Yehova Yem Mba Ican I Tser Ve yô
Yehova Yem Mba Ican I Tser Ve yô
“Atsan a orperapera ngee, kpa TER ka A dugh nan ken a cii.”—PASALMI 34:19.
1, 2. Kwase Kristu ugen yange tagher a mzeyol u nyi, man se kpa se fatyô u tagher a imba mzeyol la nena?
GUMKWASE ugen ngu Kwaseshiada u Yehova hegen hemba anyom 20. Iti na ér Keiko. * Yange er tom u pania u keke shin tom u pasen kwagh u Tartor hanma shighe la. Tom ne doo un ishima je zua ga. Nahan kpa, semberee ne ishimavihin man mtswenem na yô, Keiko ure kpishi. A kaa ér: “Mliam yange ma hingir kwaghyan wam.” Kwagh ne na yô Keiko gba henen kwagh kpoghuloo sha er una kera ure ga yô. Kpa a kaa ér: “M er nahan je kpa gba sha mi ga. Kwagh ne za zan zan yô, lum er guda ma m kpe nahan.”
2 Er i lu nahan u ure imba ne vee? Er u lu Orshiada u Yehova yô, u ngu a atôakaa kpishi a ember, gadia ú ngu civir Aôndo, man u civir Aôndo yô ngu a “ityendezwa sha uma u hegen ne kua uma u a lu van la kpaa.” (1 Timoteu 4:8) Hegen je, u ngu ken paradiso u ken jijingi la! Kwagh ne tese ér Aôndo una kura u, kwagh u vihin môm tsô una tser u ga shinii? Mayange ga! Bibilo kaa ér: “Atsan a orperapera ngee.” (Pasalmi 34:19) Kwagh ne kpiligh se iyol ga, sha ci u “tar cii ngu sha ikyev i Orbo.” (1 Yohane 5:19) Er tar u lu sha ikyev i Diabolo yô, mbamzeyol nôngo u benden a hanma wase cii.—Mbaefese 6:12.
Kwagh u Ican Ka i Er a Or Yô
3. Tese ikyav i mbacivir Aôndo mba i er kwagh ve ken Bibilo mba yange ve ya ican kpishi yô.
3 Or ka nana ya ican ica a gba yô, nan ure kpishi. (Anzaakaa 15:15) Nenge ase kwagh u yange er Yobu ne. Yobu ya ican kpishi, tsô a kaa ér: “Or u kwase a mar nan yô, ayange a nan nga ciôn tsô, man a iv a ican kpaa.” (Yobu 14:1) Yobu ure tsung. Sha shighe ugen la je yô á hen ér Yehova undu un. (Yobu 29:1–5) Ka Yobu tseegh yange ure kpishi nahan ga. Mbatomov mba Aôndo mbagenev kpaa. Bibilo kaa a vese ér ‘ishima vihi’ Hana, gadia lu a wan ga. (1 Samuel 1:9–11) Rebeka kpa yange ishima vihi un sha kwagh u tsombor na, tsô a kaa ér, “nyôrom iyol.” (Genese 27:46) Davidi kpa yange hen sha asorabo a na kpoghuloo, tsô á kaa wener: “Iyange jimin cii m shi zungwen.” (Pasalmi 38:6) Akav kpuaa a se ter heen ne cii tese wang ér nomso man kasev mba civir Aôndo mba yange ve lu uma cii man shighe u Mbakristu la ya ican sha ashighe agenegh.
4. Er nan ve i taver se er i hii ve ‘ishima i yen’ Mbakristu mba ainge mbagenev ga?
4 Mbakristu di ye? Ngise apostoli Paulu kaa a Mbatesalonika ér ve “taver . . . mba ve yen ishima la asema.” (1 Mbatesalonika 5:14) Ngeren ugen kaa ér, ishember i ken zwa Grika i i gem ér “mba ve yen ishima la” ka “mba ishimanyian i hembe ve agee sha anshighe kpuaa yô.” Mkaanem ma Paulu man tese ér mba i shigh ve mkurem mbagenev ken tiônnongo u Tesalonika la ure kpishi. Nyian ne kpa, asema yina Mbakristu mbagenev. Kpa er nan ve asema a yen ve? De se time nen sha akaa atar a aa ne se ishimayinan yô.
