Yobu Lu Or U Taver Ishima Man Or U Mimi
Yobu Lu Or U Taver Ishima Man Or U Mimi
“U fa kwagh u wanakiriki Wam Yobu dedoo kpa? Gadia ma or kuma sha a na shin tar ga, ka or u mimi, u perapera, u cian Aôndo, palegh kwaghbo.”—YOBU 1:8.
1, 2. (a) Ka mbamzeyol mba nyi yange ve tser Yobu abuu? (b) Cii man mbamzeyol ta sha Yobu yô, lu nyi oro?
ORGEN yange lu a inyaregh kpishi shi za iti shi lu gbong gbong shi saan tsombor na iyol kpaa. Lu inja er hanma kwagh u tar u keren cii lu a mi nahan. Kpa, mbamzeyol va ta sha a na ciligh ciligh acin atar. Hen icin i môm tseegh inyaregh ki lu a mi cica cii saa. Shi ijeverahumbe wua un ônov cii, un iyolna kpa gba icôron uange, iyolna cii hingir avav tseegh. Iti i or shon ér Yobu, ka un í hembe ôron kwagh na ken takerada u Bibilo, u i yer sha iti na la ye.—Yobu ityough 1 man 2.
2 Yobu toghor iyol ér: “Ma m lu er sha iwer i tsuaa la” nahan. (Yobu 3:3; 29:2) Ka an je zayol una ta sha nan ve nana tôm ayange a tsuaa, a i kpe nan iyol la ga? Sha hiihii la, Yobu lu ken mkpeyol, lu inja er ma shighe môm kpa kwagh a tser un ga nahan. Ashagbaaior naan un icivir shi keren kwaghwan hen a na kpaa. (Yobu 29:5–11) Yobu lu a inyaregh, kpa ki hemba un hanma kwagh ga. (Yobu 31:24, 25, 28) Yange wasen kasev mba côgholov man ancôgholov kpaa. (Yobu 29:12–16) Shi lu vea kwase na tseegh, keren kasev mbagenev ga.—Yobu 31:1, 9, 11.
3. Yehova yange nenge Yobu ér ngu nyi oro?
3 Yobu lu or u mimi sha ci u civir Aôndo. Yehova kaa ér: “Ma or kuma sha a na shin tar ga, ka or u mimi, u perapera, u cian Aôndo, palegh kwaghbo.” (Yobu 1:1, 8) Er Yobu lu or u mimi nahan kpa, mbamzeyol ta sha a na, vihi uma na u mkpeyol la. Shagba na cii bee. Mnyoon u sha iyol man u ken ishima yange kar Yobu tsung.
4. Aluer se hen kwagh u Yobu yô, una wase se nena?
4 Kpa ka Yobu tswen a lu ortom u Aôndo u mbamzeyol ve te sha a na imba ne ga. Mbakristu mbagenev kpishi nyian kpa mbamzeyol bende a ve mba ve war zan kwagh môm a mba Yobu la. Nahan kwagh ne va a mbampin uhar. Ka ve je ne: Aluer se umbur kwagh u Yobu shighe u se tagher a mbamzeyol mba vihin yô, kwagh la una wase se nena? Kwagh u Yobu la una wase se u wan mbagenev mba ve lu yan ican la ikyo nena?
Ikyaa i Civir Aôndo sha Mimi man Mkar u Jighjigh u Nan Wase
5. Satan yange kaa ér Yobu ngu civir Aôndo sha ci u nyi?
5 Kwagh u Yobu ngu er u ior mbagenev nahan ga. Diabolo yange gba ahon sha ityôkyaa i i ne ve á civir Aôndo yô. Yobu yange fa ér kwagh ngu nahan ga. Sha shighe ugen la, mbatyomov mba shaav kumba mkombo, Satan kpa lu her, nahan Yehova ôr Satan aeren a Yobu a dedoo, tsô Satan kaa ér: “U kase un a ya na kua akaa a a lu a mi cii gaa?” Satan ôr kwagh ne u tesen ér Yobu lu civir Aôndo sha er una zua a kwagh hen a na yô, kwagh u Satan ôr ne wa mba civir Aôndo mbagenev kpa ker. Satan hide kaa a Yehova ér: “Naregh ase uwegh Ough, bende akaa a a lu a mi la cii, tsô una venda U sha ishigh Yough je!”—Yobu 1:8–11.
