Ver Ishima Sha Mdoom Ma Nongo U Yehova
Ver Ishima Sha Mdoom Ma Nongo U Yehova
“Mdoom ma ya Wou maa kuma se.”—PASALMI 65:4.
1, 2. (a) Tom u yange gba u a er ken tempel la ua bende a ior mba Aôndo nena? (b) Ka iwasen i nyi Davidi na sha u i maa tempele?
DAVIDI ngu môm ken mba zan gwa kpishi mba í er kwagh ve ken Ruamabera u ken zwa Heberu la. Un lu ken tar u Iserael u ngise la. Lu orkuranilev shi kuhwan kwagh, shi lu profeti kua tor kpaa. Yange suur sha Yehova Aôndo a ishima na cii. Er ya ikyar a Yehova taveraa yô, sar un tsung u maan Aôndo iyou. Lu u iyou i Aôndo shin tempel ne una lu ijiir i vesen i mcivir u mimi ken tar u Iserael. Davidi yange fa ér tempel la man tom u a va er ker la cii ua na ior mba Aôndo iember shi ua wase ve kpishi. Nahan á wa icam ér: “I saan or u U tsough nan la iyol, Wer, nana̱ kporom er nana tema ken ityembe i iyou You la. Mdoom ma ya Wou maa kuma se, ka icighantempel Wou je la.”—Pasalmi 65:4.
2 Er sar Davidi u maan Yehova iyou nahan kpa i na un ian ér a maa i ga. Tom u civirigh ne lu sha ci u wan na Solomon. Nahan kpa, Davidi gba ahon ér í na orgen tom ne yum ga. Kwagh u yange hange un yô, lu u i maa tempel la tseegh. Nahan a sue tom ne a ishima na i môm, gadia a pase Solomon gbenda u Yehova tese un er a maa tempel la cii. Shi Davidi pav Mbalevi udubu udubu ver ve sha tom vough vough shi a na zenaria man azurfa kpishi ér i maa tempel.—1 Kroniku 17:1, 4, 11, 12; 23:3–6; 28:11, 12; 29:1–5.
3. Mbacivir Aôndo mba nengen akaa a i ser i ver vough vough ken mcivir u mimi la nena?
3 Mbaiserael mba jighjigh lumun akaa a i sôr i ver vough vough sha u ior ve civir Aôndo sha mimi ken iyou na la. Se mba se lu shiren Yehova tom ainge ne kpaa, se lumun akaa a nongo u Yehova u shin tar u ser u ver sha u wasen se u civir un la. Nahan kwagh ne tese ér se mba a ieren i Davidi kpa lu a mi la. Se mbá mbagban ahon ga. Kwagh hemba gban se sha mdoom ma nongo u Aôndo. Er i lu nahan ú hen sha akaa a dedoo a ken nongo u Aôndo, a se fatyô u wuese a la vee? Se time nen sha akaa ne agenegh.
Wuese Er I Ver Ior Ve Lu Hemen Se Yô
4, 5. (a) “Wanakiriki u jighjigh man u fan kwagh” ngu eren tom na nena? (b) Mbashiada mbagenev nenge kwaghyan u ken jijingi u i lu nan ve la nena?
4 Se mba a atôakaa a dedoo a wuese Yesu Kristu er a ver “wanakiriki u jighjigh man u fan kwagh” ér a̱ nengen sha akaa a na shin tar ne yô. Mbakristu mba i shigh ve mkurem mba ve lu nongo u wanakiriki ne la hemen tom u pasen ior loho u dedoo, shi ve sôr ashighe ve ver a nyôron mbamkombo sha u civir Aôndo shi mba gberen ityakerada i i har sha Bibilo ken ijô hemba 400. Ior umiliôn imôngo sha tar cii mba yan “kwaghyan” u ken jijingi u i lu nan “sha ashighe ashighe” ne saan saan. (Mateu 24:45–47) Sha mimi yô, ityôkyaa ngi i se gba ahon sha kwagh ne ga.
