‘Palegh Ahon A Gban’
‘Palegh Ahon A Gban’
“Eren akaa cii, ahon a de lu sha mi ga”.—MBAFILIPI 2:14.
1, 2. Apostoli Paulu wa Mbakristu mba ken Filipi man mba ken Korinte kwagh ér nyi, man lu sha ci u nyi?
KEN derianyom u hiihii la, apostoli Paulu nger washika wuese Mbakristu mba ken Filipi kpishi sha ieren ve i dedoo la. Yange wuese nagh vev ku nan mgbeghaa man ishimatseen ve, shi saan un iyol sha ityom ve i dedoo kpaa. Nahan kpa, Paulu umbur ve ér ve ‘eren akaa cii, ahon a de lu sha mi ga.’ (Mbafilipi 2:14) Er nan ve apostoli ne wa ve kwagh nahana?
2 Paulu yange fa kwagh u ahon a gban ka a va a mi yô. Yange vande umbur tiônnongo u ken Korinte er ahon a gban a lu kwaghbo yô. A pase ve er ngise Mbaiserael zer vihin Yehova ishima shighe u ve lu ken taaikyôngo la yô. Ve er kwagh ne nena? Asorabo yange sar ve, shi ve hingir ior mba civir akombo man mba eren idya shi ve bam Yehova sha u karen un man sha ahon a gban kpaa. Paulu taver Mbakristu mba ken Korinte ishima ér ve hen kwagh sha kwagh ne. A nger ér: “De gbe nen ahon er mbagenev ken ve lu ve gba ahon man ortiminior gema tim ve nahan ga.”—1 Mbakorinte 10:6–11.
3. Er nan ve i doo u se time sha kwagh u ahon a gban nyiana?
3 Ieren i mbacivir Yehova nyian ne ngi vough er mba ken tiônnongo u ken Filipi la nahan. Mba a ieren i dedoo shi ve doo ayol a ve kpaa. (Yohane 13:34, 35) Er se nenge mbamzeyol mba ahon a gban yange va a mi hen atô u ior mba Aôndo ken ashighe a karen la yô, doo u se dondo kwaghwan u a kaa ér: “Eren nen akaa cii, ahon a̱ de lu sha mi ga” la. Hiihii yô, de se time nen sha ahon a gban aa i er kwagh u a ken Ruamabera la. Shi se time sha akaa a se er ve se yange mzeyol u ahon a gban aa fatyô u van a mi hen atô wase nyian la.
Mbaaferev Za Yehova Ivever Iyol
4. Mbaiserael yange ve gba ahon ken taaikyôngo nena?
4 I ter ishemberti i ken zwa Heberu i í gem ér u ‘gban ahon shin u hunan kwagh shin u unun ikyer’ la acin imôngo ken Bibilo ken ungeren mba ve er kwagh u zende u Mbaiserael ken taaikyôngo u anyom 40 la. Ashighe agen Mbaiserael yange vea yaan ican yô ve kera wa ishima ga, ve gema ve gba a gba ahon. Ikyav i tesen yô, shighe u i due a ve ken tar u kpan ken Igipiti ica lu a gba ga la, “ior i Mbaiserael cii mough ayôôso a Mose man Aron.” Shi Mbaiserael gba ahon sha ikyaa i kwaghyan, ve kaa ér: “Guda u ma se kpe sha uwegh ku TER ken tar u Igipiti zum u se teman a ityev mbi inyamev ikyum se yaan bredi kuman se la; gadia ne va a vese ken deserti ne ner, né va wua nongoior ne cii sha ijen.”—Ekesodu 16:1–3.
