Ú Er Icighan Jijingi Isholibo?
Ú Er Icighan Jijingi Isholibo?
“Isholibo i zan ken ku kpaa ngi.”—1 YOHANE 5:16.
1, 2. Hii nan ve se fe ser or a fatyô u eren icighan jijingi u Aôndo isholibo?
ER KWASE ugen ken tar u Jamani civir Aôndo nahan kpa, a kaa ér: “Yange m ya ican ken ishima kpishi, gadia m shi henen mer m er icighan jijingi isholibo.” Orkristu nana fatyô u eren icighan jijingi shin tahav mbu tomov mbu Aôndo isholibo?
2 Or a fatyô u eren icighan jijingi u Yehova isholibo. Yesu Kristu yange kaa ér: “Hanma isholibo man hanma ityuhwanev kpaa á de ior; kpa ityuhwanev mbi i toho Jijingi yô, á de ior mayange ga.” (Mateu 12:31) I ta se icin ér: “Aluer se mba eren asorabo sha apera zum u se ngohol mfe u mimi la kera yô, ma nagh sha ci u asorabo kera ku ga, kpa kwagh u i lu masen keghen yô cier iyol, ka ijirôron.” (Mbaheberu 10:26, 27) Shi apostoli Yohane nger ér: “Isholibo i zan ken ku kpaa ngi.” (1 Yohane 5:16) Nahan kpa, ka or u nan er isholibo i vesen la nana kaa ér nan er “isholibo i zan ken ku” shin nan er ga yee?
Mgemshima Ve a Mde u Asorabo
3. Aluer se er isholibo man se zungwe tsung yô, alaghga tsô kwagh la tese ér nyi?
3 Ka Yehova una ôr mbaasorabo ijir ye. Sha kpôô yô, se cii se va pase un kwagh wase iyol yase, man un yô eren kwagh u vough hanma shighe cii. (Genese 18:25; Mbaromanu 14:12) Ka Yehova a lu sha ian i tesen or u nan er isholibo i a de nan i̱ ga ye, shi ka un kpa una fatyô u ngohol jijingi na hen a vese kera ye. (Pasalmi 51:11) Kpa aluer se er isholibo man se zungwe sha kwagh shon tsung yô, alaghga kwagh la una tese ér se gema ishima. Kpa mgemshima u mimi jim yô kanyi?
4. (a) U pase inja i mgemshima nena? (b) Ka msurshima u nyi a lu ken Pasalmi 103:10-14?
4 Inja i mgemshima yô ka u or geman ieren i nan shi vaan afanyô tsung sha isholibo i nan er la shi geman ijime a i̱ kpaa. Aluer se er isholibo i vesen kpa se tese ser mimi je se gema ishima yô, se zua a msurshima ken mkaanem ma orpasalmi man, ér: “[Yehova] or se iyev sha asorabo ase ga, A na se injar i sha aferakaa ase la kpaa ga. Gadia er Sha a gbe ca a kar tar sha nahan, kape erdoo Na kpaa a kehe a mba ve cie Un la. Er ica i ityoughkitaregh a ityôtar nahan, kape ngu A pav akaabo ase a vese la; er mhôônom ka ma kôr ter a ônov nahan, kape TER kpaa mhôônom ma ker Un a mba ve cie Un la. Gadia Un yô, A fa mlu wase, A umbur er se lu vuulevu je yô.”—Pasalmi 103:10-14.
5, 6. Ter semakwagh u i er ken 1 Yohane 3:19-22 la, shi pase inja i mkaanem ma apostoli la kpaa.
5 Mkaanem ma apostoli Yohane man kpa sur se ishima. A kaa ér: “Sha kwagh ne yô, sé fa er se lu ken mimi man sea pever asema ase sha ishigh Nagh, gadia aluer ishima ia na se ibo yô, Aôndo hemba ishima yase man A fa akaa cii kpaa. Ne mbadoon mo ishima, aluer ishima ia na se ibo ga yô, se mba vangertiôr sha ishigh ki Aôndo je. Man nyityôkwagh i se sen kpaa se mba ngohol i her a Na, gadia se mba kor atindi a Na, shi se mba eren akaa a doon Un kpaa.”—1 Yohane 3:19-22.
