Yehova Ne Mba “Ve Sen Un La Icighan Jijingi”
Yehova Ne Mba “Ve Sen Un La Icighan Jijingi”
“Aluer ne mba ne lu mbaaferev je kpaa ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?”—LUKA 11:13.
1. Ka hanma shighe nahan kwagh ka a hemba gban se a iwasen i icighan jijingii?
‘ME FATYÔ u wan ishima a ican ne sha tahav av tseegh ga. Saa icighan jijingi una wasem!’ Er i lu nahan u ôr kwagh nahan vee? Mbakristu kpishi ôr kwagh nahan. Alaghga u ôr kwagh nahan shighe u yange u va fa wer u gba icôronuange shin kwase wou gayô orya wou u ne vese ayol a en ica i gbe saa ku yô. Shin alaghga lu shighe u mbamzeyol va ta sha we kpishi nahan u ule yô. Alaghga shighe u mbamzeyol mba vihin tsung mban kange sha we yô, ú nenge wer u ngu masen nôngon her sha ci u icighan jijingi u Yehova na u “agee a hemban” la.—2 Mbakorinte 4:7-9; Pasalmi 40:1, 2.
2. (a) Ka mbamzeyol mba nyi Mbakristu ve tagher a mini? (b) Ka mbampin mba nyi se time sha mi ken kwaghngeren nee?
2 Gba u se Mbakristu se za hemen u nôngon a mbamkighir man ahendan a tar u u vende u civir Aôndo ne. (1 Yohane 5:19) Heela tseegh ga, Satan Diabolo iyol na ngu anen mbadondon Kristu vanger, shi ngu nôngon num a mba ve ‘kor atindi a Aôndo shi ve lu eren shiada sha kwagh u Yesu’ la kpaa. (Mpase 12:12, 17) Nahan ka shighe u se hemba keren iwasen i icighan jijingi u Aôndo je ne. Kpa kanyi jim se er ve Aôndo una za hemen u nan se icighan jijingi na mgbegha laa? Shi er nan ve se lu a vangertiôr ser Yehova wa iyol kegh a kegh u nan se agee shighe u ican i tser se yôô? Se zua a mlumun sha mbampin mban ken anzaakaa ahar a Yesu yange ôr yô.
De Gbe Uwer u Eren Msen Ga
3, 4. Ka injakwagh i nyi Yesu yange ôrôô, man a tôô i a kar sha msen nena?
3 Orhenen u Yesu ugen yange kaa a na ér: “Tere, tese se u eren msen.” (Luka 11:1) Nahan Yesu ôr ve anzaakaa ahar sha u tan ve iwanger sha kwagh u msen. A ôr injakwagh i hiihii la sha kwagh u orgen u yange ngohol orvannya yô, injakwagh i sha uhar la di lu sha kwagh u ter ugen u na wan na kwagh u sôn yô. De se time sha anzaakaa a ahar ne cii.
4 Yesu kaa ér: “Ka an ken a ven, aluer nana lu a ikyar nana za her a nan ateghôtôutu, nana za kaa a nan er: Ikyar, pwarem ikpen i bredi itiar, gadia ikyarem ugen due ken zende, va hen mo, man m ngu a ma kwagh u me na un ga; man u ken iyou la nana gema á kaa er: De zem iyol ga, hunda ngu vingir hegen, ônov av kpaa mba a mo sha gambe imôngo, me fatyô u moughon za nan we ga. Me kaa ne shin er una mough u nan nan er nan lu ikyar na ga kpaa, sha ci u a cihi kunya yum yô, una mough una na nan akaa a a gbe nan la cii.” Yesu er kwagh ne been yô, a pase er injakwagh ne i zough sha msen yô. A kaa ér: “Sôn nen, á na ne; ker nen, né zua a mi; mande nen uwegh, á bugh ne. Gadia hanmô u nan sen yô, nan ngohol; u nan keren kpaa, nan zough a mi; u nan manden uwegh kpaa, á bugh nan.”—Luka 11:5-10.
