Ijirôron I Mimi Doo Yehova Ishima
Ijirôron I Mimi Doo Yehova Ishima
“Mo TER, ijirôron i mimi doom.”—YESAIA 61:8.
1, 2. (a)Inja i “ijirôron i mimi” ér nyi, man “i mimi ga” di ér nyi? (b) Bibilo ôr kwagh u Yehova man ijirôron na i mimi ér nyi?
I PASE ijirôron i mimi ér ka ‘mtev u tôvon sha ikyaa hen koti, sha er á fa pe á na ibo shin ishô yô.’ Man gema di ijirôron i mimi ga yô ka u nzughul a or shin kôron or ihyom shin eren a or caveraa.
2 Mose yange nger kwagh u Yehova, Tor u Hemban Cii la anyom kar hegen nôngo u kuman er 3,500 nahan, ér: “Igbenda Na cii, ngi jighilii. Ka Aôndo u jighjigh, ngu a ifer ga.” (Duteronomi 32:4) Shi anyom nga karen ka hembe er deri utaankaruhar nahan yô, icighan jijingi u Aôndo mgbegha Yesaia nger mkaanem man ér: “Mo TER, ijirôron i mimi doom.” (Yesaia 61:8) Heela tseegh ga, ka ker ken derianyom u hiihii la yô, Paulu kaa wener: “Kwagh u a lu u perapera ga kpaa ngu hen Aôndo shinii? Mayange ga.” (Mbaromanu 9:14) Peteru kpa ôr kwagh u Aôndo ken derianyom shon ér: “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una rumun nan.” (Aerenakaa 10:34, 35) Sha mimi yô, “kwagh u mimi doon TER ishima.”—Pasalmi 37:28; Malaki 3:6.
Ieren i Nzughul a Mbagenev la Dumbur Hegen
3. Ieren i nzughul a ior la yange i hii nena?
3 Ka i taver ior kpishi nyian u eren a mbagenev sha inja. A fatyô u nzughul a vese hanma ijiir cii, er sha ijiirtom man ken makeranta nahan. Mbahemenev asev kpa vea nzughul a vese, shi a fatyô u nzughul a vese sha igbenda igen kua hen tsombor wase je kpaa. I hii u nzughul a ior ka kwagh u nyian a mi ga. Ieren i nzughul a mbagenev la yange i hii shighe u Satan Diabolo, u a lu or u ken jijingi u hemban ato yange mee mbamaren asev mba hiihii ve hemba ato shi ve per tindi la. Adam man Ifa kua Satan yange ve nzughul a ian i Yehova na ve i tsuan kwagh u ve soo la; kwagh u ve er la lu sha mi ga cii. Aeren a ve a bo la va tsombor u uumace jimin cii a ican man ku.—Genese 3:1-6; Mbaromanu 5:12; Mbaheberu 2:14.
4. Ior hii u nzughul a mbagenev ica i gba hegen nena?
4 Anyom kar hegen er 6,000 nahan hii shighe u i hemba ato ken Eden la. Man hii shighe la zan zan hegen ior mba a de u nzughul a mbagenev ga. Ka er Satan a lu tor u tar ne ve kwagh a lu nahan ye. (2 Mbakorinte 4:4) Ngu or u aie shi ka ter u aie, shi ngu ormsende man or u hendan kwagh a Yehova kpaa. (Yohane 8:44) Satan ka a nzughul a ior i vihi kpen kpen. U tesen ikyav yô, un kpa lu môm ken mba ve na ieren i bo i samber sha tar, sha ayange a Noa shighe u Mngerem ma Deemee lu a va ga la. Nahan Aôndo kaa ér: “Isholibo i or kehe sha won, man hanma mhen u ishima i nan kpaa lu u bo tseegh gbem.” (Genese 6:5) Sha ayange a Yesu la kpa kape kwagh lu je la. Yesu kaa ér: “Hanma iyange zayol u i lu a mi la, kuma i.” Kwaghôron ne tese ér hanma iyange yô, mzeyol banen ga, er u nzughul a mbagenev nahan. (Mateu 6:34) Kwagh u Bibilo i er ne ka mimi, i̱ kaa ér: “Akaa a i gbe a sha won cii la nga kinen imôngo nga toghor zan zan hegen.”—Mbaromanu 8:22.
5. Er nan ve ieren i nzughul a mbagenev la i hembe ngeen sha ayange ase ne a ashighe agen ciilii?
5 Mbamzeyol mba ieren i nzughul a mbagenev i ve a mi la hii ica i gba. Man hegen je yô, hemba vihin cii. Er nan kwagh a lu nahana? Ityôkyaa yô, tar u ú vende u civir Aôndo ne ngu ken “ayange a masejime” anyom imôngo hegen, man er u lu yemen u za kuusu yô, ngu tagher a “ashighe a ican” tsung. Bibilo tsengaôron ér ken ashighe a ican ne ior “vea hingir mbawan ayol a ve ikyo tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, . . . man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve ikyo ga man mbamoron ayol a ve.” (2 Timoteu 3:1-5) Ka aeren a dang er angan nahan ka a na ve ior ve nzughul a mbagenev sha igbenda kposo kposo ye.