5 Kwaseshiada u Yehova ugen u beenyol, iti na ér Elfi, a zua a msurshima man iwasen sha u eren sha akaawan a ken Ruamabera, a a lu ken ityakerada i nongo u wanakiriki u jighjigh u gberen la ica gba hegen. Kwagh ne doo Elfi kpishi nahan a nger wener: “Luun er ka nongo u Yehova ga nahan ma m er nan sha wono?” Peter vea kwase na Irmgard kpa er Aôndo tom hegen ica gba. Irmgard wuese ityakerada i “nongo u Yehova u doon tsung, u ú we se ikyo la.” Ityakerada ne kua i í gberen sha ci u mbaawanev, er mbaapirashe shin mbakondonato nahan la kpaa.
6, 7. (a) Mba nengen sha atôônanongo sha tar jimin cii nena? (b) Mbagenev ôr kwagh u nongo u Yehova u shin tar la nena?
6 Mbahemenev mba Shin Tine mba Mbashiada mba Yehova tile sha ityough ki “wanakiriki u jighjigh” la. Mbahemenev mban ka annongo u kiriki u nomso mba i shigh ve mkurem mba ve eren tom shin ijiirtamen i Mbashiada mba Yehova ken gar u Brooklyn, New York la. Mbahemenev mba Shin Tine mban ka ve tsua mbacivir Yehova mba vian tsor tsor ér ve er tom ken ubranci mba ve nengen sha atôônanongo a a hembe iyenge 98,000 sha tar jimin cii la. I tsua nomso mba aeren a ve a kom er Bibilo i tese la ér ve lu mbatamen kua udiakon ken atôônanongo. (1 Timoteu 3:1–9, 12, 13) Mbatamen mban mba hemen ikyumile i Aôndo a we sha ikyev ve la shi mba nengen sha i doo doo kpaa. Se mba ken ikyumile ne nahan wase se kpishi, gadia se doo ayol a ase shi mzough kpa ngu hen atô u “anmgbianev” sha won cii!—1 Peteru 2:17; 5:2, 3.
7 Ashighe kpishi anmgbianev ka ve wuese gbenda u mbatamen ve hemen ve sha akaa a ken jijingi sha dooshima la; mayange mba gbe ahon ga. U tesen ikyav yô, nenge ase kwagh u yange er Birgit, kwase Kristu u lun anyom 30 kar la. Zum u a lu anyom pue kar la lu a azende a bo, nahan nôngo u gban ken kwaghbo. Kpa mbatamen wa un kwagh ken Bibilo shi anmgbianev mbagenev kpa wase un, tsô a palegh kwagh u yange war tseren un la. Birgit nenge iwasen ne hegen nena? A kaa ér: “M wuese kpishi er m lu ken nongo u Yehova u doon tsung ne heregh nahan.” Gumor ugen u lun anyom 17, iti na ér Andreas, a kaa ér: “Sha mimi yô ka nongo u Yehova je ne, u hemba doon a hanma nongo ugen sha tar jimin cii.” U nenge wer doo u se wuese mdoom ma nongo u Yehova u shin tar ne ga he?
Mba Ve Lu Hemen la Mba a Mbamyen Vev
8, 9. Ior mbagenev sha ayange a Davidi er kwagh a na nena, man Davidi di gema er nena?
8 Doo u se fa ser, mba i tsough ve ér ve hemen ken mcivir u mimi la mba a mbamyina vev. Ve cica cii mba tsum; mbagenev ken ve je yô, mba a mbamyen mba ve nôngon a mi hanma shighe yô. Nahan doo u ishima ia za se iyol sha ci u ve yina yumu? Ei. Sha ayange a Mbaiserael la kpa, mba i wa ve ityom i vesen sha ikyev la er akaabo a vihin tsung. U tesen ikyav yô, shighe u Davidi lu anye la i tsua un ér a̱ kuhwan Tor Saulu ityogholough, sha u surun Saulu ishima. Ken masejime yô, Saulu soo u wuan Davidi, nahan a yevese a war.—1 Samuel 16:14–23; 18:10–12; 19:18; 20:32, 33; 22:1–5.
