“Iyange I Vesen I Ter Mgbôghom”
“Iyange I Vesen I Ter Mgbôghom”
“Iyange i vesen i TER mgbôghom, ngi van fefa je.”—SEFANIA 1:14.
1, 2. (a) Ka iyange i vesen i nyi Mbakristu ve lu keghene? (b) Ka mbampin mba nyi i gbe u se pine, man ka sha ci u nyi?
GUMKWASE ugen ngu keghen iyange i̱ ivese na a ahan zwa. Ngô u lun iyav di saan un iyol kpishi u keghen iyange i una mar yô. Ortom ugen di sar un tsung er iyange na i memyol ma i kom yô. Kanyi ior mban cii ve lu keghen nee? Mba keghen iyange i dedoo, i i lu ve a inja kpishi yô. Hanma ve yô, saan nan iyol, kpa saan ve cii iyol sha igbenda kposo kposo. Iyange i ve lu keghen la ia va kpee, man aluer i va yô, ia bur ve a bur ga cii.
2 Nyian kpaa Mbakristu mba mimi wa iyol mba keghen iyange i injaa a ahan zwa. Mba keghen ‘iyange i vesen i Ter.’ (Yesaia 13:9; Yoel 2:1; 2 Peteru 3:12) “Iyange i TER” i i lu van la ka i̱ nyi? Man ia bende a uumace nena? Man se er nan ve se wa iyol se keghen a kegh ii? Ka hange hange u se ker mbamlumun sha mbampin mban hegen, gadia akaa nga eren aa a tese ér mkaanem ma i er ken Bibilo man ka ma mimi yô, ma kaa ér: “Iyange i vesen i TER mgbôghom, ngi van fefa je.”—Sefania 1:14.
“Iyange i Vesen I Ter”
3. “Iyange i vesen i Ter” jim kanyi?
3 “Iyange i vesen i Ter” jim kanyi? Ajiir a i er kwagh u “iyange i Ter” ken Ruamabera cii ka sha kwagh u ashighe a vesen a Yehova ôr mbaihyomov nav ijir shi tsegha iti na kpaa yô. Ikyurior i Yuda man mba ken Yerusalem kua Mbababilon mba wan tswam man Mbaigipiti cii yange ve tagher a ‘iyange i Yehova’ shighe u Yehova ôr ve ijir la. (Yesaia 2:1, 10–12; 13:1–6; Yeremia 46:7–10) Nahan kpa, “iyange i TER” i hemban cii la ngi a va ga. “Iyange” shon ka i̱ Yehova una ôr mba ve vihi un iti la cii ijiir yô. Iyange la ia hii sha mtim u “Zegebabilon,” u a lu tartor u kwaghaôndo u aiegh sha tar cii la, ia mase kuren sha mtim u tar u bo ne sha iyange i Armagedon.—Mpase 16:14, 16; 17:5, 15–17; 19:11–21.
4. Er nan ve i gbe u iyange i i lu van torough torough la ia cier ior kpishi iyolo?
4 Aluer ior kpishi fa ér iyange la ngi van torough torough shin ve fa ga kpa, gba u ia cier ve iyol. Sha ci u nyi? Yehova na mlumun sha ikyev i Profeti Sefania ér: “Iyange la ka iyange i iyughugh, ka iyange i ican man i ishima, nyian, ka iyange i mvihi man i myôhôr, ka iyange i ime i wan mgbigh mgbigh, ka iyange i abeen man i angôghime.” Sha kpôô yô, iyange la i cieryol! Profeti la shi za hemen wener: “Me va a ican sha ior . . . sha ci u ve er TER kwaghbo.”—Sefania 1:15, 17.
