Kwargbidyen u Doo Ú Ishima

KWARGBIDYEN ka u lu ior kpishi zege tom. Ka ve hen ér ka kwagh u taver, u i gbe u or a na ishima i nan cii sha mi yô. Ishima ka i na amba a ior la ibo sha er ve hen sha kwagh ga yô, hemban cii je yô, zum u ve er akaa ken takerada a a tese ér kwargbidyen ngu a inja kpishi yô. (Mbafilipi 4:8) Nahan kpa u henen sha mimi u se fe sha kwagh u Yehova man aeren na a dedoo kua akaa a dedoo a a er la man atindi na kua mbaawashima nav mba dedoo la ka kwagh u saan iyol, man doo u a saan se iyol u henen sha akaa ne kpaa. Sha ci u nyi?

Yehova Aôndo ka Tor u Hemban sha won cii man ngu eren tom kpoghuloo sha u una kure awashima na u vesen la yô. (Yohane 5:17) Nahan kpa, Yehova veren ishima sha mbamhen mba ken ishima mba hanma or u civir un cii. Orpasalmi Davidi kpa yange fa kwagh ne, nahan a nger ér: “TERE, U tôvom, U fam. Mtem wam man mmough wam kpaa We U fa, U fa mhen wam ken ica je.”—Pasalmi 139:1, 2.

Alaghga or nana ôr mkaanem ma Orpasalmi man sha hiihii yô, iyol ia kpe nan. Nana hen ér, ‘Aôndo ngu shaala “ica je” kpa a fa hanma mhen u bo u ken ishima yam cii.’ Kpa jighilii yô, aluer Yehova fa mbamhen mba bov mba ken ishima yase yô, ka kwagh u dedoo. Kwagh ne una wase se se dugh mbamhen mba bov ken ishima yase kera, man zum u ve hidi ve ve se ken ishima yô, se sôn Aôndo, shi se lu a vangertiôr ser una zungwe se mhôônom aluer se na nagh ku ipaa ku Yesu kura jighjigh yô. (1 Yohane 1:8, 9; 2:1, 2) Shi doo u se fa kpaa ser Yehova tôvon mbacivir un sha gbenda u dedoo. Ka a ver ishima zum u se lu henen sha kwagh na ken ishima shi wuese un la.

Kpa alaghga u pine wer, “Yehova veren ishima sha mbamhen mba dedoo mba mbacivir un mba ve lu umiliôn imôngo la ciili?” Een, veren ishima sha ve cii. Yesu yange ôr ér mbaatsator mba ve ndahar kpishi je kpa Yehova hungur ve ga, a ôr kwagh ne u tesen er kwagh wase a gbe Yehova ishima yô. Been yô, a kaa ér: “Mbaatsator kpishi je kpaa ne hemba ve inja.” (Luka 12:5–7) Mbaatsator mba henen kwagh u Yehova ga. Nahan aluer we ve ikyo yô, hile se ve a doo un u veren ishima sha mbamhen mba dedoo mba hanmô wase ga yee? Sha kpôô yô, se er msen ier i Davidi nahan ser: “Mhen wam u ken ishima, [a] lu kwagh u kuman We ishima, TERE, Vande wam man Orpaan wam.”—Pasalmi 19:14.

Kwagh ugen u tesen ér Yehova veren ishima sha mbamhen mba mbacivir un mba jighjigh yô, ka mkaanem ma profeti Malaki nger la. A tsengaôron kwagh u ayange ase ne ér: “Tsô mbacian TER kpaa gema ôr kwagh ayol a ve; TER kpaa ver ato, ungwa, i nger ruamabera u umbur akaa sha ishigh Nagh, sha ci u mba ve cie TER, man mba ve henen sha iti Na yô.” (Malaki 3:16; NW ) Aluer se mba umbur ayol a ase ser Yehova ‘veren ato’ zum u se lu henen sha kwagh na yô, kwagh la una na kwargbidyen ua doo se ishima. Yô se lumun nen mkaanem ma orpasalmi man, a nger ér: “Me hen kwagh kpaa sha tom Wou cii; me hen kwagh ken ishima sha aeren a Ou.”—Pasalmi 77:12.