6 “Sé fa er se lu ken mimi” yô, gadia se mba tesen dooshima u anmgbianev nahan se mba hingir mbaasorabo ga. (Pasalmi 119:11) Aluer se na iyol yase ibo sha ma ityôkyaa je kpa doo u se umbur ser “Aôndo hemba ishima yase man a fa akaa cii kpaa.” Yehova zungu se mhôônom sha ci u a fa er se lu a “dooshima u mimi” shi se nôngon ityav a isholibo shi ka se nôngo kwagh tsung ser se er ishima na yô. (1 Peteru 1:22) Aluer se suur sha Yehova shi anmgbianev doo se ishima shi se mba eren isholibo sha apera ga yô, ishima yase ia “na se ibo” ga. Aluer se mba kuran atindi a Aôndo yô, se lu a “vangertiôr sha ishigh ki Aôndo” ken msen, man una ungwa se kpaa.
Ve Er Icighan Jijingi Isholibo
7. Kanyi ka i tese ér a de or isholibo i nan shin a de nan ga?
7 Ka asorabo a nyi nahan i den ior a ga? De se time sha akav a tesen agen ken Bibilo tsô se zua a mlumun sha mpin ne. Aluer se er ma isholibo man se gema ishima kpa se mba zungwen her tsung yô, akav a se time sha mi ne a̱ sur se ishima. Akav a ken Bibilo ne aa wase se se fa ser ka isholibo i or er tseegh ka i tese ér nan kuma u a zungwe nan shin a zungwe nan ga, ga; akaa agenegh er ityôkyaa i í ne ve nan er isholibo shon la man er ishima i nan i lu ker la kua m-er u nan er i̱ sha apera la kpaa ka a tese ér nan kuma u a zungwe nan shin a zungwe nan ga.
8. Mbahemenev mba kwaghaôndo u Mbayuda mba ken derianyom u hiihii la yange ve er icighan jijingi isholibo nena?
8 Mbahemenev mba kwaghaôndo u Mbayuda mba ken derianyom u hiihii, mba ve hendan kwagh a Yesu Kristu kpoghuloo la yange ve lu eren icighan jijingi isholibo. Yange ve nenge jijingi u Aôndo lu eren tom ken Yesu sha uivande mba nan Yehova icivir mba lu eren la. Nahan kpa mbaihyomov mba Kristu mban kaa ér ka sha tahav mbu Satan Diabolo Yesu lu eren uivande mbara ye. Sha kwagh u Yesu a er yô, mba yange ve tuhwa jijingi u Aôndo la cii ve lu eren isholibo i a de ve i̱ “sha ayange ne kua a a lu van ken hemen la kpaa” ga yô.—Mateu 12:22-32.
9. Ityuhwanev ka nyi, man Yesu ôr nyi sha kwagh u ityuhwaneve?
9 Ityuhwanev ka kwaghôron u sha ifer shin iliam i dang i vihin or iti. Er i lu Aôndo a lu imbor i icighan jijingi yô, aluer or ngu ôron akaa sha icighan jijingi na dang yô ka Yehova je nan lu ôron akaa sha a na dang ye. Nahan aluer or ngu lamen sha jijingi dang man nan gema ishima ga yô, a de nan isholibo i nan la ga. Yesu yange ôr mkaanem man u tesen ér ior mba un lu ôron kwagh a ve la lu hendan a icighan jijingi u Aôndo sha apera. Gadia jijingi u Yehova lu eren tom sha ikyev i Yesu, kpa mbaahendanev nav mban gema kaa ér ka tahav mbu Diabolo, sha nahan yô ve er isholibo, ve tuhwa jijingi. Nahan Yesu kaa ér: “Or u nana tuhwa Icighan Jijingi yô, mayange je á de nan isholibo i nan ga, kpa nana ya ibo i tsôron gbem sha won je.”—Marku 3:20-29.
