Ave A En A̱ Taver
Ave A En A̱ Taver
‘Ave a en a̱ taver, ne mba ne ongo akaaôron angan sha ayange ne, sha zwa u uprofeti la.’—SEKARIA 8:9.
1, 2. Er nan i doo u se time sha akaa a i er ken takerada u Hagai man u Sekaria laa?
I NGER kwaghôron u profeti u Hagai man Sekaria la anyom kar hegen kuma er 2,500 nahan. Kpa, kwaghôron ve u profeti ne ngu a inja hen a we. Ityakerada i Bibilo i ihiar ne gba ôron di akaa a mbayiase tsô ga. I kpa ngi ken ‘akaa a i vande ngeren sha ci u ityesen yase’ la. (Mbaromanu 15:4) Akaa a i er ken takerada u Hagai man u Sekaria la kpishi wase se u henen sha akaa a a lu eren hii shighe u i ver Tartor sha ken inyom i 1914 la je.
2 Apostoli Paulu ngise ter akaa kposo kposo a yange er ior mba Aôndo sha ayange a tsuaa la, been yô a kaa ér: “Akaa ne er ve, lu akav a tesen man i nger a sha u a̱ lu se ityesen, se mba mkur u ashighe a ve sha a vese ne.” (1 Mbakorinte 10:11) Nahan alaghga ú pine wer, ‘Takerada u Hagai man u Sekaria ngu a inja sha shighe wase ne nena?’
3. Kwaghôron u profeti u Hagai man u Sekaria ôr la lu sha nyi kwagha?
3 Er kwaghngeren u ken ijime la a tese nahan, kwaghôron u profeti u Hagai man u Sekaria ôr la lu sha ci u shighe u i pase Mbayuda ken Babilon ve hide ken tar u Aôndo na ve la. Kwaghôron u profeti ve la lu sha kwagh u tempel u i lu maan la. Mbayuda yange ve wa imaagh ki tempel la ken inyom i 536 C.S.Y. la. Er Mbayuda mba beenyol mbagenev ure zum u ve umbur mlu ve u tsuaa la nahan kpa, ior kpishi “ger akenge genger genger sha iember.” Jighilii yô, sha ayange a ase ne kpa, kwagh er u injaa, u a hembe ngura yô. Kanyi kwagha?—Esera 3:3-13.
4. Kanyi yange i er shighe u i nôngo Ityav mbi Tar cii Mbi sha Môm i bee ica lu a gba ga laa?
4 Shighe u i nôngo Ityav mbi Tar cii Mbi sha Môm i bee ica lu a gba ga la, i sagh mbacivir Yehova mba i shigh ve mkurem la ikyangenev mbi Zegebabilon kera. Kwagh ne lu ikyav i vesen i tesen ér Yehova ngu a ve. Mbahemenev mba kwaghaôndo man mbapativ mba ve lu akar a ve la yange ve vande cirin tom u Mbahenen Bibilo ú pasen ior kwagh shi tesen ve la; lu inja er vea kera tsa a er ú ga nahan. (Esera 4:8, 13, 21-24) Kpa Yehova kar a hanma kwagh u yangen tom u pasen kwagh u Tartor shi geman ior hingir mbahenen la cii kera. Nahan, hii ken inyom i 1919 la je, tom u pasen kwagh u Tartor ngu zan hemen, or môm ngu a fatyô u bunden u ga.
5, 6. Ka kwagh u vesen u nyi Sekaria 4:7 a pase ér una eree?
5 Se fa ser tom u pasen kwagh shi tesen ior, u mbatomov mba Yehova mba mimi ve lu eren ainge ne ua za hemen sha iwasen i Yehova. Sekaria 4:7 kaa ér: “Una due a iwen i sha kur a amo a genger sha i er: Mlumun u sha mhôôn, mlumun u sha mhôôn.” Kwagh ne tese kwagh u vesen u á lu eren sha ayange a ase ne nena?