5. Ka an jighilii Mbaiserael mough ayôôso a nan zum u ve gba ahon laa?
5 Sha kpôô yô, kwagh môm yina Mbaiserael ken taaikyôngo ga, Yehova na ve hanma kwagh u ve soo cii, yange na ve kwaghyan shi na ve mngerem kpaa. Ma shighe môm kpa lu inja er Mbaiserael vea kpe ijen ken taaikyôngo ga. Nahan kpa, er kwagh kuman ve ga yô, ve hingir u ôron kwagh dang dang shi gban ahon kpaa. Er ve lu eren ayôôso a Mose man Aron nahan kpa, lu Yehova jighilii je ve mough ayôôso a na ye. Mose kaa a Mbaiserael ér: “Yehova ungwa ivever i ne eren Un la; se mba nyi? Ka se, ne ze se ivever iyol ga, kpa ka TER.”—Ekesodu 16:4–8.
6, 7. Mbaiserael yange ve gema inja er i tese ken Numeri 14: 1–3 nahan nena?
6 Ica gba ga tsô shi Mbaiserael mough ahon a gban. Mose tindi iorov 12 ér ve za nenge Tar u Ityendezwa la mker. Mbamkerev mba pue va a loho u bo. Nahan lu nyi i ere? “Mbaiserael cii gba zan Mose man Aron ivever iyol, ior cii gba kaan er: Guda ma se kpe ken tar u Igipiti, gayô, guda ma se kpe ken deserti ne je! Ka nyi man TER A ve a vese ken tar [u Mbakanaan] ne er se̱ va kpe ku u ishôm nahana? Kasev man mbayev asev mba kiriki, á va kura ve; kera guda u sé hide ken Igipiti gaa?”—Numeri 14:1–3.
7 Nenge er Mbaiserael gema inja fese sha wono! Zum u i due a ve ken tar u Igipiti shi i yima ve shin Zegemnger u Nyian la doo ve kpishi, nahan ve wa icam ve wuese Yehova. (Ekesodu 15:1–21) Kpa er ior mba Aôndo mban tagher a mbamzeyol ken taaikyôngo shi ve lu cian Mbakanaan yô, ve hingir u gban ahon. Ve kera sugh Aôndo sha er a yem ve ga, kpa ve hide ve lu waren un a war ér ngu yangen ve u ember uma. Ahon ve a gban ne lu tesen ér ve wuese akaa a dedoo a Yehova lu nan ve la ga. Ka nahan ve Yehova kaa ér: “Ka hanma shighe je ior mba aferev mban vea de u zan Mo ivever iyoloo?” ye.—Numeri 14:27; 21:5.
Ahon a Gban ken Derianyom u Hiihii La
8, 9. Pase ahon a gban a i er kwagh u á ken Ruamabera u Mbakristu u ken zwa Grika la.
8 A̱ shi nan kpa, ior mba se er kwagh ve sha heen ser ve gba ahon ne yange ve pase ishima vihin ve ken igbar. Shighe u Yesu za iniongo i atumbe ken Yerusalem ken inyom i 32 la, ‘ikpelaior gba unun sha kwagh Na kpishi.’ (Yohane 7:12, 13, 32) Mbagen lu ôron kwagh na ivarvase kaan ér ngu or u dedoo, mbagenev di lu kaan ér ngu iferor.
9 Shighe ugen la Yesu vea mbahenen nav za Levi shin Mateu, or u ngohol kpandegh inya. Nahan “Mbafarishi man mbangeren vev gba ahon a mbahenen Nav, ve kaa er: Inja na nan ne ye kwagh shi ne me kwagh a mbangoholkpandegh kua mbaasorabo imôngo?” (Luka 5:27–30) Shighe u Yesu za ken Galilia la kpa “Mbayuda mough ayôôso a Na, sha ci u kaa er: Mo M ngu kwaghyan u a sen Sha yô.” Mbahenen mba Yesu mbagenev kpa ishima vihi ve a na sha kwaghôron la, nahan ve gba ahon.—Yohane 6:41, 60, 61.
10, 11. Kanyi yange i na ve Mbayuda mba ken Mbagrika gba ahono, man mbatamen mba ken Kristu vea hen kwagh sha gbenda u i nenge sha ahon ne nena?
