Tese Icivir Sha Mbamkombo Asev Mba Ve Lu Icighankwagh la
Tese Icivir Sha Mbamkombo Asev Mba Ve Lu Icighankwagh la
“M va a ve hen icighanwo Wam je, Me na, á saan ve iyol ken iyou Yam i msen.”—YESAIA 56:7.
1. Ka akaa a nyi nahan Ruamabera a er u tesen ér gba u se tese icivir sha mbamkombo aseva?
YEHOVA kohol ior nav, ka Mbakristu mba i shigh ve mkurem man akar a ve je la, ér ve civir un sha “icighanwo” na. Ngu eren akaa a nan ve msaanyol ken ‘iyou na i msen,’ ka tempel na u ken jijingi u a lu “iyou i msen sha ci u akuraior cii” la. (Yesaia 56:7; Marku 11:17) Akaa a Yehova a er sha u kohol ior nav ér ve civir un la tese ér mcivir na ne ka icighan mcivir, u a lu wang shi a hembe mbamcivir mbagenev cii yô. Aluer se mba tesen icivir sha mbamkombo mba se nyer sha u henen kwagh shi civir Yehova la yô, se tese ser se mba a mnenge u Yehova sha kwagh u uicighanmbaakaav.
2. Ka nyi i tese ér Yehova yange nengen ijiir i a tsua ér i civir un her la ér ka icighanjiiri, man Yesu kpa tese ér ijiir i civir Yehova ka icighanjiir nena?
2 Ijiir i Yehova yange tsua ken tar u Iserael ér i civir un her la lu icighanjiir. Yange i tsegha tabernakel a ikyav nav cii sha er mbia “hingir uicighanmbaakaav mba hemban cii yô.” (Ekesodu 30:26–29) Tabernakel la lu a ukpar uhar, i yila u môm ér “icighanjiir,” ugen la di ér “icighankpar u hemban cii.” (Mbaheberu 9:2, 3) Ken masejime yô, i va maa tempel ken Yerusalem sha ityough ki tabernakel la. Er Yerusalem lu ijiirtamen i mcivir u Yehova yô, i yilan gar la ér “icighangar.” (Nehemia 11:1; Mateu 27:53) Yesu kpa tese icivir sha tempel shighe u lu shin tar, lu pasen kwagh la. Ishima yange i vihi un a mba ve lu nzughul a tempel sha u teen akaa ker shi karen gbenda ker kpaa la.—Marku 11:15, 16.
3. Kanyi i tese ér mbamkohol mba Mbaiserael kumban la lu uicighanmbamkoholoo?
3 Mbaiserael yange ve kohol imôngo hanma shighe sha u civir Yehova shi ungwan er i lu ôron Tindi yô. Ve yilan uiniongo vev mbagen ér uicighanmbamkohol sha u tesen er ve lu icighankwagh yô. (Levitiku 23:2, 3, 36, 37) Sha ayange a Esera man Nehemia la, zum u i zua mkohol ugen yô, Mbalevi “pase ior atindi.” Man er “ior cii lu vaan er ve ungwa akaaôron a atindi la yô,” Mbalevi “yange ior cii er ve̱ huan, ve kaa er: Huan nen, gadia iyange ne ka icighaniyange je.” Tsô Mbaiserael er Iniongo i Atumbe ayange ataankarahar. “Iember lu her kpishi.” Heela tseegh ga, “ayange ayange, hii sha iyange i hiihii je zan zan ar sha iyange i masetyô la, [i] lu ôron ken ruamabera u atindigh u Aôndo. Ve er iniongo la ayange ataankarahar; iyange i sha anigheni la yô, lu icighanmkohol sha tindi.” (Nehemia 8:7–11, 17, 18) Sha mimi yô, mbamkombo mban lu uicighanmbamkohol, nahan gba u mba ve kumba her la cii vea ver ishima sha akaa a i lu ôron la.
Mbamkombo Asev Ka Uicighanmbamkohol
4, 5. Ka akaa a i eren ken mbamkombo asev a nyi nahan a tese ér mbamkombo mban ka uicighanmbamkoholo?
