Mkaanem ma Yehova Ma Uma Je

U Ôron Takerada u Esekiel Asav-asav—Vegher u sha Uhar

KEN uwer u Disemba 609 C.S.Y. (Cii man Shighe u Yesu) la, tor u Babilon hii u kasen Yerusalem sha utya sha kwa u masetyô. Kera yô, loho u Esekiel lu pasen mba ve lu uikyangen ken Babilon la cii lu sha kwagh u mtim u Yerusalem, gar u doo ve ishima yum la. Kpa itinekwagh i kwaghôron u profeti u Esekiel kôr gema hegen, ngu pasen ér akuraior a a lu ember mgbe u ior mba Aôndo la cii, kwagh a tser ve. Yange mba timin gar u Yerusalem iwer ngi kar 18 yô, loho u Esekiel shi kôr gema. Hegen lu pasen ér a hide shi a ver mcivir u mimi.

I ôr akaaôron a profeti sha kwagh u akuraior a a kase Iserael la ken Esekiel 25:1–48:35, man er Aôndo una yima ior nav yô. * Dugh Esekiel 29:17-20 sha yô, avur agen cii i nger á sha alô sha alô man sha atineakaa vough vough kpaa. Nahan kpa avur a anyiin ne kpaa ka akaaôron a profeti sha kwagh u Igipiti i er ker ye. Er takerada u Esekiel u lu vegher u Ruamabera u Aôndo a ne i nger yô, loho u i nger ker la kpa ‘ngu uma je, ngu tem gbilin ga.’—Mbaheberu 4:12.

‘TAR LA UA GEMA A HINGIR ER SULE U EDEN NAHAN’

(Esekiel 25:1–39:29)

Er Yehova tsenga nengen er a tim Yerusalem ve Amon man Moabi man Edom man Filitia man Tiru kua Sidon vea ember yô, a tindi Esekiel ér a ôr kwaghôron u profeti sha akuraior ne. Tar u Igipiti kpa a ya u ishar. I tôô ‘Farao, tor u Igipiti, man ikpelaior na’ i kar sha kon u sedar u a gber u a ta inya sha “Sanker u tor u Babilon” yô.—Esekiel 31:2, 3, 12; 32:11, 12.

Yange mba timin Yerusalem ken inyom i 607 C.S.Y. la, iwer ngi kar ataratar yô, orgen u war mtim la yô yevese va kaa a Esekiel ér: “I hembe gar.” Tsô profeti ne ‘kera lu ving’ hen mba i yem a ve uikyangen la ga. (Esekiel 33:21, 22) Gba u una yôô akaaôron a profeti sha kwagh u mhidi u a hide a ior mba i yem a ve uikyangen la ken tar ve yô. Yehova una “ver orkuran môm sha a ve, ka wanakiriki [Na] Davidi je la.” (Esekiel 34:23) Gba u a tim Edom kera, kpa tar u Yuda yô ua hingir “er sule u Eden nahan.” (Esekiel 36:35) Yehova tôndo zwa ér una kura ior nav mba vea hide la sha er “Gogi” una ta num sha a ve ga yô.—Esekiel 38:2.

Mbamlumun sha Mbampin mba sha Akaa a ken Ruamabera:

29:8-12—Ka hanma shighe nahan Igipiti hingir ice zan zan anyom kar akunduahara? Yange mba timin Yerusalem ken inyom i 607 C.S.Y. yô, asande a Mbayuda yevese yem ken Igipiti, shin er Yeremia ta ve icin nahan kpaa. (Yeremia 24:1, 8-10; 42:7-22) Nahan kpa ve war ga, gadia Nebukadinesar va ta num sha tar u Igipiti hemba u. Nahan alaghga anyom 40 a Igipiti lu ice la yange aa hii sha shighe u Babilon hemba un la. Mbatôvonakaa a mbayiase ôr kwagh u tesen ér yange i tim tar ne ga, kpa se na jighjigh ser yange kwagh er nahan, gadia uityendezwa mba Yehova mba gbe inya ga.—Yesaia 55:11.

