Bibilo I Henen Ka Kwagh u Saanyol

BIBILO ngi a akaaôron a mimi a a dugh hen Aôndo yô. I̱ ôr se ityôkyaa i se lu uma, man er i hii ve ior ve lu yan ican man er uma una lu ken hemen yô. I̱ tese se er se zua a msaanyol u mimi man er se ya ikyar a ior man er se sôr mbamzeyol asev yô. U hemban je yô, i̱ ôr se kwagh u Yehova, Orgban wase u a lu Ter wase u sha, Yehova la. Ka sea faan akaa ne cii yô, i saan se iyol shi i pever se iyol kpaa.

Bibilo kar mfe u fan Aôndo sha kwaghyan. Yesu kaa er: “Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.” (Mateu 4:4; Mbaheberu 5:12–14) Aluer se soo ser se zua a uma u tsôron u Aôndo a tende zwa la yô, gba hange hange u se ôron Mkaanem ma Aôndo hanma shighe cii, di vough er i lu hange hange u yan kwagh u dedoo hanma shighe ser se lu uma nahan.

Ka doon se u yan kwagh sha ci u i gba se a isharen i yan kwagh, shi se mba ye kwagh ser ijen kôr se. Nahan kpa, aluer se soo ser i saan se iyol yô, se mba a mgbe u vesen ugen u i gbe u se kure yô. Yesu kaa ér: “Saan mba ve lu mbaibanave ken jijingi la iyol.” (Mateu 5:3) Se fatyô u zuan a msaanyol ne sha u fan Mkaanem ma Aôndo.

Sha mimi yô, mbagenev kpishi nenge ér taver u fan Bibilo. U tesen ikyav yô, aluer u ôr avur a Bibilo a a er kwagh u aeren a mbatsev shin avur a á er kwagh sha anzaakaa la yô, alaghga a gba u or a wase u ve ú fa kwagh u avur la a lu ôron ye. Heela tseegh ga, avur a Bibilo agen ôr akaaôron a profeti sha ikyav, akaaôron ne ka aa se gba ôron tsô man se kav fese ga, saa se ôr avur a Bibilo agen a a er kwagh sha kwagh shon kpaa  ve se fa ye. (Daniel 7: 1–7; Mpase 13:1, 2) Er i lu nahan je kpa, u fatyô u fan Bibilo. U hen wer kwagh a fatyô u lun nahana?

Hanma Or Ngu a Ian i Ôron Bibilo Saan Saan

Bibilo ka Mkaanem ma Aôndo. I̱ ôr se mbaawashima nav. U hen wer Aôndo una na se takerada u ú taver u kaven shin u̱ i lu mbafantakerada tseegh vea fatyô u kaven ú yôô? Ei, Yehova una er nahan ga. Kristu Yesu kaa er: “Ka hanmô wen u nan lu ter man wan u nan una sôn nan ishu, man nana gema a na nan iyô sha ityough ki ishu la ase! Shin una sôn ijikyegh, man nana gema á na un iyese! Aluer ne mba ne lu mbaaferev je kpaa ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” (Luka 11:11–13) Sha nahan yô, we kpa u fatyô u fan Bibilo man shi aluer u pine Aôndo a ishima i môm yô, Una na u iwasen sha er ú fa Mkaanem nam yô. Sha kpôô yô, mbayev mba kiriki je kpa vea fatyô u kôron atesen a Bibilo a kiriki a ve hen la saan a mi shi eren sha mi kpaa!—2 Timoteu 3:15.

Gba u se nôngo kpoghuloo ve se kav akaaôron a Bibilo ye, man aluer se kav a yô aa taver se ishima kpishi. Shighe u Yesu nder shin ku la, a ande hen mbahenen nav uhar, a gba pasen ve akaaôron a profeti a Bibilo. Ngeren u Luka la kaa ér: “Á hii sha Mose kua uprofeti cii, A gba pasen ve akaa a sha iyol Na ken icighanruamabera cii.” Kanyi yange i due kere? Er ve hide ve gba gbidyen kwar sha akaa a ve ungwa aikighe la yô, ve gba kaan ayol a ve ér: “Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa?” (Luka 24:13–32) Mkav u ve kav Mkaanem ma Aôndo la na ve msaanyol, sha ci u kwagh ne taver jighjigh u ve na ér Aôndo una kure uityendezwa nav la, shi na ve ishimaveren ér tar u a doo ken hemen.

U nôngon ser se fa Mkaanem ma Aôndo la ka kwagh u yuhwan ga, kpa ka kwagh u saan iyol man u injaa kpishi, ka di vough er ka i saan se iyol shighe u se ye kwaghyan u doon nahan. Kanyi í gbe u se er ve se fa Mkaanem ma Aôndo? Ngeren u a dondo ne una tese se er se zua a “mfe u fan Aôndo” yô.—Anzaakaa 2:1–5.

[Picture on page 4]

Yehova ngu er ter u fan kwagh nahan, gadia ne se icighan jijingi na ér a wase se u fan Bibilo.