5. Injakwagh i Yesu a er sha kwagh u or u cihi kunya la tese se nyi sha gbenda u i gbe u se eren msene?
5 Ikyav i Yesu a tese sha kwagh u or u gba uwer u sônon kwagh ga la tese se gbenda u i gbe u se eren msen yô. Fa wer Yesu kaa ér or la zua a kwagh u lu sônon la sha ci u a “cihi kunya yum” yô. (Luka 11:8) Ken Bibilo jimin cii, i nger ishember i “cihi kunya yum” ne kwa môm tseegh. Ken zwa Grika yô, inja i ishember i “cihi kunya yum” la kpôô kpôô ér “kunya shio.” Ishember i kunya shio ne jighilii yô, i̱ tese inja i bo. Nahan kpa, shighe u i lu ôron kwagh u kunya shio shin cihi kunya ne sha kwagh u dedoo yô, mba ôron kwagh u ieren i dedoo. Ka ieren i dedoo i orya u i er kwagh na ken injakwagh la a lu a mi je la. Yange kunya kôr un u zeren zamber kwagh u gba un ishima la ga. Yesu ôr injakwagh i orya ne u tesen se ér se de gbe uwer u eren msen ga. Yehova soo ér se za hemen u ‘sônon shi keren shi manden uwegh’ kpaa. Nahan una “na mba ve sen Un la Icighan Jijingi.”
6. Sha ashighe a Yesu la, ior nengen ieren i ngohol mbavannya nena?
6 Yesu tese se ér kunya u de ker se u eren msen ga shi a tese se er i hii ve i gbe u se eren msen yô. Kwagh u una wase se ve se kav ityesen i Yesu a soo ér se fa la tsembelee yô, ka u fan er ior mba yange ve ungwa injakwagh i Yesu la nengen ieren i ngohol mbavannya la. Avur a Ruamabera kpishi tese ér sha ashighe a i ngeren Bibilo la lu ior zegekwagh u ngohol mbavannya man mbacivir Aôndo je yô hemba lun ve zegekwagh cii. (Genese 18:2–5; Mbaheberu 13:2) Yange or a̱ ngohol mbavannya ga yô, i lu kwagh u kunya kpishi. (Luka 7:36–38, 44-46) Nahan yô, de se hide se hen nen ase sha injakwagh i Yesu la.
7. Er nan ve kunya kôr orya u Yesu a er kwagh na ken injakwagh la u za nderen ikyar na ga?
7 Orya u i er kwagh na ken injakwagh la yange ngohol orvannya na la ateghôtôutu. Orya la nenge ér doo u una na orvannya na ne kwaghyan, kpa lu a ‘ma kwagh u nan un ga.’ Man lu kwagh u una de ér a̱ kpe ijen ga. Nahan a nôngo sha afatyô na cii ér una ker orvannya na kwaghyan. Tsô a za hen boki na a kunya shio, a za nder un. A kaa a na ér “ikyar, pwarem ikpen i bredi itiar.” A zamber un zan zan tsô a na un. Er zua a ikpen bredi ne yô, a nenge sha orvannya na doo doo.
Se Sônon Nen Icighan Jijingi Hanma Shighe, Gadia Kwagh Gba Se a Mi
8. Kanyi ia wase se ve se gba uwer u sônon icighan jijingi ga?
8 Injakwagh ne tese se er i hii ve i doo u se eren msen hanma shighe nena? Orya la yange gba uwer u sônon ikpen bredi ga, gadia a fa ér aluer un zua a i yô, una fatyô u nengen sha orvannya na dedoo. (Yesaia 58:5-7) Kpa a bredi shio yô, una lu orya u dedoo ga. Se fatyô u karen injakwagh ne sha a vese kpaa, sha ci u se fa ser saa se zua a icighan jijingi u Aôndo keng ve se fatyô u eren tom wase u pasen kwagh, u Mbakristu mba mimi la ye, ka nahan ve se sen Aôndo hanma shighe ser a na se jijingi na ye. (Sekaria 4:6) A jijingi shio yô, se kôr cio u eren tom ne kuren ga. (Mateu 26:41) U nenge er injakwagh ne i tese se kwagh u injaa kpa? Aluer se nenge ser gba u jijingi u Aôndo una lu a vese keng keng yô, se gba uwer u sônon un ga.
