Saan Mba Ve Zenden Sha Mimi La Iyol
Saan Mba Ve Zenden Sha Mimi La Iyol
“Iveren i TER ngi ve a inyaregh, tom u nyoonyol seer ma kwagh sha i ga.”—ANZAAKAA 10:22.
1, 2. Hii nan ve i doo u kwagh a hemba gban se sha mlu wase u ken hemen la ga?
ORAMERIKA u fan kwagh tsura ugen kaa ér, “ka sea ver ishima sha kwagh u mlu wase u ken hemen yum yô . . . kwagh ne a yange se u ember akaa a se lu a mi hegen ne.” Kape mbayev mba ve hembe veren ishima sha akaa a vea gande vea er la kpa kwagh ve a lu je la. Ka ve ember uma shighe u ve lu yev la ga zan zan vea va masen umbur yô, shighe kar ve.
2 Mbacivir Yehova je kpa ashighe agen ka ve hen kwagh nahan. Time sha akaa a a dondo heen ne. Se mba veren ashe keghen shighe u Aôndo una kure ityendezwa i a er ér una gema tar cii u̱ hingir paradiso la. Se mba keghen shighe u angev man iyolbeen kua mnyoon man ican i yan ia kera lu ga la. U veren ashe keghen akaa ne ka kwaghbo ga, kpa aluer se hemba veren ishima sha mkpeyol u ken hemen, se gema se hungur averen a se lu zuan a mi ken jijingi hegen ne nahan a lu nena? A lu kwagh u kunya kpen kpen! Iyol ia ngôôr kpen se ga, shi se ure sha er ishimaverenkeghen yase i kur sha mi ga yô. (Anzaakaa 13:12) Alaghga mbamzeyol man mbamtaver vea na yô se ure kpishi shi kunya ua kôr se a iyol yase kpaa. Nahan u ma se lu wan ishima a mbamzeyol yô, se gema se hingir u gban a gba ahon sha akaa. Se fatyô u palegh akaa ne cii aluer se mba henen sha averen a se lu zuan a mi hegen ne yô.
3. Kanyi se time sha mi ken kwaghhenen nee?
3 I ôr ken Anzaakaa 10:22 ér: “Iveren i TER ngi ve a inyaregh, tom u nyoonyol seer ma kwagh sha i ga.” Mbatomov mba Yehova mba sha ayange ne mba zan ikyura ken jijingi, nahan ka kwagh u saan iyol ga he? De se time sha averen a ken jijingi a se zough a mi hegen ne, shi se nenge er a lu hanma wase a inja yô. Sha kpôô yô, u timen sha averen a Yehova a ne “orperapera u nan zenden ken mimi u nan” la una seer taver ishima i se kange ser se za hemen u civir Ter wase u sha a iember la.—Anzaakaa 20:7.
Averen A A Ve Se a Msaanyol Hegen La
4, 5. Ka ityesen i ken Bibilo i nyi i hembe doon we ishima, man ka sha ci u nyi?
4 Se mba a mfe u vough u atesen a ken Bibilo. Ukwaghaôndo mbaaiev ka ve senge ér ve na jighjigh a Bibilo. Kpa ve lumun kwagh u i̱ tese la ga. Mba ve ze kwaghaôndo môm je kpa ashighe kpishi ka ve lu zwa môm sha kwagh u Ruamabera a tese jim jim la ga. Mlu ve ne kaha kposo a u mbatomov mba Yehova! Shin er se dugh ken ityar kposo kposo shi se lamen ijô kposo, aeren ase kpa a kaha nahan kpa, se mba civir Aôndo u mimi shi se fa un sha iti kpaa. Ngu aôndo utar ken môm u i fe kwagh na ga la ga. (Duteronomi 6:4; Pasalmi 83:18; Marku 12:29) Shi se fa ser shi côhiin tsô a kure ikyaa i vesen i sha kwagh u ian i Aôndo lu a mi u hemen la, man aluer se cii se tile sha mimi yô, se tese ser se mba ken vegher na; hanma wase yô ikyaa ne bende a nan. Se fa mimi sha kwagh u mba ve kpe la nahan se mba kera cie ser Aôndo una va nande ior ken igyamusu shin una kende ve ken pugatori er ior kpishi ve ne jighjigh nahan ga.—Orpasenkwagh 9:5, 10.
