De Mkaanem Ma Aôndo Ma Hemen We
De Mkaanem Ma Aôndo Ma Hemen We
“Mkaanem Ou ka imenger i angahar a am, man iwanger i gbenda wam kpaa.”—PASALMI 119:105.
1, 2. Er nan ve uumace kpishi ve kan shio u zuan a bem u mimi man msaanyolo?
ER I lu nahan u pine or gbenda vee? Alaghga yange u zurum ape u lu zan la je, kpa u za mase tsumen tsô. Shin adooga yange u tsume kuaa je, nahan gba u ú hide u yem gbenda ugen. Aluer u tsume gbenda shin wea fa gbenda a̱ kuma u ga kpa, u nenge wer doo u ú pine or u nan fe gbenda tsembelee ga zee? Nana wase u ú ar ape u lu zan la.
2 Uumace kpishi mba zan sha gbenda u uma a u keren iwasen i Aôndo shio. Ve er nahan anyom udubu imôngo hegen. Kpa er uumace mba ve yen mban ve pin Aôndo gbenda ga yô ve tsume gba ica. Vea fatyô u zuan a gbenda u bem u mimi man msaanyol. Er nan ve ve kanshio u zuan a bem u mimi man msaanyolo? Profeti Yeremia nger mkaanem ma ma lu shin heen ne hemba anyom 2,500 hegen. A kaa ér: “Or u zenden la, mvershigh u iaven i angahar a nan ngu sha ikyev i nan ga.” (Yeremia 10:23) Hanma or u nan vende u keren iwasen i injaa, u nan lu nôngon tswen tswen ér nana kôôm mvershigh u iaven i angahar a nan cii yô nana va ahenge kpee. Sha mimi yô, gba u a tese uumace gbenda u vea za yô!
3. Er nan ve Yehova Aôndo a hembe fan u tesen uumace gbenda a hanma or ciilii, man a tôndo zwa a vese ér nyi?
3 Yehova Aôndo kuma u tesen se gbenda gbing gbing je. Sha ci u nyi? Sha ci u a hemba fan mlu u uumace a hanma orgen cii. A fa er yange i hii ve uumace tsume gbenda saa toho yô. Shi a fa kwagh u vea er ve vea hide sha gbenda kpaa. Heela tseegh ga, er i lu Yehova a gbe akaa cii yô, a fa kwagh u a hembe doon sha ci wase hanma shighe cii yô. (Yesaia 48:17) Nahan yô, se fatyô u nan ityendezwa na i i nger ken Pasalmi 32:8 la jighjigh a ishima yase cii. Ijiir la kaa ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.” Akperan tsô a̱ de lu se ken ishima sha kwagh ne ga: Ka Yehova a hembe fan u hemen se ye. Kpa ngu hemen se nena jimi?
4, 5. Mkaanem ma Aôndo ma a hemen se nena?
4 Orpasalmi ugen yange er msen hen Yehova ér: “Mkaanem Ou ka imenger i angahar a am, man iwanger i gbenda wam kpaa.” (Pasalmi 119:105) Akaaôron a Aôndo man mbampase nav mba ken Bibilo vea fatyô u wasen se u palegh akaa a wan se agbe sha gbenda u uma u se zenden sha u ne. Sha kpôô yô, ka sea ôr Bibilo shi sea de ser i̱ hemen se yô, kwagh u Yesaia 30:21 a ôr la a kure sha a vese. Ivur la kaa ér: “Ato ou kpaa aa ungwa kwaghôron ken ijime you u kaan er: Ka gbenda je ne, za nen sha u.”