10 Shighe u i bee iniongo i Pentekosti u ken inyom i 33 ica lu a gba ga la kpa ior gba ahon, kpa ahon ne gema va a kwagh u dedoo. Anmgbianev mba ken Yudia lu eren a atôatyev kpishi a a hingir mbahenen la doo doo, kpa zayol va gema due sha gbenda u i lu karen akaa a ior va a mi la. Aerenakaa 6:1 ôr kwagh u yange er yô, ér: ‘Ahon gba Mbayuda mba ve lu ken Mbagrika la a Mbaheberu sha ci u i wa kasev mba côgholov vev ikyo sha gbayol ve u ayange ayange la ga.’
11 Ahon a ior mban gba ne lu er ka a Mbaiserael gba ken taaikyôngo la ga. Mbayuda mba ve lu ken Mbagrika ne gba ahon sha mbamzeyol vev sha ibume ga. Ityôkyaa i ve gba ahon yô, lu sha ci u i lu wan kasev mba côgholov mbagenev ikyo ga. Shi yange ve gba ahon inja er mba eren a er ayôôso ga, shin ve soo u lamen sha Yehova dang ga. Ve gba ahon ne a Mbaapostoli, nahan er ahon ve ne lu a mimi yô, Mbaapostoli mban vihi shighe ga je maa ve tsua kwagh u a er sha u sôron zayol la yô. Ve ver mbatamen mba ken Kristu ikyav i dedoo kpen kpen! Mbatamen mba eren kwagh sha kwaghfan sha u ‘vea cir ato ve sha mliam ma icanor ga yô.’—Anzaakaa 21:13; Aerenakaa 6:2–6.
Palegh Mbamzeyol mba Ahon a Gban a Ve a Mi La
12, 13. (a) Tese ikyav i mzeyol u ahon a gban ka a va a mi la. (b) Kanyi ka i na ve or gba ahono?
12 Akav kpishi a se hen ken Ruamabera ne tese ér ahon a gban yange va a mbamzeyol mba vihin tsung hen atô u ior mba Aôndo mba ngise mbara yô. Nahan doo u se hen sha mbamzeyol mba aluer se gba ahon nyian ve vea va la. Alaghga ikyav i tesen ne ia wase se. Myôm kpishi ma ngôôr tan nduran ga. Nahan aluer ma hii u tan nduran i fa kpa i er kwagh sha mi ga yô, ma a ta nduran zan zan ma a vihi, nahan a kera fatyô u eren kwagh môm môm a mi ga. Akaahendan agen kpishi ka a saa ishe, kpa u ngu wer mbasôron mbara ka ve kan a kanshio u sôron a ga, kpa ka i lu sha ci u a ta nduran zan zan gande u sôron. Se tôô ikyav ne se kar sha ahon a gban nena?
13 Er myôm ma gen ma ngôôr tan nduran ga nahan, kape uumace mba ve yen ne kpa ve lu a ieren i gban ahon je la. Se ver nen ishima sha er aluer imba ieren ne ngi nyôron hen atô wase kpa se fa fele yô. Er mdôhôrom man ahumbe ka a na kwagh a ta nduran fese nahan kape ican ia na se hingir u gban ahon je la. Shighe u i tum se iyol yô, zayol u cuku kpa una hingir se zege kwagh. Er tar u lu hemban vihin gban a gba kera ken ayange a masejime ne yô, akaa a nan or ahon a gban aa seer a seer. (2 Timoteu 3:1–5) Kwagh ne una na mbatomov mba Yehova je kpa vea hingir u gban ahon ayol a ve. Ashighe agen ka i lu ankwagh u cuku inja er mbamyina mba ior mbagenev shin gbenda u ve eren kwagh la shin ityom i ve lu a mi ken tiônnongo la i na ve or gba ahon ye.
14, 15. Er nan i doo u se de ser ahon a gban a ya tor sha a vese ga?