5 Heela tseegh ga, saan se iyol kpishi, gadia se fa ser se gba duen duen abu tsô ga. Ka Aôndo a gbe se ye, man a gba se sha ibeen na. (Genese 1:26; Malaki 2:10) Orpasalmi ngise wa Aôndo ican kaa ér: “M ngu wuese We er U erem m lu kwagh u cieryol man u kpilighyol kpaa yô; ityom You kpiligh iyol, uma wam kpaa fa nahan dedoo!”—Pasalmi 139:14.
6, 7. Ka averen a nyi u gem uma wou shin ior mbagenev mba u fe ve gem uuma vev ve ve zough a mi?
6 Se mba palegh aeren a aa vihi se iyol la. Ka i shi tan ior icin sha abaver sha kwagh u ijimba i eren man taav u man kua msôrom ma man karen ikyaa inya la. Kpa ashighe kpishi ka ve wa acin a tan la ikyo ga. Kpa aluer or u lun a ishima i mimi nan va fa ér Aôndo u mimi venda aeren a ngan man ishima i vihi nan a mba ve eren akaa shon yô, nana er nyi? Kwagh u nana er yô, ka u den aeren shon a a lu sha mi ga la. (Yesaia 63:10; 1 Mbakorinte 6:9, 10; 2 Mbakorinte 7:1; Mbaefese 4:30) Nana er kwagh ne sha ci u nan soo u eren ishima i Yehova Aôndo, kpa nan iyol i nan kpa nana zua a averen, a kpe nan iyol shi nana lu a bemshima kpaa.
7 Ka i taver mbagenev kpishi u den aeren a bo. Nahan kpa, hanma inyom yô ior udubu imôngo ka ve de aeren a bo. Nahan ve tsegha ayol a ve sha ci u Yehova shi ve er batisema, ve pase ken igbar ér ve de aeren a a vihi Aôndo ishima la. Ieren ve ne ka i taver se cii ishima kpen kpen! Kwagh ne ka a na se seer kangen ishima ser se lu ikpan i isholibo man aeren a hôngorough ga.
8. Ka kwaghwan u ken Bibilo u nyi a ve a msaanyol hen tsomboro?
8 Icombor yase ngi saan saan. Ken ityar kpishi icombor kera ngi saan saan ga. Icombor kpishi ka i pav i undu mbayev a mbamzeyol mba ken ishima kpishi. Ken ityar igen i ken Yuropa yô, icombor i lun a ormaren môm tseegh ngi seer a seer. Yehova wase se u eren kwagh sha mimi hen tsombor nena? Ôr Mbaefese 5:22–6:4 tsô u nenge akaawan a injaa a Mkaanem ma Aôndo ma we noov man kasev kua mbayev la. Aluer tsombor ngu eren sha akaawan ne man agen a a lu ken Ruamabera la yô, aa wase u seer taver mlu u hen tsombor shi yesen mbayev sha gbenda u vough, shi van a msaanyol hen tsombor kpaa. Kwagh ne ka iveren i nan se iember gaa?
9, 10. Mnenge wase sha kwagh u mlu u ken hemen kaha a u tar ne nena?
9 Se mba a vangertiôr ser ica a gba ga tsô a sôr mbamzeyol mba tar ne. Shin er uumace ve ze hemen sha gbaa u iwavaren man mfe u sangen yeke, shi mbahemenev mbagenev ve nenge ér vea sôr mbamzeyol mba uumace nahan kpa, ve fatyô u been a mbamzeyol mba vesen mba uma ga. Orvesen Klaus Schwab u a bugh mzough ugen u nengen sha mbamzeyol mba uma, u i yer ér World Economic Forum la sember kaan ér, “mbamzeyol mba tar ne mba seer a seer, kpa shighe u sôron ve yô, ngu ga.” A ôr kwagh u “mbamzeyol mba ve tser tar cii yô, er tswam u eren man mvihi u ikyasen kua m-ban u inyar nahan.” Schwab mase kuren ér: “I gbe je ka shighe u kwagh a hembe tseren tar je ne, nahan gba u ior vea zua ave shi vea sôr mbamzeyol mban fefa kpaa.” Er derianyom u sha 21 ne a lu yemen hemen yô, mlu u uumace u ken hemen jimin cii ngu hemban wan a wa ime.