Mlu Wase u Isholibo Una Fatyô u Nan Se Ishimayinan
5, 6. Kwagh u i nger ken Mbaromanu 7:22–25 la una fatyô u surun se ishima nena?
5 Mbakristu mba mimi ka vea er isholibo yô, i vihi ve kpishi, gadia mba er udangmbaiorov mba ve ne “ayol a ve sha ijimba i eren” la ga. (Mbaefese 4:19) Ishima ka i za ve iyol er ngise i̱ za Paulu iyol nahan. Yange nger ér: “Or u ken a mo u ker atô la ngu rumun atindi a Aôndo saan saan je. Kpa m ngu nengen a tindi ugen ken alegh a am kpaa, ngu nôngon num a tindi u ken mhen wam, ngu kôron mo yemen a mo uikyangen sha ikyev i tindi u isholibo u a lu ken alegh a am la.” Kwagh ne vihi Paulu gande, tsô a kaa ér: ‘Kpe ahii, mo or u gban kera ne!’—Mbaromanu 7:22–24.
6 Er i lu nahan ishima vihi u sha mlu wou er Paulu nahan vee? Aluer ishima vihi u ker sha ci u ú ngu orsholibo yô ka kwagh u dedoo je la, gadia kwagh ne una wase u, zum u ú er isholibo yô ú fa wer u er kwagh u vihin tsung, nahan u taver ishima u kera er kwagh nahan ga. Nahan kpa, doo u hanma shighe yô u lu zunguluu sha ci u mbamyen ou ga. Paulu yange vaa iyol been cii yô, a kaa ér: “I̱ wuese Aôndo sha Yesu Kristu Ter wase!” (Mbaromanu 7:25) Er i mar Paulu ken isholibo nahan kpa, lu a vangertiôr ér awambe a Yesu a hee inya la aa paa un.—Mbaromanu 5:18.
7. Kanyi ia wase or ve nana ure kpishi sha ci u asorabo a nan ga?
7 Aluer u ure kpishi sha ci u asorabo a ou yô, kwagh u apostoli Yohane yange ôr la a̱ sur u ishima. A kaa ér: “Aluer anti or nana er isholibo kpaa, se mba a Orwasen hen Ter, Yesu Kristu Orperapera. Ka Un je A lu iwom i asorabo ase ye, man ka a ase tseegh ga, kpa ka a tar cii je.” (1 Yohane 2:1, 2) Aluer u ure kpishi sha ci u asorabo ou yô, hanma shighe yô, umbur wer Yesu kpe sha ci u mbaasorabo, ka sha ci u mba lun vough, ga. Sha kpôô yô, ‘ior ca ca ve er isholibo nahan kera mba a iengem i Aôndo ga.’—Mbaromanu 3:23.
8, 9. Er nan ve i doo u se de ser ishima yase i̱ puun se a puu tseegh ga?
8 Kpa aluer ngise u er ma isholibo i vihin kpishi di ye? Alaghga u er msen hen Yehova, u ôr un hanma kwagh cii. Adooga u er nahan acin imôngo je. Shi mbatamen mba ken Kristu kpa wa u kwagh ken Bibilo. (Yakobu 5:14, 15) Shi u gema ishima sha mimi, nahan u undu tiônnongo ga. Shin alaghga yange u undu nongo u Aôndo sha shighe kpuaa, kpa u va gema ishima ken masejime nahan u hide u gba eren kwagh u dedoo. Yange wea undu tiônnongo shin wea undu ga kpa, alaghga u ngu umbur isholibo i yange u er la heregh nahan ishima ngi zan we iyol. Aluer kwagh ngu nahan yô, umbur wer Yehova den mba ve gem asema sha mimi la asorabo “wuee” je. (Yesaia 55:7) Heela tseegh ga, a soo ér ishima i vihi u kpishi je u̱ hen wer kwagh hemba u a hemba je ga. Ka Satan a soo ér u̱ hen nahan ye. (2 Mbakorinte 2:7, 10, 11) A va tim Diabolo, gadia a kuma ku, nahan a soo ér we kpa u̱ hen wer u kuma ku. (Mpase 20:10) Mayange je de lumun wer Satan a vihi jighjigh wou sha gbenda ne ga. (Mbaefese 6:11) Kpa gema “hendan . . . a na” sha ingin kpaa, er u hendan a na sha akaa agenegh nahan.—1 Peteru 5:9.