6. Ka ikyaa i vesen i nyi Satan va a mini?
6 Ikyaa i Satan va a mi la lu i vesen. Yange puu hemen u Aôndo. Tsô Aôndo una fatyô u hemen akaa a a gbe a la sha dooshima kpa? Shin uumace vea civir Aôndo sha ci u vea zua a kwagh hen a na er Satan kaa nahana? Yehova yange fa dedoo ér Yobu na un jighjigh sha mimi shi a soo un a ishima i môm kpaa, nahan a na Diabolo ian ér a kar Yobu sha er a fa, aluer imbwase i Satan la ia lu mimi shin ia lu mimi ga yô. Nahan hen icin i môm tseegh, Satan er Yobu atsan atô kposo kposo. Er Satan kar Yobu sha kwa u hiihii la kpa fatyô ga yô, gema ta un bouange ne. Satan kaa ér: “Kwavyolough sha kwavyolough; mimi je, hanma kwagh u or nan lu a mi cii, nana na sha ci u uma u nan.”—Yobu 2:4.
7. Ka atsan a waren zan kwagh môm a atsan a Yobu a nyi mbacivir Aôndo ve tagher a mi nyiana?
7 Nyian ne, Mbakristu kpishi mba yan imba ican i Yobu ya la ga, nahan kpa mba tagher a atsan atô kposo kposo. Mbagenev yô i tôv ve a ican shin ve tagher a mbamzeyol mba hen tsombor. Mbagenev di ya ican i inyar man angev. Mbagenev kpe sha ci u jighjigh u nan ve. Kpa, doo u se hen ser, ka Satan a ve a hanma ican i se ye ga. Ashighe agen ka se tagher a mbamzeyol sha ci u kwagh u se lee la shin sha ci u zayol u i mar se a mi yô. (Mbagalatia 6:7) Shi or môm nana fatyô u waren mbamzeyol mba iyolbeen man aahe ve ve a mi la ga. Bibilo pase se wang ér Yehova eren ivande hegen sha u kuran mbacivir un sha atsan a ve tagher a mi la ga.—Orpasenkwagh 9:11.
8. Satan una fatyô u kôron ave sha atsan a se ye la nzughul a vese nena?
8 Shi Satan una fatyô u kôron ave sha atsan a se ye la vihin jighjigh wase. Apostoli Paulu yange kaa ér “i nam saa ken iyol, ka ortyom u Satan je, sha u a̱ gbidyen mo” yô. (2 Mbakorinte 12:7) Zayol u Paulu tagher a mi la, a lu ashe a nyoon shin ma kwagh ugen je kpa, Paulu yange fa ér Satan una fatyô u kôron ave sha mi kua sha ishimayinan na la, nahan yangen un iember shi vihin jighjigh na. (Anzaakaa 24:10) Nyian ne, Satan una fatyô u mgbeghan ma or u hen tsombor wase shin wanyemakeranta shin ma tor u vihin tu ér nana tôv ma or u civir u Aôndo a ican.
9. Shighe u se tagher a tôvacan yô, er nan ve i doo u se gbidye ikyarkyase iyol ga?
9 Se nôngo a mbamzeyol mban se hemba ve nena? Shighe u se tagher a ve yô, se tôô ser ka shighe u se tese ser Yehova doo se ishima shi se tese ser se lumun mtemtor na a ishima yase i môm je la. (Yobu 34:10) Nyityô mzeyol u se zou a mi cii se umbur ser gba hange hange u se tile sha mimi sha ishigh ki Aôndo, aluer se fa kwagh ne nahan yô, una wase se se tile dông. Apostoli Peteru nger Mbakristu washika ér: “Ne mbadoon mo ishima, bocan u a ve sha a ven sha u karen ne a kar la, a̱ de kpiligh ne iyol er ka kwagh u cier iyol man a va tser ne ga.” (1 Peteru 4:12) Paulu kpa kaa ér: “Mba i sar ve pe zenden sha mciviraôndo ken Kristu Yesu cii, á tôv ve a ican.” (2 Timoteu 3:12) Satan ngu gban ahon sha jighjigh u Mbashiada mba Yehova her tsô, er gba sha kwagh u jighjigh u Yobu nahan. Bibilo kaa ér Satan ngu hemban anen ior mba Aôndo vanger ken ayange a masejime ne cii.—Mpase 12:9, 17.
