan seer a seer ne yô. Nahan se za nen hemen u veren ishima sha akaaôron a profeti a Yehova, er ka “imenger i i wanger ken ijiir i wan ime nahan.”—2 Peteru 1:19.
Baver We Kpa?
• Ka akaa a nyi Yehova a sôr ken nongo na?
• Iwanger i i lu tan seer a seer ne sôr atesen nena?
• Ka akaa a nyi nahan u nenge i ser ken nongo nee, man ka nyi i wase ú u lumun á?
• Er nan ve u soo wer u za hemen u zenden ken iwanger i i lu tan seer a seer nee?
[Study Questions]
[Pictures on page 15]
Mkohol u vesen u i kumba ken gar u Cedar Point, Ohio la taver Mbahenen Bibilo asema u eren Aôndo tom
[Picture on page 17]
Anmgbian N.H. Knorr due a “New World Translation of the Christian Greek Scriptures” ken inyom i 1950
[Picture Credit Line on page 14]
© 2003 BiblePlaces.com