Yehova Pasen Akaa “Hii Sha Mhii Zan Zan Mkur”
Yehova Pasen Akaa “Hii Sha Mhii Zan Zan Mkur”
“M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la.”—YESAIA 46:10.
1, 2. Kanyi kwagh i kpilighyol sha mtim u yange i tim gar u Babilon laa, man kwagh ne tese nyi sha kwagh u Yehova?
NGISE akumautya a mbaihyomov mba zege gar u Babilon per Ifi u Uferati angahar tugh ving ving ér vea za ta ityav sha gar ne. Mba za mgbôghom a hundagar yô, ve nenge kwagh u kpiligh ve iyol. I gbihi uzege mbahundav mba gar u Babilon la ivegher! Tsô ve due sha tar; ve gba nyôron ken gar la. Ve ngohol gar la ngôôr ga. Shirushi, orhemen u akumautya la hii u nengen sha tar u ve ngohol hingir u ve ne. Shighe kar yô, a wa tindi ér i pase Mbaiserael mba ve lu uikyangen ken Babilon la. Tsô Mbaiserael udubu udubu hide ken tar ve, va hii mcivir u Yehova ken Yerusalem.—2 Kroniku 36:22, 23; Esera 1:1-4.
2 Kwagh ne yange er ken inyom i 539 zan zan inyom i 537 C.S.Y. (Cii man Shighe u Yesu) la. Mbatôvonakaa a Mbayiase kpa ôr kwagh sha mi doo doo je. Kwagh u a hembe kpilighyol je yô, yange i tsenga fan kwagh ne anyom 200 ken ijime. Yehova yange ôr profeti na Yesaia ér a̱ tsengapasen mtim u Babilon, nahan a pase kwagh u mtim ne ica gba. (Yesaia 44:24–45:7) Aôndo pase er a tim Babilon yô, shi a yila tor shon u una hemba gar ne sha iti jighilii je. * Yehova yange kaa a Mbaiserael mba ve lu mbashiada nav sha shighe la wener: “Umbur nen aerenakaa a tsuaa la; gadia Mo M ngu Aôndo, mô ugen ngu ga; Mo Aôndo je, mô ugen ngu er Mo nahan ga, u M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la.” (Yesaia 46:9, 10a) Sha mimi yô, Yehova ka Aôndo u fan kwagh u ken hemen.
3. Ka mbampin mba nyi se time sha mini?
3 Aôndo fa akaa a ken hemen nan je? Yehova tsenga fan kwagh u hanma wase nana er ken hemen yôô? Sha kpôô yô, i tsenga veren akaa a se er ken uma wasa? Se time sha mbamlumun mba Bibilo i ne sha mbampin mban kua mbampin mbagenev kpaa ken kwaghngeren ne man u a dondo la.
Yehova Ka Aôndo u A Tsenge Pasen Kwagh u ken Hemen Yô
4. Akaaôron a profeti a i nger ken Bibilo la due hana?
4 Yehova fe kwagh u ken hemen, nahan shighe u i lu ngeren Bibilo la á ôr mbatomov nav akaaôron a profeti kpishi ér ve nger. Akaaôron ne nga wasen se u tsengan fan kwagh u Yehova a we ishima u eren yô. Ngise Yehova yôô wener: “Nenge, akaa a ngise la, a er kera ve, ka akaa a he M lu tesen ye; M ngu ôron ne kwagh u a, er a lu a due ga je yô.” (Yesaia 42:9) Sha mimi yô, Aôndo er kwagh a ior nav sha icivir kpen kpen!
