Er I Hii Ve Ican I Yan Cii I Sôôn Been Yô
Er I Hii Ve Ican I Yan Cii I Sôôn Been Yô
“Ka vande, tom Na ngu vough”—DUTERONOMI 32:4.
1, 2. (a) Hii nan ve ishimaverenkeghen i va lun uma gbem sha won la i doo yumu? (b) Ka nyi i lu yangen mbagenev u nan Aôndo u a er uityendezwa mba dedoo la jighjigh?
KA DOON we u henen er uma una lu ken Paradiso kpa? Alaghga u nenge a iyol you ken Paradiso u ngu timen sha akaauma atô kposo kposo. Gayô u ngu henen sha mkom u ú zua a mi shighe u ú lu eren tom u geman tar hingir ijiir i doonashe vea mbagenev imôngo la. Shin u ngu henen sha akaa a u soo u fan u eren, er eev shin kwaghmaan shin kwaghkuhwan shin akaa agen a u zough a ian i henen a ken tar u ainge ne ga la. Er i lu cii kpa, a doo ú u zuan a uma u Bibilo i yer ér “uma u a lu uma jim la”—ka uma u Yehova yange wa ishima sha hiihii ér se lu a mi la, ka u lun uma gbem sha won je la.—1 Timoteu 6:19.
2 Saan se iyol shi ka se kwagh u civirigh kpishi u ôron mbagenev ishimaverenkeghen i Bibilo i ne se la, shin ka nahan ga? Nahan kpa mbagenev venda ishimaverenkeghen la. Ka ve kaa ér imba ishimaverenkeghen la ka kwagh u ken mhen tseegh, ér ka mnyamciem ma ior ve lumun a mi a mfe shio yô. Shi alaghga a taver ve u nan Aôndo u a tende zwa ér una na ior uma u tsôron ken Paradiso la kpa jighjigh. Sha ci u nyi? Kwagh u a ze mbagenev iyol yô ka ifer i i̱ dumbur ne. Taver ve kpishi u nan uityendezwa mba Aôndo jighjigh, sha ci u ve hen ér Aôndo u dooshima ngu ga; una lu yô, ma a de ér ior ve ya ican shi ifer kpa i dumbur nahan ga. Ka ve kaa ér, ma Aôndo u una de ér ifer i za hemen je kpa ngu ga, aluer ngu yô, a hemba sha won cii ga, gayô a wa kwagh wase ikyo ga. Mbagenev yô imba mhen ne kuma ve gbing. Sha mimi yô, Satan pir uumace ashe a asema.—2 Mbakorinte 4:4.
3. Ka mpin u taver u nyi se wase ior vea zua a mlumun sha mini, man hii nan ve se lu sha ian i injaa i wasen ve?
3 Er se lu Mbashiada mba Yehova yô, se mba sha ian i wasen ior mba Satan man kwaghfan u taregh a lu tsughun ve la. (1 Mbakorinte 1:20; 3:19) Se fa er i hii ve ior kpishi ve ne uityendezwa mba ken Bibilo jighjigh ga yô. Ka sha ci u ve fa Yehova ga. Alaghga ve fa iti na ga shin ve fa inja i iti shon ga, shin ve fa kwagh u aeren a na a dedoo la cuku tseegh gayô ve fa a fa ga kuaa shin ve fa er a kur uityendezwa nav nahan kpaa ga. Kpa se yô, se fa akaa ne cii. Doo u hanma shighe yô se timen sha igbenda i se kar ve se wase ior mba ‘mfe ve a we ime’ la, sha er vea zua a mlumun sha mpin u a taver uumace, ve zer pinen gbem ne. Mpin shon ér: “Hii nan ve Aôndo a de ifer man ican i yan i lu zan hemenee?” (Mbaefese 4:18) Se hii timen sha gbenda u se hemba tan iwanger sha mpin ne sha inja yô. Se been yô se mase nengen er gbenda u Yehova a tsough u sôron iferkwagh la u ne aeren na a dugh ken igbar yô.
Gbenda u Injaa u Nan Mlumun sha Mpin Ne
4, 5. Shighe u or pin se ér hii nan ve Aôndo a ne ican i yan ian yô, ka nyi i doo u se vande erenee?
