‘Aôndo A̱ Fa Akaa A A Gbe Ne La’
‘Aôndo A̱ Fa Akaa A A Gbe Ne La’
“Akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.”—MBAFILIPI 4:6.
1. Se mba a ian i lamen a ana, man er nan ve i lu kwagh u kpilighyoloo?
ALUER u pine ian wer u tema-imôngo a pesiden u tar wou, u lam a na nahan, a lumun je kpa? Alaghga mbatomov mba hen afishi a na vea lam a we, kpa vea lumun ér u lam a na iyol na ga. Nahan kpa, Yehova Aôndo, Tor u Hemban shawon cii la yô, ngu nahan ga. Se fatyô u lamen a na hanma ijiir i se lu cii man hanma shighe u se soo cii. Gbe uwer u ungwan mbamsen mba sha ishima na ga. (Anzaakaa 15:29) Kwagh ne doo tsô! Nahan yô, doo u se wuese ian i a ne se i lamen a na ne sha u eren msen hanma shighe hen Un u a “ongo msen” la ga zee?—Pasalmi 65:2.
2. Se er nan ve Aôndo una ungwa mbamsen aseva?
2 Kpa, alaghga se pine ser ‘Or nana er msen nan ve Aôndo una ungwa nanaa?’ Bibilo pase kwagh u hange hange u se er ve Aôndo una ungwa mbamsen asev yô, ér: “Á fatyô u doon Aôndo ishima ga, saa sha jighjigh u nan. Gadia or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.” (Mbaheberu 11:6) Er se vande ôron ken kwaghngeren u ken ijime la nahan, gba u se lu a jighjigh u nan ve se eren msen hen Aôndo ye. Aôndo kegh iyol u ungwan mbamsen mba ior mba ve ve sha ishigh nagh la, kpa saa vea va hen a na sha jighjigh shi vea eren akaa a dedoo a ishima i mimi man i vough kpaa.
3. (a) Er mbamsen mba mbacivir Aôndo mba ngise ve̱ tese se nahan, kanyi akaa nahan se fatyô u ôron zum u se lu eren msene? (b) Ka atô a msen a nyi nahan se fatyô u erene?
3 Apostoli Paulu yange taver Mbakristu mba sha ayange a na la ishima wener: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.” (Mbafilipi 4:6, 7) Bibilo ôr kwagh u ior kpishi mba yange ve er msen hen Aôndo, ve pase un mbamzeyol vev yô. Ken ve yô lu Hana man Eliya man Hesekia kua Daniel. (1 Samuel 2:1–10; 1 Utor 18:36, 37; 2 Utor 19:15–19; Daniel 9:3–21) Doo u se dondo ikyav ve ne. A lu ú ver ishima yô, mkaanem ma Paulu mara tese ér se fatyô u eren mbamsen atô kposo kposo. A ôr kwagh u ishughun, inja na yô, ka msen u ka se sugh Aôndo sha akaa a a er a vese la. Se fatyô u eren msen ne wuese un kpaa. Mzamber di ka u hiden a iyol jime sônon Aôndo kwagh u a gbe se la kpoghuloo. Shi se fatyô u sônon Aôndo ma kwagh u a gbe se la jighilii. (Luka 11:2, 3) Ka i doo Ter wase u sha la u ungwan mbamsen asev sha igbenda ne cii.
4. Yehova fa mbamgbe asev cii, nahan kpa er nan ve se eren msen se pasen un akaa a a gbe se laa?
4 Alaghga mbagenev vea pine ér, ‘Yehova vande fan mbamgbe asev gaa?’ Een, a fa ve. (Mateu 6:8, 32) Kpa er nan ve shi a soo ér se eren msen hen a na se pasen un akaa a a gbe se laa? Nenge ase ikyav i tesen ne: Orteen kasua ka nana soo yô nan er mbakasuav mba nan iyua. Kpa aluer mbakasuav mban soo iyua la yô, a gba u vea za ngohol i. Or u nan ze ga yô, tese ér iyua la gba nan ishima ga. Nahan aluer se venda u eren msen hen Yehova pasen un mbamgbe asev yô, kwagh ne una tese ér se wuese akaa a Yehova a ne se la ga. Yesu kaa ér: “Sôn nen, né ngohol.” (Yohane 16:24) Aluer se er nahan yô, se tese ser se suur sha Aôndo.