9 I yila Satan ken Mpase 12:10 ér “or u senden anmgbianev asev,” ka Mbakristu mba i shigh ve mkurem je la. Ngu “senden ve sha ishigh ki Aôndo atetan kpaa, tugh kpaa.” A lu u hen sha ivur ne yô, u kav wer aluer u puu iyol you shi u nenge wer u gba kwagh ga yô a doo Satan, un u a lu ormsende la kpishi; kpa Yehova yô eren kwagh nahan ga. (1 Yohane 3:19–22) Nahan de zungu zan zan je haan iyol inya wer kwagh hemba u a hemba je ga. De lumun wer Satan a vihi ikyar i u ye vea Aôndo la ga. Yehova ka Aôndo u “mgboughon a mhôônom ma zungwen kua mrumun u sha mhôôn, u wan ishima man u lun a erdoo,” nahan mayange de lumun wer Diabolo a yange ú u nengen a kwagh ne ga.—Ekesodu 34:6.
Akaa a Yangen Se Tom Aa Na Se Ure
10. Akaa a yangen se tom aa fatyô u nan se ishimavihin nena?
10 Agee yina Mbakristu mbagenev iyol u eren Aôndo tom sha ishima ve nahan ve ure. Ka mzeyol wou laa? Alaghga icôron uange shin iyolbeen gayô mbamzeyol mbagenev mbá yangen we u pasen kwagh kpoghuloo er ngise u pasen nahan. Sha mimi yô, i kaa ér Mbakristu ve waan ian ve ikyo sha er vea zua a shighe u eren Aôndo tom yô. (Mbaefese 5:15, 16) Kpa aluer mimi je akaa nga yangen we u pasen kwagh kpoghuloo, nahan ishima ngi vihin we ker yô, u er nena?
11. Kwaghwan u Paulu u a lu ken Mbagalatia 6:4 la una wase se nena?
11 Bibilo wa se kwagh ér iyol i de kpen se ga, kpa se “hingir mbakaven mba ve ya dyako u uityendezwa sha jighjigh u nan man sha ishima i wan kpaa” la. (Mbaheberu 6:12) Se fatyô u eren nahan, aluer se time sha ikyav ve i dedoo shi se mba kaven jighjigh ve kpaa yô. Kpa aluer se mba tôôn ayol a ase karen sha mbagenev, maa kuren ikyaa ser kwagh u se eren môm kpa doo ga yô, a lu se a iwasen ga. Nahan se dondo nen kwaghwan u Paulu ne. A kaa ér: “Hanma or nana̱ kar tom u nan iyol i nan, ka nahan man nana lu a ityôkyaa i tan ihyagh ken iyol i nan tseegh, á kera lu sha kwagh u orgen ga ye.”—Mbagalatia 6:4.
12. Er nan ve i doo u tom u se lu eren Yehova la ua na se iembere?
12 Aluer angev mbu yangen Mbakristu u eren Aôndo tom a ishima i môm je kpa, mba a ityôkyaa i dedoo i vea ember yô. Bibilo taver se ishima ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga.” (Mbaheberu 6:10) Alaghga akaa a ganden we agee nga yangen we u eren Yehova tom er ngise u eren nahan. Kpa sha iwasen i Yehova yô u fatyô u pasen kwagh sha igbenda igen kpoghuloo, er u pasen kwagh sha telefon shin washika u ngeren nahan. Fa tsô wer Yehova Aôndo una ver ú doo doo sha tom u ú lu eren un a ishima you cii la kua dooshima u ú tese hen a na man ior mbagenev kpaa la.—Mateu 22:36–40.
“Ashighe a Ican” Aa Na Se Ya Ican ken Ishima Tsung
13, 14. (a) “Ashighe a ican” aa fatyô u van se a mbamzeyol nena? (b) Ior ban a dooshima ainge nena?
