Ifer Gande Ave Shinii?

Wanye u kpuaa nenge a kwagh hen inya, a shir fele a tôô, maa kwagh shon bughur pir un ashe shi vihin un iyol caveraa. Kwase mar wan za gema gbihi hen ijiir i haan ihyôghonov yem kwagh na. Orgen u i de un tom yô, hide va hen ijiir tom na la va ta hanma or u nenge a mi cii wua, been yô a wua iyol na. Orcivirigh ugen kighir mbayev mba kiriki yav a ve.

KWAGH er vihi yô, aferakaa angan nahan ngee sha shighe wase ne. Man u hemban vihin cii yô, akaabo a a hembe cieryol a aferakaa a i ter sha heen ne nga zan hemen; akaabo er mtim u ikyurior man tswam u eren nahan. Ngeren ugen u yange i gber ken inyom i 1995 yô, kaa ér: “Derianyom u sha 20 ne ka u Satan. Er i gbe je ior mba a lu a mfe man isharen i wuan mbagenev sha ci u zwa ve shin kwaghaôndo ve shin nongo ve er shighe ne nahan ga.”

Heela tseegh ga, uumace mba vihin ahumbe man tar shi mba wuan ikyon kpa been. Shi ve wua inyam igen je ve nôngo u timin a tim i kuaa. Uumace vea fatyô u hemban aferakaa angan cica cii, nahan geman tar hingir ijiir i dedoo i ior vea tema ker kundu kundu kpa? Shin u nôngon ér a sôr mbamzeyol mban ka tom agogo-o? Ikpurorfantakerada ugen u a nger akaa kpishi sha kwagh u ifer yô, kaa ér: “Sarem tsung u ma m ser tar ma u wa lun guda, kpa m ngu nengen a mkposo ga.” Alaghga we kpa kape i lu u je la.

A fatyô u tôôn mlu u tar ne karen sha tso u a lu yemen shin mngerem ma yuhwa i lu shimi kpishi yô, man hanma iyange yô, yuhwa shon ngi hemban taver a taver cii. Shin er or môm shin tso la nan soo ér a̱ yem ken atô u yuhwa la ga nahan kpa, iniôngon ve cii wase ga. Gadia tso la tile ga, a yem zan zan a za nyôr ken atô u yuhwa shon.

Myen u uumace ve yen ne kpa seer sha akaa a a ne ve mlu u tar ne a lu vihin seer a seer yô. (Mbaromanu 3:23) Nahan kpa ifer samber wuee shi gbenda u i̱ lu seer a seer la gande u a kaa ér ka uumace tseegh ve lu eren i ye. Ma iferor u ageegh u i nengen a nan ga ngu tuur uumace ken ijime ér ve eren aferakaa? Aluer kwagh ngu nahan yô, ka an laa, man se kura ayol a ase nena? Ngeren u a dondo ne una na mlumun sha mbampin mban.

[Picture Credit Line on page 3]

© Heldur Netocny/Panos Pictures