Doo Yehova Er U Ongo Un Yô
Doo Yehova Er U Ongo Un Yô
“Wan wam, lu orfankwagh, na i saan mo iyol.”—ANZAAKAA 27:11.
1. Ka ieren i nyi i samber sha tar nyiana?
IHYEMBEATO man ieren i or lun sha tseeneke u nan la samber sha tar cii nyian. Apostoli Paulu pase ken washika u yange nger Mbakristu mba ken Efese la er i hii ve kwagh a lu nahan yô. A kaa ér: “Ne vande zenden sha mi sha inja i mlu u tar u ainge ne, sha inja i tor u tahav mbu humbev, ka jijingi u a lu eren tom hegen ken ônov mba ihyembeato” je la. (Mbaefese 2:1, 2) Sha kpôô yô, alaghga u kaa wer, Satan u a lu “tor u tahav mbu humbev” la samber a ieren i ihyembeato la sha tar cii. Satan yange samber a ieren i ihyembeato ne sha derianyom u hiihii la. Man hii shighe u i gbihi un shin tar zum u i nôngo Ityav mbi Tar Cii Mbi sha Môm la je ngu hemban samber a samber a ieren i ihyembeato ne cii.—Mpase 12:9.
2, 3. Ka atôakaa a nyi a ne ve i gbe u se ungwan imo i Yehova?
2 Kpa er se lu Mbakristu yô, se fa ser gba u se ungwan imo i Yehova Aôndo a ishima i môm sha ci u a gba se shi kor se shi ngu Tor u Hembancii u lun a dooshima shi ngu Oryiman wase kpaa. (Pasalmi 148:5, 6; Aerenakaa 4:24; Mbakolose 1:13; Mpase 4:11) Mbaiserael mba sha ayange a Mose la yange ve fa ér ka Yehova a ne ve uma shi a yem ve kpaa ye. Nahan Mose kaa a ve ér: “Nahan yô, ver nen ishima u eren sha mi er TER, Aôndo wen, A kaa ne” nahan. (Duteronomi 5:32) Sha mimi yô, yange gba u Mbaiserael vea ungwan imo i Yehova. Nahan kpa í ôr ve akaa ne cii zwa lu a uma ga je tsô maa ve hingir u hemban Aôndo ve ato.
3 Ka a inja u ungwan imo i un u a gbe sha man tar la nena? Sha shighe ugen la, Aôndo tindi profeti Samuel ér a̱ za kaa Tor Saulu ér: “Ikyo i wan hemba nagh ku sôngon.” (1 Samuel 15:22, 23) Er nan ve i lu nahana?
Er Ikyo i Wan i Hembe “Nagh Ku Sôngon” Yô
4. Se na Yehova kwagh nena?
4 Ka Yehova a lu Orgban se ye, nahan hanma kwagh u se lu a mi cii ka hen a na a dugh ye. Nahan se mba a ma kwagh u se na unu? Een, se fatyô u nan un kwagh u injaa. Kwagh shon yô, kanyi? Se zua a mlumun sha mpin ne ken kwaghwan ne. Á kaa ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.” (Anzaakaa 27:11) Kwagh u se na Aôndo yô ka u ungwan imo na. Se cii mbamlu asev mba kposo kposo, shi se due sha ajiir kpa kposo kposo, nahan kpa aluer se mba ungwan imo i Aôndo yô hanma wase nana fatyô u eren kwagh u vough sha u tesen ér kwagh u Satan Diabolo kaa ér uumace vea kan shio u civir Aôndo shighe u ve tagher a ican la ka mimi ga. Nenge imba icivir i i ne se ne sha wono!
