Jighjigh u Nan u Kwase Ugen Hemba Kwaghtseren

“Aluer ne mba ôron washika ne yô, fa nen ner m war ipyaven la ga, shi m undu ne kpaa.”

KA MKAANEM ma kwase ugen u lu kwase Shiada u Yehova hii washika u nger ônov nav mbakasev utar mba lun anyom 25 man 19 man 16 je la. Iti i kwase ne ér Carmen. Kwagh ka a er i vihi yô ipyaven shon za doo ga, nahan Carmen saa ku.

Kwagh u yange er kwase ne ka kwagh u una fatyô u nan hanma or cii ishimavihin yô, gadia yange gba u una kpe a undu ônov nav mba kasev mba utar mbara. Nahan kpa, jighjigh u na uityendezwa mba Yehova taveraa la na un ishimataver, jighjigh la wase un lu a bemshima je ka ilian ga, gadia washika u kôron ken ishima u nger ônov nav la tese kwagh ne. Nenge ase kwagh u ôr a ônov nav mba kasev ne.

“Hiihii yô, m soo u kaan a ven mer ne doom ishima tsung. . . . Ne hembam ônov cii man m te ave vanger a ven kpaa.

“Ma i doom u lun vea ven zan zan tar u he u Aôndo a tende zwa la ma u kar van . . . , kpa er i gbe sha mi ga yô, m sôn Aôndo mer a wase ne sha er ne za hemen u civir un sha jighjigh er ne vanden eren nahan yô. Se wa ishima a ameen imôngo, Yehova kpa undu se ma shighe môm ga. . . . Nahan suur nen sha akaawan a á ne sha ikyev i nongo na la, shi za nen hemen u suen tiônnongo kua mbatamen kpaa. Pasen nen kwagh hanma shighe er ne fetyô la cii, shi anmgbianev cii ve doo ne ishima.

“M pav a ven, kpa a lu sha anshighe kpuaa tsô. . . . M ngu zamber a ven mer yam nen anyi sha akaa a m er a ven sha mi ga la cii, man sha ashighe a yange m kôr cio u fan er lu ne ken ishima shin pasen ne mer ne doom ishima ga la kpaa. . . . M fa tsô mer, hanmô wen yô nan ngu a mbamgbe mba nan. Yehova hemba fan mbamgbe enev a ven, man una kure ne mbamgbe enev cica cii, shi una na ne injar sha ishimawan yen kpaa.

“Mayange de hungur nen uma u ken tar u he u ne we ishima u va zuan a mi la ga. Nôngon nen her kpoghuloo sha er ne va nyôr ker yô. Yehova a ver ne doo doo shi a na ne agee sha er ne civir un zan zan mkur yô. . . . Ishima i de vihin ne ga, ônov av mba doom mo ishima. Ne doom ishima!”

Kwagh u vihin una fatyô u tseren hanma or sha hanma shighe cii. Tor Solomon u ngise ngise la yange kaa ér: “Shighe man aikyôr mba ve sha gbenda ve cii.” (Orpasenkwagh 9:11) Kpa mba ve ne Aôndo jighjigh taveraa yô, vea fatyô u lun a imba vangertiôr u apostoli Paulu kpa lu a mi ve ôr mkaanem man la. A kaa ér: “M fa dedoo mer, ku shin uma, . . . shin ma kwagh ugen u i gbe un a gba kpaa, una fatyô u paven se a dooshima u Aôndo u a lu ken Kristu Yesu Ter wase la je ga.”—Mbaromanu 8:38, 39; Mbaheberu 6:10.