14 Aluer ka nyityô kwagh i vihi se je kpa, se de ser ahon a gban a ya tor sha a vese ga, sha ci u aluer se ver ishima ga yô se hingir mba gban ahon hanma shighe. Sha kpôô yô, aluer se kôr ityough ga yô, ahon a gban aa vihi mlu wase vindi vindi. Mbaiserael yange ve gba ahon sha kwagh u uma u ken taaikyôngo zan zan je yô ve hingir u waren Yehova je kpaa. (Ekesodu 16:8) Imba kwagh ne a de eren se ga!
15 Er myôm ma ngôôr tan nduran ga nahan kpa, a fatyô u yangen ma u tan nduran sha u shighen ma ivue i nduran ua fatyô u yan fele fele ga yô, shi sôron ajiir a nduran u soo u duen la kpaa. Sha kwagh u ahon a gban kpaa, zum u se kav ser se mba a ieren ne yô, se er kwagh sha mi fele shi se er msen sha er se fatyô u yangen i yô. Se er kwagh ne nena?
Nengen Akaa Er Yehova kpa a Nengen a La
16. Se hemba ahon a gban nena?
16 Ahon a gban ka a na se har ishima yase sha iyol yase kua mbamzeyol asev tseegh, se kera nenge a averen a se zough a mi er se lu Mbashiada mba Yehova la ga. Aluer se mba umbur averen a se lu zuan a mi la hanma shighe yô, se hemba ieren i gban ahon la. U tesen ikyav yô, hanma wase nan ngu a ian i civirigh i yilan nan suur sha iti i Yehova. (Yesaia 43:10) Se fatyô u yan ikyar kôôsôô a na, shi se mba a ian i lamen a un u a ‘ongo mbamsen’ asev la sha hanma shighe cii. (Pasalmi 65:2; Yakobu 4:8) Uma wase kpa ngu a inja sha ci u se fa ikyaa i or u nan kom u hemen sha won cii la, shi se fa ser u nan Aôndo jighjigh kpoghuloo la ka kwagh u civirigh. (Anzaakaa 27:11) Se mba a ian i pasen ior loho u dedoo u Tartor ne. (Mateu 24:14) Jighjigh u se ne nagh ku ipaan ku Yesu Kristu la na yô se mba a imoshima i wang. (Yohane 3:16) Sea lu yan ican nan nan kpa ka averen a se lu a mi je ne.
17. Aluer se mba a ityôkyaa jighilii i gban ahon kpa, doo u nengen kwagh er Yehova kpa a nengen nahan sha ci u nyi?
17 Se nengen nen kwagh er Yehova kpa a nengen la, i de lu sha mnenge wase tseegh ga. Orpasalmi Davidi nger wener: “TERE, nam, m̱ fa igbenda You, tesem ihiange You.” (Pasalmi 25:4) Aluer se mba a ityôkyaa jighilii i se lu gban ahon je kpa Yehova lan ga. Una er kwagh sha mi fese je. Nahan kpa, er nan ve ka a de ér ican i er se ashighe agene? Ashighe kpishi ka a de sha ci u mlu wase la una na yô se hingir u lun a aeren a injaa er ishimawan man ishimataver man jighjigh nahan.—Yakobu 1:2–4.
18, 19. Ôr kwagh u a tese ér aluer se wa ishima a mbamzeyol yô kwagh u dedoo una due ker yô.
18 Aluer se mba wan ishima a ican, se mba gban ahon ga yô, kwagh ne una tese or u se lu yô shi alaghga una taver mbagenev asema kpaa. Mbashiada mba Yehova mba ken tar u Jamani yange ve nyôr bôôsu u yemen mkohol u vesen ken tar u Hungary ken inyom i 2003 la. Ordelaba la lu Orshiada ga, shi doo un u lun vea Mbashiada imôngo ayange pue je ga. Kpa mba za nyer yô, kera soo u undun ve ga. Sha ci u nyi?