Yobu Fa Ityôkyaa Jighilii Ga, shi Ior Wa Un Akaa a Bo Kpaa
10. Kanyi kwagh Yobu lu a mfe sha mi ga?
10 Kwagh ugen yange er Yobu u i doo u se tôm ser a er se ga yô. Yobu yange fa ityôkyaa i un lu yan ican ga. Nahan á hen ér “ka TER A ne ye, shi ka TER A ngohol kpaa ye.” (Yobu 1:21) A̱ shi nan kpa, Satan nzughul a Yobu sha ifer sha u á hen ér ka Aôndo a ne un ican ye.
11. Yobu yange er nena shighe u tagher a mbamzeyol laa?
11 Kwase u Yobu yange kaa a na ér a tuhwa Aôndo. Er Yobu ure kpishi nahan kpa ungwa imo i kwase na ga. (Yobu 2:9, 10) Alaghga Yobu yange hen ér ‘mbaaferev mba hemban tsan a na.’ (Yobu 21:7–9) Shi alaghga hen ér ‘Aôndo ngu tsahan’ un. Sha shighe ugen la je yô, lu un er ma un kpe a kpe kuaa nahan. A kaa ér: “Kpe ahii, ma U yerem shin Sheol, ma U yerem zan zan iyugh You ma i kar kera, ma U verem shighe, ma U shi U umbur mo!”—Yobu 14:13.
12, 13. Akaaôron a Yobu la yange bende a na nena?
12 Yobu lu a akar atar, akar a na ne va un inya inja er ve soo u va ‘vaan un, shi surun un ishima’ nahan. (Yobu 2:11) Nahan kpa ve lu “mbasurunshima mba injaav ga.” (Yobu 16:2) Yobu yange una lu a akar a dedoo a una ôr ve mbamzeyol nav yô, ishima ma gba un shimi kpen kpen; kpa akar a na ne sur un ishima sha mbamzeyol nav ga, ve gema ve nzughul a nzughul a na, shi ve ôr un akaa a vihin un a vihi ishima.—Yobu 19:2; 26:2.
13 Alaghga tsô Yobu yange hen ér: ‘Er nan i lu mo keng m lu yan icana? Kanyi i bo je m er ve m lu yan imba ican nee?’ Akar a Yobu yange pase un ityôkyaa i a lu yan ican la sha gbenda u tsumen a tsume a na. Ve kaa a na ér a er akaabo a vihin tsung, ka nahan ve a lu yan ican ye. Elifasa pine ér: “Ka han je man lu i gber mbaperapera kera? Sha mnenge wam yô, mba ve tsôghol ifer, kua mbalôôn anzughul, ka ve sunda di sha mi vough.”—Yobu 4:7, 8.
14. Er nan ve se fatyô u kaan ser hanma ican i se ye cii ka inja yase i dang ga?
14 Sha mimi yô, aluer se lôô ken iyol yase yô, ka di ken iyol yase se sunda ye, kpa aluer se gema se lôô ken Jijingi yô, se sunda di ken Jijingi je. (Mbagalatia 6:7, 8) Sea lu a inja i dedoo nan nan kpa, er se lu ken tar ne di tsô yô, se zua a mbamzeyol. Nahan mbaishôôgh vea fatyô u lun iyol ishô sha mbamzeyol cii ga. Yesu Kristu ‘lu a acôghor a wan iyol ga, lu paleghaa a mbaasorabo,’ nahan kpa kpe ku u nyoon tsung sha kon u mtsaha. Apostoli Yakobu di i wua un sha ci u jighjigh na u nan. (Mbaheberu 7:26; Aerenakaa 12:1, 2) Mhen u kpeegh u Elifasa man akar a na a ahar la yange na yô, Yobu sendegh sha ishô na, lumun ér ve vihin un iti ga cii. Shi alaghga mbaaie mba akar a Yobu lu wan un iyol ér á er akaabo ve a lu yan ican la kpa yange ve na hingir u waren Aôndo.—Yobu 34:5; 35:2.