Se Er Msen Hen Aôndo Nena?
5. Er nan ve i gbe u se eren msen ken iti i Yesu?
5 Yehova wa se atindi kpete kpete a tesen se er se eren msen hen a na ga. Nahan kpa, gba u se fa er se er msen hen Aôndo yô, man Bibilo ta se iwanger sha kwagh ne. Ikyav i tesen yô, ngise Yesu tese mbadondon un ér: ‘Nyityô kwagh i ne sôn Ter yô, Una na ne ken iti Yam.’ (Yohane 16:23) Nahan, gba u se eren msen ken iti i Yesu, gadia ka un tseegh a lu gbenda u Aôndo a hee iveren na sha uumace jimin cii ye.
6. Zum u se lu eren msen yô saa se tile sha shin se gure inya gayô se tema inya keng-ne?
6 Saa se tile sha shin se gure inya shin se tema inya keng ve se er msen yee? Bibilo pase se ma gbenda u se ver iyol yase zum u se lu eren msen ve Aôndo una ungwa se ga. (1 Utor 8:22; Nehemia 8:6; Marku 11:25; Luka 22:41) Kwagh u a lu hange hange yô ka u eren msen hen Aôndo sha mimi man a ishima i vough.—Yoel 2:12, 13.
7. (a) Inja i ishember i “amen” la ér nyi? (b) Mba er ishember ne ken mbamsen sha inja vough nena?
7 Ka a er msen a kaa ér “amen” nahan, i lu kaan ér nyi? Ruamabera tese ér doo u se kuren mbamsen asev sha “Amen,” hemban je yô zum u se er msen ken igbar sha ci u mbagenev yô. (Pasalmi 72:19; 89:52) Ishember i ken zwa Heberu i ʼa·menʹ la inja i i jighilii yô ér “i lu nahan.” Takerada u i yer ér McClintock and Strong’s Cyclopedia la pase ér ka a er msen a kure ve a kaa ér “Amen” nahan, kwagh ne a tese ér “í lumun mkaanem ma í ôr ken msen shon la shi í soo ér ma kure sha mi kpaa.” Nahan yô, or ka nana kaa ér “Amen” a ishima i nan i môm zum u nan er msen nan kur yô, kwagh ne a tese er ishima i lu nan ker sha kwagh u nan sember ôron la yô. Shighe u Orkristu u nan hemen tiônnongo ken msen nan kur msen sha “Amen” yô, mba ve lu ungwan la cii vea fatyô u kaan ér “Amen” shin ishima shin vea ôr a due sha, sha u tesen ér ve lumun a kwagh u i er la a ishima ve cii.—1 Mbakorinte 14:16.
8. Ashighe agen mbamsen asev mbagenev vea bee msen u Yakob shin Aberaham nena, man vea tese er ishima i lu se ker nena?
8 Ashighe agen Aôndo una fatyô u den ér se tese er ishima i lu se ker sha akaa a se er msen sha mi la. Alaghga a gba u se er kwagh er Yakob nahan, gadia un nôngo wav a ortyom tugh zan zan sev puaa ér a ver un doo doo. (Genese 32:24–26) Ashighe agen yô a gba u se er kwagh er Aberaham nahan, gadia a zamber a Yehova acin imôngo sha ci u Loti man hanma orperapera u ken gar u Sodom cii. (Genese 18:22–33) Nahan se kpa se fatyô u zamber a Yehova sha kwagh u a doo se ishima tsung yô ser a̱ wase se, gadia ngu Aôndo u perapera man u erdoo kua u zungwen mhôônom kpaa.
Se Sôn Aôndo Nyi?