19 Shighe u ve lu yemen sha gbenda la akaa a vihin er kpishi. Kpa Mbashiada mban gba ahon ga. Ordelaba la gema kaa ér, er un tee ior je ka hiin je un tee ior mba lun a inja i dedoo je ne! Shi a tôndo zwa kpaa wener aluer Mbashiada va u va pasen un kwagh yô, una kegh ato a ve dedoo. Mbashiada mba ve lu zan mkohol u vesen ne tese inja i dedoo kpen kpen, ve ‘er akaa cii, ahon a gban lu sha mi ga’!
Mde u Asorabo Ve a Mzough
20. Doo u se de mbagenev kwaghbo ve sha ci u nyi?
20 Kanyi i gbe u se er aluer kwagh zua se a anmgbian ugen yôô? Aluer ka kwagh u vesen yô, doo u se er sha kwaghwan u Yesu u a lu ken Mateu 18:15–17 la. Kpa u ngu wer ka hanma shighe cii se eren nahan ga, sha ci u mbamzeyol mbagen kpishi ka ve lu mba ikyoogh ga. Aluer or er se kwaghbo yô, er nan ve se tee kwagh la a lu se ian i dedoo i se hen u den mbagenev kwaghbo ve ga? Paulu nger ér: “Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la. Kwagh u a hembe cii yô, haa nen dooshima iyol, ka kwagh u maghen mlu u vough je la.” (Mbakolose 3: 13, 14) Se fatyô u den mbagenev akaabo a ve kpa? Se hen ser Yehova una fatyô u hunan aeren a ase gaa? Una fatyô u eren kwagh nahan, kpa ka a shi zungwen se mhôônon shi den se asorabo kpaa.
21. Ahon a gban aa fatyô u benden a mba ve lu ungwan la nena?
21 A lu nyi je i lu zayol wase kpa, ahon a gban aa fatyô u been a zayol wase ga. Ishemberti i ken zwa Heberu i i gem ér “ahon a gban” la shi ia fatyô lun u “unun shin ikyer” kpaa. Afaerenga a doo se u lun vea or u zeren gban ahon ga shi se palegh nan je kpaa. Nahan aluer se mba gban ahon yô kape mbagenev mba ve lu ungwan la kpa vea er je la. Sha ci u a doo ve u lun a imbaor la ga nahan vea palegh se. Aluer kwagh ngu kuman or sha won ga yô, alaghga mbagenev vea soo u fan zayol u nan la, kpa sha mimi yô ieren ne ia fatyô u urugh se van a mi hen imbaor la ga.
22. Wankwase ugen ôr kwagh u Mbashiada mba Yehova ér nyi?
22 Ishima i den mbagenev kwaghbo la ka i va a bem, man ieren ne i doo ior mba Yehova kpen kpen. (Pasalmi 133:1–3) Wankwase Katoliko ugen u kuman anyom 17 ken tar u Yuropa nger washika hen afishi a branci a Mbashiada mba Yehova sha u pasen kwagh u a doo un ken nongo ve yô. A kaa ér: “ Ka cii nongo u m fe ior vev ve pav ker sha ci u ihyom shin hua shin tswam shin ieren i ior wan ayol a ve ikyo tseegh ga je ne.”
23. Kanyi se time sha mi ken ngeren u a dondo nee?
23 Iwuese i se lu a mi sha averen a se lu zuan a mi er se lu civir Yehova, Aôndo u mimi la ia wase se u lun ken mzough, geman yangen ahon a gban hen atô wase. Ngeren u a dondo ne una wase se se nenge er se lu a aeren a Aôndo ve aa wase se u palegh ahon a gban a hemban vihin cii yô. Ahon shon yô ka u lamen dang sha nongo u Yehova u ú lu shin tar ne la.
Baver We Kpa?
• Ahon a gban kua nyi kere?
• A fatyô u tesen ikyav i kwagh u ahon a gban ka a er la nena?
• Kanyi ia wase se u dughun ieren i gban ahon ken a vese kera?
• Ieren i den mbagenev kwaghbo la ia wase se u palegh ahon a gban nena?
[Study Questions]