‘Mbampase Ou Ka Iember Yam Je’

“Akaa a i vande ngeren la cii ka sha ci u ityesen yase lu i nger a ye.”—MBAROMANU 15:4.

1. Yehova we se kwagh hanma shighe nena, man er nan ve kwagh a gbe se a akaawan a na?

 YEHOVAH we ior nav kwagh kpoghuloo sha er vea nôngo a mbamzeyol ken ashighe a ican ne yô. Ka se zua a akaawan ne agen shighe u se lu henen Bibilo se tseegh yô, kua shighe u se ongo akaaôron ken mbamkombo mba Mbakristu la kpaa. Akaa a se ôron shi se ongo ken mbamkombo mban kpishi ka a se vande fan yô. Alaghga se vande henen a je kpaa. Er se hungur kwagh fele yô, doo u a umbur se mbaawashima man atindiakaa kua akaawan a Yehova hanma shighe. Akaa a Aôndo a umbur se hanma shighe ne a̱ doo se ishima. Gadia ka a taver se ishima, a wase se u veren ishima sha ityôkyaa i se lumun u eren uma u sha ishima i Aôndo yô. Ka nahan ve orpasalmi yange wa icam ter Yehova ér: “Mbampase [shin akaawan] Ou ka iember yam” ye.—Pasalmi 119:24

2, 3. (a) Hii nan ve Yehova a kor ungeren mba ken Bibilo mba ve er kwagh u ior la zan zan shighe wase nee? (b) Ka akaa a unô se time sha mi ken kwaghngeren nee?

² I nger Mkaanem ma Aôndo ica i gba hegen, nahan kpa ma a tahav her. (Mbaheberu 4:12) Ma ôr se akaa a mimi a yange er ior mba i er kwagh ve ken Bibilo yô. Er aeren a ityôô kua mbamhen mba hegen ve kaha kposo a mba sha shighe u i nger Bibilo la nahan kpa, ashighe kpishi mbamzeyol mba se tagher a mi hegen ne ka ve lu kwagh môm a mbamzeyol mba ior mba sha ashighe a tsuaa la. Akaa kpishi a i nger ken Bibilo sha ci u iwasen yase la tese se akaa a doon tsung a ior mba Yehova yange doo ve ishima shi ve civir un sha mimi shin er ve tagher a ahendan nahan kpaa. Ungeren mban mbagenev ôr kwagh u aeren a a vihi Aôndo ishima yô. Yehova yange mgbegha ior ve nger aeren a dedoo man a bo ne ken Bibilo sha u a lu kwaghwan hen avese yô. Apostoli Paulu yange nger wener: “Akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la.”—Mbaromanu 15:4.

³ De se time sha akaa atar a yange er ior mba civir Aôndo, a i nger ken Ruamabera la; se time sha kwagh u uma u Davidi vea Saulu man u Anania kua Safira man shi kwagh u Yosev vea kwase u Potifar. Ungeren mban cii tese se akaa a injaa kpishi.

Lumun Kwagh u Aôndo a Ser a Ver Yô

4, 5. (a) Kanyi yange i za hemen hen atô u Tor Saulu man Davidi? (b) Davidi yange er a Saulu shighe u a kôr un ihyom la nena?

⁴ Tor Saulu yange hemba Yehova ato, nahan kera kuma u hemen ior Nav ga. Sha nahan yô Aôndo venda un kpa gema tindi Profeti na Samuel ér a za shighe Davidi mkurem, a hingir tor u Mbaiserael ken hemen. Er Davidi er kwagh sha kpaver ken utya, ior cii hingir u wuese un yô, Saulu gba nengen Davidi ér ka orihyom na. Nahan a nôngo acin imôngo ér una wua un. Kpa er Yehova lu a Davidi yô, a war sha acin la cii.—1 Samuel 18:6–12, 25; 19:10, 11.

⁵ Kwagh ne na yô, Davidi hingir or u  zenden wue wue anyom imôngo. Er ian due i ma wua Saulu yô, ior nav gba kaan a na ér Yehova na orihyom wou sha ikyev you, nahan wua un. Kpa Davidi lumun ga. Davidi venda sha ci u á na Yehova jighjigh shi á na Saulu icivir kpaa, gadia Aôndo ver un tor sha ior Nav. Lu Yehova kôr Saulu tor sha Iserael ye. Shi a lu Yehova iyolna una dugh un tor kera sha shighe u a nenge i doo un ye. Nahan Davidi nenge ér tom ne ka u na ga. Davidi yange er kwagh u a fetyô cii sha u ishima i de u vihin Saulu a na yô, kpa hemba un tsô a kaa ér: “TER Una tsaha un, gayô, iyange i kuugh na ia va, shin una za kpe ken utya. TER A̱ yangem, m̱ de ze uwegh agh sha or u TER, u i shigh un mkurem la ga.”—1 Samuel 24:3–15; 26:7–20.