5. Or ka nana tsenga fan kwagh u Yehova a soo u eren yô, i gba u nana er nena?
5 Profeti Amoshi ôr kwagh u taver se ishima wener: “Mimi je TER Una gba eren ma kwagh môm ga saa Una vande pasen kwaghmyer Na la hen mbatomov Nav, uprofeti ve.” Er Yehova a pasen mbatomov nav kwagh u ken hemen yô, kwagh ne gema va ve a tom. Nenge ase injakwagh i doon i Amoshi yange ôr ne, wener: “Begha ta kume, yô, ka an je nana de ciana?” Begha ka una ta kume yô, ior kua uzendenya mba ve lu her ikyua cii ve kar ayem, nahan Yehova kpa yange una ôr kwagh yô uprofeti mba ngise er Amoshi nahan, ve pase kwaghôron na la fefa. “Ter AÔNDO ôr kwagh, yô, ka an je nana de pasenaa?”—Amoshi 3:7, 8.
“Ikyôr Ia Lagh” “Kwaghôron” u Yehova
6. “Awashima” u Yehova yange kure sha mi sha kwagh u mtim u Babilon nena?
6 Yehova ngise ôr kwagh sha ikyev i profeti na Yesaia ér: “Awashima Wam una lu je, Me er kwagh u a doom ken ishima u eren la cii.” (Yesaia 46:10b) “Awashima” u Aôndo ne inja na yô ka kwagh u Aôndo soo u eren a Babilon yô. Man kwagh ne kua myer u Aôndo yila Shirushi ken tar u Pershia ér a va ngohol Babilon, a tim gar la kera la. Yehova yange yôô awashima na ne ica gba cii shighe la kuma ye. Er se vande ôron nahan, kwagh ne kure sha mi ken inyom i 539 C.S.Y. la.
7. Er nan ve se fatyô u nan jighjigh ser mayange “kwaghôron” u Yehova una gba inya ga?
7 Ngise akumautya a Amon man Moabi mough ityav a Tor Yehoshafati u Yuda. Kwagh ne er kuma er anyom deri unyiin nahan cii ve Shirushi va tim gar u Babilon ye. Yehoshafati er msen vangertiôr ér: “TERE, Aôndo u uter asev, We U ngu Aôndo u Sha gaa? Ka We U tem tor sha utor mba akuraior cii ye gaa? Ka sha uwegh Ough, tahav mbu lu kua agee kpaa ye, ka nahan man ma or á fatyô u hendan kwagh a We ga ye.” (2 Kroniku 20:6) Yesaia kpa yange ôr kwagh vangertiôr, wener: “TER u akum a Sha wa ishima kera je, man ka an nana bunde unu? Uwegh Nagh ku naregh, yô, ka an nana hure ku?” (Yesaia 14:27) Nebukadinesar, tor u Babilon kpa shighe u i hide un a mfe na her, ihyundugh bee un la, á hide a iyol ijime á kaa ér: “Ma or fatyô u yangen uwegh [ku Aôndo] ga, shin u pinen Un er: Ka nyi U eren nahan, kpaa ga.” (Daniel 4:35) Yehova kaa a ior nav ér: “Kwaghôron Wam, . . . una hide her a Mo gbilin ga, kpa una er kwagh u M we ishima yô, ikyôr ia lagh un sha kwagh u M tindi un u eren yô.” (Yesaia 55:11) Nahan yô se na nen jighjigh ser, ma shighe môm kpa “kwaghôron” u Yehova una gba inya ga. Awashima u Yehova una kure kpee.
Aôndo Ngu a ‘Awashima u Tsôron’
8. Kanyi i lu “awashima” u Aôndo “u tsôron” laa?
8 Apostoli Paulu yange nger Mbakristu mba ken Efese washika ér Aôndo ngu a “awashima . . . u tsôron.” (Mbaefese 3:11) Awashima u Aôndo ne gban kan di kwagh u a we ishima u eren tsô ga; inja er a nger hanma kwagh u a soo u eren vough vough a ver ga. Kpa gema ka kwagh u Yehova a tsough ér una er sha ci u uumace man tar ne er yange soo ér i lu sha hiihii la. (Genese 1:28) De se time nen sha kwaghôron u profeti u hiihii u i nger ken Bibilo la tsô se nenge er i lu kwagh u awashima na una gba kpe mayange ga yô.
