Kwagh u A Hembe Doon A u Pasen Mlu U Kwavaôndo Yô

HANMA ikyurior yô, nôngo u lun a injakwagh sha kwagh u mlu u kwavaôndo. Ka anzaakaa shon agen je ne: Kwavaôndo ka ua nyian aikighe, i doo or tsoo; ka a nyian sha pepe, or tsoo gbe duen ga. Mbapasen mlu u kwavaôndo mba ainge pase er i hii ve kwavaôndo ka u nyian sha mi er injakwagh i i ter sha heen ne i kaa nahan.

Ior mba sha ayange a Yesu la kpa fa u pasen mlu u kwavaôndo. Ngise Yesu kaa a Mbayuda mbagenev ér: “Iyange ka ia bee yô, ne kaa ner: Ura ua nôô, gadia nyian sha. A lu pepe yô, ne kaan ner: Nyian Aôndo kohol ura gadia nyian sha man abeen due. Ne mba kaven akaa a sha kwavaôndo, kpa . . . “ Kpa nyi? Yesu za hemen ôr kwagh u kpilighyol, wener: ‘Ne mba fetyô u kaven uivande mba ve tesen mlu u ashighe ga.’—Mateu 16:2, 3.

“Mlu u ashighe” ne kanyi? Ka akav a yange tese wang ér Yesu ka Mesiya u mimi u Aôndo tindi un la. Akaa a Yesu lu eren la lu kwagh u hanma or a fatyô u nengen a mi er kwavaôndo u nyian nahan yô. Nahan kpa, Mbayuda kpishi venda u kaven akav a yange tese ér Mesiya ngu a ve la—man mve u Mesiya ne lu kwagh u yange hemba lun a inja a u kaven akaa a sha kwavaôndo yô.

Nyian ne kpa, ikyav igen ngi i i̱ hembe lun a inja, i í doo u se fa i aa u fan er kwavaôndo u lu sha mi yô. Yesu yange tsengaôron ér a tim tar u bo ne kera sha er tar u he ua va yô. A pase akaa a aa er sha u wasen se u fan shighe u mtim ne una mgbôghom yô. Akaa shon agen yô, ka ityav mbi i lu nôngon sha tar ajiir kposo kposo kua ijen i i ker yum ne. Yesu yange kaa ér se nengen a akaa ne yô, se fa ser shighe u Aôndo una tim bo tar ne zulum ve.—Mateu 24:3-21.

U ngu nengen a “mlu u ashighe” ne je kpa?