5 A lu u ver ishima yô, Pasalmi 119:105 pase akaa ahar a lun kwagh môm, a Mkaanem ma Aôndo ma eren yô. Hiihii yô, ma imenger i angahar a ase. Ka sea tagher a mbamzeyol mba ayange ayange yô, atindiakaa a Bibilo a kôôm angahar a ase sha er se er kwagh sha kwaghfan shi se palegh uhôn mba tar ne yô. Kwagh u sha uhar yô, mbampase mba Aôndo ka ve wanger gbenda wase, nahan se tsua akaa a a zough sha ishimaverenkeghen i se lu a mi i va lun uma gbem sha won ken Paradiso u Aôndo a tende zwa u van a mi la. Er gbenda wase u wanger yô, se fatyô u fan akaa a dedoo shin a bo a ieren yase ia va a mi yô. (Mbaromanu 14:21; 1 Timoteu 6:9; Mpase 22:12) De se tôv nen vighe vighe se nenge er mkaanem ma Aôndo ma ken Bibilo la ma a lu imenger i angahar a ase man iwanger i gbenda wase kpaa yô.
“Imenger i Angahar a Am”
6. Ka hanma shighe nahan mkaanem ma Aôndo ma a fatyô u lun imenger i angahar a ase?
6 Hanma iyange yô, ka se tsua akaa a se er yô. Akaa agen a se tsough u eren la ka a lu a kiriki, kpa ashighe agen yô ka se tagher a imeen i eren idya shin eren kwagh a mbagenev sha mimi ga shin imeen i sha kwagh u tilen paleghaa a tar ne. Saa a “hoghor [se] u paven kwagh u dedoo a kwagh u bo” keng ve se ya ikyaren ne ye. (Mbaheberu 5:14) Aluer se zua a mfe u vough u Mkaanem ma Aôndo shi se kav atindiakaa a ken Mkaanem nam yô, se tsaase imoshima yase sha er se tsuan akaa a doon Yehova ishima yô.—Anzaakaa 3:21.
7. Pase er alaghga Orkristu nana soo u zenden imôngo a ior mba nan jighjigh ga mba ve eren tom ijiir i môm a nan yô.
7 Nenge ase ikyav i tesen ne. U ngu organden u ú lu nôngon sha gbashima wer ú er kwagh u saan Yehova iyol yôô? (Anzaakaa 27:11) Aluer ka nahan yô, ú er kwagh doo. Kpa, tôô ase wer ior mbagen mba ve eren tom ijiir i môm a we yô, yam tikeeti na u ér ne za nenge iniumbe mape. Ve soo kwagh wou sha ijiirtom, nahan ve soo u duen ahumbe a man a we imôngo. Alaghga u nenge wer ka ior mba bov ga. Shi mba eren akaa a dedoo ashighe agen je kpaa. Tsô u er nena? Aluer u lumun u zan iniumbe la a ve nahan, u gbihi iyol you ken kwaghboo? Mkaanem ma Aôndo ma a wase u sha ikyaa ne nena?
8. Ka akaawan a ken Ruamabera a nyi aa wase se u gbidyen kwar sha kwagh u kôron ijende a mbageneve?
8 Time ase sha akaawan agen a ken Ruamabera la. Kwaghwan u alaghga una hii van we ken ishima yô, ka u i nger ken 1 Mbakorinte 15:33 la. A kaa ér: “Ujende mba bov mba vihin mbamlu mba dedoo.” Aluer u ngu eren sha kwaghwan ne yô, a gba u ú palegh mba ve ne jighjigh ga la elegh elegh shinii? Ruamabera tese nahan ga. Paulu je kpa, yange wa “ior cii” ikyo, kua mbananjighjighga kpaa. (1 Mbakorinte 9:22) Ieren i wan mbagenev ikyo la ka tamenkwagh u kwaghaôndo u Mbakristu a har sha mi jim jim yô, man kwagh ne kua u wan mba ve lumun jighjigh u nan wase ga la kpa ikyo. (Mbaromanu 10:13-15) Sha mimi yô, aluer se mba palegh ior mba i gbe u se wase ve la yô, se er kwagh u i we se ér “se eren . . . akaa a doon a ior cii” la nena sha wono?—Mbagalatia 6:10.