Doo u Se Ker Iwasen Shighe u Ican i Tser Se Yô
15. Shighe u ican i tser se yô, ka mhen u nyi una wase se?
15 Kwagh ngu u se hen sha uma u Yobu yôô? Aahe man angev kua tôvacan cii doo ga. Alaghga a lu inja er ior kpishi mbamzeyol mban mba benden a ve ga nahan. (Pasalmi 73:3–12) Ashighe agen se pine iyol yase ser: ‘Aluer m ngu ken ican nahan mdoo u Aôndo a doom ishima la una mgbegham u civir un her kpa? Ka i sarem u eren kwagh u doon Yehova sha er una “kaa imo a or u a lahan” un la kpa?’ (Anzaakaa 27:11; Mateu 22:37) Mayange je se lumun ser alam a dang a ior a̱ na se gba akperan ken ishima sha kwagh u Ter wase u sha la ga. Orkristu u jighjigh ugen u angev kende un inya anyom imôngo yô, kaa ér: “Nyityôkwagh i Yehova a ne ian ér i tserem cii me wa ishima a mi. M fa mer una nam agee a nôngon a mi. Man ka kwagh u á er a mo vough je la.”
16. Mkaanem ma Aôndo ka ma wase mba ican i tser ve la nena?
16 Se fa ayom a Satan agen a Yobu yange fa ga yô. Se “lan ayom a na” shin mbaawashima nav mba ifer la ga. (2 Mbakorinte 2:11) Heela tseegh ga, se mba a imbor i kwaghfan i se suur sha mi yô. I ôr akaa a nomso man kasev mbajighjigh mba ve wa ishima a atsan atô kposo kposo ken Bibilo. Apostoli Paulu ngu môm ken Mbakristu mba ve ye ican kpishi yô. A kaa ér: “Akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la.” (Mbaromanu 15:4) Yange i wuhe Orshiada u ken tar u Yuropa ugen sha ci u jighjigh na shighe u i lu nôngon ityav mbi tar cii mbi sha uhar la. Orshiada ne tôô kwaghyan na u ayange atar na ér i na un Bibilo. A kaa wener: “Bibilo i m na kwaghyan wam m ngohol la i̱ wasem kpen kpen. Er ijen i sha iyol kôrom nahan kpa, m zua a kwaghyan u ken jijingi u wasem kua mbagenev ken ican yô. M ngu a Bibilo la zan zan nyian.”
17. Ka akaa a nyi Aôndo a er sha u wasen se u wan ishima a atsana?
17 Dugh ishimasurun i se zou a mi ken Bibilo la sha kpa, se mba a ityakerada i i er akaa a ken Bibilo, í ia wase se u wan ishima a mbamzeyol yô. Aluer u nenge ken takerada u i yer ér Watch Tower Publications Index la yô, alaghga u zua a ngeren u a er kwagh u ma Orkristu u nan tagher a mzeyol er we nahan, u una wase u yô. (1 Peteru 5:9) Shi aluer u ôr mbatamen mba ve we u ikyo zayol wou shin u ôr Mbakristu mbagenev mba ve taver ken mimi yô, vea wase u. Kwagh u vesen yô, aluer se mba eren msen yô, Yehova una wase se shi una na se icighan jijingi na. Paulu yange nôngo a saa u Satan na un ken iyol lu “gbidyen” un la nena? Yange hen u suur sha tahav mbu Aôndo. (2 Mbakorinte 12:9, 10) A nger ér: “M ngu a agee a eren akaa cii je ken Un u A taver mo ne.”—Mbafilipi 4:13.