6. Kwagh u Davidi man Saulu la ngu se a inja nena?

⁶ Kwagh u Davidi man Saulu ne tese se kwagh u injaa. Er i lu nahan kwagh er ken tiônnongo u Kristu u lanen we ishima vee? Alaghga ma anmgbian ngu eren inja ka doon ga. Adooga kwagh u nan lu eren la ka isholibo i vesen keng ga, kpa ieren i nan la za u iyol. Nahan ú er nena? Er kwagh u anmgbian wou u ken Kristu ne a gbe u ishima shi ú til ken vegher u Yehova kpaa yô, ú fatyô u ôron kwagh a nan kundu kundu, sha er nana sôr inja yô. Kpa aluer nan de ga ye? Aluer ú nôngo sha afatyô wou kpa gba sha mi ga yô, de nan a Yehova. Ka kwagh u Davidi er vough je ne.

7. Se dondo ikyav i Davidi zum u ior ve lu nzughul a vese shin ve lu nyaghen se nena?

⁷ Shi kwagh ugen yô, alaghga ior mba nzughul a we shin ve soo kwagh wou ga sha ci u kwaghaôndo wou. Adooga u fa kwagh u ú er hen shighe ne ga. Kwagh ka una er se nahan i taver se u wan ishima je i zua ga, kpa kwagh u Davidi er shighe u Saulu lu nzughul a na la tese se kwagh u injaa. Upasalmi mba doon tsung mba Davidi nger la tese er yange er msen kpoghuloo ér Aôndo a war un sha ikyev i Saulu yô, man er yange na Yehova jighjigh shi gba un ishima kpishi u nan iti i Aôndo icivir kpaa yô. (Pasalmi 18:1–6, 25–27, 30–32, 48–50; 57:1–11) Davidi na Yehova jighjigh her shin er Saulu nzughul a na anyom imôngo nahan kpaa. Se kpa, ior vea nzughul a vese nan nan shin vea er se nyi je kpa, se za hemen u nan Yehova jighjigh shi se undu tiônnongo na ga. Se fa ser, Yehova ngu nengen hanma kwagh cii.—Pasalmi 86:2.

8. Mbashiada mba Yehova mba ken tar u Mozambique yange ve er nena shighe u i kar jighjigh u nan ve laa?

⁸ Mbakristu mba ken tar u Mozambique ver se ikyav i dedoo i ior mba ainge mba ve var a Yehova gbang gbang sha shighe u imeen yô. Ken inyom i 1984 la shojapetali ta num sha agar a Mbakristu mban lu her la acin imôngo, ve kura ve akaa, shi ve nande ve ayou shi ve wua mbagenev kpaa. Kwagh lu u Mbakristu mba mimi mban vea er ga.  Ityô ve yange i soo u kighir ve ér ve nyôr mzough ve u mbaatemtyo la shin a̱ gande kpa ve sue mzough ne. Kpa Mbashiada mba Yehova mban fa ér aluer ve nyôr mzough ne yô, kwagh ne una tese ér ve mba paleghaa a tar ga. Er ve venda yô ishima vihi shojapetali ne je zua ga. Yange i wua Mbashiada kuma 30 sha shighe shon u i lu eren ayôôso ken tar u Mozambique ne. Er ior mba Aôndo mban tagher a ku nahan kpa, jighjigh ve tenger ga. * I nzughul a ve kpa ve wa ishima er Davidi nahan, nahan ken masejime yô ve hemba tôvacan ne.

Kwaghwan u a Lu Se Icintan Yô

9, 10. (a) Akaa a yange er ior mbagen mba i er kwagh ve ken Ruamabera la aa wase se nena? (b) Kwagh u Anania man Safira er la lu shami ga nena?

⁹ Kwagh u yange er ior mbagenev mba i er kwagh ve ken Ruamabera la umbur se aeren a i gbe u se palegh yô. Sha kpôô yô, Bibilo ôr akaa kpishi a ior mba yange ve er kwaghbo nahan ve ya ican yô. Mbagenev je yô, lu mbacivir Aôndo. (1 Mbakorinte 10:11) Ken ve yô, lu Anania vea kwase na Safira. Ve lu ken tiônnongo u Kristu u ken Yerusalem, u ken derianyom u hiihii la.