6, 7. Ka bocan u nyi uumace ve lu tagher a mi ayange nee?
6 Er i gbe je ka ken derianyom u a kar la i hembe nzughul a ior cii ye. Ityôkyaa yô, ka ken derianyom shon i hemba nôngon ityav cii ye. U tesen ikyav yô, mbatôvon sha akaa a mbayiase ker ahaba ér ken ityav mbi Tar Cii mbi sha Uhar mbira tseegh i wua ior kuma er miliôn 50 zan zan 60 nahan. Ior mba í hemba wuan ve yô lu mbaaderapupuu. Lu nomso man kasev man mbayev mba ve fa kwagh u ityav mbi shon kpaa ga yô. Er ityav mbira bee kera je kpa, i er ayôôso sha ajiir kposo kposo i wua ior umiliôn imôngo; shi ken ayôôso ne kpa lu mbaaderapupuu i hemba wuan ye. Ka Satan a lu mgbeghan ior ken ijime ér ve nzughul a mbagenev nahan ye, sha ci u ishima vihi un, gadia a fa ér ica a gba ga tsô Yehova una tim un kera. I ôr kwaghôron u profeti ken Bibilo sha kwagh na ér: “Diabolo sen shin ven, ishima vihi un tsung gadia a fa er shighe na a kera vese ga yô.”—Mpase 12:12.
7 Hanma inyom yô, ityar kposo kposo ka i vihi inyaregh je i gande ôron sha u varen ikyav mbi utyav shi nôngon ityav kpaa. Ior umiliôn uderi imôngo mba a ijiir i tsan man kwaghyan kua akondo a zeren ga. Luun er a vihin inyaregh kin cii sha u eren akaa a aa na ior mkpeyol nahan ma i doo kpen kpen. Ior mba kuman er biliôn môm nahan mba a kwaghyan ga, kpa mbagenev gema mba a mi kpishi. Kwaghtôvon ugen u Mzough u Ityar Cii a tev yô tese ér hanma inyom yô, ijen ka i wua mbayev i nôngo u kuman er miliôn utaan nahan. Nenge imba ican i yan ne sha wono! Shi kasev mbagenev ka ve vihi iyav, ve wua anikyundanev mba ve lu a fa kwagh môm môm ga yô. I ker ahaba ér hanma inyom yô, kasev ka ve vihi iyav i kuma miliôn 40 zan zan 60 nahan tar sha won cii. Nenge imba ican i eren mbagenev la sha wono!
8. Ka an tswen nana fatyô u sôron mbamzeyol mba uumace?
8 Taver mbahementar kpishi u sôron mbamzeyol mba ve lu zan uumace iyol nyian ne. Uumace vea nôngo nan nan kpa, vea fatyô u been a mbamzeyol mban ga. Mkaanem ma Aôndo tsengaôron ér ken ayange a ase ne, “udangmbaiorov man mbatsughunior vea yem hemen hemen vea hemba vihin a vihi kwagh. Mba tsughun ior man ve di kpaa mba gem mba tsughun ve.” (2 Timoteu 3:13) Ieren i nzughul a mbagenev la i̱ hingir ikye i uumace je yô, ka kwagh u or môm kpa nana fatyô u been a i̱ ga. Ka Aôndo u igbenda na cii i lu jighilii la tswen una kar a ieren ne kera ye. Ka un tswen una fatyô u timin Satan man azôv a na kua uumace mbaaferev kera ye.—Yeremia 10:23, 24.
Mhen u Mbagenev sha Kwagh u Ican i Yan
9, 10. Yange iyol kpe Asav sha ci u nyi?
9 Sha ashighe a tsuaa la, mbangeren Bibilo mbagenev kpa lan ve ishima er i hii ve Aôndo a lu a er kwagh sha mbamzeyol mba uumace ga, man er i hii ve a lu a ôr ijir sha mimi man sha perapera kpaa ga yô. De se nenge ikyav i orgen u yange lu sha ashighe a i ngeren Bibilo la. Ngeren u sha ityou u Pasalmi 73 la yila or shon ér Asav. A shi nan kpa ngeren ne ngu ôron kwagh u ityagher Orlevi u wan atsam, u lu hen shighe u Davidi lu Tor la, gayô ngu ôron kwagh u mbawanatsam mba hen ya u Asav. Asav man tsombor na yange ve nger atsam kpishi, i waan a ken mbamkombo mba mbacivir Aôndo. Nahan kpa, sha shighe ugen la, iyol kpe orngeren pasalmi ne u civir Aôndo. Yange nenge ér ka kpen mbaaferev iyol, shi lu un inja er akaabo nga tseren ve ga nahan.