4 Shighe u or nan pin se er i hii ve Aôndo a ne ican i yan ian yô se kaa a nan ser nyi? Alaghga a maa se iyol u pasen nan vighe vighe er yange zayol ne hii ken sule u Eden yô. Ashighe agen yô, aluer se er nahala kpa a vihi ga. Nahan kpa doo u se wa ikyo. Hemba doon u se wa imaagh ki kwaghôron wase la cii ve se za hemen ye. (Anzaakaa 25:11; Mbakolose 4:6) De se nenge sha akaa atar a se fatyô u ôron or cii ve se mase nan nan mlumun sha mpin ne vighe vighe yô.
5 Hiihii yô, aluer mngee u ifer i ngee shin tar yum ne za or iyol tsung yô, alaghga tsô ifer bende a nan iyol i nan shin ma or u nan u ishima ishima. Nahan a hemba doon u tesen ser mhôônom kôr se a nan sha mimi cii ve se mase zan hemen ye. Apostoli Paulu ngise wa Mbakristu kwagh ér: “Vaa nen a mba ve vaa imôngo.” (Mbaromanu 12:15) Aluer mhôônom kôr se a nan shin se mba “mbazungwenmhôônom” yô, alaghga se hemba benden a ishima nan. (1 Peteru 3:8) Aluer nan kav ér kwagh u nan gba se ishima yô, nana hemba keghen ato a vese cii.
6, 7. Hii nan ve i doo u se wuese or u nan pin mpin a ishima i môm sha kwagh u a lu zan nan iyol laa?
6 Kwagh u sha uhar yô, doo u se sugh or shon sha mpin u nan la. Mbagenev ka ve hen ér er ve pin imba mpin la yô tese ér ve ban a jighjigh shi mba ne Aôndo icivir ga. Alaghga je yô orhemen u ma kwaghaôndo kaa a nan nahan. Kpa, u or pinen amba a mpin la tseegh tese ér nan ban a jighjigh u nan ga. Mbajighjigh mba i er kwagh ve ken Bibilo je kpa yange ve pine amba a mpin ne. Ikyav i tesen yô, orngeren pasalmi Davidi ngise pine ér: “TERE, ka nyi U til ca; ka nyi U yer iyol sha ayange a mzeyolo?” (Pasalmi 10:1) Kape profeti Habaku kpa ngise pine je la, ér: “TERE, ka nan je m yila, man We U kera ongom ga? M genger imo her a We mer: Ipila; kpa U rumun u yiman ga. Ka sha ci u nyi U erem m nengen a iferkwagh man m kenger icana? Gadia mtim man ipila mbam sha ishi; numsuwen ngu, man ahendan gema mough.”—Habaku 1:2, 3.
7 Ior mban cii lu mbajighjigh mba ve cian Aôndo a ishima i môm yô. Yange Aôndo zôhô a ve sha ci u ve pine mbampin sha akaa a zan ve iyol yumu? Mayange ga cii, kpa Yehova gema na i nger mbampin vev mbara ken Mkaanem nam. Nyian kpa, alaghga tsô ka ijen i ken jijingi je i lu kôron or u i taver nan er i hii ve ifer i ngee yum la ye. Nahan sar nan u zuan a mbamlumun mba i lu Bibilo tseegh ia fatyô u nan sha mbampin mba nan la. Fa wer, Yesu yange ôr kwagh u dedoo sha ior mba ijen i lu kôron ve ken jijingi shin ve lu “mbaibanave ken jijingi” la. (Mateu 5:3) Ka se kwagh u civirigh kpishi u wasen amba la sha er vea zua a msaanyol u Yesu a tende zwa a mi la!
8. Ka atesen a tsumen a nyi a ne ior ve henen ér ka Aôndo a ne ior ve lu yan icana, kpa se wase ve nena?
8 Kwagh u sha utar yô, doo u se wase or la nana fa ér ka Aôndo a ne ve aferakaa a ngee shin tar yum nahan ga. I tese ior kpishi ér ka Aôndo a hemen tar ne ye, shi yange tsengaveren hanma kwagh u a lu tseren se cii. Shi i tese ve ér Aôndo ngu a atôakyaa a a ne ve se lu yan ican, aa or môm nana fatyô u pasen ga yô. Kpa atesen ne cii ka a aiegh. Atesen ne laha Aôndo shi a na yô ka inja er ka un a ne ve aferakaa man ican i yan i ngee shin tar nahan. Nahan a gba u se yar tom a Mkaanem ma Aôndo sha u kôôm atesen a bo ne. (2 Timoteu 3:16) Ka Yehova a lu hemen tar u ifer ne ga, ka Satan Diabolo a lu hemen u ye. (1 Yohane 5:19) Yehova tsengaveren kwagh u una er akaa a á gbe a, á ne a kwaghfan la ga, gadia a na hanma ve ian i tsuan u eren kwagh u dedoo shin u bo gayô u tsuan u eren kwagh u vough shin u vough ga. (Duteronomi 30:19) Yehova eren iferkwagh mayange ga, iferkwagh vihi un ishima tsung; man mhôônom ma ker un a mba ve lu yan ican la kpaa.—Yobu 34:10; Anzaakaa 6:16-19; 1 Peteru 5:7.