5. Or ka nana̱ hemba Un u a gbe se la ato yô, i lu un ken ishima nena? Tese ikyav.
5 Kwagh gba Aôndo sha akaa a se tsough u eren la. Ka sea hemba Aôndo ato yô kwagh la ka a bende a na. Nena? Or ka nana er kwagh u sha mi ga yô i vihi un. (Pasalmi 78:40, 41) Tôô wer i tese or u nan lu a angev mbu shogaa akaa a nana yaan ve a kpe nan iyol yô, kpa kwagh gba nan sha akaayan la ga, nan yem yan akaa a aa wase nan ga yô. Imba kwagh ne nahan u hen wer a lu ortwer u nan la ken ishima nena? Se fa ser uumace ka vea hemba Aôndo ato yô i vihi un, gadia a fa mbamzeyol mba or ka nana per atindi a na ve nan zua a mi yô.
6. Kanyi ia wase se ve se ungwan imo i Aôndo?
6 Kanyi ia wase hanma wase u ungwan imo i Aôndo? Doo u hanma wase nana sôn Aôndo “ishima i fan kwagh” er Tor Solomon ngise sôn nahan. Yange sôn ishima i fan kwagh sha er “una paven perapera a ifer” shi una ôron Mbaiserael mba ve lu ahuraior a na la ijir yô. (1 Utor 3:9) Aluer se soo ser se fa kwagh u a lu u perapera man u ifer ken tar u ihyembeato i mgbough ker ne yô, gba u se lu a “ishima i fan kwagh.” Aôndo na se Mkaanem nam man ityakerada i i pase Bibilo man mbamkombo mba Mbakristu kua mbatamen mba ken tiônnongo mba lun a dooshima sha er vea wase se se lu a “ishima i fan kwagh” yô. Se mba eren tom a akaa a Aôndo a ne se ne doo doo kpa?
7. Er nan ve Yehova a hembe ôron kwagh u wan atindi a na ikyo var var a iniav mbi nana?
7 Umbur wer Yehova ngise pase ior nav mba sha ashighe a tsuaa la ér u wan atindi a na ikyo hemba doon a u kôron ilev nan iniav a mi. (Anzaakaa 21:3, 27; Hosea 6:6; Mateu 12:7) Er nan ve kwagh lu nahana, gadia lu Yehova iyolna wa ior nav tindi ér ve naan iniav ga zee? Kpa awashima u or u nan nagh la jim ka nyi? Ka u nan nagh ér i saan Aôndo iyolo? Shin ka u nan ér ka kwagh u hanma or nan lu eren shinii?Aluer mimi je sar or u civir Aôndo u eren ishima na yô nana̱ ver ishima u eren sha hanma tindi na cii. Kwagh gba Aôndo sha nagh ku uile ga, kpa kwagh u injaa u se na un yô, ka u wan atindi a na ikyo.
Ikyav i Tan Se Icin
8. Er nan ve Aôndo venda ér Saulu a de kera lu tor ga?
8 Kwagh u i er ken Bibilo sha kwagh u Tor Saulu la pase se er i lu hange hange u wan atindi a Aôndo ikyo yô. Shighe u Saulu hii u hemen la, lu or u hiden a iyol ijime man or u kwagh kuman un shi ‘nengen iyol na kpeghee’ kpaa. Kpa shighe karen yô iyolgengese man mbamhen mbabov gba yan tor ken a na. (1 Samuel 10:21, 22; 15:17) Sha shighe ugen la gba u Saulu una nôngo ityav a Mbafiliti. Nahan Samuel kaa a na ér a kegh un una va na Yehova iniav shi una seer ôron un akaa a i gbe u una er yô. Kpa Samuel kera va fele ga, nahan ior hii u samben. Saulu nengen nahan maa gba mi nan “nagh ku nanden” je. Kwagh ne doo Yehova ga cii. Samuel za ve yô, tor gba keren ishô sha ihyembeato na la, kaan ér ka er Samuel a ve fele ga ve un “cimin ishima” un ne nagh ér i doo Yehova a na ye. Tor Saulu yange nenge ér hemba doon u una na nagh iyolna a u dondon kwaghwan u i kaa a na ér a kegh Samuel a va na nagh la. Tsô Samuel kaa a na ér: “U er ibumekwagh; u wa kwagh u TER, Aôndo wou, A kaa u la ikyo ga.” Ihyembeato yange i̱ na yô, i hungwa Saulu ikyônough.—1 Samuel 10:8; 13:5-13.