6 Sekaria 4:7 tsengaôron kwagh u shighe u mcivir u mimi u Ter u Hemban Cii una samber ken tempel u ken jijingi shin tar jimin cii la. Tempel ne ka ian i Yehova a ne se ér se civir un sha ci u nagh ku Kristu Yesu a ne sha ci wase la. Sha mimi yô, tempel u ken jijingi u vesen ne hii ken derianyom u hiihii la je. Kpa, a lu ken hemen mcivir u mimi una samber a tser tar cii ye. Mbacivir Aôndo umiliôn imôngo mba eren tom shin tar ken tempel u ken jijingi la. Ve mban cii kua ikpelaior i mba a nder ve la vea hingir vough sha shighe u Hemen u Anyom Dubu u Yesu Kristu la. Sha mkur u anyom dubu la a lu mbacivir Aôndo sha mimi tseegh vea mase lun shin tar u ua hingir wang la ye.
7. Kanyi tom Yesu a lu eren sha u samber a mcivir u mimi sha won cii sha shighe wase nee, man er nan i doo u kwagh ne una taver se ishima?
7 Gomna Serubabel man Zegepristi Yosua yange ve nenge er i maa tempel i bee ken inyom i 515 C.S.Y. la yô. Sekaria 6:12, 13 tsengapasen er Yesu kpa una er tom u vesen sha u wasen mcivir u mimi a samber sha won cii yô. Ijiir la kaa ér: “TER u akum a Sha ngu kaan nahan er: Nenge, or u i yer iti na er Icerenkon la una due hen ijiir na, ka un una maa tempel u TER ye; . . . una ya icivir i tor, una tema tor sha ikyônough nagh ki torough man una lu pristi sha ikyônough nagh ki torough.” Er i lu Yesu u á lu sha, á lu icerenkon u tsombor u Davidi u tor la á lu suen tom u Tartor u i lu eren ken tempel u ken jijingi la yô, ú hen wer ma or nana fatyô u bunden u? Mayange ga! Nahan doo u kwagh ne una taver se ishima se er tom wase u pasen ior kwagh la kpoghuloo je se hide ijime sha ci u ugbayol asev mba ayange ayange mbara ga.
Kwagh u A Hembe Lun Se a Inja Yô
8. Er nan ve i gbe u tom u ken tempel u ken jijingi la ua lu se kwagh u hiihii?
8 Aluer se soo ser Yehova a̱ sue se shi a̱ ver se doo doo yô, tom u ken tempel u ken jijingi la u̱ lu se kwagh u hiihii. Doo u se fa er ashighe ase ne a lu “ayange a masejime” yô, nahan se er kwagh er Mbayuda mba ve kaa ér, “shighe ngu a kuma . . . ga” la ga. (Hagai 1:2; 2 Timoteu 3:1) Yesu tsengaôron ér mbadondon un mba jighjigh vea pase loho u dedoo u Tartor shi vea gema ior vea hingir mbahenen kpaa. Nahan se wa nen ikyo tsung sha er se ta tom wase u civirigh ne kera ga yô. Tom u pasen ior kwagh shi tesen ve, ú mbaahendanev yange ve cir ú sha anshighe kpuaa la yange ú hide ú hii ken inyom i 1919 la, kpa ngu a kure ga. Nahan kpa, fa wer ua kure kpee, a bunde ga!
9, 10. Saa or nana er nyi ve Yehova una ver nanaa, man kwagh ne tese ér doo u se er nena?
9 Aluer se mba eren tom ne kpoghuloo yô, kape averen di kpa se zua a mi ngôgh je la—se jimin cii kua hanma wase asange asange kpaa. Nenge ase ityendezwa i Yehova er a Mbayuda, i se kpa ia fatyô u taver se ishima ne. Er Mbayuda hide hii u civir Aôndo a ishima ve i môm shi hii tempel u maan kpoghuloo yô, Yehova ngôôr ga je tôndo zwa a ve ér: “Hii nyian je, Me ver ne dedoo.” (Hagai 2:19) Yehova lumun ve a ishima na cii. Kape Aôndo tôndo zwa ér una ver ve doo doo je ne: “Ivor i bem ia lu heregh; kon u wain ua ume atam a u, inya kpaa ia na iyiagh nagh, Usha kpaa vea gba avure a ve; Me na asande a ior a a shi her ne, aa ya dyako sha akaa ne cii.”—Sekaria 8:9-13.