10 Saan se iyol kpishi sha ci u Yehova ver kwagh u una fatyô u sôron mbamzeyol mba uumace cica cii yô—ka Tartor u Aôndo u Mesiya je la! Tartor la ua ‘bee a ityav’ sha tar, nahan ‘bem a̱ gema a ngee.’ (Pasalmi 46:9; 72:7) Yesu Kristu u i ver un tor u Tartor shon la una ‘yima oribanave, man icanor kua mbaatsanev sha mkighir man ipila.’ (Pasalmi 72:12-14) Kwaghyan a kera ban ken Tartor la ga. (Pasalmi 72:16) Yehova “una ese [se] mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” (Mpase 21:4) I ver Tartor la sha hegen man shi côhiin tsô ua sôr mbamzeyol mba uumace cica cii.—Daniel 2:44; Mpase 11:15.
11, 12. (a) Aluer or ngu keren iemberyolough nahan nana zua a msaanyol u tsôrono? Pase ase. (b) Kanyi i ne msaanyol u mimi?
11 Se fa kwagh u a ne msaanyol u mimi yô. Kanyi i ne msaanyol u mimi? Orgen u timen sha mbamhen man aeren a orumace kaa ér msaanyol ngu a agbaa atar—agbaa shon yô ka iemberyolough man tom u eren shin u nengen sha tsombor man u eren akaa sha ci u mbagenev. Ken akaa a atar a a ter ne cii ka iemberyolough i hembe gban ijime ye, shi a kaa ér: “Kpa doo u se time sha iemberyolough, gadia iemberyolough hemba doon ior kpishi ishima.” Bibilo nenge iemberyolough nena?
12 Tor Solomon u Iserael u tsuaa la kaa ér: “M kaa ken ishima yam mer: Yô, me kar u sha msaanyol; nahan yô, i kpe u iyol sha ishar i haan iyol; kpa nenge, kwagh ne kpaa lu gbilinkwagh tsô. M yila ahan a sen mer, ka ihyundugh; m kaa sha msaanyol, mer, ne nyi?” (Orpasenkwagh 2:1, 2) Ruamabera tese ér msaanyol u iemberyolough ia na se cii una tsa gbem ga. Kpa aluer se gema se er tom nahan, se zua a msaanyolo? Se mba eren tom u u hembe lun a inja cii yô—ka tom u pasen kwagh u Tartor, shi geman ior hingir mbahenen je la. (Mateu 24:14; 28:19, 20) Tom u pasen mbagenev loho u myom u ú lu ken Bibilo la ka tom u ua va se a myom man mba ve ongo se la yô. (1 Timoteu 4:16) Se mba “mbashirentom a Aôndo imôngo,” nahan se fa ser “u nan a na kwagh hembe saan iyol a u ngohol a ngohol kwagh.” (1 Mbakorinte 3:9; Aerenakaa 20:35) Tom ne ka u na uma wase a hemba lun a inja shi ka u na Orgban se a gema a kaa imo a Satan Diabolo u a lahan un la. (Anzaakaa 27:11) Sha kpôô yô, Yehova tese se ér aluer se mba civir Aôndo yô, se zua a msaanyol u tsôron.—1 Timoteu 4:8.
13. (a) Ka sha nyi gbenda Makeranta u Henen Tom u Hemen u Aôndo la u lu kwagh u nan se msaanyolo? (b) Makeranta u Henen Tom u Hemen u Aôndo la wase u nena?