5. Ka mnenge u vough u nyi ior umiliôn ve lu a mi sha kwagh u iyange i Yehova, man ityôkyaa ér nyi?
5 Nahan kpa, sar ior umiliôn imôngo tsung u iyange i Yehova la i̱ va yô. Sha ci u nyi? Sha ci u ve fa ér ka iyange i á yima mbaperapera, shi a kende a Yehova sha shi a tsegha iti na kpaa yô. (Yoel 3:16, 17; Sefania 3:12–17) Ka kwagh u ior ve lu eren a uma ve hegen ne una na iyange la ia cier ve iyol shin vea keghen i a ahan zwa ye. We iyol you u nenge mve u iyange la nena? U wa iyol u kegh a kegh kpa? Iyange i Yehova i mgbôghom, nahan kwagh ne bende a ieren you ayange ayange kpa?
“Mbanahantar Vea Due a Tarnahan”
6. Ior kpishi mba nengen “iyange i Ter” la nena, man er nan ve kwagh ne a kpiligh Mbakristu mba mimi iyol ga?
6 Er ayange ne a lu a se hunde ishima ga nahan kpa, kwagh gba ior kpishi sha “iyange i Ter” i i mgbôghom la ga. Ve de mba lahan a laha mba ve lu tan ve icin ér iyange la i mgbôghom la. Kpa ieren ve ne i kpiligh Mbakristu mba mimi iyol ga. Ve umbur icintan i apostoli Paulu a te ne, ér: “Kwagh u hiihii yô, fa nen er ken ayange a masejime mbanahantar vea due a tarnahan, vea zende sha asaren a ve ayol a ve. Vea kaa er ityendezwa i m-ande Na ngi hana? Gadia hii sha shighe u uter kpe kera la akaa cii nga her di er a lu sha mhii u igbetar la nahan.”—2 Peteru 3:3, 4.
7. Kanyi ia wase se ve se hunde ishima ga?
7 Kanyi ia wase se ve se palegh mhen u kpeegh u mbanahantar la shi se hunde ishima ga? Peteru wa se kwagh ér: “Sarem pe umbur ne akaa, nderen ishima yen i wang. Ka sha er né umbur akaaôron a uicighanmbaprofeti ngise lu ôron la man shi tindi u Ter Oryiman la, u mbaapostoli enev ve ôr la.” (2 Peteru 3:1, 2) Aluer se mba veren ishima sha akaaôron a profeti yô, kwagh ne una wase u ‘nderen ishima yase wang.’ Alaghga sé ungwa akaawan ne acin imôngo, kpa doo u se hemba veren ishima sha a hegen cii.—Yesaia 34:1–4; Luka 21:34–36.
8. Er nan ve kwagh a gbe mbagenev sha akaawan a Bibilo ga?
8 Er nan ve kwagh a gbe mbagenev sha akaawan ne ga? Peteru za hemen ér: ‘Kwagh ne hungur ve sha apera er sha imo i Aôndo yô, Usha lu tsuaa je kua tar kpaa u u dugh shin mnger man i er u sha mnger kpaa. Ka sha ve kpaa man tar u u lu hen shighe la, mngerem uve u, u tim kera ye.’ (2 Peteru 3:5, 6) Sha mimi yô, mbagenev soo ér iyange i Yehova la i va ga. Ve soo ér kwagh môm tsô a̱ yange ve u ember uma ga. Shi ve soo ér Yehova a̱ tsaha ve sha uma u ve lu eren la kpaa ga. Peteru ôr kwagh ve ér mba ‘zenden sha asaren a ve ayol a ve.’
9. Ka ieren i nyi ior mba sha ayange a Noa man Loti lu a mini?
9 Yehova yange tim tar sha ashighe a karen la, kpa mbanahantar mban venda sha “apera” ér kwagh er nahan ga. Nahan kpa, Yesu Kristu man apostoli Peteru ôr kwagh u yange er sha “ayange a Noa” man “a Loti” la. (Luka 17:26–30; 2 Peteru 2:5–9) Kwagh yange gba ior mba ve lu cii man Mngerem ma Deemee va la sha icintan i Noa ta ve la ga. Shi shighe u i lu a tim gar u Sodom man Gomora ga la kpa, ônovmbakemev mba Loti nenge kwaghôron na ‘er ka asenge’ nahan.—Genese 19:14.