10. Hii nan ve Yesu yila Yuda ér ‘wan u mtimi’?
10 Time ase sha kwagh u Yuda Isekarioti la. Un yange eren kwagh sha mimi ga, gadia dughun inyaregh ken ikpanyar i tilin la. (Yohane 12:5, 6) Ken masejime yô Yuda za kohol Mbayuda ér una nenge Yesu mker sha agbenger a azurfa 30. Ka mimi, Yuda yange vaa afanyô shighe u nenge Yesu mker kera la, kpa mayange gema ishima sha isholibo i er sha apera la ga. Sha ityôkyaa ne yô, Yuda kuma u a va nder un shin mbakpenev ga. Nahan Yesu yila un ér “wan u mtim.”—Yohane 17:12; Mateu 26:14-16.
Ve Er Icighan Jijingi Isholibo Ga
11-13. Tor Davidi yange er isholibo vea Batesheba nena, man gbenda u Aôndo zungwe ve mhôônom la sur se ishima nena?
11 Ashighe kpishi Mbakristu mba ve pase asorabo a ve shi mbatamen mba ken tiônnongo ve wase ve ve hidi ve ye ikyar i dedoo vea Yehova la ka ve ya ican ken ishima kpishi sha tindi u Aôndo u yange ve per la. (Yakobu 5:14) Aluer ishima ngi zan se iyol sha imba gbenda ne yô, adooga se zua a mtsera sha u timen sha kwagh u Ruamabera a er sha kwagh u ior mba i de ve asorabo a ve la.
12 Tor Davidi yange er isholibo i vesen vea Batesheba, kwase u Uria. Er Davidi lu zenden sha tembeyoughough na yô, a nenge kwase u doonashe ne lu ôôn iyol, tsô a tindi i za va a na, maa a yav a na. Davidi ongo ér Batesheba wa iyav yô, a nôngo ér nom na Uria a za yav a na sha er una cir idya i ve er la yô. Er ayom a tor la gba sha mi ga yô, a ker gbenda u a wua Uria ken uitya yô. Mba woo un yô, Batesheba maa hingir kwase u Davidi nahan a mar un wan, kpa wan shon kpe.—2 Samuel 11:1-27.
13 Yehova yange gba den Davidi man Batesheba tsô ga. Nahan kpa Aôndo de Davidi isholibo na la, man a̱ shi nan kpa lu sha ci u mgemshima na la kua ikyuryan i Tartor i Aôndo ya a na la. (2 Samuel 7:11-16; 12:7-14) Ikyav tese ér Batesheba kpa yange gema ishima sha isholibo i er la, gadia ka un va hingir ngô u Tor Solomon, nahan hingir ngôtamen u Yesu Kristu ye. (Mateu 1:1, 6, 16) Aluer se er ma isholibo kpa se gema ishima yô, doo u se umbur ser Yehova fa er se gem ishima yô.
14. Kwagh u Tor Manase la tese se er Aôndo a den asorabo a vesen nena?
14 Kwagh u Manase, Tor u Yuda la kpa tese se er Yehova a den asorabo a vesen kpaa yô. Yange er kwaghbo sha ishigh ki Yehova. Manase ta atse a nanden nagh sha mi sha ci u Baal shi civir “akum a Sha cii,” shi ta atse a nanden nagh sha mi sha ci u mbaaôndo mba aiev ken ityembe i tempel ihiar. Manase nande ônov nav ken usu shi eren ahir kpaa, nahan a mee Yuda kua mba ve tema ken Yerusalem cii “ve er ifer, hemba akuraior a TER lu tim a sha ishigh ki Mbaiserael kera la.” Er uprofeti mba Aôndo ta un icin nahan kpa, a ver ato ga. Ken masejime yô tor u Ashiria kôr Manase yem a na uikyangen. Shighe u Manase lu uikyangen la, a gema ishima a gba hiden a iyol na ijime tsung shi gba eren msen hen Aôndo, tsô Aôndo de un asorabo na shi hide ver un tor ken Yerusalem, nahan hide gba suen mcivir u mimi.—2 Kroniku 33:2-17.