29:18—Yange “hanma ityough ki orough kpur, man hanma vandegh torough” nena? Nebukadinesar yange kase gar u Tiru sha utya taveraa hide ijime ga, sha nahan yô ader a ushoja mba Nebukadinesar zer kôôn ve sha ityou nahan ityouv vev kpur, shi er ve lu kuran ikyav mbi maan ayou a taven sha man ugilgar yô, avande a ve kpa torough.—Esekiel 26:7-12.

Ityesen hen Avese:

29:19, 20. Shighe u Nebukadinesar ta num sha Tiru la, ior i Tiru yevese a akaa ve a injaa yem ken gar ve u ken icile la, nahan Nebukadinesar kera zua a akaa a injaa kpishi a yan ishar ga. Er Nebukadinesar lu tor u fan Aôndo ga, moron iyol shi keren kwagh na iyol na tseegh nahan kpa, Yehova na un injar sha tom u a er la, a na un tar u Igipiti hingir  “injar i ikyumutya na.” Nahan doo u se kpa se dondo ikyav i Yehova la, se taan ugomoti kpandegh sha ityom i ve eren sha ci wase la. Ieren i mbautahav shin gbenda u ve vihin inyaregh ki kpandegh la na se ian i vendan u tan kpandegh ga.—Mbaromanu 13:4-7.

33:7-9. Mayange Mbakristu mba i shigh ve mkurem, mba ve lu nongo u mbakuran nyian ne, kua akar a ve cii ve de den u pasen loho u dedoo u Tartor ne shi tan ior icin sha kwagh u “zegecan” u a lu van la ga.—Mateu 24:21.

33:10-20. Saa se de aeren a bo, se eren kwagh u Aôndo a soo her a vese la keng ve se war ye. Sha kpôô yô, gbenda u Yehova ‘ngu vough.’

36:20, 21. Er Mbaiserael, mba ve lu “ior mba TER” la kera lu eren kwagh u i fa ve sha mi la ga yô, ve hôngor a iti i Aôndo ken akuraior. Mayange se lu nen mbacivir Yehova sha iti tseegh ga.

36:25, 37, 38; NW. Paradiso u ken jijingi u se lu ember nyian ne mgbough a “ikpela i uicighanmbaiorov.” Sha nahan yô, se ver nen paradiso ne a lu wang.

38:1-23. Er se fe ser Yehova una yima ior nav sha ikyev i Gogi u ken tar u Magogi nahan doo se kpen kpen! Gogi ka iti i i ne “tor u tar ne,” Satan Diabolo yô. Yange i na un iti ne shighe u i zenda un sha kera la. Tar u Magogi ka tar wase u i daa Satan man azôv a na i gbihi shin u ne.—Yohane 12:31; Mpase 12:7-12.

“VER ISHIMA SHA AKAA A ME TESE U NE CII”

(Esekiel 40:1–48:35)

I tim gar u Yerusalem anyom kar 14 hegen. (Esekiel 40:1) Nahan anyom akunduahargber kar ataratar shi her a Mbayuda vea lu ken uikyangen yô. (Yeremia 29:10) Esekiel iyolna kpa zurum anyom 50 hegen. I tôô un ken mpase u sha mnenge i va a na ken tar u Iserael. Tsô i kaa a na ér: “Wan u or, nenge sha ashe ou, man ungwa sha ato ou, man ver ishima sha akaa a Me tese u ne cii.” (Esekiel 40:2-4) Yange i tese Esekiel tempel u he ken mpase u sha mnenge nahan, doo un kpen kpen.

Icighan tempel u Esekiel nenge a mi la lu a ihindagar 6 man ayou 30 man Icighankpar man Icighankpar u Hemban man atse a nanden nagh sha mi, a i er sha ikyon yô kua atse a nan nagh ku nanden sha mi. Shi a nenge mngerem lu “duen” ken tempel la kuan senen. (Esekiel 47:1) Esekiel shi nenge er i kar dyako i na hanma kwe u ônov mba Iserael vegher na yô, hanma kwe yô i na u inya hii ken vegher u sha ityoughkitaregh la za asegh ken vegher u shin ityôtar. I ver ijiir i nengen sha akaa hen atô u dyako u Yuda man Benyamin. “Icighanjiir u TER” man gar u i yer ér “Yehova-shama” la lu hen ijiir i i lu hen atô u dyako u Yuda man Benyamin la.—Esekiel 48:9, 10, 15, 35.