9. Zum u se lu eren msen yô, doo u ishima ia hemba lun se sha nyi?
9 Umbur wer Paulu kaa ér: ‘Akaa a a gbe ne la, Aôndo A̱ fa a ken hanma kwagh cii.’ (Mbafilipi 4:6) Nahan, se fatyô u eren msen sha hanma kwagh u a gbe se cii. Kpa, zum u se lu eren msen yô ishima i hemba lun se sha kwagh u Yehova. Daniel ver se ikyav i dedoo sha gbaa ne. Shighe u Mbaiserael lu yan ican sha ci u asorabo a ve la, Daniel zamber a Yehova ér a̱ zungwe ve mhôônom; a kaa ér: ‘De ngôôr ga, sha ci Wou, We, Aôndo wam; sha ci u iti You.’ (Daniel 9:15–19) Mbamsen asev mba tesen ér gba se ishima u i̱ tsegha iti i Yehova shi i̱ er ishima na kpa?
10. Er nan ve se fe ser ka a inja u eren msen sha akaa a a ze se iyoloo?
10 Doo u se eren msen sha akaa a a ze se iyol la kpaa. Ikyav i tesen yô, se fatyô u sônon ser Aôndo a̱ wase se se fa akaa a na a cimin er orpasalmi kpa yange er nahan. Á er msen wener: “Nam mkav, m̱ kuran atindiakaa a Ou, m̱ waan a ikyo a ishima yam cii.” (Pasalmi 119:33, 34; Mbakolose 1:9, 10) Yesu yange “eren mbamsen man uzamber sha imo i genger genger man shi a mliam ashe kpaa. A sôn Un u A fatyô u yiman Un ken ku la.” (Mbaheberu 5:7) Kwagh u Yesu er ne tese ér doo u se sôn agee hen Aôndo zum u se tagher a kwaghbo shin ameen yô. Shighe u Yesu lu tesen mbahenen nav er vea eren msen la kpa, a pase ve ér ve eren msen sha mbamzeyol vev er mde u asorabo man kwaghyan ve u ayange ayange nahan.
11. Msen una wase se se gba ken imeen ga nena?
11 Yesu tese mbahenen nav msen wener ve zamber a Aôndo, ve kaa ér: “De ze a vese hen ape imeen i lu ga, kpa yima se sha ifer.” (Mateu 6:9–13) Ken masejime yô á wa mbahenen nav kwagh ér: “Kuran nen, eren nen msen sha er né gba ken imeen ga yô.” (Mateu 26:41) Msen ngu hange hange shighe u se tagher a imeen yô. Alaghga a lu se ape vendan atindi a Bibilo hen ijiir tom yase shin ken makeranta. Adooga mba ve lu Mbashiada ga vea lôhô se ma iniongo i i doo sha ci u Mbakristu ga yô. Shin mbagenev vea kaa a vese ér se er ma kwagh u a hendan a atindiakaa a perapera yô. Sha ashighe angan nahan, doo u se dondo kwagh u Yesu a we se ér se eren msen la—se fatyô u tsengan eren msen sha akaa ne kua shighe u se tagher a ameen shon kpôô kpôô la kpaa. Se sôn Aôndo a̱ wase se sha er se gba ga yô.
12. Ka akaa a nan se ishimanyian a nyi nahan alaghga aa mgbegha se se er msene, man se fa ser Yehova una er nena?
12 Mbacivir Aôndo mba ainge mba a mbamzeyol man akaa a nan ve ishimanyian kposo kposo. Angev man mbamzeyol mba ken ishima ka akaa a vesen a a hembe nan ior ishimanyian yô. Ipila i ior ve eren hen ajiir a ase la kpa na yô tume se iyol a uma. Inyaregh kpa ban, nahan ka ican u zuan a imiemnger. Er se fe ser Yehova keghen ato a mbacivir un zum u ve er msen hen a na yô, ishima gba se shimi kpen kpen! Pasalmi 102:17 ôr kwagh u Yehova ér: “A ungwa msen u mba ve lu a orjime ga yô, A laha msen ve je ga.”
13. (a) Ka akaa a nyi nahan se fatyô u eren msen sha mini? (b) Tese ikyav i imba msen ne.