9 Mbaiserael mbagenev kpa er kwagh sha ifer. Ikyav i tesen yô, Yoabi kurutya u Davidi yange wua Abiner, anmgbian u Saulu. Abesalom di zua zwa sha ter na Davidi ér una ngohol tor. Ahitofel, or u Davidi u mimi u waan un kwagh la kpa nzughul a Davidi. (2 Samuel 3:22–30; 15:1–17, 31; 16:15, 21) Nahan kpa, Davidi hingir or u gban ahon sha kwagh ga; shi a undu mcivir u mimi kpaa ga. Kpa a gema a er kwagh sha gbenda ugen kposo. Atsan a Davidi ya la na yô a var a Yehova gbang gbang shi a za hemen a inja i dedoo i yange lu a mi zum u yevese Saulu la. Davidi wa icam sha shighe u lu yan ican ne ér: “Zungwem mhôônom, Aôndo, zungwem mhôônom, gadia ka ken a We, uma wam a yer ye, een, ka ken mure u akper a Ou me yer ye, zan zan akaavihin ne aa kar kera.”—Pasalmi 57:1.
10, 11. Kanyi yange i er kwase Kristu ugen shighe u lu yev laa, man a ôr kwagh u mbamyen mba mbacivir Aôndo a na imôngo nena?
10 Ityôkyaa ngi i se gba ahon sha kwagh u mbakoron ior ndiar ave ken nongo u Aôndo nyian ga. Mayange je, Yehova man mbatyomov nav man mbatamen mba ken Kristu vea fatyô u gban den tsô ér mbaaferev mba eren kwagh a mbagenev sha atseregh ve lu ken tiônnongo u Kristu ga. Kpa, se cii se mba tagher a mbamyen asev man mbamyen mba ior mba Aôndo mbagenev kpaa.
11 Zum u anmgbian u kwase Gertrud, u yange civir Yehova ica i gba la lu gumkwase yô, i wa un aie iyol ér ngu kwase-icugh, or kpa fa un ken tom u yôôn Tartor hanma shighe ga. Nahan a er nena? Yange gba ahon sha kwagh nee? Ei. Ken inyom i 2003 la, Gertrud kpe sha anyom 91. Cii man ku na yô a hide a hen sha kwagh u uma na tsô a kaa ér: “Kwagh u yange erem ne, kua akaa agenegh kpaa wasem u fan mer uumace mba tsum, kpa Yehova ngu yaren tom a se uumace mba se yen ne sha u eren tom na u injaa.” Nahan mbacivir Aôndo mbagenev yange vea er kwagh a Gertrud, u a tese ér ve yina yô, Gertrud a er msen hen Yehova tsung ér a̱ wase un.
12. (a) Mbakristu mbagenev ken derianyom u hiihii yange ve ver ikyav i bo nena? (b) Doo u se ver ishima sha nyi?
12 Aluer ortamen shin diakon nan tsume je kpa, se za hemen u “eren . . . akaa cii, ahon a̱ de lu sha mi ga,” gadia se fa ser Mbakristu mba civir Aôndo sha mimi, mba ve eren un tom kpoghuloo la je kpa yina. (Mbafilipi 2:14) Aluer se dondo ikyav i bo i Mbakristu mbagenev mba ken tiônnongo u Kristu u ken derianyom u hiihii la yô á vihi kpishi! Orhenen Yuda kaa ér, mbatesen mba aiev mba sha ayange la “lu vendan mbautahav, ve lu tuhwan mba ve engem la.” Heela tseegh ga, mbaasorabo mban lu ‘mbagbanahon mba ma kwagh kuman ve ga’ yô. (Yuda 8, 16) Yô, se venda nen ieren i mbagbanahon, mba kwagh kuman ve ga la, se gema se ver nen ishima sha akaa a dedoo a “wanakiriki u jighjigh” a lu nan se la. Se wuese nen mdoom ma nongo u Yehova, nahan se “eren nen akaa cii, ahon a̱ de lu sha mi ga.”