9. Kwagh u i er ken Genese 3:15 la bende a awashima u Aôndo nena?
9 Ityendezwa i Yehova a er ken Genese 3:15 la tese ér Adam man Ifa yange mba gbe a gba ken isholibo nahan maa Yehova wa ishima ér kwase na u sha ikyav la a̱ ver vor. Yehova shi tsenganengen kwagh u una due ken ihyom i hen atô u kwase na u sha ikyav la man Satan, kua vor u kwase la man u Satan kpaa. Shin er lu u Yehova una de iyô ia cagh ikishinguhar u Vor u kwase u Aôndo u sha ikyav la nahan kpa, a va kuman un yô, Vor la ua cagh iyô shin Satan Diabolo ityough. Nahan awashima u Yehova ne yange hii u kuren sha mi, gadia Aôndo tsua tsombor u Yesu u a lu Mesiya u i tende zwa ér ngu van la una due ker yô.—Luka 3:15, 23-38; Mbagalatia 4:4.
Kwagh u Yehova a Tsenge Veren Yô
10. Yehova yange wa ishima shighe u gba Adam man Ifa la ér ve̱ er isholibo shinii? Pase ase yôô.
10 Ngise apostoli Peteru ôr tom u Yesu er sha u kuren awashima u Aôndo yô, ér: “I vande fan Un je er i lu a gba tar ga yô, kpa i pase Un ken shighe u masetyô ne sha ci wen.” (1 Peteru 1:20) Sha shighe u Yehova gba Adam man Ifa la, yange wa ishima ér ve̱ er isholibo, nahan Yesu Kristu a̱ va na nagh sha u paan uumacee? Ei. Inja i ishember i ken zwa Grika i i gem i ken ivur ne ér “gba” la ér, “u gbihin vor hen inya.” Nahan, yange i ‘gbihi vor hen inya,’ shin Ifa jire iyol cii ve un man Adam ve er isholibo yee? Ei. Yange ve er isholibo cii ve ve mar ônov ye. (Genese 4:1) Nahan yô, lu shighe u Adam man Ifa er isholibo kpa lu a hii u maren ônov ga la, Yehova tsenga veren shighe u m-ande u “vor” la ye. Ku u Yesu man mnder na la ka kwagh u dedoo u i er sha u paan uumace, sha er a kar a isholibo kera kua ityom i Satan cica cii yô.—Mateu 20:28; Mbaheberu 2:14; 1 Yohane 3:8.
11. Kanyi kwagh Yehova yange tsenga veren sha u kuren awashima naa?
11 Aôndo shi yange tsenga veren kwagh ugen u una er sha u kuren awashima na yô. Washika u Paulu nger Mbaefese la pase kwagh ne. A kaa ér Aôndo una “kohol akaa a a lu Sha man a a lu shin tar kpaa ci ca cii sha ikyev i Kristu.” Paulu za hemen ôr kwagh u “akaa a a lu Sha” la, inja na yô, ka mba vea ya dyako a Kristu imôngo la ér: “I vande veren se . . . sha awashima u Un u A eren akaa cii sha mhen u awashima Na la.” (Mbaefese 1:10, 11) Sha kpôô yô, Yehova yange tsenga wan ishima ér ken hemen yô, uumace mbagenev ve̱ hingir vegher u kiriki u vor u kwase u Aôndo la shi ve̱ er tom a Kristu imôngo sha er nagh ku ipaa la kua wase ior yô. (Mbaromanu 8:28-30) Apostoli Peteru yila ve ér “icighanikyurior.” (1 Peteru 2:9) Apostoli Yohane yange zua a ian i civirigh i fan iyenge i ve mba shon mba vea ya dyako a Kristu ne. I tese un ken mpase u sha mnenge ér mba iyenge 144,000. (Mpase 7:4-8; 14:1, 3) Ve cica cii mba suen Tor Kristu, nahan mba eren tom “sha ci u icivir i iengem [i Aôndo].”—Mbaefese 1:12-14.