13 Se mba keghen shighe u se va lu uma ken tar u he u perapera ú Aôndo la, nahan kpa hegen yô, se mba ken “ashighe a ican.” (2 Timoteu 3:1) Kpa, ishima gba se shimi, gadia se fa ser er atsan a ngee kpishi yô kwagh ne tese ér ica a gba ga tsô a yima se. Nahan kpa, akaa a a lu eren ne, se kpa nga benden a vese. U tesen ikyav yô, aluer u ngu a tom ga nahan, ishima a za u iyol ga he? Alaghga tom ngu ican, nahan er u lu zuan a tom ga shighe a lu karen yô, adooga u ngu henen wer Yehova ngu nengen a mzeyol wou ne ga shi ngu ungwan msen wou kpaa ga. Shin afaerenga ior mba nyaghen we shin mba nzughul a we. Ashighe agen yô, ka wea nenge di a nenge akaa a i nger sha ityough ki ipipaabaver tseegh kpa í lu u ken ishima er Loti, orperapera u yange “ya ican ken ishima tsung” sha ci u ijimba i ior lu eren hen ijiir na la nahan.—2 Peteru 2:7.
14 Kwagh ugen ngu u ior ve lu eren ken ayange a masejime ne, u i gbe u se nenge sha mi yô. Bibilo tsengakaan ér ior kpishi vea lu “mbalun a dooshima ga.” (2 Timoteu 3:3) Icombor kpishi doo ayol a ve ga je gande. Takerada ugen u i yer ér Family Violence la kaa ér “ikyav tese ér ashighe kpishi ka a wua or shin a vihi nan iyol shin a nzughul a nan gayô a yav a nan sha igyosogh yô, i lu mba hen tsombor u nan je ve er kwagh nahan ye.” Takerada ne shi kaa ér: “Ya ka ijiir i dooshima ma a hembe ngeen shi ior ma ve tem kundu kundu, mbaganden kua mbayev kpaa cii, kpa ka nahan ga; de gema ka ijiir i hemban cier iyol cii.” Ior mba i yese ve hen tsombor u ayôôso a ngee her yô, ka vea vese yô ashighe agen ishimanyian man ijungwen i za ve iyol kpishi. Aluer ka mzeyol wou ne yô, kanyi jim ú eree?
15. Dooshima u Yehova hemba u hanma orumace nena?
15 Orpasalmi Davidi yange wa icam ér: “Gadia terem man ngôm undum, kpa TER Una tôôm.” (Pasalmi 27:10) Se fa ser dooshima u Yehova hemba dooshima u hanma ormaren, nahan saan se iyol kpishi! Ormaren ka nana venda se shi nana nzughul a vese shin nana undu se nahan, i vihi se kpishi, aluer kwagh ngu nahan kpa Yehova una de u wan se ikyo ga. (Mbaromanu 8:38, 39) Umbur wer Aôndo urugh mba ve doo un ishima la ve a mi ken vegher na. (Yohane 3:16; 6:44) Mbagenev vea nzughul a we nan nan kpa, fa wer kwagh wou doo Teru u sha la ishima!
Akaa a a Wase Se Se Kera Ure Ga Yô
16, 17. Zum u ishima i ze se iyol kpishi yô, ka nyi se er ve se taver ken jijingi heregh?
16 Akaa nga a u er ve u nôngo a ijungwen yô. U tesen ikyav yô, eren ityom i injaa i Mbakristu ve eren la. Hen sha akaa a ken Mkaanem ma Aôndo, hemban cii je yô zum u ú lu zunguluu yô. Ngise Orpasalmi wa icam wener: “Zum u m hen mer, nguhar wam ngu dolough yô, erdoo Wou kôrom sha, TERE. Zum u mbamhen ve ngeem ken ishima yô, mbamsurshima Ou nam ishima i saan saan.” (Pasalmi 94:18, 19) A lu u ngu ôron Bibilo hanma shighe yô ishima you ia iv a mkaanem ma surun we ishima kua mbamhen mba taver we ishima kpaa.
17 Msen kpa ngu hange hange. Aluer taver we u pasen Yehova kwagh u a lu zan we iyol je kpa, fa wer á fa kwagh u ú soo u ôron un la. (Mbaromanu 8:26, 27) Orpasalmi taver hanma wase ishima ér: “Haa akaa a zan we iyol cii sha TER, tsô Una taver we; Una rumun er i̱ tenger a mbaperapera mayange ga.”—Pasalmi 55:22.