13 Sha kpôô yô, doo u se eren msen sha hanma kwagh u a bende a tom u se eren Yehova man mlu wase vea na cii. (1 Yohane 5:14) Aluer ú soo u tsuan kwagh u ú er sha gbaa u ivesegh shin tom u uke shin ka u pe seer eren tom u pasen kwagh yô, lam a Aôndo sha akaa ne, zamber un a̱ hemen we. U tesen ikyav yô, gumkwase ugen ken tar u Philippines yange soo u eren tom u pasen kwagh hanma shighe la. Nahan kpa, lu a tom u una eren a koson iyol na ga. Gumkwase ne kaa ér: “Iyange i Sati ugen yô, m er msen hen Yehova sha kwagh u tom u pania. Er m due kwaghpasen sha iyange shon la yô, m na wankwase ugen u lun anyom pue-kar takerada. Maa a kende a kaa a mo ér: ‘Iyange i Hiitom pepe yô, va hen makeranta wam.’ M pine un mer, ‘m va er nyi?’ M pin nahan yô a kaa ér, mba keren or u a tôô nan tom yô; i soo or fele fele. Ka ker iyange i Hiitom yô m za; i tôôm tom ave ave je. Kwagh ne er fese je cier mo iyol.” Mbashiada mbagenev kpishi sha tar kpa imba kwagh ne vande eren ve. Nahan, mayange de eren kekeke u eren msen hen Aôndo a ishima you cii sha akaa a a ze u iyol ga!
Shighe u Se Er Isholibo kpa Doo u Se Er Msene?
14, 15. (a) Aluer or er isholibo je kpa er nan i doo u nana de msen u eren ga? (b) Dugh mbamsen mba orsholibo nan er iyol i nan la kera yô, kanyi igen ia wase nanaa?
14 Aluer or er isholibo yô msen una wase nan nena? Mbagenev ka vea er isholibo yô kunya u kôr ve nahan ve kera soo u eren msen ga. Kpa u eren kwagh nahan la ka shami ga. U tesen ikyav yô: Aluer or ngu zan zende, nan za tsume gbenda kpa nan venda ú pinen mbagenev sha ci u kunya kôr nan yum nahan nana nyôr ape nan lu zan la sha won kpa? Mayange ga, nana tsume a saa toho! Nahan, aluer or er isholibo man kunya ngu kôron nan u eren msen hen Aôndo yô, nana seer yan a ya ican. Kunya u de yangen or u nan er isholibo la u lamen a Yehova ga. Jighilii yô, Aôndo kaa a hanma or u nan er isholibo i vesen cii ér nana er msen hen a na. Profeti Yesaia yange kaa a mbaasorabo mba sha ayange a na la ér ve yila Yehova a wase ve, “gadia Un deen kwaghbo wuee.” (Yesaia 55:6, 7) Kpa, gba u orsholibo la nana ‘zamber a Yehova’ nana hide a iyol ijime, shi nana de isholibo i nan la shi nana gema ishima sha mimi kpaa.—Pasalmi 119:58; Daniel 9:13.
15 Zum u or er isholibo yô, msen ngu hange hange sha ci u ityôkyaa i í ôr heen ne kpaa. Orhenen Yakobu ôr kwagh u or u i gbe u a wase nan ken jijingi yô wener: “Nana̱ yila mbatamen mba nongo u Kristu, ve̱ er msen sha ci u nan, . . . man Ter Una mough a nan sha.” (Yakobu 5:14, 15) Sha mimi yô, gba u orsholibo nana er msen hen Yehova nana pase isholibo i nan, nahan kpa nana fatyô u ôron mbatamen sha er ve kpa vea er msen sha ci u nan yô. Kwagh ne una wase nan u sôron mlu u nan vea Aôndo.
Gbenda u Aôndo a Ongo Mbamsen Asev La
16, 17. (a) Yehova ongo mbamsen asev nena? (b) Ka akaa a yange er anmgbianev asev a nyi a tese ér msen man kwaghpasen zua kôôsôô?