10 Aluer se mba eren tom u Yehova a ne se la kpoghuloo man a ishima i sar sar yô Yehova una ver se doo doo, vough er yange haa iveren sha akaa a Mbayuda lu eren sha u civir un shi ver ve sha u nan ve akaa a iyolough nahan. Averen ne wa bem u hen atô wase la man mkpeyol kua mzehemen u ken jijingi kpa ker. Kpa, fa wer saa se za hemen u eren tom u ken tempel u ken jijingi la sha ishima i Yehova ve un kpa una za hemen u veren se doo doo ye.
11. Se fatyô u tôvon ayol a ase fan kwagh u a hembe gban se ishima nena?
11 Hegen ka shighe u i doo u se ‘ver ishima, se nenge sha akaa a se eren yô.’ (Hagai 1:5, 7) Doo u se tema se hen sha akaa a a hembe gban se ishima la. Gbenda u Yehova a veren se nyian la har sha er se kpa se lu kenden a iti na sha shi se lu eren tom ken tempel na u ken jijingi zan a mi la. Pine iyol you wer: ‘Ishima hemba ngin mo sha akaa agen kposo ayange nee? Gbashima u yange m lu a mi sha kwagh u Yehova man mkaanem nam ma mimi man tom na zum u m er batisema la pandee? Sarem u zuan a mkpeyol, nahan m de u veren ishima sha kwagh u Yehova man Tartor naa? Mcie u cian or—inja na yô ka u lun a ishimanyian sha kwagh u mbagenev vea ôr sha a mo la—ngu yangen mo u nan iti i Yehova icivir shi eren tom ken tempel na u ken jijingi laa?’—Mpase 2:2-4.
12. Hagai 1:6, 9 ôr kwagh u yange er Mbayuda la nena?
12 Se soo ser Yehova a̱ de u veren se doo doo sha ci u se undu tom u kenden a iti na sha la yum ga. A lu se umbur yô, Mbayuda mba ve hide ken tar ve la yange ve hii tom u maan tempel sha gbashima, kpa Hagai 1:9 pase ér, ve de ú, ‘ve gema ve lu zan ayem hanma or hen ya u nan.’ Ve tume ityough kuren ugbayol vev mba ayange ayange shi ve lu eren akaa agen kpaa. Nahan, ve lu zuan a akaa “kpeghee” tseegh. Kwaghyan lu u vea ya a kuma ve kua kwaghman ga shi ve lu a akondo a vea haa iyol, a tsee ve iyol kpaa ga. (Hagai 1:6) Yehova de u veren ve. Kwagh ngu u se hen sha kwagh ve la nyian kpa?
13, 14. Se fatyô u eren tom sha ityesen i se zough a mi ken Hagai 1:6, 9 la nena, man er nan ve kwagh ne a lu kwagh u injaa yumu?
13 Sha mimi yô, ka er se de u civir Yehova, se yem eren akaa a ase ga ve una za hemen u veren se doo doo ye. Saa se er nahan keng ve se tume ityough eren akaa agen, er u keren inyaregh shin u keren igbenda i zuan a inyaregh a iyol nyoon shio nahan ga ye. Shi ka nahan man a hange se u zan makeranta aren sha azenger shin henen akaa agen sha er se er tom u sha ishima yase shin se kure hangeshima wase ga ye.
14 Alaghga ambaakaa ne nahan ka kwaghbo keng ga. Nahan kpa, u nenge wer aluer se tôô akaa ne se kar sha uma u tsôron yô, ka akaa ‘a lun kpenegh’ ga zee? (Mbaheberu 9:14) Nga kpenegh sha nyi gbenda? Ka agbilinakaa, a a lu kpenegh ken jijingi shi a lu a iwasen kpaa ga yô. Aluer or tume ityough eren a yô, aa vihi mlu u nan vea Aôndo. Kape kwagh yange er Mbakristu mba i shigh ve mkurem mbagenev sha shighe u mbaapostoli je la. (Mbafilipi 3:17-19) Nyian kpa, kwagh er mbagenev nahan. Alaghga we kpa, ú fa mbagenev mba yange ve de akaa agen dan ve kure kure, nahan ve de u eren ityom i Orkristu shi ve undu tiônnongo kpaa yô; man kwagh tsô gba ve u hiden va civir Yehova ga. Se mba eren msen ser amba la a̱ hide hen Yehova, kpa er se lu ôron nahan, aluer or ngu eren “aeren a a lu kpenegh” yô Yehova una lumun nan ga shi una haa nan iveren na kpaa ga. Imba kwagh ne nahan vihi je zua ga. Inja na yô, or u kwagh a er nan nahan la nana kera zua a msaanyol man bem u jijingi u Aôndo a ne se la ga. Man gema nenge ase er nana kera lu hen atô u anmgbianev mba ken Kristu ga ve kwagh a kar nan sha wono!—Mbagalatia 1:6; 5:7, 13, 22-24.