9. Ka ityakerada i nyi “wanakiriki u jighjigh man u fan kwagh” a gber sha u wasen ior ve fa er i hii ve Yehova Aôndo a ne ican i yan iana?
9 Aluer u vande eren akaa a atar ne yô, alaghga or u ú lu lamen a nan la nana kegh ato shi nana soo u fan er i hii ve Aôndo a de ican i yan i lu zan hemen yô. “Wanakiriki u jighjigh man u fan kwagh” gber ityakerada kpishi i ia wase ú u eren kwagh ne yô. (Mateu 24:45-47) U tesen ikyav yô, yange i due a trak ugen sha Mkohol u Vesen u “Ungwan Imo i Aôndo,” u i er ken inyom i 2005 zan zan 2006 la, trak la ngu a itinekwagh ér Ican I Yan Cii Sôôn Been! Aluer i gema trak ne ken zwa wou yô, ôr un fa kwagh u i nger ker la tsembelee. Shi i ôr kwagh u mpin u injaa ne ken ityough ki gen ki takerada u Bibilo Tese Ér Nyi Jimi? la, man takerada ne ngu ken ijô 157 hegen. Yar tom a ityakerada ne tsema tsema. Ityakerada ne ta iwanger sha kwagh u Bibilo i er sha kwagh u ikyaa i mtemtor i yange i hii ken Eden la, man er i hii ve Yehova er kwagh u a er la sha u sôron ikyaa shon yô. Shi fa kpaa wer, er u lu ôron or kwagh ne yô, ka kwaghfan u hemban cii je u lu tesen nan ye. Ka mfe u fan Yehova man aeren a na a doon tsung je la.
Hemba Veren Ishima sha Aeren a Yehova
10. Hii nan ve i taver mbagenev er i hii ve Aôndo a de ior ve lu yan icanaa, kpa ka mfe u nyi una wase ve?
10 Er u lu wasen ior wer ve fa er i hii ve Yehova a de ér uumace ve hemen ayol a ve ken tar u u lu sha ikyev i Satan ne yô, tese ve aeren a Yehova a dedoo la kpa ve fa. Ior kpishi fa ér Aôndo ngu a agee, gadia mba ongo er ior ve yer un ér Aôndo Uhembanagee yô. Nahan alaghga a taver ve er i hii ve a kera yar tom a tahav nav mbura sha u been a ifer man ican i yan ga yô. A̱ shi nan kpa ambaaior la fa aeren a Yehova agen ga. Aeren shon yô ka, mlu u wang man ijirôron i sha mimi man kwaghfan kua dooshima. Yehova tesen aeren ne sha gbenda u vough. Ka nahan ve Bibilo i kaa ér: “Tom Na ngu vough” ye. (Duteronomi 32:4) Kpa, u pase ior aeren ne shighe u ú lu nan ve mlumun sha mbampin mba ve pin sha kwagh u ifer man ican i yan la nena? De se time sha igbenda kpuaa i ú er kwagh ne yô.
11, 12. (a) Hii nan ve isholibo i Adam man Ifa er la yange i lu i a de ve a mi ga? (b) Hii nan ve Yehova una de ér isholibo i za hemen gbem sha won ga?
11 Yehova yange ma gba den Adam man Ifa isholibo ve tsô gaa? Kwaghbo u ve er la lu u a gba den ve tsô ga. Er Adam man Ifa lu ior mba vough yô, yange ve venda hemen u Yehova sha apera, ve gema ve lumun hemen u Satan. Ka nahan ve mbahembanato mban gema ishima zungwe sha isholibo i ve er la cuku tsô kpaa ga ye. Nahan yô, ior ka vea pinen er i hii ve Yehova yange gba den ve kwaghbo la tsô ga yô, ve lu pinen ér, hii nan ve Yehova yange hide a atindi na la ijime, de ér isholibo man ihyembeato i za hemen ga? Mlumun u sha mpin ne gba zua sha mlu u Yehova iyol na, ka icighanmlu na je la.—Ekesodu 28:36; 39:30.
