Ka Mbagenev Tseegh Ve Ôron We Kwagh U Mimi Yee?

WANYEKWASE ugen u lun anyom 16 kaa ér: “Aie doom ishima ga, shi m soon mer or a erem aie ga.” Se mbagenev kpa kape aie a doo se ga je la. Ka se soo ser hanma kwagh u or ôr se cii, a nger a nger shin a ôr se sha zwa kpa i lu u mimi. Kpa gema se di ye, se mba er mbagenev kwagh sha mimi kpa?

Ior kpishi mba i tev ve ken tar u Jamani kaa ér, “aluer or er aie sha ankwagh u cuku ér nana kura iyol i nan shin nana yima mbagenev sha ma zayol yô ka kwaghbo ga, shi ka kwagh u hange hange u or nana er ve nana doo a mbagenev je la.” Shi kwase u tôôn abaver ugen nger ér: “Doo u ôron kwagh sha mimi hanma shighe cii, nahan kpa aluer ior mba ôron kwagh sha mimi hanma shighe cii yô, tar ua hôm ga.”

Se mba soon ser mbagenev ve ôron se kwagh sha mimi, kpa se yô ashighe agen ka i lu se er se er aie kpa a lu kwaghbo ga shinii? Kpa doo u se ôron kwagh sha mimi shin doo ga? Ka mbamzeyol mba nyi aie u eren a ve a mini?

Mbamzeyol mba Aie u Eren a Ve a Mi Yô

Hen ase sha mbamzeyol mba aie u eren ka a va a mi la. Aie u eren ka a na nom man kwase kua mbagenev hen tsombor ve kera na ayol a ve jighjigh ga. Shi aluer or ngu lamen sha iyol i orgen sha ifer yô, kwagh ne una vihi nan iti. Mbatomov ka vea nyien kômpeni yô, kwagh ne a va u a mgbejime shi ú seer akaa ishe kpaa. Shi or ka nana kimbi inyaregh ki i gbe u nana ta kpandegh la cica cii ga yô, kwagh ne a pande inyaregh ki gomoti ma a zough a mi ve ma a sôr tar la. Mbatimenshaakaa kpa ka ve vihi ityom ve sha mbaaie mba eren shi ve na imakeranta shin mbamzough mba ve ze iti je kpa ve kera lu a icivir ga. Mba ve eren ikpenga i sha ifer i zuan a inyaregh a iyol nyoon shio ka ve nyighe mba ve eren kpenga imôngo la ve ya ve inyaregh cica cii. Kape i lu ve Bibilo i kaa ér “nombor u aiegh” man “or u eren shiada u mimi ga” cii ka akaa a hôngorough, a Yehova a ker a ihyom je ne!—Anzaakaa 6:16–19.

Aie u eren kpoghuloo una fatyô u bulan ior kua ityô yase jimin cii. Ior kpishi vea lumun ér kwagh ne ka mimi.

[Picture on page 3]

Aie u eren ka a na nom man kwase ve kera na ayol a ve jighjigh ga