13 Se mba a makeranta u injaa u tsaase ior sha er vea fa kwaghôron yô. Gerhard ngu ortamen ken tiônnongo u Mbashiada mba Yehova. A ôr kwagh u shighe u un lu gumor la ér: “Zum u m lu gumor la kwaghôron a taver mo kpen kpen. Yange mea tile sha ishigh ki ior yô, i cier mo iyol m fatyô u lamen wang ga, maa m gba eren ikyeghem. Kwagh ne na yô lum er m fa kwagh môm ga nahan, nahan m ure kpishi. Mbamaren av wam ken makeranta u henen kwaghôron, kpa gba sha mi ga. Zayol wam yô, m fa takerada ga shi m cian ashe kpishi. Kpa Yehova gema ver Makeranta u Henen Tom u Hemen u Aôndo, man makeranta ne wasem kpishi. M nyer makeranta ne yô ishima hii u taver mo. M nôngo sha afatyô wam cii m er sha akaa a m lu henen la. Kwagh ne wasem kpen kpen! M hii u lamen gbar gbar, m kera lu zunguluu ga, shi ishima hemba taver mo u pasen kwagh kpaa. Hegen ne ka m na kwaghôron u ken igbar je kpaa. M wuese Yehova kpishi er makeranta ne u wasem, uma wam a seer lun a inja nahan.” Gbenda u Yehova a tsaase se sha er se er tom u a ne se la ka ityôkyaa i ember gaa?
14, 15. Ka iwasen i nyi ka se zua a mi zum u kwagh a ze se iyolo? Tese ikyav.
14 Se ya ikyar a Yehova shi se mba zough a iwasen hen mzough u anmgbianev u a lu sha tar cii la. Kwase ugen ken tar u Jamani, mba yer iti na ér Katrin. Yange ungwa ér tar tenger shin atô ityeku ken kpentar u Ashia, kpianger mngerem tim ior ken ityar i hen atô u imbusutariyan i Ashia man ityoughkitaregh ki Ashia, nahan kunda un iyol. Wan na u kwase yange lu zan zende ken tar u Thailand shighe u aahe u bo ne er la. Aahe ne wua ior kpishi shi mba vihin ayol kpaa lu, nahan Katrin lu henen ér shin wan na una lu môm ken ior mba ve kpe la shin mba ve vihi ayol la-o. Iyange jimin bee pelegh igen kpa Katrin lu henen kwagh u wan na her tsô. Kpa ken masejime yô, wan na va gbidye un waya nahan fe ér kwagh er un ga yô, ishima maa gba un shimi.
15 Kanyi yange i wase Katrin hen shighe u ishima lu nyian un sha kwagh u wan na laa? A kaa ér: “Hen shighe la cii m lu eren msen hen Yehova. Hanma kwa u mea er msen yô, m zua a agee man bemshima. Shi anmgbianev mba ken tiônnongo va sôrom lu taver mo ishima kpaa.” (Mbafilipi 4:6, 7) Yange una er msen hen Yehova hen shighe u ishima lu zan un iyol kpishi la ga, shi anmgbianev mba ken tiônnongo vea sur un ishima ga nahan, ma er nena? Ikyar i se ye vea Yehova man Wan na kangenaa man mlu u se lu ikyooso ikyooso a anmgbianev asev mba ken Kristu la ka iveren i vesen kpen kpen, nahan doo u se er beer a mi ga.
16. Ôr kwagh u yange er, u a tese ér mnder u shin ku ngu a inja kpishi yô.