9. Saulu yange tese ér ka ikye na u hemban Aôndo ato nena?
9 Kwagh ne yange tese tor kwaghfan kpa? Mayange ga cii. Shighe kar yô Yehova wa Saulu tindi ér a tim ikyurior i Amaleki, i̱ sha shighe ugen la i̱ ta num sha Iserael a ityôkyaa shio la. Shi i kaa a Saulu ér a de waren ma zendenya môm kpaa ga. Saulu ungwa Yehova, “hemba Mbaamaleki, hii hen Havila vegher u zan sha Shur” la. Shighe u Samuel va u va kohol tor la, saan tor iyol tsung er un hembe ityav yô tsô a kaa a Samuel ér: “TER A̱ ver u doo doo, m er sha imo i TER ve.” Nahan kpa Saulu kua ior mba ve lu a na la er akaa a i kaa a ve wang ér ve er la ga, Saulu man ior nav war Tor Agagu “man iyôngo i hemban doon man ibua man ilev mbi kehen man aniyôngov kua akaa a doon cii, ve tim a ga.” Tor Saulu gba keren ishô sha ihyembeato na ne, a kaa ér: “Ior tsegha iyôngo kua ibua i hemban doon sha u nan TER, Aôndo wou, nagh a mi.”—1 Samuel 15:1-15.
10. Ka kwaghfan u nyi Saulu yange hen ga?
10 Tsô Samuel gema kaa a Saulu ér: “Iniav mbi nanden kua mbi sôngon, doo TER ishima er ikyo i wan sha imo i TER nahan kpa? Yô, nenge, ikyo i wan hemba nagh ku sôngon, man u veren ato kpaa hemba ahôm a anomaiyôngo.” (1 Samuel 15:22) Er Yehova yange kaa ér i̱ tim ilev mbira yô, doo u a na un iniav a mbi kpaa ga.
Ungwan Imo i Aôndo sha Akaa Cii
11, 12. (a) Yehova nengen iniôngon yase i civir un la nena? (b) Or nana tsugh iyol i nan, nana henen ér nan ngu eren ishima i Aôndo, kpa nana gema nana hembanato nena?
11 Yehova ka una nenge a tôvon mbatomov nav mba jighjigh a ican kpa vea civir un her shi kwagh a gba ior sha loho u Tartor u ve pasen la ga kpa vea za hemen u pasen u shi uma una taver ve kpa vea zaan mbamkombo mba Mbakristu nahan, i doo un kpen kpen. Ka sea ungwan imo na sea civir un sha igbenda i injaa ingin nahan, i saan un iyol. Ka sea nôngon kpoghuloo sea civir Yehova ser a doo se ishima yô, i doo un je i zua ga. Alaghga kwagh a gba uumace sha ityom i se eren kpoghuloo ne ga, kpa Aôndo yô ngu nengen shi umbur er se lu civir un a ishima yase cii yô.—Mateu 6:4.
12 Kpa, aluer se soo ser se civir Aôndo a ishima yase cii yô, gba u se kuran atindi a na sha hanma kwagh u se eren cii. Mayange je se tsugh ayol a ase, se henen ser er se lu civir Aôndo, eren ishima na sha akaa agen yô, sea per atindiakaa a na agen kpa ka kwaghbo ga ze. U tesen ikyav yô, alaghga or nana tsugh iyol i nan, nana henen ér aluer nan ngu eren akaa agen a mcivir u Aôndo yô, nana̱ eren idya shin akaabo agen a vesen je kpa Aôndo una tsaha nan ga. Mhen ne ka u shami ga!—Mbagalatia 6:7, 8.