¹⁰ Yange mba eren Pentekosti u inyom i 33 la mba been yô, gba u a nengen sha mbananjighjigh mba hev mba ve lu ken Yerusalem heregh ér vea ngohol ityesen hen mbaapostoli la. Nahan mbagenev ken tiônnongo tee akaa a ve sha u vea wase u nengen sha ve cii yô. (Aerenakaa 2:41–45) Anania man Safira yange ve tee sule ve ve pande inyaregh ve koso, ve va a ki ki shi la ve va na mbaapostoli ér ka ishe i ve tee sule shon je la. Sha mimi yô, Anania man Safira lu a ian i nan inyaregh ki ve soo cii, kpa awashima ve lu u bo shi ve soo u nyighen kpaa. Yange ve soo ér vea bume mbaapostoli kua tiônnongo, a wuese ve ér ve er iyua kpishi. Kpa icighan jijingi wase apostoli Peteru, nahan a pon aie man atseregh a ve la, tsô Yehova wua ve her ave ave la je.—Aerenakaa 5:1–10.

11, 12. (a) Pase ajiir a Ruamabera a kaa ér se ôron kwagh sha mimi la? (b) Aluer se mba a inja i mimi yô, se zua a mbamtsera mba nyivii?

¹¹ Hanma shighe u i lu se pe eren aie sha u mbagenev ve wuese se yô, doo u se umbur kwagh u yange er Anania man Safira la, nahan se er teghelee. Se fatyô u tsughun ior, kpa mayange se tsugh Yehova ga. (Mbaheberu 4:13) Ruamabera wa se kwagh acin  imôngo ér se eren kwagh sha mimi ayol a ase, gadia mbaerenaie vea lu ken tar u ua lu a aferakaa ker ga la ga. (Anzaakaa 14:2; Mpase 21:8; 22:15) Man se fa ityôkyaa tsembelee je. Ka Satan Diabolo a lu or u samber a mbaaie cica cii ye.—Yohane 8:44.

¹² Aluer se mba ior mba mimi yô, se zua a mbamtsera kpishi. Se lu a imoshima i wang shi mbagenev vea na se jighjigh nahan a saan se iyol. Ashighe kpishi ka i tôô Mbakristu tom sha ci u inja ve i mimi. Mbagenev yô, i de ior tom kpa i undu ve her sha ci u ieren ve i mimi la. Kpa mtsera u hemban cii yô ka un ne: ka sea lu ior mba mimi yô, se hingir azende a Aôndo Uhembanagee cii.—Pasalmi 15:1, 2.

Palegh Dang u Eren

13. Ka imeen i nyi Yosev yange tagher a mini, man a er nena?

¹³ Yange i tee Yosev, wan u tertamen Yakob, hingir kpan. Lu anyom 17 hen shighe la. Ayange nga kar yô, i yem a Yosev hen ya u Potifar, Origipiti u lu orvesen u ken ya u Farao yô. Yosev maa gba doon kwase u orvesen na ne ishima. Sar un tsung u Yosev a yav a na, gadia Yosev doo-or kpishi. Tsô a zer ôron kwagh a na ayange ayange ér: “Va yav a mo.” Yosev lu vea tsombor u ter na hen shighe ne ga; lu ken tar ugen ica ape or fa un ga yô. Yange una soo yô ma yav a kwase ne or môm tsô ma nan fa ga. Kpa, zum u kwase u Potifar kôr Yosev sha ikyondo ér a yav a na yô, orti yevese kera.—Genese 37:2, 18–28; 39:1–12.

14, 15. (a) Er nan ve kwagh u Yosev la a lu a inja hen a vese? (b) Er nan ve yange saan kwase Kristu ugen iyol zum u a dondo kwaghwan u Aôndo yôô?

¹⁴ I yese Yosev hen tsombor u civir Aôndo, nahan a fa ér aluer or yav a kwase, shin kwase yav a or u nan lu nom u nan ga yô ka kwaghbo. Tsô a pine ér: “A er nan man me er kwaghbo u vesen ne, me er Aôndo isholibo nahana?” Alaghga yange fa er u eren kwagh nahan i lu isholibo yô, sha ci u a fa kwagh u Aôndo wa ishima ér uumace ve eren zum u a gba kwase môm tseegh a na Adam ken Eden la. (Genese 2:24) Mbacivir Aôndo ainge vea fatyô u zuan a iwasen sha u henen sha kwagh u Yosev er la. Idya i eren ngee sha ajiir agen kpishi, nahan gumor ka nana venda u eren idya yô mbakwav mba nan ve naha nan tar kpishi. Noov gema eren idya ayange ne kpoghuloo, kasev mba yaav kpa sha zwa la. Nahan yô, kwagh u Yosev ne umbur se kwagh u i doo u se er sha shighe wase ne yô. Tindi u Aôndo tese ér ijimba man idya ka kwaghbo, kwagh ngu a gema sha kwagh ne ga. (Mbaheberu 13:4) Ior kpishi mba ve er idya yô kaa ér ityôkyaa i dedoo  ngi i i doo u or nana palegh idya yô. Idya ka i va a mbamzeyol mba vihin kpishi er ahenge a van man imoshima i bo man iyuhe man iyav mbu wan kua angev mbu tsaren sha idya nahan. Er i umbur se ken Ruamabera nahan, aluer or ngu eren idya yô, “ka iyol i nan je nan eren i kwaghbo ye.”—1 Mbakorinte 5:9–12; 6:18; Anzaakaa 6:23–29, 32.

