Palegh Mcivir U Aiegh!
Palegh Mcivir U Aiegh!
“Due nen ken atô ve kera, lu nen kposo, kape Ter A kaa la, kwagh u hôngorough kpaa, de benden nen ave ga.”—2 MBAKORINTE 6:17.
1. Kanyi i gbe u mbaasemaamimi vea fa?
MBAASEMAAMIMI kpishi fa mimi sha kwagh u Aôndo ga, shi ve fa mlu u uumace u ken hemen kpaa ga. Er ve lu a fa mimi sha kwagh u Aôndo man mlu u uumace u ken hemen ga yô, mba ken mtsum shi ve fa kwagh u vea er jighilii kpaa ga. Ior umiliôn imôngo hingir ikpan i tsav mbu civir man akombo a sôron man ugurgur mba vihin Aôndo ishima. Alaghga azende a ou shin tsombor wou lumun a ityesen i igyamusu man i mbaaôndo utar ken môm la man ityesen i uma kpen ga la man atesen agen kpaa.
2. Kanyi mbahemenev mba kwaghaôndo ve ere, man kwagh ne gema va a nyi?
2 Kanyi i ne ve ior kpishi ve lu a mfe u mimi sha kwagh u Aôndo ga? Kwagh u kpilighyol yô, ka kwaghaôndo a ne ve kwagh a lu nahan ye. Ukwaghaôndo man mbahemenev mba kwaghaôndo due a atesen a Aôndo a lumun a mi ga yô. (Marku 7:7, 8) Kwagh ne na yô, ior kpishi hen ér mba civir Aôndo u mimi, kpa ve kera fa er ve lu vihin un a vihi ishima ga. Ka kwaghaôndo u aiegh jighilii a ne ve ior kpishi ve lu a mfe u mimi sha kwagh u Aôndo ga ye.
3. Ka an jighilii nan lu suen kwaghaôndo u aiegh, man Bibilo pase mlu na nena?
3 Orgen ngu u se nengen a na ga, u a lu suen kwaghaôndo u aiegh yô. Apostoli Paulu ôr kwagh na ér: “Aôndo u tar u ainge ne pir ve ashe a asema sha u ve̱ de nengen a iwanger i Loho u Dedoo u iengem i Kristu u A lu ibeen i Aôndo la ga” yô. (2 Mbakorinte 4:4) Ka Satan Diabolo jighilii a lu “aôndo u tar u ainge” ye. Ka un jim jim a lu suen mcivir u aiegh ye. Paulu nger ér: “Satan . . . ka a gema iyol na er ka ortyom u iwanger nahan. Nahan aluer mbatyomov nav kpaa vea gema ayol a ve er ka mbatyomov mba perapera yô, ka kwagh u kpiligh iyol ga.” (2 Mbakorinte 11:14, 15) Satan ka a er kwagh u bo a lu inja er ka u dedoo nahan, nahan a tsugh ior ve lumun aie.
4. Tindi u Aôndo wa Mbaiserael mba ngise la ôr ve nyi sha kwagh u uprofeti mbaaieve?
4 Nahan se fa hegen wanger wanger er i hii ve Bibilo i vende ér se de nyer iyol ken mcivir u aiegh ga yô. U tesen ikyav yô, Tindi u sha Ikyev i Mose la yange venda a ior mba Aôndo ér ve de nyer nongo a uprofeti mbaaiev ga. Hanmaor u yange nana tesen ityesen i aiegh shi nana civir aôndo u aiegh cii ‘i wua nan sha ci u nan tese er i hendan kwagh a TER’ yô. Yange í wa Mbaiserael kwagh ér ve ‘dugh ifer ken a ve kera.’ (Duteronomi 13:1–5) Nahan, Yehova nengen kwaghaôndo u aiegh ér ka kwagh u ifer.—Esekiel 13:3.