16 Se mba a ishimaverenkeghen i va nengen a ior asev mba ve kpe la. (Yohane 5:28, 29) Gumor ugen mba yer iti na ér Matthias, i yese un hen tsombor u Mbashiada mba Yehova. Kpa kwagh u injaa u lu a mi la gba un kwagh ga, nahan a undu tiônnongo u Kristu zum u lu gumor la. A kaa hegen ér: “Yange m tumen idyu a terem ga. Ma shighe môm kpa m lumun a na ga. Kpa terem gema soo ér i kpem iyol. M doo un ishima kpen kpen, kpa hen shighe la yô, m fa ga. Ka ker ken inyom i 1996 la yô, m tema hen kpe gambe na, m kôr un uwegh a mliam ashe, m zamber a na mer a yam anyi sha akaa a m er a na cii, shi m kaa a na mer a doom ishima kpishi. Kpa kera lu kwagh u una ungwam ga. Yange angev kôr un, shighe karen kpuaa yô maa saa ku. Aluer m va nenge a terem sha shighe u a nder mbakpenev la yô, se sôr anyiman a yange se lu a mi la cii. Un kpa una ungwa ér m ngu ortamen hegen shi mo man kwase wam se mba eren tom u pania u keke nahan a saan un iyol je a zua ga.” Ishimaverenkeghen i mnder u shin ku la ka iveren hen a vese je zua ga!
“Tom u Nyoonyol Seer Ma Kwagh sha I Ga”
17. U henen sha akaa a dedoo a Yehova a er sha ci wase la wasen se nena?
17 Yesu Kristu ôr kwagh u Ter na u sha la kaa ér: “Ka A er iyange Na i̱ due i̱ ta sha mbaaferev kua mbamimi kpaa, man ka A nôô ura sha mbaperapera man mba ve lu mbaperapera ga kpaa.” (Mateu 5:45) Aluer Yehova Aôndo eren akaa a dedoo a mbaaferev man mba ve lu perapera ga mbara kpaa yô, hile mba ve zenden sha mimi la ve una er a ve a doo ga yee! I ôr ken Pasalmi 84:11 ér: “TER . . . Una nyume mbazan jighilii la ma kwagh u dedoo ga.” Ka sea hen sha ikyo i a we mba a doo ve ishima la nahan ishima i iv se a iwuese shi i saan se iyol kpaa.
18. (a) Hii nan ve se fatyô u kaan ser averen a Yehova nga ve a mnyoon ga. (b) Hii nan ve ior mba Aôndo mbajighjigh ve ye icana?
18 “Iveren i TER”—ka kwagh u a wasen ior nav ve ve lu zan hemen ken jijingi je la. Shi se nenge kpaa ser “tom u nyoonyol seer ma kwagh sha i ga.” (Anzaakaa 10:22) Kpa er nan ve Aôndo a ne ian ér ameen a va sha ior nav mbajighjigh mbageneve, man er nan ve a de ér mnyoon man ican i ta sha a ve? Atsan nga tseren se sha ci u atôakaa atar. (1) Mhen u ishima yase ka u bo. (Genese 6:5; 8:21; Yakobu 1:14, 15) (2) Satan man azôv a na. (Mbaefese 6:11, 12) (3) Tar u bo ne. (Yohane 15:19) Shin er Yehova a de ér akaabo a tser se nahan kpa, ka hen a na a dugh ga. Sha ci u “hanma nagh ku dedoo man hanma iyua i vough kpaa ka Sha hen Ter u iwanger ve dugh, ve senen ye.” (Yakobu 1:17) Averen a Yehova nga ve a mnyoon ga.
19. Kanyi i lu keghen mba ve ze hemen u zenden sha mimi laa?
19 Saa se kporom hen Aôndo keng ve se fatyô u zan hemen ken jijingi ye. Ka sea yaan ikyar a na kangenaa yô, se ‘wa imagh ki dedoo sha ci wase ayol a ase ken hemen, sha u se kôr ave sha uma u a lu uma jim la’—ka uma u tsôron je la. (1 Timoteu 6:12, 17-19) Ken tar u he u Aôndo una va a mi la se zua a averen a ken jijingi tseegh ga, se zua a averen a sha iyol kpaa. Mba ve ‘veren ato sha imo i TER’ la cii vea zua a uma u a lu uma jim la. (Duteronomi 28:2) Nahan se seer taver nen ishima, se za nen hemen u zenden sha mimi.
Ú Hen Nyi?
• Hii nan ve i doo u se hemba veren ishima sha mlu wase u ken hemen la ga?
• Ka averen a nyi se zough a mi hegene?
• Hii nan ve mbatomov mba Aôndo mba jighjigh ve ye icanaa?
[Study Questions]