18. Anmgbianev mba se civir Aôndo imôngo vea taver se ishima nena?
18 Iwasen ngi, nahan se yina nen ishima u keren i ga. I ôr ken takerada u Anzaakaa ér: “Aluer ú gba uwer sha iyange i ican yô, agee ou vese ga.” (Anzaakaa 24:10) Ishimayinan ia fatyô u vihin mtil sha mimi wase di er hur ka a vihi haav mbu iyou nahan. Kpa, Yehova bugh gbenda u ua wase se u nôngon a mbamzeyol mban yô. Gbenda shon yô ka anmgbianev mba ve civir Aôndo a vese la. Ortyom yange ande hen Yesu taver un ishima hen tugh mbu i kôr un la. (Luka 22:43) Paulu di yange lu yemen uikyangen ken Roma yô, a za asegh sha anmgbianev hen kasua u Api Forum man Atumbe Atar, kwagh ne doo un je a “sugh Aôndo, nahan ishima taver un.” (Aerenakaa 28:15) Ken tar u Jamani di, yange i kôr wanyekwase Shiada ugen u lun anyom pue kar a kar i za wuhe ken afo a mbakwarev a ken gar u Ravensbrück. A kaa wener: “Er i za nyôr a mo la je, orgen u se civir Aôndo imôngo yô nenge a mo fele maa va sughum kigh kigh. Kwase Kristu ugen u se civir Aôndo imôngo di wasem kpen kpen, nahan a hingir ngôm u ken Kristu.”
“Lu jighjigh”
19. Lu nyi i wase Yobu ve hendan a ameen a Satana?
19 Yehova pase ér Yobu lu or u “kusu mimi na taveraa” yô. (Yobu 2:3) Er Yobu ure shi fa ityôkyaa i un lu yan ican ga nahan kpa, a kusu mimi na taveraa. Yobu wa ishima a atsan a a tser un la cii. A kaa ér: “Zan zan me kpe je kpaa, me gbihi mimi wam ga.”—Yobu 27:5.
20. Er nan ve i doo u se taver ishima?
20 Aluer se kpa se mba a imba ishimataver i Yobu la yô, shighe u se tagher a ameen shin ahendan shin atsan je kpa se fatyô u kusun mimi wase her gban. Yesu yange kaa a tiônnongo u ken Semurna ér: “De cie akaa a aa va tser u la ga. Nenge diabolo ngu veren iyol u una kende ior enev mbagenev ken gaadi, sha u á kar ne yô; man ican ia er ne á kuma ayange pue je. Lu jighjigh, ar ken ku je man Me na u tsar u uma ye.”—Mpase 2:10.
21, 22. Shighe u se lu wan ishima a atsan yô, ka ishimasurun i nyi se zua a mini?
21 Er Satan a lu hemen tar ne di tsô yô, a kar ishimataver yase man mtil sha mimi wase kpee. Nahan kpa, mkaanem ma Yesu a er sha heen ne taver se ishima ér aluer se ver ishima sha mlu wase u ken hemen yô, sea tagher a nyityô tôvacan kpa se cia ga. Kwagh u vesen u i doo u se er yô, ka u se lu jighjigh. Paulu kaa ér: ‘Atsan a se tagher a mi la ka a sha anshighe kpeghee’ tsô, kpa “iengem” shin injar i Yehova a tende zwa a vese la gema ka i̱ “vesen i ganden cii.” (2 Mbakorinte 4:17, 18) Aluer se nenge yô, uma u Yobu ember shighe u atsan a na bee la hemba lihen a uma na u a ember shighe u lu a ya atsan ga la ica je.—Yobu 42:16.
22 Ashighe agen a lu se inja er atsan a ase aa bee ga shin a lu inja er a gande se vanger nahan. Kwaghngeren u a dondo ne una tese se akaa agen a se hen sha ishimataver i Yobu la yô. Shi se hen akaa agen a se er ve se taver mbagenev mba ve lu yan ican la ishima yô.
Ú Na Mlumun Wer Nyi?
• Ka ikyaa i vesen i nyi Satan yange va a mi sha kwagh u jighjigh u Yobu?
• Shighe u se tagher a tôvacan yô, er nan ve i doo u se gbidye ikyarkyase iyol ga?
• Yehova wasen se u wan ishima a tôvacan nena?
[Study Questions]
[Pictures on page 11]
Aluer se mba keren akaawan ken ityakerada i Mbakristu, shi ôron Aôndo man Mbakristu mba ve vie mbamzeyol asev kpaa yô, se zua a iwasen