5. Ka acin a tan a nyi i doo u se ungwa nyiana?
5 Kwaghaôndo u aiegh yange vihi Yesu Kristu man mbaapostoli nav ishima vough er Yehova nahan. Yesu ta mbahenen nav icin ér: “Kura nen ayol a en sha uprofeti mba aiev mba ve ve her a ven a akôv a iyôngo iyol, kpa ken atô ve yô, gema ka ugbaseela mba huav je.” (Mateu 7:15; Marku 13:22, 23) Apostoli Paulu nger ér: “Ka Sha man i lu pasen iyugh i Aôndo ye. Ngi van sha hanma mvende u i lu vendan Aôndo man sha hanma ifer i ior mba ve lu kighir mimi inya” cii. (Mbaromanu 1:18) Nahan doo u Mbakristu mba mimi vea ungwa icintan ne, shi vea palegh hanma or u nan kighir mimi u Mkaanem ma Aôndo inya shin nan samber a atesen a aiegh cii.—1 Yohane 4:1.
Due ken “Zegebabilon” Kera
6. I ôr kwagh u “Zegebabilon” ken Bibilo nena?
6 Nenge er takerada u Mpase u er kwagh u kwaghaôndo u aiegh yô. U pase ér kwaghaôndo u aiegh ngu er idyakwase u hunden msôrom u a lu a tahav sha ityartor kpishi man sha ior mba ve lu ken i la cii nahan. Kwase u sha injakwagh ne er idya a utor kpishi shi a hunde sha awambe a mbacivir Aôndo mba mimi. (Mpase 17:1, 2, 6, 18) I nger un iti sha icugh, iti shon zua sha inja na i dang man i hôngorough la. Iti shon ér “Zegebabilon, ngô u udyambakasev man shi akaa a ndôhôr ishima a shin tar kpaa.”—Mpase 17:5.
7, 8. Kwaghaôndo u aiegh er idya inja nena, man ka mbamzeyol mba nyi ve dugh kere?
7 Gbenda u Ruamabera a er kwagh u Zegebabilon la zua vough sha ukwaghaôndo mbaaiev mba sha tar cii. Er ukwaghaôndo udubu udubu ve tem imôngo, ve lumun ér vea lu ken mzough môm tar sha won jimin ga nahan kpa, awashima ve man ieren ve cii ngi i môm. Kwaghaôndo u aiegh ngu a tahav sha gomoti kpen kpen, vough er idyakwase u i er kwagh na ken takerada u Mpase la nahan. Kwaghaôndo u aiegh er idya, gadia ngu hian a utor mba tar ne, vough er kwase u a kor iceghzwa na i ivesegh ga nahan. Orhenen Yakobu nger ér: “Ne mbadyarev, ne fa er u yan ikyar a tar i lu u lun ihyom a Aôndo gaa? Nahan yô, or u i sar nan ka lun ikyar a tar yô, nan hingir orihyom u Aôndo je ve.”—Yakobu 4:4.
8 Akaa a kwaghaôndo u aiegh a lu eren a ugomoti ne va uumace a ican kpishi. U tesen ikyav yô, ikpurorfantakerada ugen ken Afrika u a tôvon sha akaa a taregh, i yer un ér Xolela Mangcu la kaa ér: “Akav nga kpishi a tesen inium i ior ve nenge ve woo ayol a ve sha ci u ave a ukwaghaôndo ve we sha akaa a patii la.” Heela tseegh ga, semberee ne, pipa i tôôn abaver igen kaa ér: “Inium i ior ve lu nôngon wuan mbagenev kpishi man ayôôso a ior ve lu eren nyian, a lu van a mzeyol ne cii ka kwaghaôndo a lu ave sha mi ye.” Ayôôso a kwaghaôndo a we ave sha mi wua ior umiliôn imôngo. Zegebabilon wua ior mba Aôndo mba mimi kpaa, je yô, afatyô u kaan ér a hunde sha awambe a ve la.—Mpase 18:24.
