‘I Nger Sha Ci U Ityesen Yase’

‘M-ER u i eren uruamabera kpishi la yô, ikighir ngi ga.’ (Orpasenkwagh 12:12) Mkaanem ma ken ivur Bibilo ne ka ma mimi sha shighe wase ne kpaa, vough er shighe u i nger ma la nahan, gadia ityakerada ngee nyian je gande ôron. Nahan yô, or nana fa ityakerada i i hembe doon i nana ôr nena?

Ior kpishi ka vea soo u ôron ma takerada yô, ve vande nengen iti i or u nan nger la shi ve ôr mkaanem ma pasen kwagh u nan la kpaa. Mbagberen ityakerada ka ve pase ajiir a ior mba ve nger i la, makeranta u ve ze man ityakerada i ve vande ngeren kpaa. Iti i orngeren takerada ngi hange hange, ka nahan ve ngise la, kasev mbangeren ityakerada tôôn ati a nomso sha er mbaôron vea nenge takerada ve ashe ashe sha ci u ka kwase nan nger u yum ga ye.

Kpa kwagh er vihi yô, er kwaghngeren u hiihii la a tese nahan, mbagenev venda Ruamabera u ken Zwa Heberu la sha ci u ve na jighjigh ér Aôndo u i er kwagh na ker la ka u vihin tu, u yange timin mbaihyomov nav, zungwen ve mhôônom ga yô. * De se time nen sha kwagh u Ruamabera u ken Zwa Heberu man Ruamabera u Mbakristu u ken Zwa Grika la a er se sha kwagh u Or u nan nger Bibilo la yô.

Kwagh u Orngeren Bibilo

Ruamabera u ken Zwa Heberu kaa ér Aôndo yange ôr a ikyurior i Iserael wener: “Mo TER M gem kposo ga.” (Malaki 3:6) Anyom nga kar 500 yô, Yakobu u lu môm ken mbangeren Bibilo la ôr kwagh u Aôndo wener: “Un yô, ma mgem ngu ken a Na ga, shin mure u mgem tsô kpaa ga.” (Yakobu 1:17) Tsô, er nan ve mbagenev ve henen ér Aôndo u i pase kwagh na ken Ruamabera u ken Zwa Heberu la ngu kposo a Aôndo u ken Ruamabera u Mbakristu u ken Zwa Grika laa?

Ka sha ci u ajiir kposo kposo ken Bibilo pase or u Aôndo a lu la sha igbenda kposo kposo. Takerada u Genese tseegh kpa pase se kwagh u Aôndo sha igbenda kposo kposo, ér ‘vaan afanyô’ sha kwagh shi ka un “A gbe Sha man tar” ye, shi ngu “Orjirigh u tar cii.” (Genese 6:6; 14:22; 18:25) Asember a i er heen kposo kposo ne cii nga ôron kwagh u Aôndo mômô? Een.

U tesen ikyav yô: Alaghga ior mba orjir ugen a er ve ijir yô, vea nenge un ér ka or u tsoghul ishima u a lumun tindi u peren ga yô. Kpa, adooga ônov mba orjir ne yô, vea nenge ter ve ne ér ka ter u lun a dooshima, u a eren erdoo a ônov nav yô.  Azende a na di kpa alaghga aa nenge un ér ka huror u fan kwagh, u hômon kwagh kpaa. Nenge ase yô, ka or ne môm a lu orjir shi a lu ter kua huror kpaa ye. Inja na yô, a tese or u a lu yô sha ashighe kposo kposo.

Kape Ruamabera u ken Zwa Heberu kpa a pase kwagh u Yehova sha igbenda kposo kposo je la. I kaa ker ér ka “Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je.” Nahan kpa, shi i kaa ér, “u tsahan yô, deen ga.” (Ekesodu 34:6, 7) Igbenda ihiar i Aôndo a eren kwagh kposo kposo ne pase se inja i iti na la. Inja i iti i “Yehova” la jighilii yô ér, “Ka A Na i Hingir.” Inja na yô, Aôndo hingir kwagh u a soo cii sha u kuren uityendezwa nav. (Ekesodu 3:13-15, NW) Nahan kpa, ngu Aôndo shon môm tsô. Yesu kaa ér: “Ter Aôndo wase ka Ter tswen je.”—Marku 12:29.

I Nger Ruamabera Ugen sha Ityough Ki Ruamabera u ken Zwa Heberu Laa?

Ior mba ainge mba ngôôr gberen ityakerada i he i henen kwagh a mi sha ityough ki i tse ga. Er shighe u ior ve seer zuan a mfe sha kwagh shin ve kera lumun a mhen u tse ga nahan. Ruamabera u Mbakristu u ken Zwa Grika la kar tile sha ityough ki Ruamabera u ken Zwa Heberu la sha imba gbenda ne shinii? Ei.