9. Ka kwaghwan u Bibilo u nyi una wase se u lun a mba se eren tom imôngo a ve la kôôsôô yum ga?
9 Nahan kpa, u eren kwagh doo doo a or u ú eren tom ijiir i môm a nan la ka kwagh môm a u yan ikyar a nan kôôsôô ga. Kwaghwan u ken Ruamabera ugen ta se iwanger sha kwagh ne. Apostoli Paulu ta Mbakristu icin wener: “I̱ de zough ne ken mzough u kpeegh sha igbur i môm a or u nan ne jighjigh ga, imôngo ga.” (2 Mbakorinte 6:14) Inja i ishemberkwaghôron i “i̱ de zough ne ken mzough u kpeegh . . . ga” la ér nyi? Bibilo igen gema ishember ne ér “de kohol imôngo a mba ve ne jighjigh ga la ga,” igen di kaa ér “de eren kwagh imôngo a mba ve ne jighjigh ga la er ne mba kwar ga.” Shi igen kpa kaa ér “de lu imôngo a mba ve ne jighjigh ga la sha gbenda u vough ga, ga.” Ka hanma shighe nahan a fatyô u kaan ér or ngu lun imôngo a or u eren tom a nan sha gbenda u vough ga? Or nana er nyi ve a fatyô u kaan ér i zua nan ken mzough u kpeegh sha igbur i môm a orgene? Bibilo i i̱ lu Mkaanem ma Aôndo la ia kôôm angahar a ou sha kwagh ne.
10. (a) Yesu yange yaan ikyar a ior nena? (b) Ka mbampin mba nyi vea wase or nana kôr ijende a ior sha kwaghfana?
10 Nenge ase ikyav i Yesu ver la. Hii shighe u i gba tar la je, uumace doo un ishima. (Anzaakaa 8:31) Shighe u lu shin tar la, a ya ikyar a mbadondon un kangenaa. (Yohane 13:1) Orgen u yange eren kwaghaôndo u mimi ga je kpa “doo [Yesu] ishima.” (Marku 10:17-22) Nahan kpa, Yesu kôron ijende a ior dang dang ga. Ior mba yange ve soo u eren ishima i Ter na sha mimi ga la cii yô, Yesu ya ikyar a ve ga. Sha shighe ugen la, Yesu kaa ér: “Aluer ne eren kwagh u M we ne tindi sha mi yô, ne mba akar Am je.” (Yohane 15:14) Sha mimi yô, alaghga or ngu hen ijiirtom you u ú doo a nan yô. Kpa pine ase iyol you yôô: ‘Or ne soo u kuran atindi a Yesu a we je kpa? A soo u henen kwagh u Yehova, u Yesu a kaa ér se civir un la kpa? Ngu a aeren a dedoo a mo kpa m lu a mi sha ci u m ngu Orkristu la kpa?’ (Mateu 4:10) Aluer u ngu lamen a mba u eren tom ijiir i môm a ve la shi u ngu hanger wer u kura atindi a Bibilo yô, kwagh ne una wase u ú zua a mbamlumun sha mbampin mban.
11. Tese ikyav i akaa a i doo u mkaanem ma Aôndo ma a hemen se gbenda u nôngon a mi yô.
11 Akaa agen kpa nga kpishi a mkaanem ma Aôndo ma a wase se er imenger i angahar a ase nahan yô. Ikyav i tesen yô, alaghga Orkristu u nan lu keren tom kpoghuloo yô, zua a tom mape. Nahan kpa, tom la ka u yan shighe shi nyoon iyol kpishi. Aluer nan lumun u yô, nana bunden mbamkombo mba Mbakristu kpishi shi nana bunden akaa agen kpaa a a gbe a zough a mcivir u mimi yô. (Pasalmi 37:25) Orkristu ugen di yô, alaghga sar nan tsung u nengen icer i vidio kua akaa a i tesen sha televishen a a hendan a akaawan a Bibilo je i lu ashe tugh ga yô. (Mbaefese 4:17-19) Shi Orkristu ugen yô, alaghga anmgbian u ken Kristu ka nana er an-kwagh u shin iyol a nan cuku maa ishima i vihi nan je. (Mbakolose 3:13) Doo u se de Mkaanem ma Aôndo ma lu imenger i angahar a ase sha akaa a i ter sha heen ne cii. Sha kpôô yô, aluer se mba dondon atindiakaa a Bibilo yô, se kôr cio u nôngon a nyityô mzeyol u se tagher a mi ken uma wase cii. Mkaanem ma Aôndo ma “a inja sha ityesen man sha mkôôm man sha myange man sha myese u ken perapera kpaa.”—2 Timoteu 3:16.
