Ibanave Ngi Seer A Seer Nyian

GUMOR ugen ken gar u São Paulo, ken tar u Brazil, mba yer un ér Vicente, * ka a shi tuur trôk zenden sha godobi sangen akaa za teen. Tugh mbua ilen yô, a tar katôn shin ityô trôk na hen kpe gbenda a yav. Akaahendan ka a̱ karen a̱ eren ayôôso je kpa kwagh a gba or ti sha mi ga. Vicente yange lu a tom shi lu a ya kua tsombor ave, kpa akaa la cii saa. Hegen ne a hingir u zenden sha godobi keren inyaregh sha ican tsung.

Kwagh ka a er i vihi yô, ior umiliôn imôngo sha tar jimin cii mba ken ibanave tsung er Vicente nahan. Ior kpishi ken ityar i i lu a kwagh ave ga yô mba tse sha ugodobi shin ken atumbe a vihin ashe. Mbazamberakaa er mba kpen angahar kua mbaapirashe man kasev mba lun a mbayev sha ave nahan ngee ken ityar ne. Heela tseegh ga, mbayev mba kiriki ka ve zenden ve teen akaa sha ajiir a akaahendan a til sha er vea zua a asange a sulee yô.

Taver mbagenev kpishi er i hii ve ior kpishi ve lu ken ibanave tsung yô. Pipaabaver i ken tar u Ingila i̱ í yer ér The Economist la kaa ér: “Uumace kpen mban yôughyôugh shi mba a mfe u tweregh shi ve za ikyura ken iwavaren, kpa mba a zua a mfe u vea bee a ibanave ga.” Mfe u ior ve zou a mi sha iwavaren kpishi ne wase mbagenev je zua ga. Aluer u za ken agar a vesen a ken ityar i i lu a inyaregh kpishi yô, ior mba lun a umato mba taver ishe de ishar. Shi ikyav mbi hev dumbur ken ukenti mba vesen, man ma shighe môm kpa ior mba gbe uwer u yamen mbi ga. Mbakpengav mba ukenti mba vesen uhar mba̱ ken tar u Brazil yange ve er zege iniongo ve va a mbaamarev sha u ior ve yam ve ikyav kpishi yô. Ve er iniongo ne sha iyange i Disemba 23 zan zan Disemba 24, 2004, hii tugh zan zan sev puaa. Nahan ve zua a mbakasuav je kuma er 500,000 nahan!

Nahan kpa, mbakpishiv mba zough a iwasen sha inyaregh ki ior ve lu a mi la ga. Er mbagenev ve lu a inyaregh kpishi, mbagenev di ve lu ken ibanave yô, ior kpishi nenge ér doo u a ker gbenda u a bee a ibanave. Ipipaabaver i ken tar u Brazil i̱ í yer ér Veja la kaa ér: “Kwagh u vesen u i doo u mbahemen tar vea hii nengen sha mi ken inyom i [2005] yô, ka u keren gbenda u been a ibanave.” Ipipaabaver shon shi ôr er i soo u hiden eren kwagh sha mhen u orgen yange due a mi, u i yer ér Mhen u Marshall la yô. I soo u eren nahan sha u a wase ityar i i hembe gban ican cii la, hemban je yô, ityar i ken Afrika. * Er i lu inja er mhen ne una wase nahan kpa, ipipaabaver shon shi kaa ér: “Atôakaa nga kpishi a a tese ér mhen ne una wase ga yô. Aluer iyol kpe ityar kpishi i i eren iyua u wasen ityar i i lu ken ican la yô, ka sha ci u ka a er iyua kpa ior ve ya inyaregh kira.” Kwagh ka a er i vihi yô, gomoti man mbamzough mba wasen mbaatsanev sha tar cii ka vea na inyaregh ér i wase mbaatsanev kpa anyighe man atimbir a na yô i lu annyar kpuaa tseegh a ar a mbaatsanev mban ye.

Yesu yange fa ér ior vea lu ken ibanave ica a gba. Nahan, a kaa ér: “Ne mba a mbaatsanev a ven imôngo.” (Mateu 26:11) Kwagh ne tese ér ibanave ia bee sha won ga shinii? Ma gbenda tsô ngu u a bee a ibanave gaa? Mbakristu vea er nyi sha u wasen mbaatsaneva?

[Footnotes]