10. Yehova una er a ior mba ve we icintan na ikyo ga la nena?
10 Nyian kpaa ka ieren i ior ve lu a mi vough je la. Ungwa kwagh u Yehova una er a mba ve we icintan na ikyo ga la. A kaa ér: “Me tsaha ior mba ve tse a akase a ve her la, mba ve kaan ken asema ve er: TER Una er kwagh u dedoo ga, shin u bo kpaa ga, la. Akaa a ve aa hingir ishar, man ayou a ve kpaa á yôhôr a kera; shin vea maa ayou kpaa, vea tema ken a ga; shin vea môôr ikyon i wain kpaa, vea ma zar u i ga.” (Sefania 1:12, 13) Ior vea za hemen u “eren akaa a ve” a ve eren ayange ayange la, kpa mayange vea zua a iwasen í tsôron sha ityom ve i sha ican la ga. Sha ci u nyi? Iyange i Yehova ia va sha a ve sha shighe u vea fa ga yô, nahan inyaregh ki ve te atihi la cii kia kan shio u yiman ve.—Sefania 1:18.
‘Keghen’ I̱
11. Ka kwaghwan u nyi i doo u se umburu?
11 Doo u se dondo aferaior a a kase se ne ga, kpa se dondo kwaghwan u profeti Habaku ne. A kaa ér: “Mpase u sha mnenge ne ngu keghen shighe na, ngu zan fefa sha u kuren, una er aie ga; shin er una ngôôr kpaa, kegh un, gadia una va kpee, una bunde ga.” (Habaku 2:3) Aluer ka se uumace mba se yen ne inja er iyange la ngi timbir nahan kpa, se umbur ser Yehova ngu eren negh negh ga. Iyange la ia va sha shighe vough, sha ihwa i or môm nan ver ishima ga yô.—Marku 13:33; 2 Peteru 3:9, 10.
12. Yesu yange wa se kwagh ér nyi, man ieren i mbadondon un mbajighjigh ngi kposo nena?
12 Yesu yange ôr var var er i doo u se keghen iyange i Yehova yô, akaa ér mbadondon un mbagenev je kpa vea hunde ishima. A ôr kwagh ve wener: “Aluer wanakiriki u bo la nana kaa ken ishima i nan er: Terem timbir u van yum man nana gba gbidyen akar a na a tom, man nana gba yan akaa, man akaa a mbahundenmsôrom imôngo yô, ter u wanakiriki la una va sha iyange i wanakiriki la nan ver ishima ga la, hen shighe u nan fe ga la kpaa; una gber nan atôôn atôôn.” (Mateu 24:48-51) Kpa wanakiriki u fan kwagh yô, ngu jighjigh, a hunde ishima ga. Ngu per a wa iyol a kegh a kegh. Yesu shi ‘wa un akaa a na cii sha ikyev.’—Mateu 24:42-47.
Gba u Se Hunde Ishima Ga
13. Yesu yange ôr er i doo u eren kwagh torough torough nena?
13 Yange gba hange hange u Mbakristu mba sha derianyom u hiihii la vea hunde ishima ga. Yange gba u vea due gar u Yerusalem imbusu ayem ayem shighe u ve nenge ‘akumautya kase’ un la. (Luka 21:20, 21) Kwagh ne yange er ken inyom i 66 la. Ungwa er Yesu yange kaa a Mbakristu mba ve lu sha shighe la ér ve er kwagh torough torough yô. A kaa ér: “U nan lu sha tor kpaa, nana̱ de hongo sha u tôôn ikyav mbi ken iyou i nan ga; man shi u nan lu ken ityev kpaa, nana̱ de hidi sha u za tôôn riga u nan ga.” (Mateu 24:17, 18) Mbatimen sha akaa a mbayiase kaa ér anyom yange kar anyiin cii ve i va mase timin Yerusalem ye. Kpa er nan ve gba u Mbakristu vea er kwagh sha icintan i Yesu la fele fele ken inyom i 66 laa?