Luun er Yesu yange una we ishima ér ityakerada i i er kwagh u tom na kua ityakerada i mbahenen nav nger la i kar i tile sha ityough ki Ruamabera u ken Zwa Heberu la yô, ma pase nahan kpee je. Kpa, takerada u Luka ôr kwagh u Yesu er zum u shighe na u kôndon yemen sha zulum la, ér: “Hii sha Mose kua uprofeti cii [Ruamabera u ken Zwa Heberu la], A gba pasen [mbahenen nav mbagenev uhar] akaa a sha iyol Na ken icighanruamabera cii.” Ayange nga kar yô, Yesu ande hen mbaapostoli nav mba jighjigh man mbagenev. Takerada u Luka za hemen nahan ér: “A kaa a ve er: Angan ka akaaôron Am a M ôr ne je er M lu a ven imôngo la, Mer, ka u akaa a i nger sha a Mo ken atindiakaa a Mose man uprofeti man upasalmi á kure sha mi vough keng.” (Luka 24:27, 44) Luun er Ruamabera u ken Zwa Heberu la yange ya tsegh, kera  lu a inja ga yô, u hen wer Yesu ma lu ôron akaa a i nger ker la sha shighe u kure tom na shin tar laa?

Shighe u i ver nongo u Kristu la kpa, mbadondon mba Yesu za hemen u ôron akaa a ken Ruamabera u ken Zwa Heberu la, sha u tan iwanger sha akaaôron a profeti aa á lu a kure ga la man sha akaawan a injaa a ken Tindi u Mose kua ungeren mba mbacivir Aôndo mba ngise mba yange ve er akaa a taver Mbakristu ishima u civir Aôndo sha jighjigh la kpaa. (Aerenakaa 2:16-21; 1 Mbakorinte 9:9, 10; Mbaheberu 11:1–12:1) Apostoli Paulu nger wener, ‘icighanruamabera cii ka Aôndo A ne i nger ye. Ngu a inja.’ * (2 Timoteu 3:16) Ruamabera u ken Zwa Heberu la ngu a inja nena?

Akaawan a Wasen Se Ayange Ayange

Hen ase sha kwagh u mzeyol u ior nyaghen akuraior agen u a ngee ainge yum ne. Gum Oretiopia ugen u lun anyom 21, u a lu ken gar ugen sha Ityoughkitaregh ki Yuropa yô, kaa ér: “Ka sea soo u duen geri yô, se due imôngo. Alaghga se lu imôngo yô, vea er se kwagh ga.” A za hemen wener: “Se mba dugh geri ahwa ataratar aikighe ga, hemban je yô sha kômgbenda. Ka sea due, ior vea nengen a vese yô ve gba lamen sha a vese er se lu ioril yô.” Ruamabera u ken Zwa Heberu la ôr kwagh u mzeyol u vesen ne kpa?

Yange i kaa a Mbaiserael mba sha ayange a tsuaa la ér: “Aluer shiror una lu her a we ken tar wen yô, de eren nen un ican ga. Shiror u a lu her a ven yô, a̱ lu ne er ka or u tar la jim yô, a̱ doo u ishima er iyol you nahan; gadia ne kpaa ngise ne lu ushirmbaiorov ken tar u Igipiti.” (Levitiku 19:33, 34) Tindi u tar u Iserael u sha ayange a tsuaa u i ter sha heen ne kaa ér i waan mba teman twev shin “ushirmbaiorov” ikyo, man ka ken Ruamabera u ken Zwa Heberu la tindi ne a lu ye. U nenge wer aluer ior er tom sha kwagh u tindi ne a we se la nahan mzeyol u ior nyaghen akuraior agen ne una bee ga he?

Er Ruamabera u ken Zwa Heberu la a er kwagh u inyar vighe vighe ga nahan kpa, gema ngu a akaawan a injaa sha gbaa ne kpaa. U tesen ikyav yô, Anzaakaa 22:7 kaa ér: “Or u yan injô yô, ka kpan u or u nan injô la.” Ior mba wasen ior mhen sha kwagh u inyar mba ainge kpishi  kaa ér or ka nana yamen kwagh sha injô dang dang yô nan kpera ican nan wa ikyum.

Heela tseegh ga, Tor Solomon u yange ngee a inyaregh kpishi, zan zan hegen kpa i lu ior kpuaa tseegh ve lu er un nahan la, ôr kwagh u ieren i ior kpishi ve lu a mi nyian i keren inyaregh kpoghuloo la. A kaa ér: “Or u azurfa a doo nan yô, azurfa una kuma nan ga; u nan keren inyaregh ki ngeen kpaa, mtsera una kuma nan ga; kwagh ne kpaa ka gbilinkwagh tsô.” (Orpasenkwagh 5:10) Kwaghwan na ne doo je zua ga!