“Kwaghôron ne Ngu Ican Je”
13. Mbagenev yange ve nenge atesen a Yesu Kristu agen nena?
13 Mbagenev ken derianyom u hiihii la yange ve gba ahon sha mbatamen man udiakon, mbagenev di gba ahon sha atesen a Yesu. Yesu ôr ken Yohane 6:48–69 wener: “Or u nan ye iyol Yam, shi nan me awambe Am yô, nan ngu a uma u tsôron.” Er “mbahenen Nav mbagenev kpishi . . . ungwa kwagh ne nahan yô, ve kaa er: Kwaghôron ne ngu ican je; ka an nana fatyô u veren ato sha mini?” Yesu fa “er mbahenen Nav lu unun shin ikyer sha kwagh” ne yô. Nahan “hii hen shighe la je mbagenev kpishi ken mbahenen Nav hide ijime, ve kera za a Na ityô ga.” Kpa lu mbahenen cii unun shin ikyer ga. Nenge ase kwagh u mbaapostoli mba 12 mbara yange ve ôr a Yesu zum u a pine ve ér: ‘Ne kpaa, ka ne ka yemenee?’ la. Apostoli Peteru gema kaa ér: “Tere, ka hen an je shi sé zaa? Ka We U lu a mkaanem ma uma u tsôron ye. Man se yô, se na jighjigh shi se fa er We U ngu Icighan u Aôndo.”
14, 15. (a) Er nan ve atesen agen a Mbakristu a kom mbagenev ga? (b) Kwagh u yange er Emanuel la tese se nyi?
14 Sha shighe wase ne kpa, atesen a Mbakristu agen kuma mbagenev kpuaa ken ior mba Aôndo ga, nahan ve gba ahon sha akaa a nongo u Yehova u shin tar la u eren yô. Er nan ve kwagh a lu nahana? Ashighe kpishi, mbagenev ka ve gba ahon sha ci u ve kav gbenda u Aôndo a eren kwagh ga. Un u a gbe akaa cii la pasen ior nav mimi kure kure. Nahan yô, se mba zuan a iwanger sha akaa a Ruamabera a tese la seer sha ashighe ashighe. Nongo u Yehova ka ua seer zuan a iwanger nahan mbacivir Yehova kpishi ve ember. Kpa mbagenev kpuaa, ‘er perapera kar ikyaa inya,’ nahan ve venda mbamgem mba hev mban. (Orpasenkwagh 7:16) Mbagenev yô ka iyolmoron i ne ve ve er kwagh nahan ye. Mbagenev di soo ér or a ôr ve kwagh ga. Aluer kanyi je i ne ve amba ne a lu gban ahon kpaa, ka kwaghbo, gadia ahon aa fatyô u urugh se yemen a vese ken tar, nahan se hingir u dondon ú.
15 U tesen ikyav yô, Orshiada ugen, iti na ér Emanuel, yange puu ityakerada igen i “wanakiriki u jighjigh man u fan kwagh” i yange ôr yô. (Mateu 24:45) Tsô a de u ôron ityakerada yase i Mbakristu. Ayange nga kar yô, a za kohol mbatamen mba ken tiônnongo na ér un kera soo u lun Orshiada u Yehova ga. Kpa ica gba ga je tsô, Emanuel mase kaven er atesen a nongo u Yehova a lu shami yô. Nahan a hide a za kohol Mbashiada, a lumun ibo na, tsô i ngohol un hide hingir Orshiada u Yehova. Nahan saan un iyol je zua ga.
16. Kanyi ia wase se u been a akperan a se lu a mi sha atesen agenegh a Mbakristu laa?
16 Aluer akperan nga se ken ishima sha kwagh u atesen agen a ior mba Yehova ve lumun a mi, nahan ka se pe gban ahon yô se er nena? Ishima i de yen se ga. Alaghga “wanakiriki u jighjigh” una va nger kwagh u a ne mlumun sha mpin wase, nahan akperan ase aa bee. Doo u se ker iwasen hen mbatamen mba ken Kristu. (Yuda 22, 23) Aluer se mba eren msen shi henen kwagh iyol yase shi se mba lun imôngo a anmgbianev mba ve taver ken jijingi yô, kwagh ne kpa una wase se u dughun akperan ken ishima kera shi mimi u ken Bibilo u taver jighjigh wase, u se henen sha ikyev i nongo u Yehova la kpa una seer doon se ishima.