14, 15. Er nan ve lu hange hange u Mbakristu mba sha derianyom u hiihii la vea yevese vea due gar u Yerusalem shighe u ve nenge akumautya kase un laa?
14 Akumautya a Mbaroma yange ve de zan zan ve va tim gar u Yerusalem ken inyom i 70 la. Nahan kpa, Mbayuda lu iyol ishô ken anyom anyiin a a kar ken ijime la ga. Yange ior er tswam shi i wua mbagenev kpishi ken anyom ne. Or u timen sha akaa a mbayiase ugen ôr kwagh u za hemen ken Yerusalem hen shighe la ér, yange “i nôngo num i wua ior je kpilighyol, shi i nzughul a mbagenev vihi kpen kpen.” Yange i tsua igyumior i tese ve u kuran gar shi i taver ve ishima ér ve nôngo ityav shi ve za shoja kpaa. Hanma iyange yô, i tese ve u nôngon ityav. Mba yange ve soo u suen ityô ve ga cii i tôô ér ka mbavan a mgbejime. Nahan yange Mbakristu vea timbir ken gar la hen shighe la yô, kwagh ma kese ve.—Mateu 26:52; Marku 12:17.
15 Yesu yange kaa a “mba ken Yudia” man mba ken Yerusalem ér ve due ken gar la kera. Yange gba hange hange u vea due, sha ci u akumautya a Mbaroma yange mba undun gar la iwer ngi karen kpuaa yô, ve hide ve va u va nôngon ityav. Hiihii yô, ve ngohol gar u Galilia ken inyom i 67, inyom hurugh yô shi ve ngohol gar u Yudia kpaa. Kwagh ne yange na ior ya ican kpishi. Man ian kera lu cuku i Mbayuda vea due ken Yerusalem kera ga. Yange i tsua ior ér ve kuran hunda gar, nahan or nana soo u duen yô, i tôô ér nan ngu duen ér nana za dondo shoja i Roma.
16. Ka ieren i nyi yange gba u Mbakristu mba sha derianyom u hiihii la vea lu a mi ve vea war ican laa?
16 Akaa ne cii wase se u fan ityôkyaa i i ne ve Yesu yange ôr kwagh u mlu u torough torough u ashighe la yô. Yange gba u Mbakristu vea de akaa agen aa saa ve shi vea lumun ér inyaregh ki keren ki yange ve kwagh ga. Shi gba u vea “undu inyarev [vev] cii” a ishima i môm sha er vea er sha icintan i Yesu la yô. (Luka 14:33) Mba yange ve dondo icintan la ve yevese ve yem Yordan yande la yô, ve war.
Mayange Je Se Hunde Nen Ishima Ga
17. Er nan ve i doo u se hemba lun per hegen ciilii?
17 Akaaôron a profeti a i er ken Bibilo tese wang ér se mgbôghom a mkur u ayange a masejime a tar ne. Nahan gba u se hemba lun sulaa hegen cii. Orshoja u nan lu ken uitya ga yô, ishima i te nan kwe sha kwagh u uitya ga, shi nan cie ér ityav mbia wua nan kpaa ga. Nahan kpa, aluer nan hunde ishima, nan ngu per ga yô, alaghga a yila nan abu ér nana za nôngo ityav shighe u nan we iyol ga yô, man aluer gba u nana za nôngo ityav hen shighe la yô nana vihi iyol ken uitya kpen kpen. Se Mbakristu kpa kape ityav mbi ken jijingi mbi se lu nôngon mbira mbi lu je la. Aluer se hunde ishima yô, se fatyô u wan agoyol, hendan a mbamzeyol mba se tagher a mi la ga, shi iyange i Yehova ia va sha a vese abu. (Luka 21:36; 1 Mbatesalonika 5:4) Nahan aluer or ‘hire ijime u dondon TER’ yô, ka shighe u nana hide nana ker un je ne.—Sefania 1:3–6; 2 Mbatesalonika 1:8, 9.
