Ngi Ican u Ôron Ga, kpa Ngi Shamii?

KEN uwer u Setemba 2005 la, ior mba ken Côôci i Ingila lumun a ishima i môm ér i̱ due a Bibilo i̱ he i̱ í yer ér The 100–Minute Bible la. I gber Bibilo ne ér i̱ ôron i̱ ken miniti deri môm tseegh. Bibilo i he ne i sav akaa a ken Ruamabera u ken zwa Heberu la jimin cii ken upeeji 17 tseegh, shi i̱ sav u ken zwa Grika la di ken upeeji 33. Orgen u yange er tom sha Bibilo ne kaa ér akaa a ken Bibilo á i nenge ér a “taver shi a maa iyol u ôron” ga cii i nger ken Bibilo ne ga. Sha mimi yô, ngi ican u ôron ga, kpa ngi shamii?

Í nger iti i Aôndo, i i yer ér Yehova la ken Bibilo ne ga, akaa agen kpa nga a ior mba ve henen Bibilo kpoghuloo vea nenge a mi ker a shi ve yô. (Ekesodu 6:3) U tesen ikyav yô, í ôr ken vegher u sha 1 u Bibilo ne ér Aôndo “gba sha man tar ken atô u ayange a kpôô kpôô ne ataratar.” Kpa Genese 1:1 kaa ér: “Sha hiihii Aôndo gba Sha man tar.” Shi ngeren u Bibilo u hiihii la ôr akaa agen a Aôndo gba ken “ayange” ataratar shin ashighe a karen gôgônan yô. Nahan Genese 2:4 kohol ashighe a igbetar la cii yila ér, ‘iyange i TER Aôndo er Sha man tar la.’

Shi i ôr ken The 100–Minute Bible la ér “Satan, ortom u [Aôndo] ugen . . . u tom na yô i lu u senden uumace ityough la” yange ta num sha orjighjigh Yobu. Kwaghôron ne ka u mimi ga. Gadia inja i “Satan” ér “Orhendankwagh.” Shi Satan ngu ortom u Aôndo ga, kpa ngu orihyom u vesen u Aôndo, shi a tsua iyolna ér una lu or u senden uumace ityough.—Mpase 12:7–10.

Vegher u Ruamabera u ken Zwa Grika u Bibilo i The 100–Minute Bible la di ôr ér nyi? Í ôr kwagh u injakwagh i Yesu a er sha kwagh u iyôngo man ivo la ken mgem u he ne ér “aluer or na or iwasen cuku kpa” a doo Yesu a nan. Nahan kpa, ka “anmgbianev” mba Yesu mba ve lu mbadondon un la a kaa ér aluer or er erdoo a ve yô una ver nan doo doo ye. (Mateu 25:40) Ken takerada u Mpase di, i pase sema kwagh u i er ker la ér, “a tim Roma u a lu Zegebabilon la njighe-njighe.” Nahan kpa, mbahenen Bibilo kpoghuloo yô, fa ér í ôr kwagh sha kwagh u “Zegebabilon” ken takerada u Mpase nahan cuku tsô kpaa ga.—Mpase 17:15–18:24.

Mba ve soo u fan kwagh u Orgbanakaa man awashima na yô fa ér gba u vea ôr Bibilo jimin cii, a lu avegher a doon ve la tseegh ga. Sha mimi yô, ka miniti 100 tseegh or nana tôô u ôron Bibilo ga, kpa doo u se fa ser aluer se mba ôron Bibilo yô, ia wase se kpishi. (Yohane 17:3) Nahan taver ishima ôron Bibilo, tsô u zua a injar i ôron Bibilo.—2 Timoteu 3:16, 17.