Mbamlumun sha Mbampin mba sha Akaa a ken Ruamabera:

40:3–47:12—Tempel u Esekiel nenge a mi ken mpase u sha mnenge la tile sha ityough ki nyi? Ma shighe môm kpa i maa zege tempel u Esekiel nenge a mi ken mpase u sha mnenge ne ga. Tempel la tile sha ityough ki tempel u Aôndo u ken jijingi, inja na yô ka gbenda u a ser mcivir u wang a ver sha inja sha ayange ase ne la. (Esekiel 40:2; Mika 4:1; Mbaheberu 8:2; 9:23, 24) Mpase u sha mnenge u sha kwagh u tempel ne ngu kuren ken “ayange a masejime,” hen shighe u i hide i ser tom u pristi ne. (2 Timoteu 3:1; Esekiel 44:10-16; Malaki 3:1-3) Nahan kpa mpase u sha mnenge ne una mase kuren ken Paradiso. Tempel u sha ikyav la yange na Mbayuda mba ve lu ken uikyangen la ishimaveren ér vea hide a hii mcivir u mimi shi hanma tsombor u Mbayuda yô ua zua a dyako ken tar la.

40:3–43:17—Mkar u i kar tempel la tese ér nyi? Mkar u i kar tempel la ka ikyav i tesen ér awashima u Yehova sha kwagh u mcivir u mimi una kure kpee a bunde ga.

43:2-4, 7, 9—“Akom a utor vev” a yange gba u a kura a ken tempel kera la kanyi? A̱ shi nan kpa akom la tile sha ityough ki ieev. Mbahemenev mba ken Yerusalem man ior nav cii yange ve hôngor a tempel u Aôndo sha ieev, je yô ve gema mbi hingir utor vev.

43:13-20—Atse a nanden nagh a Esekiel nenge a mi ken mpase u sha mnenge la tile sha ityough ki nyi? Atse a nanden nagh a sha ikyav ne ka awashima u Aôndo sha kwagh u nagh ku ipaan ku Yesu la. Nagh ku Yesu kura ku na yô i na Mbakristu mba i shigh ve mkurem la ishô, shi “zegeikpelaior” kpa ngi a mtil u wang sha ishigh ki Aôndo. (Mpase 7:9-14; Mbaromanu 5:1, 2) Alaghga ka ityôkyaa i i ne ve “zegetasa u haan mngerem shin mi” u yange lu ken tempel u Solomon, u upristi ôôn ave shi mi  la a lu ken tempel u ken mpase u sha mnenge la ga je la.—1 Utor 7:23-26.

44:10-16—Nongo u upristi la tile sha ityough ki unô? Nongo u upristi la tile sha ityough ki Mbakristu mba i shighe ve mkurem mba ainge ne. Yange i sôr ve, ve hingir wang ken inyom i 1918, shighe u Yehova tema “er orsoughon man orsôron,” ken tempel na u ken jijingi la. (Malaki 3:1-5) Mba yange ve lu wang shin ve gema asema la za hemen a ityom i icivirigh i ve vanden eren la. Nahan lu u vea nôngo kpoghuloo vea ‘kuran ayol a ve wang sha kwagh u taregh,’ sha er vea gema a lu ikyav hen “zegeikpelaior” i ikwe i i lu pristi ga i til sha ityough vev la.—Yakobu 1:27; Mpase 7:9, 10.

45:1; 47:13–48:29—“Tar” la man mkar u i kar u la tile sha ityough ki nyi? Tar la tile sha ityom i ior mba Aôndo ve eren la. Hanma ijiir i or u civir Yehova nan lu cii, aluer nan za hemen a mcivir u mimi yô, ka ken tar u i hidi a mi la je nan lu ye. Mkar u karen tar la una mase kuren ken tar u he, ape a kar tar a na hanma or u jighjigh dyako u nan la.—Yesaia 65:17, 21.

45:7, 16—Icighannagh ku yange i na sha ci u tom u pristi man sha ci u tor la tile sha ityough ki nyi? Ken tempel u ken jijingi la yô, nagh kun tile sha m-sue u suen mcivir u Aôndo la, inja na yô ka u nan iwasen shi lun ken ijoughave kpaa.