13. Afatyô u karen jighjigh u se ne Yehova la shighe u se lu ken iuv se tseegh la nena?
13 Doo u se pine ayol a ase ser: ‘M kor atindi a Yehova sha akaa a m eren ayange ayange la, kua sha akaa a m eren ken iuv la kpa?’ Yesu kaa ér: “U nan lu jighjigh sha ankwagh u kiriki yô, nana lu jighjigh sha kwagh u vesen kpaa; man shi u nan lu perapera sha ankwagh u kiriki ga yô, kwagh u vesen kpaa nana lu perapera sha mi ga.” (Luka 16:10) Se mba ‘zenden a ishima i lun a acôghor a wan iyol ga,’ kua shighe u se lu ken ‘iyou yase’ ape mbagenev ve nengen a vese ga la kpa? (Pasalmi 101:2) Sha mimi yô, ken iyou yase je kpa a fatyô u karen jighjigh wase. Ken ityar i ior kpishi ve lu a ukômputa ken ayou a ve yô, u nengen ufoto mba ijimbagh ka kwagh u ican ga. Ken anyom a a kar ken ijime kpuaa la, cii man or nana nenge ufoto mbaijimbagh yô saa nan za ape i tesen ve la. Doo u se er tom sha mkaanem ma Yesu man a ishima i môm, ma kaa ér: “Hanma or u nana kenger kwase sha u nana tôm un yô, nan er idya a na ken ishima je ve.” Sha mimi yô, se fatyô u kôron iyol yase tsaha sha u kenger ufoto mbaijimbagh ga kpa? (Mateu 5:28; Yobu 31:1, 9, 10; Pasalmi 119:37; Anzaakaa 6:24, 25; Mbaefese 5:3-5) Man gema di akaa a pilagh a i tesen sha televishen la di yô, se mba eren nan sha mini? Mhen wase zua vea u Aôndo wase, un u a ‘ker or u ipila i doo nan ishima ihyom’ la kpa? (Pasalmi 11:5) Man gema di ikyôhô i man kpishi ken iuv la di ye? Bibilo venda ihyundugh ki msôrough shi i̱ ta Mbakristu icin ér ve de lumun ér ‘msôrom ma ya tor sha a ve ga.’—Titu 2:3; Luka 21:34, 35; 1 Timoteu 3:3.
14. Ka igbenda i nyi nahan se tese ser se mba ongo imo i Aôndo sha gbar u inyara?
14 Kwagh ugen u i gbe u se wa ikyo sha mi yô ka kwagh u inyar. U tesen ikyav yô, se soo u nyôron iyol ken igbenda i zuan a inyaregh a iyol nyoon shio i sha anyighe laa? Shin ishima ka i mee se ér se yevese kpandegh ku tanaa? Shin ka se ‘kimbi hanma or kwagh u a lu u á kimbi nan la, orngohol kpandegh kpa, se̱ ta nan kpandeghe’?—Mbaromanu 13:7.
Dooshima Mgbegh Se u Ungwan Imo i Aôndo
15. Er nan ve u we atindi a Yehova ikyo?
15 Aluer se mba wan atindiakaa a Aôndo ikyo yô se zua a averen. U tesen ikyav yô, aluer se nyagh taav u man shi se mba eren sha atindiakaa a Aôndo shi se mba eren sha tindi u i we ér se nyagh awambe la yô se tôô iangev mbi mbagenev ve lu tôôn la ga. Shi aluer se mba dondon mimi u ken Bibilo sha akaa agen kpaa yô, una wase se u eren kwagh a inyaregh yasegh sha kwaghfan shi eren kwagh a ior mbagenev sha inja kua mba hen tsombor wase kpaa. (Yesaia 48:17) Se fatyô u nengen iwasen i se zough a mi la ser ka iveren i wan atindi a Aôndo ikyo. Nahan kpa ityôkyaa i vesen i se ongo Yehova yô, ka sha ci u a doo se ishima. Se mba civir Aôndo sha ci u akaa a dedoo a a ne se la ga. (Yobu 1:9-11; 2:4, 5) Aôndo na se ian i tsuan or u se nenge ser doo se ungwan nan la. Nahan se tsua a ishima yase ser se ungwan Yehova, sha ci u se soo u civir un shi eren kwagh u vough.—Mbaromanu 6:16, 17; 1 Yohane 5:3.