15. Ka nyi yange i er apostoli Peteru u a tese ér Yehova den asorabo “wuee”?
15 Uderimbaanyomov mba kar imôngo yô, apostoli Peteru er isholibo i vesen kpishi, gadia a nyiman Yesu. (Marku 14:30, 66-72) Kpa, Yehova de Peteru isholibo na la “wuee.” (Yesaia 55:7) Sha ci u nyi? Sha ci u Peteru gema ishima sha mimi. (Luka 22:62) Ikyav tese wang ér Aôndo yange de Peteru isholibo la, gadia ayange nga kar 50 yô, i na Peteru ian i civirigh i pasen kwagh u Yesu gbar gbar sha iyange i Pentekosti. (Aerenakaa 2:14-36) Nyian kpa kape Aôndo una de Mbakristu mba ve gem ishima sha mimi isholibo ve je la. Orpasalmi ngise wa icam ér: “TERE, aluer Wea we aferakaa ikyo yô, ka an ma nan til sha, Tere? Kpa We U ngu a mde u asorabo.”—Pasalmi 130:3, 4.
De u Cian Wer Ú Er Icighan Jijingi Isholibo
16. Ka sha ci u atôakaa a nyi nahan Aôndo a den se asorabo?
16 Akav a ior mba se er kwagh ve sha heen ne a wase se se pande u cian ser se er icighan jijingi isholibo. Akav ne tese ér Yehova den mba ve gem ishima sha mimi la isholibo ve. Kwagh u vesen yô ka u eren msen hen Aôndo sha gbashima. Aluer se er ma isholibo yô, se er msen se zamber ser i de se i̱ sha ci u nagh ku ipaa ku Yesu la man sha ci u mhôônom ma zungwen ma Yehova man sha ci u myen wase la man sha ci u tom u se lu vanden eren un sha mimi la kpaa. Er se fe mrumun u sha mhôôn u Yehova yô, se fatyô u sônon ser a de se isholibo yase shi se lu a vangertiôr ser una ungwa se kpaa.—Mbaefese 1:7.
17. Aluer or er isholibo man gba u a wase nan ve nana hide a civir Aôndo yô nana er nyi?
17 Kpa aluer or er isholibo man nan fatyô u eren msen ga, sha ci u nan nenge ér nan kera kuma u eren msen hen Aôndo ga di ye? Orhenen Yakobu ôr se kwagh u se er sha gbar ne yô. A kaa ér imba or la “nana̱ yila mbatamen mba nongo u Kristu, ve̱ er msen sha ci u nan, ve̱ shighe nan mkurem ken iti i Ter. Msen u sha jighjigh u nan la una yima oruange la man Ter Una mough a nan sha. Aluer nan er isholibo je kpaa, á de nan.”—Yakobu 5:14, 15.
18. Aluer i dugh or ken tiônnongo kera je kpa, er nan ve a fatyô u den nan isholibo i nan laa?
18 Aluer or er isholibo man nan gema ishima ga, nahan i dugh nan ken tiônnongo kera je kpa, ngula tese ér ka u a kera de nan isholibo i nan la mayange ga ze. Paulu yange ôr kwagh u orgen ken Korinte u i shighe un mkurem, u i dugh un ken tiônnongo kera la, ér: “Sha imbaor la yô, er mba ve hemba ngeen la vea tsaha nan yô, kuma. Nahan yô, guda gema de nen nan kwagh la man shi sur nen nan ishima kpaa sha u ijungwen i tsung la i̱ de hembe nan ga yô.” (2 Mbakorinte 2:6-8; 1 Mbakorinte 5:1-5) Kpa, aluer mba ve er isholibo la soo u hiden civir Yehova sha mimi yô, gba u vea lumun iwasen i mbatamen mba ken Kristu vea na ve ken Bibilo la, shi vea tese ér ve gema ishima sha mimi kpaa. Saa vea “ume . . . atam a a kom mgemshima yô.”—Luka 3:8.