9. I pase er mcivir u aiegh a vihi Yehova ishima ken takerada u Mpase nena?
9 Kwagh u Bibilo i kaa ér una tser Zegebabilon la tese wanger wanger ér Yehova kôr mcivir u aiegh ihyom. Mpase 17:16 kaa ér: “Akor pue a u nenge a mi la kua inyam yô, vea kôr idyakwase la ihyom, vea ngohol un akaa, una hingir aveve una hungwa idyelegh, vea ya inyam na vea nande un sha usu.” Kwagh u zege inyamkyume la i hii eren yô, i kôr idyakwase la i ande avur avur. Kwagh u a shi her la cii í nande. Shi kpuaa tsô, ugomoti mba tar ne vea er kwagh nahan, vea mough num a kwaghaôndo u aiegh. A lu Aôndo iyolna je una mgbegha ugomoti mban ér ve er kwagh ne ye. (Mpase 17:17) Shi ciôn tsô, a tim Zegebabilon u a lu tartor u kwaghaôndo u aiegh sha tar cii la kera. Nahan, mayange “á kera zua a na” ga.—Mpase 18:21.
10. Gba u mtil wase a kwaghaôndo u aiegh una lu nena?
10 Gba u mbacivir Aôndo sha mimi vea tese mtil ve a Zegebabilon nena? Bibilo pase wanger wanger ér: “Due nen ken a na kera sha er né nyôr nongo sha asorabo a na ga, shi né ngohol atsan a tseren un la kpaa ga yô.” (Mpase 18:4) Mba ve soo ér vea va war yô, gba u vea due ken kwaghaôndo u aiegh kera, er shighe a shi her ne. Zum u Yesu Kristu lu shin tar la, a tsengakaan wener, ken ayange a masejime ne, ior kpishi vea senge ér mba dondon un. (Mateu 24:3–5) Kpa una kaa a ambaaior la ér: “Mayange je M ngu a fa ne ga, yem nen heen kera, ne mbavendanatindi mban.” (Mateu 7:23) Yesu Kristu u a lu Tor hegen ne venda kwaghaôndo u aiegh.
Se Palegh Mcivir u Aiegh Nena?
11. Se er nan ve se palegh mcivir u aiegh?
11 Gba u Mbakristu mba mimi vea palegh mcivir u aiegh man atesen a kwaghaôndo u aiegh kpaa. Mayange je se ungwa kwaghpasen ve sha redio shin sha televishen ga, shi se ôr ityakerada ve i i we Aôndo aiegh iyol kua Mkaanem nam la ga. (Pasalmi 119:37) Shi se zaan uiniongo vev man anumbe a ve kpaa ga. Heela tseegh ga, se mba suen mcivir u aiegh sha ma gbenda môm kpaa ga. (1 Mbakorinte 10:21) Aluer se palegh akaa ne yô, se kura ayol a ase, nahan or nana kera ‘yem a vese sha kwaghfan shin sha atseregh a gbilinigh a sha inja i ukaaer mba ior man sha inja i ujijingi mba taregh mba hiihii mba sha inja i Kristu a lu la ga.’—Mbakolose 2:8.
12. Or a due ken kwaghaôndo u aiegh kera nena?
12 Aluer or ngu ken kwaghaôndo u aiegh man nan soo ér nana hingir Orshiada u Yehova yô, nana er nan? Kwagh u nana er yô, nana nger washika nana pase kwaghaôndo u nan la wang ér nan kera ngu ken kwaghaôndo u aiegh la ga. Doo u or la nana vihi shighe ga, nana undu kwaghaôndo la sha er mcivir u aiegh una vihi nan ga yô. Ka hange hange u ieren i or u nan soo ér nana hingir Orshiada la ia tese mba ken kwaghaôndo u nan la kua ior mba nan cii wang ér nan kera ngu nongo a kwaghaôndo u aiegh ga.