4 U ôron sha mimi yô, Yehova ngu a ma icighangar shin tar nyian, u a lu a tempel u i tsegh sha ci u mcivir na ga. Nahan kpa, doo u se fa ser mbamkombo mba se nyer sha u civir Yehova la ka icighankwagh. Se mba kombo kwa tar ken hanma sati sha u ôron Ruamabera shi henen un kpaa. Ka i ôr Mkaanem ma Yehova “wanger wanger” shi i “pase inja i [ma]” er sha ayange a Nehemia la kpa i eren nahan. (Nehemia 8:8) Mbamkombo asev cii mba hiin ve sha msen shi mba kur ve sha msen, shi mba we atsam a wuese Yehova ken mbamkombo asev kpishi. (Pasalmi 26:12) Sha mimi yô, mbamkombo mba atôônanongo a nyer la ka vegher u mcivir wase, nahan gba u se tese icivir sha ve shi se ver ishima sha akaa a i ôron ker la kpaa.
5 Yehova veren ior nav doo doo zum u ka vea kumba u civir un shi henen Mkaanem nam shi ember mzough ve u Mbakristu la. Ka sea nyôr mkombo yô se fa tsô ser, Yehova ‘na iveren na’ ngi ape se kombo la. (Pasalmi 133:1, 3) Ka sea za mbamkombo mban shi sea ver ishima sha akaa a i lu ôron la yô se kpa se zua a iveren na. Bee kera yô, Yesu kaa ér: “Her ape ior ihiar shin itiar ve kohol ken iti Yam yô, Mo kpaa M ngu ve her atô je.” Kpa jighilii yô, Yesu lu ôron kwagh u mbatamen mba ken Kristu mba ve kombo sha u sôron ayôôso hen atô u ior yô, nahan kpa kwagh u Yesu ôr ne bende sha mbamkombo asev kpaa. (Mateu 18:20) Aluer Yesu ngu a Mbakristu sha ikyev i icighan jijingi zum u ve kombo ken iti na yô, doo u mbamkombo mban vea lu se icighankwagh ga zee?
6. Ka nyi se fatyô u ôron sha kwagh u ajiir a vesen man a kiriki a se nyer mbamkombo asev her laa?
6 Sha mimi yô, Yehova tem ken ma tempel u ior ve maa ga. Nahan kpa, Ayou ase a Tartor ka ajiir a civir Aôndo. (Aerenakaa 7:48; 17:24) Se mba nyer mbamkombo ker sha u henen Mkaanem ma Yehova shi eren msen hen a na shi wan atsam a wuese un. Ayou ase a Mkohol kpa ka kwagh u se eren her je la. Shi ka sea za kôr haya hen iyaav mbi vesen er ayou a vesen a eren anumbe shin agirgi u anumbegh sea zua mbamkohol ase mba vesen mba ve lu uicighanmbakohol la yô, iyaav mbin kpa mbi hingir ajiir a civir Aôndo her. Doo u se tese icivir sha mbamkombo asev mban, a̱ lu mba vesen shin mba kiriki kpaa. Se tese icivir ne sha ieren yase zum u se ze ve la.
Igbenda i Se Tese Icivir sha Mbamkombo Asev Yô
7. Se fatyô u tesen icivir sha mbamkombo asev ken igbar nena?
7 Igbenda ngi i se fatyô u tesen icivir sha mbamkombo asev ken igbar yô. Gbenda môm yô, ka u lun her shighe u i lu wan atsam a Tartor la. Atsam ne kpishi nga a asember er ka msen nahan, nahan gba u se waan a sha icivir. Apostoli Paulu yange ôr mkaanem ma ken Pasalmi 22 la wener Yesu kaa ér: “Me pase anmgbianev Av iti You, ka her atô u mkohol man me wa icam i civir We ye.” (Mbaheberu 2:12) Nahan yô, hanma shighe u se ze mkombo yô doo u se vande teman inya cii man orkyôn una ôr icam i a wa la ye, shi se ver ishima sha inja i asember a icam shon er se lu wan i la. Se waan nen atsam er orpasalmi u yange nger ér: “Me wuese TER a ishima yam cii, ken nongo u mbaperapera kua ken mkohol kpaa” la. (Pasalmi 111:1) Sha mimi yô, u wan atsam wuese Yehova ka ityôkyaa i dedoo i se zaan mbamkombo sha shighe shi se kuren ve kpaa.