16 Aôndo ongo mbamsen asev nena? Ashighe agen ka á ungwa msen wase fele shi se kpa se fa je ser a ungwa se. (2 Utor 20:1–6) Kpa ashighe agen yô shighe ka a wa karen shi i wa taver se u kaven ser á ungwa msen wase la. Er Yesu yange tese ken injakwagh na i kwasecôghol u zer van hen orjir ér a̱ kure un ijir la nahan, alaghga a gba u se kpa se zer eren msen hen Aôndo sha kwaghmôm gbem. (Luka 18:1–8) Kpa, doo u se fa ser aluer se er msen sha ishima i Yehova yô, mayange una kaa a vese ér: “De zem iyol ga,” ga.—Luka 11:5–9.
17 Ior mba Yehova nenge er a ongo mbamsen vev yô. Ashighe kpishi ka se nenge er Yehova a ongo msen wase sha kwagh u tom wase u pasen ior loho u dedoo la yô. Ikyav i tesen yô, anmgbianev mba kasev uhar ken tar u Philippines yange ve due kwaghpasen, ve za ken agar agen ica ve za na ior ityakerada i Bibilo. Mba ne kwase ugen ankwatakerada u kiriki yô, mliam haa un ashe. Tsô a kaa ér: “Nyen tugh m er msen hen Aôndo mer a̱ tindi or nana va tesem Bibilo, m na jighjigh mer Aôndo ungwa msen wam ne ve.” Kwase ne timbir a timbir ga je maa hii u zan mbamkombo ken Iyol i Tartor. Anmgbian u nomso ugen ken tar ugen ken Imbusutarimese i Ashia yange cia u pasen kwagh hen ya ugen u í kuran un kpoghuloo, í lumun ér ior ve gba nyôron her ga yô. Nahan kpa, á er msen hen Yehova, tsô ishima taver un maa a nyôr hen ya la. A kuma uwegh sha hunda ugen maa gumkwase ugen za due. Anmgbian la er un ityôkyaa i un ve cii yô, gumkwase ne hii mliam. A kaa wener un ngu keren a ker Mbashiada mba Yehova, je un er msen ér Aôndo a wase un una zua a ve. Kwagh ne doo anmgbian ne kpishi, nahan a tese gumkwase ne tiônnongo u Mbashiada mba Yehova u hen ningir la.
18. (a) Zum u Aôndo a ongo msen wase yô, doo u se er nyi? (b) Aluer se mba eren msen hanma shighe yô, kanyi ia kure sha a vese voughlo?
18 Sha mimi yô, msen ka kwagh u dedoo je zua ga. Yehova wa iyol kegh a kegh u ungwan mbamsen asev. (Yesaia 30:18, 19) Kpa, gba u se ver ishima se nengen er Yehova a ongo mbamsen asev yô. Ashighe agen ngu a ungwa msen wase sha gbenda u se hen la ga. Nahan kpa, shighe u se kav ser a ungwa se yô, mayange i de hungur se u sughun un shi wuese un ga. (1 Mbatesalonika 5:18) Heela tseegh ga, hanma shighe yô umbur kwaghwan u apostoli Paulu ne: “Akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.” Hanma shighe u ian i dugh yô lam a Aôndo. Aluer ú ngu eren nahan yô, kwagh u mba Aôndo a ongo mbamsen vev u Paulu a er heen ne una kure sha a we vough: “Bem u Aôndo u a gande hanma mfe wase cii una kura asema a en man mbamhen enev.”—Mbafilipi 4:6, 7.
Ú Fatyô u Nan Mlumun Kpa?
• Se fatyô u eren mbamsen atô kposo kposo nena?
• Se er msen nena?
• Ka atôakaa a nyi nahan se fatyô u eren msen sha mini?
• Aluer or er isholibo yô msen una wase nan nena?
[Study Questions]
[Pictures on page 25]
Msen u eren a ishima yase i môm ka a wase se u hendan a ameen
[Pictures on page 27]
Ka se wuese Aôndo shi se pase un mbamzeyol asev shi se sôn un akaa a a gbe se la zum u se er msen yô