47:1-5—Mngerem ma shin ifi u Esekiel nenge a mi ken mpase u sha mnenge la tile sha ityough ki nyi? Mngerem mara tile sha ityough ki akaa a Yehova a er sha u nan se uma la, kua nagh ku ipaan ku Wan na Yesu Kristu na la man mfe u Aôndo u a lu ken Bibilo la. (Yeremia 2:13; Yohane 4:7-26; Mbaefese 5:25-27) Ifi la ngu gbanger seer kure kure sha er mbahev mba ve lu van ken mcivir u mimi kpishi ne vea fatyô u nyôron yô. (Yesaia 60:22) Shighe u Hemen u Anyom Dubu la, ifi la una hemba kuan cii, man mngerem mara wa mkav u ior vea seer kaven akaa a i nger ken “uruamabera” mba a bugh la kpa ker.—Mpase 20:12; 22:1, 2.

47:12—Ikyon i umen atam la tile sha ityough ki nyi? Ikyon i sha ikyav la tile sha ityough ki kwagh u Aôndo una er sha u hiden a uumace sha mlu u vough la.

48:15-19, 30-35—Gar u Esekiel nenge a mi ken mpase u sha mnenge la tile sha ityough ki nyi? Gar u í yer ér “Yehova-shama” la ngu hen ‘icighanjiir ga,’ nahan tese ér ka kwagh u shin tar. Ka inja er gar ne ka hemen u shin tar, u ua va mba vea lu ken “tar u he” u perapera la a mtsera nahan. (2 Peteru 3:13) Ihinda i gar ne a lu a mi ken akpe na la tese ér una luun ivegher hanma shighe cii. Gba u mbakuran mba ior mba Aôndo vea lu mba ior vea zaan hen a ve gbar gbar yô.

Ityesen hen Avese:

40:14, 16, 22, 26. Atineavilegh a a lu sha hunda u nyôron ken tempel la tese ér ka mba ve lu a aeren a dedoo tseegh a na ve ian i nyôron ken tempel la ye. (Pasalmi 92:12) Kwagh ne tese se ér saa se civir Yehova sha mimi ve una lumun se ye.

44:23. Tom u nongo u upristi u sha ayange ne u eren sha ci wase ne doo se kpen kpen. “Wanakiriki u jighjigh man u fan kwagh” hemen gbenda sha u nan kwaghyan u ken jijingi sha shighe vough, shi wasen se u fan mkposo u kwagh u a lu wang ga man u a lu wang sha ishigh ki Yehova yô.—Mateu 24:45.

47:9, 11. Mfe ka vegher u hange hange ken mngerem ma sha ikyav mara, man ma eren tom u been ior angev sha ayange ase ne. Hanma ijiir i or me ma cii maa na nan uma u tsôron. (Yohane 17:3) Kpa mba ve vende u man mngerem ma umam man yô, a gema a lu “bar” a na ve ye, inja na yô, a tim ve kera gbem sha won. Nahan doo u se ‘nôngo sha gbashima u pasen kwaghôron u mimi jighilii.’—2 Timoteu 2:15.

“Me Tsegha Iti Yam i Vesen”

Yange mba hongo tor u masetyô u ken tsombor u Davidi tor yô, Yehova de shighe kar gôgônan cii ve Un u “i lu kwagh na jim” la kar tema ye. Nahan kpa Aôndo vihi ikyuryan i ya vea Davidi la ga. (Esekiel 21:27; 2 Samuel 7:11-16) Kwaghôron u profeti u Esekiel la ôr kwagh u “wanakiriki Wam Davidi” ér una hingir “orkuran” man “tor.” (Esekiel 34:23, 24; 37:22, 24, 25) Wanakiriki ne ka ma orgen môm ga, ka Yesu Kristu u a tem tor sha Tartor na la. (Mpase 11:15) Yehova una “tsegha icighan iti [na]” sha ikyev i Tartor u Mesiya la.—Esekiel 36:23.

Ica a kera gba ga tsô a tim mba ve lahan iti i Aôndo mbara cica cii. Kpa mba ve tsegh iti i Yehova sha u civir un sha gbenda u a soo la yô, vea zua a uma u tsôron. Nahan yô, se za nen hemen u man mngerem ma umam ma ma lu kuan kpishi sha ayange ase ne shi se ver mcivir u mimi a̱ lu kwagh u vesen ken uma wase.

[Footnote]