18. Ka akaa a nyi or u nan ure kpishi nana er ve a wase nanaa?
18 Ashighe agen or ka nan lu gbuu sha ci u angev mbu ken ityou mbugenev mbu mbu ne ishimayinan yô. * Aluer ka kwagh u a lu zan we iyol la yô, ver ishima sha tar u he u Aôndo la, shighe u “ma or u nan tem ker . . . nana kera kaa er: Kwagh nyoon mo, ga” la. (Yesaia 33:24) Aluer u ngu lun gbuu hanma shighe yô, alaghga hemba doon u ú nenge a mbatwerev. (Mateu 9:12) Shi doo u ú ver ishima sha iyol you kpaa. U fatyô u zuan a iwasen sha u yan kwaghyan u dedoo shi eren anumbe kpaa. Shi memen tsembelee. De nengen televishen zan zan atôutu ga, shi de eren anumbe a ú vôr kpishi shi a tume u iyol ken ishima ga. Kpa kwagh u vesen yô, ka un ne: de gbe uwer u eren Aôndo tom ga! Shighe ngu a kuma u Yehova “una ese [se] mliam sha ashe kera cii” ga, nahan kpa una wase u ú wa ishima.—Mpase 21:4; 1 Mbakorinte 10:13.
“Uwegh Ku Aôndo Ku Ageegh Ku Lu sha a” We
19. Yehova tôndo zwa ér una er a mba ve lu yan ican la nena?
19 Atsan a orperapera ngee, kpa Bibilo sur se ishima ér, “TER ka A dugh nan ken a cii.” (Pasalmi 34:19) Aôndo ka a er kwagh ne nena? Zum u apostoli Paulu er msen hen Yehova kwa imôngo ér a̱ dugh ‘saa u ken iyol’ na kera yô, Yehova kaa a na ér: “Agee Am ka a tema hoghom hoghom ken isheer.” (2 Mbakorinte 12:7–9) Yehova yange tôndo zwa a Paulu ér nyi, man a tôndo zwa ér una er a we nena? Ér una bee u angev hegen ga, kpa una na u agee a wan ishima.
20. Er se lu a mbamzeyol nahan kpa, í taver se ishima ken 1 Peteru 5:6, 7 ér nyi?
20 Apostoli Peteru nger ér: “Hide nen a ayol a en ijime er uwegh ku Aôndo ku ageegh ku lu sha a ven nahan, sha er shighe á va kuma vough yô Una kende ne sha. Gema nen ishima i nyian yen la cii, haa nen sha a Na, gadia ka Un A lu koson ne ye.” (1 Peteru 5:6, 7) Er Yehova a koson we yô, una undu u ga. Aluer ka nyi je i lu zan we iyol kpa una sue u. Umbur wer “uwegh ku Aôndo ku ageegh” ku sha Mbakristu mba jighjigh. Er se civir Yehova yô, ngu nan se agee a wan ishima. Aluer se undu un ga yô, kwagh môm kpa una vihi mlu wase vea na gbekeke ga. Nahan yô, se za nen hemen u nan Yehova jighjigh sha er se zua a uma u tsôron ken tar u he u a tende zwa a mi la shi se nenge shighe u una yima mba ican i tser ve gbem sha won la yô!
[Footnotes]
^ I gema iti na.
^ Angev mbu ken ityou mbu nan or ishimayinan ne gban kan di ijungwen tsô ga, kpa ka angev mbu or ka nana lu a mi yô nan lu gbuu hanma shighe yô. Aluer u soo u seer fan kwagh u mbu yô nenge Iyoukura (zwa Buter) i Oktoba 15, 1988, peeji 25–29 man Novemba 15, 1988, peeji 21–24 man Setemba 1, 1996, peeji 30–31.
Baver We Kpa?
• Er nan ve mbacivir Yehova kpa ve ye icana?
• Ka akaa a nyi nahan nga a na ior mba Aôndo ve ure ashighe agene?
• Yehova ka a wase se u nôngon a ishimanyian nena?
• “Uwegh ku Aôndo ku ageegh ku sha” avese nena?
[Study Questions]
[Pictures on page 12]
Er ior mba Yehova ve tagher a ameen nahan kpa, mba saan saan
[Picture on page 15]
Gbenda môm u ú fatyô u eren Yehova tom kpoghuloo yô ka u pasen kwagh sha telefon