18, 19. Kanyi ia wase se ve se ‘keghen mve u iyange i Aôndo’ la sha gbashima?
18 Apostoli Peteru wa se kwagh ér se “eren sha u [iyange i Ter] i̱ va fefa yô.” Se er kwagh ne nena? Gbenda môm u se er kwagh ne yô, ka sha u ‘lun ken icighanmlu shi lun a aeren a civir Aôndo.’ (2 Peteru 3:11, 12) Aluer se mba eren akaa ne yô, aa wase se se hemba keghen mve u “iyange i Aôndo” la saan saan. Se fatyô u torough a shighe u a shi her ne ga zan zan iyange i Yehova la ia kar van. Inja i ishember i ken zwa Grika i i gem ér “eren sha u i̱ va fefa” la ér “u torough a kwagh.” Kpa jighilii yô, se fatyô u torough a shighe u a shi her ne ga zan zan iyange i Yehova ia kar van. Nahan kpa, aluer se mba eren Aôndo tom yô, iyange la ia bee je se fa ga.—1 Mbakorinte 15:58.
19 Aluer se mba gbidyen kwar sha Mkaanem ma Aôndo shi se mba henen sha akaawan a na yô, kwagh ne una wase se se “tômon (se keghen shi se torough a) mve u iyange la.” Se “keghen iyange la hanma shighe cii.” (2 Peteru 3:12, The Amplified Bible; The New Testament, by William Barclay) I ôr akaaôron a profeti kpishi ken akaawan a Aôndo, akaaôron ne tsengaôron mve u iyange i Yehova kua averen a mba ve lu ‘keghen iyange i Yehova’ la vea zua a mi yô.—Sefania 3:8.
20. Ka kwaghwan u nyi i doo u se er kwagh sha mini?
20 Ka shighe u hanma wase nana er sha kwaghwan u profeti Sefania a we se je ne, a kaa ér: “Je er i lu a pase awashima la ga yô—iyange ngi karen er imough nahan—je er iyugh i TER i tsung la i lu a va sha a ven ga ne, man er iyange i iyugh i TER i lu a va sha a ven ga ne. Ker nen TER, ne mbaasemaleghlegh mba sha tar cii, ne mba ne we atindi a Na ikyo; ker nen perapera, ker nen ishima i legh legh, tsô alaghga á yer ne sha iyange i iyugh i TER la.”—Sefania 2:2, 3.
21. Gba u ior mba Aôndo vea kange ishima ér vea er nyi ken inyom i 2007 nee?
21 Sha nahan yô, ivur i sha inyom i ken inyom i 2007 ne ngi sha shighe vough. I̱ kaa ér: “Iyange i vesen i TER mgbôghom.” Ior mba Aôndo fa dedoo ér “ngi van fefa.” (Sefania 1:14) Ia “ngôôr” ga. (Habaku 2:3) Nahan er se lu keghen iyange ne yô, mayange je se hungur nen mnyam ken shighe u se lu ker ne ga, gadia se fa ser mkur u akaaôron a profeti mgbôghom!
Ú Fatyô u Nan Mlumun Kpa?
• “Iyange i vesen i TER” kanyi?
• Er nan ve ior kpishi ve hunde ishima ken ayange a se lu ker nee?
• Er nan yange gba u Mbakristu mba ken derianyom u hiihii la vea er kwagh torough torougho?
• Er nan ve i doo u se hemba eren kwagh torough torough hegen ciilii?
[Study Questions]
[Blurb on page 11]
Ivur i sha inyom i ken inyom i 2007 ne ér: “Iyange i vesen i TER mgbôghom.”—Sefania 1:14.
[Pictures on pages 8, 9]
Iyange i Yehova ia va sha mbanahantar abu er sha ayange a Noa la nahan
[Picture on page 10]
Shighe u Mbakristu nenge ‘akumautya kase’ Yerusalem la, gba u vea tema a tema ga