“Iwanger i Gbenda Wam”
12. Mkaanem ma Aôndo ma iwanger i gbenda wase nena?
12 Pasalmi 119:105 shi kaa kpaa ér mkaanem ma Aôndo ma a fatyô u lun iwanger i gbenda wase, nahan ma a ta se iwanger sha gbenda u ú lu se ken hemen la. Se mba ken ime sha kwagh u kper ga, gadia Bibilo pase se inja i akaa a vihin tsung a a lu eren shin tar nyian ne man kwagh u una due ker kpaa. Sha kpôô yô, se fa er se lu ken “ayange a masejime” a tar u bo ne yô. (2 Timoteu 3:1-5) Er se fe kwagh u una va er ken hemen yô, mfe ne a̱ wase se u eren uma u dedoo hegen. Apostoli Peteru nger wener: “Er akaa cii á va sough kera nahan yô, doo u né lu ken icighanmlu man né lu civir Aôndo nana? Er ne keghen mve u iyange i Aôndo, man ne eren sha u i̱ va fefa yô.”—2 Peteru 3:11, 12.
13. Er shighe wase ne a lu shighe u eren kwagh torough torough yô, doo u kwagh ne una bende a mhen wase man uma wase nena?
13 Mhen wase man akaa a se eren la a̱ tese ér se na jighjigh taveraa ser, “tar . . . ngu karen kera kua isharen i u kpaa.” (1 Yohane 2:17) Aluer se mba kuran atindi a Bibilo a tesen se gbenda la yô, se tsuan akaa a se we ishima u eren ken hemen la sha kwaghfan. U tesen ikyav yô, Yesu kaa ér: “Vande keren nen tartor Na man perapera Na, man akaa ne cii á seer ne a ye.” (Mateu 6:33) Se wuese agumaior a a ne mkaanem ma Yesu man jighjigh, nahan á lu eren tom u pasen kwagh hanma shighe la kpishi je! Mbagenev na ayol a ve sha u za eren tom u Tartor ken ityar i kwagh a hembe gban sha mbayôôn angwe u Tartor la. Mbagenev je yô, yem a icombor ve cii.
14. Tsombor u Orkristu ugen seer eren tom u pasen kwagh nena?
14 Nenge ase kwagh u Orkristu ugen ken tar u Amerika vea kwase na man ônov vev uhar yange ve er ne. Yange ve mough ken tar ve ve yem ken tar u Dominican Republic ér vea za wase tiônnongo ugen ken gar ugen u lun a iorov 50,000. Tiônnongo ne ngu a mbapasenkwagh er 130 nahan. Kpa, sha iyange i Aipor 12, 2006 la, iorov 1,300 va mkombo u umbur ku u Kristu! Iyiav mbi ken sule mbi hen ijiir ne “via kuma u sundan,” nahan ken atô u iwer itian tseegh, anmgbian ne vea kwase na man wan na u nomso kua u kwase hen Bibilo a iorov 30. (Yohane 4:35) Anmgbian ne kaa ér: “Tiônnongo ne ngu a anmgbianev mba nomso man mba kasev 30 mba ve mough sha ajiir agen ve ve sha u va wasen tom yô. Anmgbianev mba ken tar u Amerika mba er 20 nahan, anmgbianev mbagenev mbara di ka mba ken tar u Bahamas man Canada man Italia man New Zealand kua Ishpania kpaa. Ve va hen ijiir ne a ishima i tseen ér vea pase kwagh, nahan kwagh ne na yô tom maa anmgbianev mba ken gar ne iyol kpen kpen.”