8. Ka ikyav i ken Bibilo i nyi i tese ér doo u se kegh ato zulee shighe u i lu eren msen ken mkombo?
8 Kwagh ugen u a ne mbamkombo asev ve lu a inja kpishi yô, ka mbamsen mba anmgbianev ka ve er a ishima ve i môm sha ci u mba ve ze mkombo cii la. Sha shighe ugen la, er Mbakristu mba ken derianyom u hiihii mba ve lu ken Yerusalem la zua mkombo yô, “ve genger amo ve sôn Aôndo a ishima i môm.” Kwagh ne wase ve ve za hemen u ‘ôron kwagh vangertiôr,’ shin er i lu tôvon ve a ican nahan kpaa. (Aerenakaa 4:24–31) U hen wer, mba ve lu her la lu henen akaa ken ishima wue wue zum u i lu eren msen shon laa? Mayange ga, ve sôn Aôndo “a ishima i môm.” Mbamsen mba i eren ken mbamkombo asev la ka ve tese ér hanma or u nan kombo la nan va a ishima i civir Aôndo. Nahan gba se kegh ato zulee shighe u i lu eren msen la.
9. Se tese icivir sha uicighanmbamkohol asev sha iyolwuhan yase man ieren yase nena?
9 Iyolwuhan yase kpa ka gbenda ugen u se tese icivir sha mbamkombo asev mba ve lu icighankwagh la. Mlu u ikyondo i se zer man ityou ki se er shin se hondo la kpa una na mbamkombo asev vea hemba lun a ulum. Apostoli Paulu wa se kwagh ér: “Sarem pe nomso ve̱ eren msen sha hanma ijiir, ve̱ kenden ave a wang sha, i̱ de lu sha ishima i vihin ga, ayôôso kpaa ga. Shi sarem pe kasev di kpaa ve̱ wuhan ayol a ve daalaa, i̱ lu sha kwaghfan man akuma akuma kpaa, i̱ de lu sha gbatyo u gban, shin sha zenaria shin sha utagbede shin sha akondo a taver ishe kpaa ga, kpa i̱ lu sha aeren a dedoo er i kom u kasev mba ve kaa er ve mba cian Aôndo mimi vea er yô.” (1 Timoteu 2:8–10) Zum u se ze mkohol u vesen hen agirgi u anumbegh u a lu a haav ga, nahan se tem ken iyange je kpa, se fatyô u wuhan iyol sha inja, man sha icivir kpaa. Shi aluer mkohol ngu se zegekwagh yô mayange je se ya kwagh shin se tam tsur u i yer ér chewing gum la shighe u mkohol a lu zan hemen ga. Ka sea wuha iyol sha inja shi ieren yase kpa ia doo zum u se kombo imôngo yô Yehova Aôndo a zua a icivir shi ieren yase ne i̱ tese ér mcivir na gba se kwagh kua mba se civir un a ve imôngo la kpaa.
Ieren i i Kom sha Ya u Aôndo Yô
10. Apostoli Paulu yange tese ér gba u se er kwagh sha inja zum u se ze mbamkombo mba Mbakristu nena?
10 Apostoli Paulu wa se kwagh u injaa ken 1 Mbakorinte ityough 14. Kwaghwan na la pase er i doo u a eren mbamkombo mba Mbakristu yô. A mase kuren kwaghwan shon ér: “I̱ eren akaa cii tsembelee je, sha inja sha inja.” (1 Mbakorinte 14:40) Mbamkombo asev ka vegher u injaa u tom u nongo u Kristu u eren yô, nahan zum u se ze ve yô se er kwagh sha gbenda u u kom sha ya u Yehova yô.
11, 12. (a) Doo u a tese mbayev mba ve ze mbamkombo asev nyi? (b) Mbayev mba kiriki vea fatyô u pasen jighjigh u nan ve ken mbamkombo sha inja nena?