9, 10. (a) Tese ikyav er i hii ve i gbe u se gba uwer u sônon icighan jijingi u Aôndo ga yô. (b) Ka mpin u nyi i gbe u se pine ayol a ase, man ityôkyaa ér nyi?
9 Ikyav i tesen ne ia wase se u tôôn kwagh u se hen ken injakwagh ne karen sha ayange ase. Tôô wer angev kôr ma or u hen tsombor wou ateghôtôutu. Ú ker ortwer tugh la wer nana wase u wee? Aluer ka angev mbu ikyoogh ga yô ú ker ortwer ga. Kpa, aluer ka angev mbu shimav mbu ker nan yô, kunya a kôr u u za yilan nan ga. Sha ci u nyi? Sha ci u aluer u er nahan ga yô, alaghga nana kpe. Gadia u fa wer gba u u ôr or u nan fe u sôron angev mbura tsema tsema yô. Aluer u ker iwasen ga yô, kwagh a er u bo. Mbakristu mba mimi kpa tagher a kwagh u bo. Gadia Satan ngu zenden “er begha” nahan keren or u una ya yô. (1 Peteru 5:8) Nahan gba u se lu a icighan jijingi u Aôndo, gadia ka kwagh u una wase se se za hemen u civir Yehova sha mimi je la. Aluer se mba sônon iwasen i Aôndo ga yô, kwagh a kese se. Nahan se cihi nen kunya, se gba nen uwer u sônon icighan jijingi u Aôndo ga. (Mbaefese 3:14–16) Gadia ka kwagh u se er ve se zua a agee a “taver ishima zan zan mkur” je la.—Mateu 10:22; 24:13.
10 Nahan doo u ashighe agen se pine ayol a ase ser, ‘Sha mimi yô, m eren msen kpoghuloo je kpa?’ Fa wer, aluer se fa ser mimi mimi je kwagh gba se a iwasen i Aôndo yô, mayange je se gba uwer u sônon icighan jijingi u Aôndo ga.
Kanyi Ia Wase Se u Eren Msen Vangertiôrô?
11. Yesu kar injakwagh i ter man wan na la sha msen nena?
11 Injakwagh i Yesu a er sha kwagh u orya u gba uwer u sônon kwagh ga la wase se u fan kwagh u or u nan jighjigh u nan lu eren msen yô. Injakwagh i i dondo ne di wase se u fan kwagh u Yehova Aôndo, un u a ongo mbamsen la. Yesu pine ér: “Ka hanmô wen u nan lu ter man wan u nan una sôn nan ishu, man nana gema á na un iyô sha ityough ki ishu la ase! Shin una sôn ijikyegh, man nana gema á na un iyese!” Yesu seer tan iwanger sha injakwagh ne ér: “Aluer ne mba ne lu mbaaferev je kpaa ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?”—Luka 11:11-13.
12. Injakwagh i Yesu a er sha kwagh u ter u na wan kwagh u a sôn un la tese ér gba Yehova ishima u ungwan mbamsen asev nena?
12 Yesu tese ikyav i ter u na wan na kwagh u sôn la sha u wasen se u fan er ka i lu Yehova ken ishima a mba ve er msen hen a na la yô. (Luka 10:22) Nenge ase mkposo u a lu ken anzaakaa a ahar ne yô. Or u i er kwagh na ken injakwagh i hiihii la yange soo u wasen ikyar na ga, kpa Yehova yô ngu nahan ga, ngu er ormaren u nan we ônov mba nan ikyo, u nan lu a gbashima u nan wan u nan kwagh u nan sen la. (Pasalmi 50:15) Yesu seer pasen er Yehova a ongo mbamsen asev yô. A tôô gbenda u mbamaren ve eren kwagh a ônov vev la a kar sha gbenda u ter wase u sha la a eren kwagh a vese yô. A kaa ér aluer uumace mba ve lu mbamaren, ve lu “mbaaferev” sha ci u dyako u isholibo i ve ye la je kpa na ônov vev iyua i dedoo yô, gema ter wase u sha, u a lu a inja i dedoo la ve una na mba ve civir un icighan jijingi ga yee?—Yakobu 1:17.