12. Er nan ve se fe ser i tsenga veren ior asange asange ken nongo u iorov 144,000 mba vea yem sha la ga?
12 Er Aôndo yange wa ishima tsuaa je ér iorov 144,000 ve ya dyako a Kristu imôngo nahan kpa, kwagh ne tese ér i tsenga veren ior mbagenev asange asange ér ve civir Aôndo sha jighjigh sha imba gbenda ne ga. Sha mimi yô, ngise i nger akaawan ken Ruamabera u ken Zwa Grika la jighilii ér a̱ wase mba i shigh ve mkurem la shi a̱ taver ve asema sha er vea kôr mimi gbang, nahan vea kuma u yemen sha yô. (Mbafilipi 2:12; 2 Mbatesalonika 1:5, 11; 2 Peteru 1:10, 11) Yehova yange tsenga fan ér iorov 144,000 vea kuma u eren kwagh u un we ishima yô. Nahan kpa, ka kwagh u mba i tsough ve ér ve lu ken nongo u mba yemen sha ne vea er a uma ve la una tese ér ve kuma shin ve kuma ga ye; man hanma ve yô nana tsua kwagh u nana er a uma u nan iyol i nan.—Mateu 24:13.
Kwagh u Yehova a Tsenge Fan Yô
13, 14. Gbenda u Yehova a eren tom a tahav nav mbu fan kwagh u ken hemen la zua sha nyi, man ka sha ci u nyi?
13 Yehova ka Aôndo u tsengan fan kwagh u ken hemen man u a kur awashima na kpaa yô. Nahan eren tom a tahav nav mbu fan kwagh u ken hemen ne nena? Hiihii yô, se na jighjigh ser Aôndo eren kwagh sha mimi man sha dooshima, un ka u perapera je. Apostoli Paulu ngise nger Mbaheberu mba ve lu Mbakristu ken derianyom u hiihii la washika pase ve wener ibumun i Aôndo man ityendezwa na ka “akaa ahar a a lu a geman ga, a Aôndo kpaa Una fatyô u eren aie sha mi ga” yô. (Mbaheberu 6:17, 18) Paulu shi pase kwagh ne ken washika u nger orhenen Titu la, wener “Aôndo . . . eren aie ga.”—Titu 1:2.
14 Shi kwagh ugen yô, er Yehova a hembe agee sha won cii nahan kpa, eren ifer ga. Mose yange kaa ér Yehova “ka Aôndo u jighjigh, ngu a ifer ga, Un ka u perapera man u mimi.” (Duteronomi 32:4) Hanma kwagh u Yehova a eren cii zua sha mlu na u doon tsung. Eren kwagh u a zough sha aeren na a vesen la vough yô. A yô ka, dooshima man kwaghfan man perapera kua tahav.
15, 16. Yehova yange pase Adam ken sule u Eden kwagh u una er nena?
15 Nenge ase gbenda u Yehova ngise er kwagh ken sule u Eden la; ú zua sha aeren a na a vesen la. Er Yehova a lu Ter u dooshima yô, yange na uumace hanma kwagh u ve soo cii. A na Adam mfe u henen sha kwagh sha alô sha alô kua mfe u kuren kwagh kpaa. Uzendenya mba eren kwagh sha mfe ve u marami u a mgbeghan ve u eren kwagh la tseegh, kpa Adam yô yange i gba un a mfe u tsuan kwagh u a soo u eren yô. Aôndo gbe Adam cii yô, a shir ashe shaala a nenge “hanma kwagh u Un er yô, lu u doon tsung.”—Genese 1:26-31; 2 Peteru 2:12.
16 Zum u Yehova wa Adam tindi ér a̱ de ye “kon u mfe u fan kwagh u dedoo man kwagh u bo la” ga la, a pase un hanma kwagh cii sha er Adam una tsua kwagh u a soo yô. A na Adam ian ér a gbaa yan “hanma kon u ken sule” la tsô, saa kon môm tseegh, shi a pase un kwagh u una tser un aluer a ya u yô. (Genese 2:16, 17) Aôndo yange pase Adam vighe vighe kwagh u una due ken ieren na yô. Tsô Adam er nena?