11 Gba u a tese mbayev u eren kwagh sha inja zum u ve ze mkombo yô. Doo u mbamaren mba ve lu Mbakristu yô vea pase ônov vev ér Iyou i Tartor man ajiir a i kombo Takerada u Henen la ka ajiir a numben her ga. Ka ajiir a se civir Yehova shi se henen Mkaanem nam her yô. Tor u fan kwagh Solomon yange nger ér: “Ver ishima sha nguhar wou zum u u zaan hen iyou i Aôndo yô; gadia u zan sha u za ungwan hemba doon.” (Orpasenkwagh 5:1) Mose yange tese Mbaiserael u kohol imôngo, mbaganden man “mbayev mba kiriki” kpaa. A kaa ér: ‘Kohol ior, ve̱ ungwa, ve̱ hen ve̱ cian TER, Aôndo wou, ve̱ waan akaaôron a tindi ne cii ikyo, ve̱ eren sha mi; ônov vev mba ve fe ga kpaa, ve̱ ungwa, ve̱ hen u cian TER, Aôndo wen, sha ayange a né tema ken tar u né lu zan ner né per Yordan né za ngohol u la cii.’—Duteronomi 31:12, 13.
12 Nyian kpaa, mbayev asev mba kiriki mba ze mbamkombo vea mbamaren vev ér vea za ungwa shi vea hen kwagh. Mbayev ka vea hii u keghen ato zulee shi kaven atesen a kiriki a Bibilo yô, ve kpa ve hii u kenden ave ken mkombo ‘pasen’ jighjigh u nan ve. (Mbaromanu 10:10) Anye u kiriki nana hii u eren kwagh ne sha u nan mlumun sha mbampin tiônôô. Sha hiihii la, alaghga nana ôr a ôr asember a i nger shin takerada la, kpa ken hemen yô nana hii u nan mlumun sha mkaanem ma nanegh. Mbayev ka vea naan mlumun nahan i doo ve kpen kpen shi kwagh ne ka a wase ve kpaa. Shi mbaganden kpa mbamlumun mba mbayev ve ne sha asema a ve sha u pasen jighjigh u nan ve ne ngu a na ve msaanyol. Kpa jighilii yô, gba u mbamaren kpa vea naan mlumun sha mbampin sha er ônov vev vea nenge ikyav ken ve yô. Aluer gba sha mi yô, hanma wanye nana lu a Bibilo i nan kua takerada u atsam man kôpi u takerada u i lu henen la. Ve de nzughul a ityakerada ne ga. Akaa a i ter sha heen ne cii aa wase mbayev u kaven er mbamkombo asev ve lu icighankwagh yô.
13. Sar se u mba ve ze mbamkombo asev sha kwa u hiihii la ve er nena?
13 Kpa, se soo ser mbamkombo asev ve lu er mbaadua mba ucôôci ve eren la ga. Ashighe agen ka vea nyôr adua yô, ve tema ving er or kpe nahan, sha u tesen ér ve neer perapera. Ashighe agen di adua a lu er ka iyou tashi nahan. Se soo ser mbamkombo mba se eren ken Ayou ase a Tartor la ve kundu mba ve ve la cii iyol kpa i de lu her gong gong er i zua ma zege iniongo nahan ga. Se mba kohol imôngo sha u wuese Yehova, nahan hanma shighe yô mbamkombo asev ve luun a icivir. Se soo ser mba ve ze mbamkombo asev sha kwa u hiihii la ve ungwa akaa a i er ker la shi ve nenge ieren yase kua i ônov asev, nahan ishima i mgbegha ve ve kaa ér: “Mimi je Aôndo ngu ken a ven.”—1 Mbakorinte 14:25.
Kwagh u Se Eren Hanma Shighe u Se Zough u Civir Yehova Yô
14, 15. (a) Ka nyi se er ve mayange se ‘gbihi iyou i Aôndo wase’ ga? (b) Kwagh u i nger ken Yesaia 66:23 la ngu kuren kera kpaa nena?