13. Aluer se er msen hen Yehova yô, se lu a vangertiôr ser nyi?
13 Injakwagh ne tese se nyi? I tese se ér hanma shighe u se sen Ter wase u sha icighan jijingi di tsô yô, a wa iyol a kegh a kegh u nan se. (1 Yohane 5:14) Nahan aluer se er msen hen Yehova acin imôngo je kpa mayange una kaa ér: “De zem iyol ga, hunda ngu vingir hegen,” ga. (Luka 11:7) Kpa, Yesu kaa ér: “Sôn nen, á na ne; ker nen, né zua a mi; mande nen uwegh, á bugh ne.” (Luka 11:9, 10) Yehova “ngu ikyua ikyua a mba ve yer Un cii.”—Pasalmi 20:9; 145:18.
14. (a) Mbagenev ka vea tagher a ican yô, ka mhen u shami ga u nyi ka ve lu a mini? (b) Shighe u se tagher a ican yô, er nan ve i doo u se er msen hen Yehova vangertiôrô?
14 Ikyav i Yesu a tese sha kwagh u ter u wa wan na ikyo la shi tese ér erdoo u Yehova hemba erdoo u mbamaren mba shin tar ne ica je. Nahan aluer se mba yan ican yô, doo u se hen ser Yehova gema ijime a vese ve se lu yan ican ga. Ka Satan, orihyom wase u vesen la a soo ér se hen nahan ye. (Yobu 4:1, 7, 8; Yohane 8:44) Ma ijiir i môm ken Ruamabera kpa lumun a imba mhen u nan iyol yase ibo ne ga. Yehova “meen [or] sha kwagh u ifer ga.” (Yakobu 1:13) Ne se ican, inja er ngu nan se iyô shin yese ga. Ter wase u sha la ne “mba ve sen Un [la], akaa a dedoo.” (Mateu 7:11; Luka 11:13) Aluer erdoo u Yehova man gbashima u a lu a mi u wasen se la doo se ishima yô, ishima ia hemba taver se u eren msen hen a na vangertiôr. Aluer se mba eren nahan yô, se kpaa se ôr kwagh vough er orpasalmi nahan. A kaa ér: “Mimi je, Aôndo ungwa, A wa imo i msen wam ikyo.”—Pasalmi 10:17; 66:19.
Gbenda u Icighan Jijingi a Lu Orwasen Se Yô
15. (a) Ka ityendezwa i nyi Yesu yange er sha kwagh u icighan jijingi? (b) Ka gbenda môm u nyi icighan jijingi a wasen se?
15 Er mase shin di ayange kpuaa u a wua Yesu yô, a kimbir ibumun i ôr ken anzaakaa a na a ahar la. A ôr mbaapostoli nav kwagh u icighan jijingi ér: “Me sôn Ter, man Una na ne Orsurunshima ugen u Una lu a ven gbem yô.” (Yohane 14:16) Nahan, Yesu tôndo zwa ér orwasen shin icighan jijingi una lu a mbadondon nav zan zan shighe wase ne. Icighan jijingi wasen se nyian sha gbenda u injaa u nyi? Icighan jijingi wasen se u wan ishima a atsan kposo kposo. Wasen se nena? Apostoli Paulu iyolna yange ya ican kpishi, nahan nger Mbakristu mba ken Korinte washika ôr ve er jijingi u Aôndo wase un yô. De se time nen sha akaa agen a á nger la.