12 I ôr kwagh u icighanmlu u Yehova ken Bibilo acin imôngo. Kpa, kwagh er vihi yô, ka asande a ior ken tar u bo ne kpuaa tseegh a fe kwagh u ieren ne ye. Yehova ngu tsembelee shi ngu wang shi ngu paleghaa a hanma isholibo cii. (Yesaia 6:3; 59:2) Sha kwagh u isholibo yô, Yehova sôr gbenda ver u a fatyô u wamen un, nahan una ese i kera, mayange una de ér i za hemen gbem sha won ga. Luun er Yehova una soo ér isholibo i za hemen gbem sha won yô, ma se lu a ishimaverenkeghen sha kwagh u ken hemen ga. (Anzaakaa 14:12) A kuman shighe u Yehova a ver la yô, una hide a akaa a á gbe la cica cii aa hide a hingir wang. Kwagh ne una kure sha mi vough, gadia ka kwagh u Un u a lu Icighan la a soo u eren je ne.
13, 14. Hii nan ve Yehova yange tim mbahembanato mbara ken Eden kera ga?
13 Yehova yange ma tim mbahembanato mbara ken Eden kera ma hide ma gba ior mba hev gaa? Sha kpôô yô, ngu a tahav mbu yange ma er nahan yô; ica a gba ga tsô una yar tom a tahav mbula una tim mbaaferev cica cii. Alaghga a taver mbagenev vea pine ér: ‘Tsô er nan ve yange tim mbaaferev shighe u ve lu iorov utar tseegh la ga? Luun er yange una tim ve kera sha shighe la yô, ma yange msamber u isholibo man ican i yan i i samber sha tar nyian ne ga he?’ Hii nan ve Yehova yange er kwagh nahala ga? I kaa a vese ken Duteronomi 32:4 ér: “Igbenda Na cii, ngi jighilii.” Yehova ka imbor i ijirôron i sha mimi. Jighilii yô, “kwagh u mimi doon TER ishima.” (Pasalmi 37:28) Kwagh u mimi doo Yehova ishima, ka nahan ve yange tim mbahembanato mbara ken Eden kera ga ye. Sha ci u nyi?
14 Ihyembeato i Satan la due a mpin sha ian i Aôndo a lu a mi i hemen la. Er Yehova a lu imbor i ijirôron i sha mimi yô, gba u una na mlumun sha mpin u Satan due a mi la vough. Er mbahembanato mbara kuma u Yehova una tim ve kera nahan kpa, luun er yange una tim ve ave ave yô, ma na mlumun u vough sha mpin u Satan due a mi la ga. Yehova yange una tim ve kera yô ma seer tesen mhembe u tahav nav, kpa ka tahav mbu Yehova Satan gba anyiman sha mi ga. Heela tseegh ga, Yehova yange vande pasen Adam man Ifa awashima na kera. Lu u vea mar ônov kpishi vea seer ngeen shi vea iv tar, vea gema u ua lu sha ikyev ve, shi lu u vea gema akaa a i gbe a sha tar cii aa lu sha ikyev ve. (Genese 1:28) Yehova yange una tim Adam man Ifa kera yô, awashima na u pase sha kwagh u tsombor u uumace wang la ma hingir gbilinkwagh. Er Yehova a lu imbor i ijirôron i sha mimi yô, mayange una de ér awashima na a bunde ga, gadia kur mbaawashima nav hanma shighe cii.—Yesaia 55:10, 11.
15, 16. Aluer ior mba ôron igbenda i ma ve “ser” ihyembeato i ken Eden la yô, se wase ve nena?
15 Ma or ngu u ma nan hembe sôron ihyembeato ne sha kwaghfan a Yehova? Alaghga mbagenev vea ôr er á lu ve Yehova ve, yange ma ve “sôr” ihyembeato i ken Eden la yô. Kpa, u eren nahan la ka u tesen ér ve hen ér ve hemba mban a gbenda u injaa u sôron zayol la ga zee? Alaghga awashima ve una lu u bo ga ase je, kpa gema tese ér ve fa Yehova man kwaghfan na u kpilighyol la ga. Shighe u apostoli Paulu lu ngeren Mbakristu mba ken gar u Roma washika la, a ôr kwagh u kwaghfan u Aôndo la vighe vighe, kua “kwaghmyer” u Yehova u a we ishima u yiman uumace mba jighjigh shi tseghan Icighanti Na sha ikyev i Tartor u Mesiya la. Paulu yange nenge kwaghfan u Aôndo u á we ishima u eren kwagh nahan ne nena? Yange mase kuren washika na la sha mkaanem man, ér: “Aôndo u A lu a kwaghfan Un tswen ne, iengem i̱ lu i Na ken Yesu Kristu gbem sha won. Amen.”—Mbaromanu 11:25; 16:25-27.