14 Er se vande ôron nahan, Yehova ngu kohol ior nav shi ngu eren akaa a nan ve msaanyol ken ‘iyou na i msen,’ ka tempel na u ken jijingi je la. (Yesaia 56:7) Orjighjigh Nehemia yange umbur anmgbianev nav Mbayuda wener ve tese icivir sha tempel u ken Yerusalem la sha u eren iyua i maan tempel shon. A kaa ér: “Mayange sé kera gbihi iyou i Aôndo wase ga.” (Nehemia 10:39) Shi kwagh ugen yô, doo u se vengese myer u Yehova a yer se ér se va civir un ken ‘iyou na i msen’ la.
15 Yesaia yange ôr kwaghôron u profeti ugen u a tese ér doo u se kohol imôngo hanma shighe sha u civir Aôndo yô. A kaa ér: “Hii sha uwer u he ne zan zan ar sha uwer u he ugen, man hii sha iyange i memen ne zan zan ar sha iyange i memen igen, uuma cii vea va gure sha ishigh Yagh, kape TER A kaa la.” (Yesaia 66:23) Kwagh ne ngu eren nyian. Mbakristu mba ve tsegh ayol a ve sha ci u Aôndo mba kohol hanma shighe, ken hanma sati sha u civir Yehova. Igbenda igen i ve eren kwagh ne yô ka u zan mbamkombo mba Mbakristu shi duen za pasen ior kwaghaôndo. U ngu môm ken mba ve ve hanma shighe sha u ‘va guren sha ishigh ki Yehova’ la kpa?
16. Er nan ve i doo u a lu ikye yase u zan mbamkombo hegene?
16 Mkaanem ma ken Yesaia 66:23 mara ma a hemba kuren sha mi ken tar u he u Yehova a tende zwa a mi la. Sha shighe la, “uuma cii” vea ‘guren sha ishigh’ ki Yehova kpôô kpôô, inja na yô vea civir un ayange ayange man iwer i iwer zan zan gbem sha won. Er u kohol imôngo civir Yehova i lu kwagh u se va eren ken tar u he la gbem sha won yô, u nenge wer doo u hegen je se zaan mbamkombo asev mba ve lu uicighanmbamkohol la hanma shighe ga he?
17. Er nan ve i gbe u se “seer” zan mbamkombo asev ‘er se nenge iyange la i lu mgbôghom yôô’?
17 Er mkur a lu mgbôghom yô, se hemba kangen nen ishima u zan mbamkombo asev mba Mbakristu la sha u za civir Yehova. Er mbamkombo asev ve lu se icighankwagh yô, mayange je se mba lumun ser tom u uke u se eren shin tom u i ne se ken makeranta shin makeranta u se henen aikighe la u yange se u kumban a mba nan jighjigh a vese imôngo hanma shighe ga. Kwagh gba se a agee a mbamkombo mban ve ne se la. Mbamkombo mba atôônanongo a nyer la ka ve wase se u fan anmgbianev asev shi ve wase se u taver ayol a ase asema sha er se lu a “dooshima man aeren a dedoo” yô. Gba u se “seer” eren nahan “er [se] nenge iyange la i lu mgbôghom yô.” (Mbaheberu 10:24, 25) Yô, se tesen nen icivir sha uicighanmbamkohol asev sha u zan ve hanma shighe shi wuhan iyol sha inja shi eren inja i dedoo shighe u se ze ve la. Aluer se mba eren nahan yô, se tese ser se mba nengen uicighanmbaakaav er Yehova kpa a nengen ve la.
U Hiden Saven a Sav
• Ka nyi i tese ér doo u a nengen mbamkombo mba ior mba Yehova ve nyer sha u civir un la ér ka icighankwagha?
• Ka akaa a i eren ken mbamkombo asev a nyi a tese ér mbamkombo mban ka icighankwagha?
• Mbayev mba kiriki vea tese icivir sha uicighanmbamkohol asev nena?
• Er nan i doo u se zaan mbamkombo hanma shighee?
[Study Questions]
[Picture on page 22]
Mbamkombo mba se ze sha u civir Yehova la ka uicighanmbamkohol aluer i nyôr ve han han je kpaa
[Picture on page 25]
Mbayev asev mba kiriki mba ze mkombo sha u za ungwan shi henen kwagh kpaa