13. Kanyi kwagh Bibilo i we se sha kwagh u mcivir u aiegh?
13 Apostoli Paulu nger ér: “I̱ de zough ne ken mzough u kpeegh sha igbur i môm a or u nan ne jighjigh ga, imôngo ga. Gadia perapera zua vea ifer sha nyi? Shin ka nyi mzough i lu hen iwanger a ime? Ka nyi i zough Kristu a Belial la? Shin ka sha nyi man kwagh u or u nan ne jighjigh a zua a u nan ne jighjigh ga laa? Ka nyi i zough tempel u Aôndo a akombo? . . . Nahan yô, due nen ken atô ve kera, lu nen kposo, kape Ter A kaa la, kwagh u hôngorough kpaa, de benden nen ave ga.” (2 Mbakorinte 6:14–17) Se er sha mkaanem man sha u palegh kwaghaôndo u aiegh. Kwaghwan u Paulu la tese ér kwagh môm kpa se de eren a mba ken kwaghaôndo u aiegh ga shinii?
“Zenden Nen sha Kwaghfan”
14. Gba u se palegh ior mba ken kwaghaôndo u aiegh jimin ciili? Pase ase yôô.
14 Gba u mbacivir Aôndo mba mimi vea er kwagh môm a mba ken kwaghaôndo u aiegh ga shinii? Shin gba u se palegh ior mba jighjigh ve a kaha a u wase la jimin ciili? Ka nahan ga. Tindi u sha uhar ken atindi a hemban la kaa ér: “Or u nan we ndor a we yô, nana̱ doo u ishima er we iyol you nahan.” (Mateu 22:39) Ka se tese ser mbawanndor a vese doo se ishima sha u pasen ve loho u dedoo u Tartor. Shi ka se tese ser ve doo se ishima sha u henen Bibilo a ve shi wasen ve sha u ve fa er i gbe u vea due ken mcivir u aiegh kera yô.
15. Inja i u ‘lun ior i tar ne ga’ ér nyi?
15 Se mba pasen mbawanndor a vese loho u dedoo, kpa er se lu mbadondon Yesu yô, se mba “ior i tar ne ga.” (Yohane 15:19) Inja i ishemberti i “tar” i i er kwagh u i heen ne yô, ka uumace mba ve lu paleghaa a Aôndo la. (Mbaefese 4:17–19; 1 Yohane 5:19) Se mba ior i tar ne ga sha ci u se palegh aeren kua alam a ior i tar ne a a vihi Yehova ishima la. (1 Yohane 2:15–17) Shi se mba eren sha kwaghwan u i we ér “ujende mba bov mba vihin mbamlu mba dedoo” la, sha nahan yô, se mba ye ikyar a ior mba ve eren aeren a Mbakristu ga la ga. (1 Mbakorinte 15:33) Nahan u se lun ior i tar ne ga yô, ka u se ‘kuran iyol yase wang sha kwagh u taregh.’ (Yakobu 1:27) Kwagh ne tese ér kwagh môm kpa se de eren a ior i tar ne ga ze ga.—Yohane 17:15, 16; 1 Mbakorinte 5:9, 10.
16, 17. Doo u Mbakristu vea eren a mba ve lu a fa mimi u ken Bibilo ga la nena?
16 Doo u se eren a ior mba ve fe mimi u ken Bibilo ga la nena? Paulu ngise nger tiônnongo u ken Kolose washika ér: “Zenden nen sha kwaghfan hen mba ve lu ken won la, man wa nen ian yen ikyo. Kwaghôron wen a̱ luun u doon gbem, u i we bar sha mi yô, sha u fa nen er i doo u nea ôr kwagh a hanma or yô.” (Mbakolose 4:5, 6) Apostoli Peteru nger ér: “Gema tsegha nen Kristu ken asema a en, A̱ lu Ter, waan nen ago iyol veren nen a ver sha u né na imo sha mpin u hanma or u nana pine ne ityôkyaa i ishimaverenkeghen i i lu ken a ven la, kpa i̱ lu sha ishima i legh legh man sha mcie kpaa.” (1 Peteru 3:15) Paulu di gema wa Mbakristu kwagh ér: “Ve̱ de er kwagh u dang sha ma or ga, ve̱ de lu mbanôngonnum ga, ve̱ lu a ishima i legh legh ve̱ hide a ayol a ve ijime hen ior cii.”—Titu 3:2.