16 Paulu yange fa er Yehova a lu a “kwaghfan Un tswen” yô, ka un a hembe kwaghfan sha won cii ye. Nahan ka hanma orumace u yinan je nana fatyô u henen gbenda u injaa u sôron ma zayol sha wono, man hide ahon a yange Satan gba sha kwagh u ian i Aôndo a lu a mi i hemen la ve nana fatyô u sôron yee? Sha nahan yô, doo u se wase ior ve na Aôndo u a lu a “kwaghfan ken ishima” la icivir, er se kpa se lu eren nahan. (Yobu 9:4) Aluer se kav kwaghfan u Yehova tsembelee yô, se hemba nan jighjigh a ishima i môm ser gbenda u a ser mbamzeyol la ka u hemban doon cii.—Anzaakaa 3:5, 6.
Fa Kwagh u Ieren i Yehova i Vesen La
17. Aluer mba ishima i ze ve iyol er i hii ve Aôndo a ne ican i yan ian la seer fan kwagh u dooshima u Yehova yô, kwagh la una wase ve nena?
17 “Aôndo ka dooshima.” (1 Yohane 4:8) Mkaanem ma kôron ken ishima ma ken Bibilo man tese se ieren i Yehova i vesen ne. Ken aeren a na cii ka ieren na i i hembe doon je ne, shi ka i i hembe surun mba ishima i ze ve iyol sha mngee u ifer i ngee yum la asema ye. Yehova tese dooshima na sha hanma gbenda u a ser kwagh u isholibo i̱ er a uumace la cii. Ka dooshima yange mgbegha Yehova na ônov mba Adam man Ifa mba asorabo mban ishimaverenkeghen ye. (Genese 3:15) Aôndo yange na ve ian i kporom hen a Na ken msen shi na sha er vea fatyô u yan ikyar i dedoo a Na yô. Lu dooshima mgbegha Aôndo ve tindi wan na va paa se sha er Una de se asorabo gbekeke shi se kuma u hiden lun uma gbem sha won ken mlu u vough ye. (Yohane 3:16) Shi ka dooshima kpa a ne ve a lu wan ishima a uumace sha er ior kpishi vea zua a ian i vendan hemen u Satan geman tsuan hemen u Yehova ye.—2 Peteru 3:9.
18. Saan se iyol u fan nyi, man ka nyi se lu timen sha mi ken kwaghngeren u a dondo nee?
18 Pastô ugen yange lu lamen a ikpelaior i i̱ kohol sha u umbur num u mbaeren tswam ta sha gar ugen yô, a kaa ér: “Se fa er i hii ve Aôndo a de aferakaa man ican i yan i lu zan hemen nahan ga.” Vihi kpishi er mbahemen kwaghaôndo je kpa ve fe ityôkyaa ne ga nahan! Kpa se yô se fa ityôkyaa, nahan doo se ga he? (Duteronomi 29:29) Shi se fa ser, er Yehova a lu a kwaghfan shi a eren kwagh sha mimi man sha dooshima yô, ica a gba ga tsô una kar a ican i yan cii kera. Jighilii yô, a tôndo zwa u eren nahan. (Mpase 21:3, 4) Kpa, ma ishimaverenkeghen ngi sha ci u mba ve kpe ken uderimbaanyomov mba ve kar imôngo ne je he? Shin gbenda u Yehova a tsough u sôron zayol u yange hii ken Eden la ngu a ishimaverenkeghen sha ci ve ga? Ngu a mi. Dooshima mgbegha un nahan a tôndo zwa u va nderen ve. Ka kwagh u se lu timen sha mi ken kwaghngeren u a dondo ne je la.
Ú Na Mlumun Wer Nyi?
• Aluer or pine se er i hii ve Aôndo a ne ican i yan ian yô, se kaa a nan ser nyi?
• Gbenda u Yehova tsua u sôron ihyembeato i ken Eden la tese icighanmlu na man ieren na i ôron ijir sha mimi la nena?
• Hii nan ve i doo u se wase ior ve seer fan dooshima u Yehova?
[Study Questions]
[Picture on page 11]
Ker ian i wasen mba ishima i ze ve iyol sha kwagh u ican i yan i i lu shin tar la
[Pictures on page 13]
Orjighjigh Davidi man Habaku cii yange ve pine Aôndo mbampin sha akaa a zan ve iyol