15. Hagai 2:14 tese ér mcivir wase ka beerkwagh ga nena?
15 Kwagh ne ka kwagh u iniumbe ga cii. Nenge kwagh u Hagai 2:14 a er u tesen se er Yehova yange nenge Mbayuda mba ve undu iyou na ve lu maan ayou a ve cirin ikpande sha mi la. Alaghga ve lu cirin ikpande sha ayou a ve kpôô kpôô shin ve lu eren a er hwe sha a tsô. Ivur la kaa ér: “Kape ior mban ve lu je ne, man kape ikyurior ne i lu sha ishigh Yagh ne, kape TER A kaa ne; man kape hanma tom u aveegh ve kpaa u lu ne, kua kwagh u ve ne nagh a min la kpaa; ka u wang ga.” Er kwagh gba Mbayuda a mcivir u mimi ga yô, iniav mbi Mbayuda mba civir Aôndo a ishima i môm ga mban lu nan sha atse a nanden nagh á yange i hira ta ken Yerusalem la cii Yehova lumun a mi ga.—Esera 3:3.
Aôndo Bum Ér Una Lu a Mbacivir Un sha Mimi
16. Mbampase mba sha mnenge mba i tese Sekaria la wase Mbayuda fa ér nyi?
16 Sekaria nenge mbampase mba sha mnenge anigheni. Mbampase mban wase Mbayuda mba jighjigh mba ve lu maan tempel u Aôndo la ve fa ér Aôndo una sue ve. Mpase u sha mnenge u hiihii la tese ér aluer Mbayuda wa imo i Aôndo ikyo, za hemen u maan tempel, ve gba uwer ga yô, vea maa un a kure keng, shi a kpe Yerusalem kua Yuda iyol kpaa. (Sekaria 1:8-17) U sha uhar la di tese ér ugomoti mba hendan a mcivir u mimi cii vea kar kera. (Sekaria 1:18–21) Mbampase mbagenev mbara di wase Mbayuda u fan ér Aôndo una kura ve shighe u vea lu maan tempel la, shi ior mba ken akuraior vea nyôr ken iyou i mcivir u Yehova i a maa i la lugh lugh, bem u mimi man mkpeyol una lu. Shi Mbayuda fa ér hanma kwagh u yangen ve tom u Aôndo na ve, u lun er ka uwo nahan je kpa, una hingir shambe shambe shi á kar a iferkwagh kera shi ortyom una hemen ve sha tom la, una kura ve kpaa. (Sekaria 2:5, 11; 3:10; 4:7; 5:6–11; 6:1–8) Er Aôndo tôndo zwa ér una wase ve yô, mba ve ungwan un la cii sôr uuma vev shi kwagh hemba gban ve u eren tom u Aôndo due a ve ér ve er la.
17. Er se fe ser mcivir u mimi una hemba keng yô, doo u se pine ayol a ase ser nyi?
17 Se kpa er se fe ser mcivir u mimi una hemba keng yô, kwagh ne a̱ mgbegha se u eren tom sha gbashima shi henen sha kwagh u iyou i mcivir u Yehova shi nengen sha i kpaa. Nahan, pine iyol you wer: ‘Aluer m na jighjigh mer hegen ka shighe u pasen ior loho u dedoo u Tartor shi geman ve hingir mbahenen yô, mbaawashima av kua aeren am zua sha jighjigh u nan wam ne je kpa? M er Mkaanem ma Aôndo ma profeti doo doo, shi m henen sha ma hanma shighe kpa? M lamen sha kwagh u m er la a anmgbianev av mba ken Kristu kua mbagenev kpa?’