17 Se Mbashiada mba Yehova se mba eren tswam shin nomor a ior ga. Shi se mba lamen a mba ken kwaghaôndo u aiegh dang kpaa ga. Nahan, or u se ze u za pasen nan kwagh shin orwanndor a vese shin mba se eren tom ijiir i môm a ve ka vea lam a vese dang je kpa, se er kwagh a ve sha kwaghfan.—Kolose 4:6; 2 Timoteu 2:24.
“Kwaghôron u Dedoo u U Zough a Mi hen Mo yô, A̱ Lu U Ikyav i Zan sha Mi”
18. Ka kwagh u vihin u nyi ka a er mba ve hidi ve yem ken mcivir u aiegh laa?
18 Aluer or fa mimi u ken Bibilo man nan hide nan yem ken mcivir u aiegh nahan a vihi kpen kpen! Bibilo pase kwagh u una er ambaaior la ér: “Aluer vea osogh vea war ihyôngor i tar kera sha mfe u ve fe Yesu Kristu, Ter wase man Oryiman wase la, kpa akaa ne á shi á kôr ve á hemba ve yô, mkur ve u masejime la hemba vihin a mlu ve u hiihii la. . . . Injakwaghôron i mimi ne kuma sha a ve vough er: Iwa suwa, shi hide ya, man shi: Ngôigo ôô iyol kpa shi hide vingir shin angbiôr.”—2 Peteru 2:20–22.
19. Er nan ve i doo u se lu sulaa sha nyityôkwagh i ia vihi mlu wase u ken jijingi ciilii?
19 Akaa a vihin mlu wase u ken jijingi aa de lun ga, nahan gba u se lu sulaa sha er se palegh a yô. Apostoli Paulu ta se icin ér: “Sha ayange a masejime yô, mbagenev vea undu jighjigh u nan, vea ver ishima sha ujijingi mba tsughun ior man sha ityesen i ujijingi mba bov.” (1 Timoteu 4:1) Se mba ken mkur u “ayange a masejime” ne. Mba ve palegh mcivir u aiegh ga yô, a ‘daase a ve a yem a ve wue wue sha ahumbe a ityesen, sha atseregh a ior, sha mtsugh u tsughun ior tsumen a ve sha wayo la.’—Mbaefese 4:13, 14.
20. Se kura iyol yase sha aeren a kwaghaôndo u aiegh a aa vihi se la nena?
20 Se kura ayol a ase sha aeren a kwaghaôndo u aiegh a aa fatyô u vihin se la nena? Gbidye kwar sha akaa a Yehova a ne se la cii. A na se Bibilo i i lu Mkaanem nam la. (2 Timoteu 3:16, 17) Yehova shi ne se kwaghyan u ken jijingi kpishi sha ikyev i “wanakiriki u jighjigh man u fan kwagh.” (Mateu 24:45) Nahan, er se lu henen mimi seer ne, doo u se lu a isharen i yan “kwaghyan u taver” shi zan mbamkombo mba Mbakristu, ape se henen akaa a ken jijingi la gaa? (Mbaheberu 5:13, 14; Pasalmi 26:8) Yô, se taver nen ishima se eren nen sha akaa a Yehova a lu tesen se la sha er ‘kwaghôron u dedoo’ u se ongo la una lu ken a vese yô. (2 Timoteu 1:13) Aluer se mba eren nahan yô, se fatyô u palegh mcivir u aiegh.
U Hen Nyi?
• Zegebabilon kanyi?
• Kanyi i gbe u se er ve se palegh kwaghaôndo u aiegh?
• Ka akaa a vihin mlu wase u ken jijingi a nyi i doo u se paleghaa?
[Study Questions]
[Picture on page 18]
U fa er i hii ve i yer “Zegebabilon” ér idyakwase kpa?
[Picture on page 19]
Shi kpuaa tsô a tim “Zegebabilon” kera
[Picture on page 21]
Ka se er a mba ve ne jighjigh a vese imôngo ga la “sha ishima i legh legh man sha mcie kpaa”