Lu a Ishima i Gbar Gbar
17, 18. Er ma se gbaan ahon sha kwagh yô hemba doon u se er nena, man ka sha ci u nyi?
17 Sha mimi yô, i mar uumace mba ve yen ne a ishima i eren isholibo, nahan alaghga mbagenev vea lu a ieren i gban hunan kwagh dang dang tsô. (Genese 8:21; Mbaromanu 5:12) Kpa aluer se hingir ior mba gban ahon sha kwagh hanma shighe yô, kwagh ne una vihi mlu wase vea Yehova Aôndo. Nahan yô, gba u se wa ikyo sha er se dugh ieren i gban ahon ken a vese kera yô.
18 Doo u se gbaan ahon sha akaa a i eren ken tiônnongo ga, kpa se lu a ishima i gbar gbar shi se eren akaa a ken jijingi hanma shighe, a a na se iember shi aa wase se u nan Aôndo icivir shi eren kwagh akuma akuma shi taver jighjigh u nan wase kpaa yô. (1 Mbakorinte 15:58; Titu 2:1–5) Yehova ngu nengen hanma kwagh u a lu zan hemen ken nongo na yô, shi Yesu kpa fa hanma kwagh u a lu eren ken hanma tiônnongo cii, vough er ken derianyom u hiihii la kpa fa nahan. (Mpase 1:10, 11) Yô, wa ishima keghen Aôndo kua Kristu u a lu Ityough ki tiônnongo la. Alaghga una yar tom a mbatamen mba vian tsor tsor sha u sôron akaa a i gbe u a sôr la.—Pasalmi 43:5; Mbakolose 1:18; Titu 1:5.
19. Cii man shighe u Tartor ua hii u nengen sha uumace jimin cii la a̱ kuma yô, kanyi i doo u se hemba veren ishima sha mini?
19 Ica a gba ga tsô tar u bo ne ua kar kera, nahan Tartor u Mesiya ua gema nengen sha uumace cii. Kpa cii man shighe la yô, gba u hanma wase nana lu a ishima i gbar gbar! Kwagh ne una wase se u nengen a aeren a dedoo a mbananjighjigh mbagenev, nahan se kera har ishima sha mbamyina vev ga. Aluer se ver ishima sha aeren a ve a dedoo yô, a saan se iyol. Se kera huna kwagh zan zan se ure ga, kpa ishima ia hemba taver se shi se taver ken jijingi kpaa.
20. Aluer se mba a ishima i gbar gbar yô se zua a akaa a dedoo nena?
20 Shi aluer se mba a ishima i gbar gbar yô kwagh ne una wase se u umbur akaa a dedoo a se lu vea nongo u Yehova u shin tar ne ve se lu zuan a mi la. Shin tar cii ka nongo u u lu eren kwagh sha mimi, a Tor u Hemban sha won cii je ne. U fa kwagh ne nahan ka u ken ishima nena? Man u nenge ian i u lu a mi i civir Yehova, Aôndo u mimi tswen la nena? Lu a ieren i Davidi kpa lu a mi la; yange wa icam ér: “We, u U ongo msen, ka hen a We man uuma cii vea va ye. I saan or u U tsough nan la iyol, Wer, nana̱ kporom er nana tema ken ityembe i iyou You la. Mdoom ma ya Wou maa kuma se.”—Pasalmi 65:2, 4.
Baver We Kpa?
• Er nan i doo u se wuese mver u i ver mbagenev ve lu hemen ken tiônnongo laa?
• Zum u anmgbianev mba ve lu hemen ve tsum yô doo u se er nena?
• Gba u se nenge iwanger i se seer zuan a mi sha akaa a ken Ruamabera la nena?
• Kanyi ia wase Orkristu nana dugh akperan ken ishima i nan kera?
[Study Questions]
[Picture on page 8]
Davidi yange pase Solomon er a maa tempel yô shi sue mcivir u mimi a ishima na cii
[Picture on page 11]
Mbatamen mba ken Kristu mba wasen se sha akaa a ken jijingi saan saan