18. Sekaria ityough 14 ôr kwagh u una er ken hemen nena?
18 Sekaria ôr kwagh u mtim u Zegebabilon kua ityav mbi Armagedon mbi mbia dondo la. A kaa ér: “Á lu iyange i môm i TER A fe i yô; á lu tetan ga, á lu tugh kpaa ga; kpa á va hingir aikighe yô, iwanger ia lu.” Sha kpôô yô, iyange i Yehova i Armagedon la ia wa ime je ka u ôron ga, ia lu iyange i vihin sha ci u mbaihyomov nav sha tar cii! Kpa ia gema a lu shighe u iwanger hen mbacivir Yehova, shi una lumun ve kpaa. Sekaria shi pase er hanma kwagh u ken tar u he la cii una yôô icighanmlu u Yehova yô. A lu mcivir u mimi u ken zege tempel u ken jijingi u Aôndo la tseegh una lu sha tar ye. (Sekaria 14: 7, 16–19) Kwagh ne ka ibumun i doon tsung! Se nenge mkur u kwagh u i tsenge ôron ne, shi se nenge er mimi je Yehova a kom u lun tor u hemban sha won cii yô. Iyange i Yehova la ia lu zege iyange i hemban cii!
Averen a Been Mayange Ga
19, 20. Mkaanem ma ken Sekaria 14:8, 9 la taver we ishima nena?
19 Kwagh u vesen u Yehova una er ne una karen kera yô, á kôr Satan Diabolo man azôv a na cii a gbihi shin ihyungwa i i ze kweng la, nahan vea kera fatyô u eren kwagh ga. (Mpase 20:1–3, 7) Hen shighe la, Hemen u Anyom Dubu u Kristu la ua va uumace a msaanyol. Sekaria 14:8, 9 kaa ér: “Sha iyange la mngerem ma umam maa due ken Yerusalem; tiôn u ma ugen una yem sha zegemnger u sha ityoughkitaregh man tiôn ugen shin zegemnger u shin ityôtar; fam kua inyom kpaa, á lu nahan. TER Una tema tor sha tar cii; sha iyange la TER Una lu môm man iti Na kpaa ia lu i môm.”
20 “Mngerem ma umam” shin “ifi u mngerem ma umam” ma ma til sha ityough ki akaa a Yehova una na uumace sha u ve lu uma la, ma a za hemen u duen ken ikyônough ki torough ki Tartor u Mesiya la. (Mpase 22:1, 2) Zegeikpelaior i mbacivir Yehova mba vea war Armagedon la vea zua a injar, gadia á war ve sha ikyev i ku u Adam va a mi sha uumace la. Mbakpenev je kpa vea zua a iwasen, gadia a nder ve. Hen shighe la Yehova una hii u hemen tar cii sha gbenda ugen. Uumace sha tar jimin cii vea fa er i lu un á lu Tor u Hemban Cii man er i lu Un tseegh i gbe u se civir yô.
21. Doo u se kange ishima ser se er nyi?
21 Akaa a Hagai man Sekaria tsengaôron, a a kur sha mi ne cii na se ityôkyaa i vesen i zan hemen a tom u Aôndo a ne se ér se er ken ityembe i tempel na u ken jijingi i shin tar la. Cii man shighe u mcivir u mimi una samber sha tar jimin cii la a kuma yô, se za nen hemen u veren akaa a Tartor hiihii ken uuma asev. Sekaria 8:9 wa se kwagh ér: “Ave a en a̱ taver, ne mba ne ongo akaaôron angan sha ayange ne, sha zwa u uprofeti” la.
Baver We Kpa?
• Ka akaa a yange er sha shighe u Hagai man Sekaria a nyi nahan á ne ityakerada ne i lu a inja nyiana?
• Profeti Hagai man Sekaria tese se nyi sha kwagh u akaa a i doo u aa lu se kwagh u hiihii laa?
• Aluer se time sha kwaghôron u Hagai man Sekaria yô, una wase se se lu a vangertiôr sha kwagh u ken hemen nena?
[Study Questions]
[Picture on page 13]
Hagai man Sekaria taver Mbayuda asema ér ve er tom sha gbashima tsô Aôndo una ver ve doo doo
[Pictures on page 14]
Ú ngu ‘zan ayem hen ya wouwee’?
[Picture on page 15]
Yehova tôndo zwa ér una ver se doo doo, shi ngu eren nahan kpaa