17. Er nan ve se fe ser Yehova gbe yaren tom a tahav nav sha u fan kwagh u ken hemen ga, saa kwagh u a soo u fan tseeghle?
17 Er Yehova a lu a tahav mbu fan kwagh u ken hemen nahan kpa, adooga yange nenge doo un u eren tom a tahav mbun sha er una tsenga fan kwagh u Adam—man Ifa—vea er ga. Nahan se mba a akperan sha kwagh u tahav mbu Yehova a lu a mi mbu fan kwagh u ken hemen la ga. Kpa se soo u fan, aluer Yehova una tsuan a tsua kwagh u a soo u tsengan fan yô. Shi kwagh ugen yô, Yehova ka Aôndo u dooshima, nahan una fatyô u eren kwagh sha ifer sha u tsengan veren ér uumace ve hemba un ato, nahan ve ya ican ga. (Mateu 7:11; 1 Yohane 4:8) Er Yehova a lu a tahav mbu fan kwagh u ken hemen nahan kpa, ka kwagh u a soo u fan tseegh ka a fa ye.
18. Er nan ve mtsough u Yehova a tsuan a tsua kwagh u ken hemen u a soo u fan la a tese ér tahav yina un ga?
18 Er Yehova a gbe fan kwagh u ken hemen ga, saa kwagh u a soo u fan tseegh yô, kwagh ne tese ér tahav yina unu? Ei. Mose pase ér Yehova “ka vande” shi a kaa ér: “Tom Na ngu vough.” Ngu a ibo sha akaa a isholibo i uumace i ve a mi la ga. Akaa a vihin a a tser se nyian ne cii due ken ihyembeato i Adam la. Apostoli Paulu ôr kwagh ne wang wener: “Isholibo nyôr shin tar sha or môm, man ku gema va sha ci u isholibo . . . nahan ku va sha ior cii sha ci u ve cii ve er isholibo yô.”—Duteronomi 32:4, 5; Mbaromanu 5:12; Yeremia 10:23.
19. Ka mbampin mba nyi se ôr kwagh sha mi ken ngeren u a dondo nee?
19 Akaa a se er ken ngeren ne cii wase se u fan ser Yehova eren ifer ga. (Pasalmi 33:5) Tahav mbu Yehova man aeren a na a dedoo man atindiakaa a na cii zua sha awashima na vough. (Mbaromanu 8:28) Er Yehova a lu Aôndo u fan kwagh u ken hemen yô, a pase “akaa a a lu a vande eren ga la” “hii sha mhii zan zan mkur, man hii sha ayange a tsuaa la je.” (Yesaia 46:9, 10) Shi se nenge ser, tsough a tsua kwagh u ken hemen u a soo u fan yô. Nahan, kwagh ne gema bende a vese nena? Se er nan ve akaa a se tsough u eren la aa zua sha awashima u Aôndo u dedoo laa? Man aluer se mba eren akaa a a zough sha awashima na yô, se zua a averen nena? Kwaghngeren u a dondo ne una na mlumun sha mbampin mban.
[Footnote]
^ Nenge peeji 28 u antakerada u i yer ér A Book for All People la, ka Mbashiada mba Yehova ve gber u ye.
Ú Fatyô u Pasen Kpa?
• Ka akav a ngise a nyi a tese ér ‘ikyôr ngi laghen’ “kwaghôron” u Aôndo hanma shighee?
• Kanyi kwagh Yehova a tsenge veren sha kwagh u “awashima” na “u tsôron” laa?
• Yehova eren tom a tahav nav mbu fan kwagh u ken hemen la nena?
[Study Questions]
[Picture on page 20]
Yehoshafati yange na Yehova jighjigh
[Picture on page 21]
Aôndo tsengaôron ku u Yesu man mnder na
[Picture on page 22]
Yehova yange tsenga veren kwagh u una er Adam man Ifa yôô?