16. Mlu wase una fatyô u lun kwagh môm a u Paulu la nena?
16 Hiihii yô, Paulu ôr mba ve civir Aôndo a na imôngo la sha mimi ér un ngu yan ican a mzeyol ugen u lun er “saa ken iyol” na nahan. A kaa ér: “M sôn Ter kwa tar mer, kwagh ne a̱ due ken mo kera.” (2 Mbakorinte 12:7, 8) Paulu yange zamber Aôndo ér a bee un ican i yan na la, kpa i bee ga. We kpa alaghga u ngu a ma mzeyol u ú lu nôngon a mi yô. Nahan alaghga u gba uwer ga, u ngu eren msen vangertiôr wer Yehova a bee ú zayol la, di er Paulu kpa er nahan. Alaghga u zamber Aôndo acin imôngo, kpa zayol la bee ga. Kwagh ne tese ér Yehova ungwa mbamsen ou ga, shi jijingi na ngu wasen we ga shinii? Ka nahan ga cii! (Pasalmi 10:1, 17) Nenge ase kwagh ugen u Paulu shi ôr yô.
17. Yehova yange ungwa msen u Paulu nena?
17 Aôndo yange ôr kwagh a Paulu shighe u á er msen hen a na la ér: “Mrumun u sha mhôôn Wam kuma u, gadia agee Am ka a tema hoghom hoghom ken isheer.” Paulu kaa ér: “Nahan yô, me ta ihyagh sha isheer saan saan sha u agee a Kristu a̱ tema ken mo yô [“sha u agee a Kristu a̱ yisam er tenti nahan,” NW ].” (2 Mbakorinte 12:9; Pasalmi 147:5) Paulu yange nenge wener Aôndo kura un sha ikyev i Kristu doo doo, inja er un yer ken haav mbu tenti nahan. Nyian kpaa Yehova ongo mbamsen asev. Kuran mba ve civir un la, inja er ve yer ken haav mbu iyoughough nahan.
18. Kanyi ka i wase se u wan ishima a atsana?
18 Haav mbu iyoughough mbu yangen ura ga, shi mbu yangen ahumbe kpaa ga, kpa ka mbu yange ura u nôôn se. Nahan mkor u se zough a mi sha “agee a Kristu” la kpaa yangen se u tagher a atsan shin mbamzeyol ga. Kpa agee ne ka a kura se mbacivir Yehova sha mbamzeyol mba tar ne man num u Satan, tor u tar ne a lu nôngon a vese la. (Mpase 7:9, 15, 16) Nahan, aluer u ngu wan ishima a ican man ngi been ‘ken we kera’ ga kpa, fa wer Yehova ngu nengen a ican you, shi a ungwa “mliam ou” kpaa. (Yesaia 30:19; 2 Mbakorinte 12:7, 8) Paulu kaa ér: “Aôndo yô, ka u jighjigh, Una rumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.”—1 Mbakorinte 10:13; Mbafilipi 4:6, 7.
19. Ú kange ishima wer u er nyi, man ka sha ci u nyi?
19 Sha kpôô yô, “ayange a masejime” a tar u u civir Aôndo ga ne ka “ashighe a ican.” (2 Timoteu 3:1) Nahan kpa, ior mba Aôndo vea fatyô u wan ishima a ashighe a ican ne. Sha ci u nyi? Sha ci u mbatomov mba Yehova Aôndo ka vea za hemen u sônon un icighan jijingi vangertiôr yô, a na ve gbar gbar shi a na ve mgbeghaa sha u a kura ve shi a wase ve kpaa. Nahan se taver nen ishima se za nen hemen u eren msen sônon icighan jijingi hanma shighe cii.—Pasalmi 34:6; 1 Yohane 5:14, 15.
Ú Na Mlumun Wer Nyi?
• Kanyi kwagh se er ve se zua a icighan jijingi u Aôndo?
• Er nan ve se lu a vangertiôr ser aluer se sôn Yehova icighan jijingi yô, una na se?
• Icighan jijingi wasen se u wan ishima a atsan nena?
[Study Questions]
[Picture on page 13]
Kanyi se hen sha injakwagh i Yesu ôr sha kwagh u orya u cihi kunya laa?
[Picture on page 14]
Ú sen icighan jijingi u Aôndo hanma shighe kpa?
[Picture on page 15]
Kanyi se hen sha kwagh u Yehova ken injakwagh i ter u wa wan na ikyo laa?