19. Ka nyi ia wase se ve a ‘kpe jighjigh u nan wase iyoloo’?
19 Ka nyi ia na ve se hen ser se er icighan jijingi isholibo? Aluer or hemba veren ishima sha isholibo i nan la shin vihi nan iyol yô, nana fatyô u henen ér nan er icighan jijingi isholibo. Aluer kwagh ngu nahan yô, hemba doon u or la nana er msen shi nana seer memen kpaa. Doo u se er kwagh ne sha er Satan una na ishima ia yina se nahan se de u civir Aôndo ga yô. Er ku u iferor je kpa u doo Yehova ga yô, se mba a vangertiôr ser a doo Yehova u mbacivir un ve tim ga. Nahan aluer ishima ngi zan se iyol ser se er icighan jijingi isholibo yô, se za hemen u timen ken Mkaanem ma Aôndo, hemban je yô takerada u Pasalmi. Shi gba u se zaan mbamkombo mba tiônnongo hanma shighe shi se pasen loho u Tartor kpaa. Aluer se mba eren akaa ne yô, a ‘kpe jighjigh u nan wase iyol’ shi ishima a kera nyian se ér alaghga se va er isholibo i a de se i̱ ga la ga.—Titu 2:2.
20. Ka nyi ia wase or ve nana fa ér nan er icighan jijingi isholibo ga?
20 Aluer or ngu cian ér nan er icighan jijingi isholibo yô nana̱ pine iyol i nan ér: ‘M tuhwa icighan jijingi shinii? Aluer m tuhwa icighan jijingi yô, m gema ishima sha isholibo yam la sha mimi kpa? M na jighjigh mer Aôndo una dem isholibo yam mimi kpa? Shin m ngu or u vendan mimi, u m vende iwanger i ken jijingi yôô?’ Alaghga imba or la nana mase kaven ér nan tuhwa icighan jijingi u Aôndo ga, shi nan ngu or u vendan mimi kpaa ga. Nana kav ér nan gema ishima shi nan na jighjigh taveraa ér Yehova de nan a isholibo i nan kpaa. Aluer ka nahan yô, nan er icighan jijingi u Yehova isholibo ga.
21. Ka mbampin mba nyi se time sha mi ken kwaghhenen u a dondo nee?
21 U se fan ser se er icighan jijingi isholibo ga la ka kwagh u surun se ishima kpen kpen. Nahan kpa, mbampin gema due sha kwagh u or eren icighan jijingi isholibo ne, man se time sha mbampin mba shon ken kwaghhenen u a dondo ne. U tesen ikyav yô, se fatyô u pinen ayol a ase ser: ‘Ka icighan jijingi u Aôndo a lu hemen mo mimi je kpa? M ngu umen ityamegh ki jijingi ken uma wam kpa?’
Ú Na Mlumun Wer Nyi?
• Hii nan ve se fatyô u kaan ser or a fatyô u eren icighan jijingi isholibo?
• Mgemshima ka nyi?
• Shighe u Yesu lu shin tar la, ka unô yange ve er jijingi isholibo?
• A er nan ve ishima ia de u nyian se ér se er isholibo i a de se ga?
[Study Questions]
[Picture on page 4]
Mba yange ve kaa ér ka sha tahav mbu Satan Yesu lu eren uivande la er icighan jijingi u Aôndo isholibo
[Picture on page 5]
Er Peteru nyiman Yesu nahan kpa, yange er isholibo i a de un ga ze