Mbampin mba Mbaôron Takerada Ne Ve Pin La

Kanyi i ne ve “akaainjaa a akuraior cii” a lu van ken “iyou” i Mcivir U Mimi?—Hagai 2:7.

Yehova tsengaôron sha ikyev i profeti Hagai ér: “Me tenger akuraior cii, nahan akaainjaa a akuraior cii aa va, nahan Me iv iyou ne a iengem.” (Hagai 2:7) Mba tenger “akuraior cii” nahan “akaainjaa” a akuraior ne—mbaasemaamimi—mba van ken mcivir u mimii? Ei.

Time ase sha kwagh u a lu tenger akuraior man kwagh u a gem a dugh ker la. Bibilo kaa ér ‘akuraior nga kumbur, ior kpaa mba henen ugbilinmbaakaav.’ (Pasalmi 2:1) ‘Ugbilinmbaakaav’ mba ve lu “henen” yô ér ma ve hemen gbem shawon. Ma kwagh ugen tsô te ve ishima kwe ga, saa kwagh u a bende a hemen ve tseegh.

Tom u pasen kwagh u Tartor u Aôndo a ver, u Mbashiada mba Yehova ve lu eren tar sha won cii la na yô ishima ta akuraior ne kwe. Tartor u Mesiya u Aôndo, u Yesu Kristu una hemen ú la ua ‘hembe ityartor [i uumace] cii avur avur.’ (Daniel 2:44) Loho u se pasen ne u kua ijirôron kpaa, man ngu tenger akuraior. (Yesaia 61:2) Man er se lu hemban eren tom u pasen kwagh ne shi u lu samber seer a seer yô, ngu hemban tenger akuraior ne cii. Ikyav i mtenger u akuraior u i tsengeôron ken Hagai 2:7 la ér nyi?

I ôr ken Hagai 2:6 ér: “TER u akum a Sha ngu kaan nahan er: Mase shin kwagh môm, kera shi ca ga tsô, Me tenger Sha man tar man zegemnger man iombortar.” Apostoli Paulu ôr kwagh ter ivur ne kaa ér: “A tôndo zwa er: Shi kwa môm u Me tenger á kera lu tar tseegh ga, á kua Usha kpaa. U kaan er, ‘shi kwa môm’ yô, tese sha mkar u á va kar a akaa a a fetyô u tenger la kera, ka akaa a i gbe a je la, sha u akaa a a fetyô u tenger ga [ka Tartor je la] yô, a̱ lu her.” (Mbaheberu 12:26, 27) A tim tar ne kera cica cii sha er tar u he u Aôndo una ver la ua kar a tema yô.

Mbaasemaamimi mba van ken mimi, kpa u ngu wer ka er i lu tenger akuraior ve ve lu van ga. Ka tom u pasen kwagh u Tartor u Aôndo a ver, ú u lu tenger akuraior ne u lu urugh mbaasemaamimi mban van a mi hen Yehova man ken mcivir na u mimi ye. “Icôronloho u Dedoo” u i lu yôôn ne ngu urugh mbaasemaamimi van a ve ken mcivir u Aôndo u mimi la.—Mpase 14:6, 7.

Loho u Tartor ne ka loho u ijirôron man u myom. (Yesaia 61:1, 2) Loho u i lu pasen tar sha won cii ne ngu kuren akaa ahar: ngu tenger akuraior shi ngu urugh akaainjaa a akuraior ne va ivin iyou i Yehova a iengem.