15. Ka averen a nyi nahan u zough a mi sha ci u ú vande keren Tartor ken akaa a u eren ciilii?
15 Nahan kpa, mbagenev vea fatyô u za wasen tom ken tar u tom u ngee ker ga. Kpa mba ve fetyô yô—shin mba vea fatyô u sôron mbamlu vev sha er vea za wase tom ne yô—vea zua a averen ken tom ne ngôgh. Man wea lu eren tom han han kpa, er Yehova tom a agee a ou cii sha er u zua a iember i or ka nana eren un tom ve nan zua a mi la yô. Aluer u vande keren Tartor yô, Yehova tôndo zwa wener, una “haa [u] iveren, je ia neer á haa inya.”—Malaki 3:10.
Zua a Iwasen sha u Dondon Hemen u Yehova
16. Aluer se de ser mkaanem ma Aôndo ma hemen se yô, kwagh ne una wase se nena?
16 Er se nenge nahan, mkaanem ma Yehova ma hemen se sha igbenda ihiar i i lu kwagh môm yô. Ma imenger i angahar a ase, gadia ma wasen se u zan sha gbenda u vough shi ma hemen se u tsuan akaa a dedoo. Shi ma iwanger i gbenda wase. Ka ma wanger gbenda wase nahan se fatyô u nengen kwagh u a lu se ken hemen yô. Kwagh ne ka a gema a wase se u dondon kwaghwan u Peteru ne, a kaa ér: “Nyôôso nen mfe wen, shi lu nen geng ge geng, ishimaverenkeghen yen i̱ lu sha mrumun u sha mhôôn u i lu van ne a mi sha m-ande u Yesu Kristu la vough.”—1 Peteru 1:13.
17. Bibilo i henen ia wase se u dondon hemen u Aôndo nena?
17 Se fa dedoo ser, Yehova ngu tesen se gbenda. Mpin u a gem a lu yô, ka un ne, Ú dondo gbenda u a lu tesen se ne kpa? Kange ishima wer ú ôron Bibilo hanma iyange, ka nahan man ú fa gbenda u Yehova a lu tesen se la ye. Gbidyen kwar sha akaa a ú ôron la, shi nôngo u kaven ishima i Yehova sha akaa ne shi hen sha igbenda kposo kposo i u fatyô u yaren tom sha mi ken uma wou yô. (1 Timoteu 4:15) Ú eren nahan cii yô, yar tom a “tahav mbu mhen” wou shighe u ú soo u tsuan kwagh u ú er yô.—Mbaromanu 12:1, NW.
18. Ka sea de ser Mkaanem ma Aôndo ma hemen se yô, ka averen a nyi ka se zua a mini?
18 Aluer se de ser akaawan a ken Mkaanem ma Aôndo ma wase se yô, aa na se mkav shi aa hemen se se tsua akaa a injaa a se er ken uma wase yô. Se na jighjigh ser mkaanem ma Yehova ma i nger ma inya la ka ma na “orlanenkwagh nan hingir orfankwagh.” (Pasalmi 19:7) Ka sea de Bibilo ia hemen se gbenda yô, se hingir u lun a imoshima i wang shi se zua a mkom sha ci u se mba eren ishima i Yehova. (1 Timoteu 1:18, 19) Aluer mkaanem ma Aôndo ma iwanger i angahar a ase ayange ayange yô, Yehova una na se injar i hemban cii, ka uma u tsôron je la.—Yohane 17:3.
Baver We Kpa?
• Er nan i doo u se de ser Yehova a hemen se gbenda?
• Mkaanem ma Aôndo ma a fatyô u lun imenger i angahar a ase nena?
• Mkaanem ma Aôndo ma a lu iwanger i gbenda wase nena?
• Aluer se mba henen Bibilo yô, ia wase se u dondon gbenda u Aôndo a lu tesen se la nena?
[Study Questions]
[Picture on page 17]
Ka hanma shighe nahan a fatyô u kaan ér se mba lun imôngo a or u nan jighjigh ga sha gbenda u vough ga?
[Picture on page 18]
Ka mba yange ve eren ishima i Yehova la Yesu luun a ve hanma shighe ye
[Pictures on page 19]
Akaa a se eren la tese ér se mba vanden keren Tartor kpa?