16, 17. (a) Yesu yange waan imo i Aôndo ikyo sha u tesen ér a doo un ishima a ishima na cii nena? (b) Se dondo Yesu nena?
16 Yesu ver ikyav i dedoo i wan atindi a Yehova ikyo sha ci u Yehova doo un ishima a ishima na cii. (Yohane 8:28, 29) Shighe u Yesu lu shin tar la, “A hen ikyo i wan sha atsan a A ya la.” (Mbaheberu 5:8, 9) A hen ikyo i wan nena? Yange “hide a iyol Na ijime, hingir u ungwan kwagh zan zan ar ken ku, man lu ku u [sha kon u mtsaha].” (Mbafilipi 2:7, 8) Shighe u Yesu lu sha la je vanden wan imo i Ter na ikyo, nahan kpa ve shin tar yô i va kar ikyo i wan na la. Kwagh ne na yô, se mba a vangertiôr ser Yesu kuma sha hanma gbenda cii u lun Pristi u Tamen sha anmgbianev nav mba ken jijingi man sha uumace mbagenev mbananjighjigh mbara kpaa.—Mbaheberu 4:15; 1 Yohane 2:1, 2.
17 Man se di ye? Se kpaa se dondo Yesu sha u hemban eren ishima i Aôndo cii. (1 Peteru 2:21) Aluer Aôndo doo se ishima, nahan se mba wan atindi a na ikyo, kua sha shighe u i lu kighir se shin i lu meen se ér se per a je kpaa yô, a saan se iyol. (Mbaromanu 7:18-20) U wan atindi a Yehova ikyo la kua u eren sha akaa a mba ve lu hemen mcivir u mimi la ve kaa ér se er la shin er ve lu a mbamyen vev nahan kpaa. (Mbaheberu 13:17) Ka sea kuran atindi a Aôndo sha akaa a se eren ior ve nengen ga la yô, i doo Yehova kpen kpen.
18, 19. Aluer se mba wan atindi a Aôndo ikyo a ishima yase cii yô, kanyi ia due kere?
18 Nyian ne, alaghga a gba u se wa ikyo sha imo i Yehova sha u wan ishima a tôvacan sha er se wa jighjigh wase inya tine yô. (Aerenakaa 5:29) Shi Yehova wa se tindi ér se pase ior kwagh shi se tese ve kpaa, nahan a gba u se kura tindi ne sha u wan ishima eren tom ne zan zan mkur u tar. (Mateu 24:13, 14; 28:19, 20) Shin er se lu tagher a mtaver u tar ne nahan kpa gba u se lu a ishimataver sha er se za hemen u kumban imôngo a anmgbianev asev yô. Aôndo wase u dooshima ngu nengen er se lu nôngon ungwan un sha akaa ne cii yô. Kwagh u se er ve se wa ikyo sha atindi a Aôndo a ishima yase cii yô ka u nôngon a iyol yase i isholibo ne shi geman ijime a kwaghbo, soon kwagh u dedoo.—Mbaromanu 12:9.
19 Ka sea civir Yehova ser a doo se ishima shi sea wuese un yô, a hingir se or u ‘nan mba ve lu keren Un la injar.’ (Mbaheberu 11:6) Ka hange hange u nan iniav mbi dedoo shi ka kwagh u doon kpaa, kpa kwagh u Yehova a hembe soon cii yô ka u se waan atindi a na ikyo sha ci u a doo se ishima.—Anzaakaa 3:1, 2.
Ú Na Mlumun Wer Nyi?
• Se fatyô u kaan ser se mba a kwagh u nan Yehova inja nena?
• Saulu yange er akaa a sha mi ga nena?
• Ú tese wer u na jighjigh wer ikyo i wan hemba nagh ku nan nena?
• Kanyi i̱ mgbegha ú u wan ikyo sha atindi a Yehova?
[Study Questions]