¹⁵ Gumkwase u civir Yehova ugen u a lu a er nom ga yô, ngu a ityôkyaa i wuese akaawan a Aôndo. Iti na ér Jenny. * Gumor u doonashe ugen, u ve eren tom ijiir i môm yô yange soo kwagh na kpishi, tsô gba eren sarka a na. Kpa er Jenny wongor ga yô, gumor ne gba zan un iyol kpoghuloo je. Jenny kaa wener: “Yange taver mo u vendan a na kpishi, sha ci u nomsoor ka nana soo kwagh wou nahan, i kehe u ken ishima kpishi.” Nahan kpa, Jenny yange mase kaven wener gumor ne ngu nôngon di a nôngo tsô ér una seer un sha iyenge i kasev mba un vande yaven a ve yô. Er Jenny lu nôngon u gban ken imeen ne yô, a er msen hen Yehova ér a wase un sha er una var a Na gbang gbang yô. Jenny mase kaven ér akaa a yange un hen ken Bibilo man ityakerada i Mbakristu i yange un ôr la wase un u umbur akaa kpishi a yange wase un, un hingir tsevaa yô. Kwagh môm ken akaa a Jenny umbur yô ka kwagh u Yosev man kwase u Potifar la. Jenny kaa ér: “Yange m za hemen u kaan a iyol yam mer Yehova doom ishima, nahan mayange me er Aôndo isholibo i vesen ne ga.”

Wa Akaawan a Aôndo Ikyo!

16. Aluer se mba ôron kwagh u ior mba i ter kwagh ve ken Bibilo shi se mba henen sha kwagh ve yô se zua a iwasen nena?

¹⁶ Aluer se nôngo kpoghuloo se kav er i hii ve Yehova a ne ian i nger akaa agen ken Ruamabera sha ci wase yô, atindi na aa seer doon se ishima. Se fatyô u pinen ayol a ase ser, akaa shon tese se nyi? Ka aeren shin mbaawashima mba ior mba i er kwagh ve ken Bibilo mba nyi nahan i doo u se dondo shin se paleghaa? I ôr kwagh u ior uderi imôngo ken Mkaanem ma Aôndo. Hanma or u nan soo kwaghwan u Aôndo cii yô, nana zua a iwasen aluer nan ngu a isharen i zuan a kwaghfan u a ne ior uma la yô. Kwagh ne kua u henen akaa a injaa sha u ôron kwagh u ior mba Yehova a de ér i nger kwagh ve ken mkaanem nam, shi i̱ koso ungeren mban sha ci wase la kpaa. Ashighe kpishi magazin ne ka a ôr kwagh u ve mba shonov mba i er kwagh ve ken Bibilo sha ci u ityesen yase la. U nenge wer doo u ú tôô shighe u ôr ungeren mban ga zee?

17. U nenge akaawan a Yehova nena, man ka sha ci u nyi?

¹⁷ Se wuese kpishi er Yehova a we mba ve lu nôngon ér vea er ishima na ikyo tsung yô! Sha mimi yô, se yina, er nomso man kasev mba i er kwagh ve ken Bibilo la kpa yange ve yina nahan. Nahan kpa, akaa a yange ve er, a i nger ken Bibilo la nga se a inja kpen kpen. Aluer se mba wan mbampase mba Yehova ikyo yô, kwagh ne una wase se se er kwaghbo u vesen ga, shi se dondo ikyav i dedoo i mba yange ve er kwagh u perapera la kpaa. Aluer se er nahan yô, se kpa se wa icam er orpasalmi nahan, ser: “Mba i saan ve iyol yô, ka mba ve we mbampase [shin akaawan a Yehova] ikyo, ve keren Un a ishima ve cii la; Uma wam kor mbampase Ou, ve doom ishima tsung je!”—Pasalmi 119:2, 167.

[Footnotes]

Ú Na Mlumun Wer Nyi?

• Ieren i Davidi a Saulu la tese se nyi?

• Kwagh u Anania man Safira la tese se nyi?

• Er nan ve kwagh u Yosev yange er la a hembe lun se a inja nyian ciilii?

[Study Questions]

[Picture on page 14]

Er nan ve Davidi yange lumun ér i wua Saulu ga?

[Picture on page 15]

Kwagh u Anania man Safira la tese se nyi?

[Picture on page 16]

Kanyi yange i na ve Yosev venda idyaa?