Ishimaverenkeghen i Kwagh u ken Hemen

Bibilo jimin cii ngi a itinekwagh i môm tseegh. Ka i je ne: Aôndo una er tom a Tartor u Yesu a hemen u la sha u kenden a mtemtor na sha shi tseghan iti Na kpaa.—Daniel 2:44; Mpase 11:15.

Ruamabera u ken Zwa Heberu la pase se vighe vighe er uma una lu ken Tartor u Aôndo la yô. Akaa a se hen ker ne sur se asema shi kporom a vese hen Yehova Aôndo, un u a lu Imbor i msurshima shon la. U tesen ikyav yô, profeti Yesaia yange kaa wener bem una lu hen atô u inyamtoho man uumace: “Zum la gbaseela una teman vea waniyôngo imôngo, anyam kpaa una yaven a wanivo imôngo; gumbua man gumbegha kua icighanile vea teman imôngo, wanye u kpeghee una hemen ve.” (Yesaia 11:6-8) Kwagh ne doo tsô!

Man gema ior mba i nyaghen ve sha ci u zwa ve kua mba ve lu uange kpoghuloo shin mba ican i ker ve la yô, Ruamabera u ken Zwa Heberu la kaa ér nyi sha kwagh ve? Ruamabera ne tsengaôron kwagh u Kristu Yesu ér: “Una yima oribanave zum u nana vaa yô, man icanor kua or u nan lu a orwasen ga kpaa. Mhôônom maa kôr un a mbaatsanev man mbaibanave, una yima uuma mba mbaibanave kpaa.” (Pasalmi 72:12, 13) Uityendezwa mban doo, sha ci u ka ve wase ior mba ve ne ve jighjigh la u lun a ishimaveren ér guda ngu van.—Mbaheberu 11:6.

Ka nahan ve Aôndo yange mgbegha apostoli Paulu nger mkaanem man ye. A kaa wener: ‘Akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la’! (Mbaromanu 15:4) Sha kpôô yô, zan zan hegen kpa Ruamabera u ken Zwa Heberu la ngu vegher u hange hange u Bibilo, i i̱ lu Mkaanem ma Aôndo la. Ruamabera ne ngu a inja sha ci wase nyian. Se na jighjigh ser ú seer henen kwagh u Bibilo jimin cii i tese yô, ka nahan man ú seer kporom ikyua a Orngeren u Bibilo, Yehova Aôndo ye.—Pasalmi 119:111, 112.

[Footnotes]

[Box on page 6]

IKYURYAN I TSE SHIN RUAMABERA U KEN ZWA HEBERU?

Ishember i “Ikyuryan i Tse” la ngi ken 2 Mbakorinte 3:14 ken Icighan Bibilo. Mba yer ishember i “ikyuryan” i í nger ken ivur ne la ken zwa Grika ér di·a·theʹke. Inja i ishember i “Ikyuryan i Tse” i ken 2 Mbakorinte 3:14 ne ér nyi?

Orngeren dikishenali ugen, mba yer un ér Edward Robinson, a kaa wener: “Er ikyuryan i tse la i lu ken ityakerada i Mose nger la yô, [ishember i di·a·theʹke] la tile sha ityough ki ityakerada i ikyuryan, ngeren u Mose, ka tindi je la.” Apostoli Paulu yange lu ôron kwagh u Tindi u Mose la ken 2 Mbakorinte 3:14, man tindi ne gema ka a ka anvegher u Ruamabera u yange i nger cii man shighe u Mbakristu la tsô.

Nahan yô, hemba doon u a yilan ityakerada i hiihii i ken Icighan Bibilo, i í lu 39 la ér nyi? Yesu Kristu man mbadondon un yange ve ôr kwagh môm u tesen ér ityakerada i ken Bibilo ne ya tsegh ga, kpa ve yilan i ér “icighanruamabera.” (Mateu 21:42; Mbaromanu 1:2) Nahan yô, Mbashiada mba Yehova mba yer Ikyuryan i Tse ér Ruamabera u ken Zwa Heberu sha ci u yange i hemba ngeren ityakerada i ken Bibilo ne ken zwa Heberu. Ruamabera u ior ve senge ér ka Ikyuryan i He la kpa, mba yer un ér Ruamabera u Mbakristu u ken Zwa Grika, sha ci u ior mba Aôndo yange yar tom a ve ve nger ityakerada i ken Bibilo ne cii nger i ken zwa Grika.

[Pictures on page 4]

Or nana fatyô u lun orjir u tsoghul ishima man ter u lun a dooshima kua huror kpaa

[Picture on page 5]

Yesu yange ôron ior akaa a ken Ruamabera u ken Zwa Heberu la

[Pictures on page 7]

Ka akaawan a ken Bibilo a nyi aa wase or nana tsua akaa a injaa?