10 Tsô a nger ér: “Gadia m lu tômon kwagh u mbaihyaghev, zum u m nenge ikyôl-laghen i mbaaferev la yô. Gadia ma kwagh u vihin tseren ve ga, ayol a ve taver gbong gbong. Ican eren ve er ior mbagenev nahan ga, man shi kwagh u bo te sha a ve er ior mbagenev nahan kpaa ga.” (Pasalmi 73:2-8) Nahan kpa, shighe kar yô orngeren Bibilo ne nenge ér mhen na la ka u sha mi ga. (Pasalmi 73:15, 16) Orpasalmi ne nôngo ér una kôôm mhen na, nahan kpa taver un er i hii ve mbacivir Aôndo ve ye ican kpa mbaaferev yô kwagh a tseren ve ga yô.
11. Orngeren pasalmi Asav yange va mase fan nyi kwagha?
11 Ken masejime yô, orjighjigh u ngise ne fa kwagh u una tser mbaaferev yô, yange fa er Yehova una va tim ve kera yô. (Pasalmi 73:17-19) Davidi nger ér: “Ver ashe hen TER, wa ikyo sha gbenda Na, tsô Una kende u sha, ú ya dyako u tar, ú nenge mtim u á tim mbaaferev kera yô.”—Pasalmi 37:9, 11, 34.
12. (a) Yehova wa ishima u eren nyi sha ifer man ieren i nzughul a mbagenev laa? (b) U ungwa kwagh u Yehova una va er a ieren i nzughul a mbagenev la nahan ka u ken ishima nena?
12 Sha mimi yô, Yehova wa ishima ér shighe a kuma yô, una kar a ifer man ieren i nzughul a mbagenev la sha tar kera. Kwagh ne ka kwagh u i doo u hanma Orkristu u jighjigh cii nana umbur hanma shighe yô. Hanmaor u nan eren ishima i Yehova ga cii yô una tim nan, kpa mba ve eren ishima na yô una na ve injar. “Ashe Na nga kenger, akurashee a Na nga karen ônov mba iorov. TER ngu karen orperapera kua iferor kpaa; or u ipira i doo nan la yô, A kôr nan ihyom. Una haa akausu a kpenger kpenger sha mbaaferev kua sulfur [man] ahumbe a hian. Gadia TER ka u perapera je, perapera doo Un ishima.”—Pasalmi 11:4-7.
Tar u He u a Nzughul a Or Ker Ga La
13, 14. Er nan ve perapera man ieren i vough ia dumbur ken tar u he laa?
13 Yehova una tim tar u u lu sha ikyev i Satan, i nzughul a ior sha u ne una gema a va a tar u he u doon ashe. Ka Tartor u Aôndo a ver sha, u yange Yesu ôr a mbadondon un ér ve eren msen ér u va la ua hemen tar u he la ye. Hen shighe la, ifer man ieren i nzughul a mbagenev ia kera lu ga, a lu perapera man ieren i mimi tseegh ia lu ye. Nahan hen shighe la msen u se eren ser: “Tartor Wou u̱ va, i̱ er ishima You shin tar kpaa vough er i eren i Sha nahan” la una kure vough.—Mateu 6:10.
14 Bibilo pase hemen u se veren ashe gbenda a mi la, ka hemen u u sar hanmaor u nan lu a ishima i mimi cii u nengen a mi yô. Hen shighe la, kwagh u i ôr ken Pasalmi 145:16 la una kure sha mi vough. Ijiir ne kaa ér: “[We Yehova Aôndo] U bugh uwegh Ough, U ne hanma kwagh u uma sha isharen na, ka kom un.” Heela tseegh ga, Yesaia 32:1 kaa ér: “Nenge, tor [Kristu Yesu u a lu sha la] una tema tor sha perapera, atiator [mba ve til sha ityough ki Kristu shin tar la] kpaa aa kura tar sha ijirôron i mimi.” Yesaia 9:7 tsengaôron kwagh u Tor Yesu Kristu ér: “Tarkuran kua bem vea lu a ikighir je ga, sha ikyônough ki torough ki Davidi man sha tartor na kpaa, sha er á ver u dông u̱ lu taveraa sha ijirôron i vough kua sha perapera, hii hegen je zan zan gbem sha won. Gbashima u TER u akum a Sha una er kwagh ne.” Ú nenge a iyol you ken tar u a hemen u sha perapera ne kpa?
15. Yehova una er nyi sha ci u uumace ken tar u he laa?
15 Ken tar u he u Aôndo la, ityôkyaa ia lu i ôron mkaanem ma i er ken Orpasenkwagh 4:1 la ga. Ivur la kaa ér: “M gema m nenge ipila i i eren shin tar cii; man nenge, mliam ma mba i kighir ve la, man ve lu a orsurun ve ishima ga; mba ve kighir ve la ve lu a tahav, kpa ve lu a orsurunshima ga.” Sha mimi yô, a taver se kpishi u gbidyen kwar a ishima yase i i yen ne nengen er tar u he u perapera la ua lu yô. Ifer ia kera lu ga, hanma iyange yô, a lu akaa a dedoo tseegh se ember ye. Hanma kwagh u sha mi ga cii Yehova una sôr un sha gbenda u u gande mfe wase yô. Nahan mkaanem ma Yehova Aôndo yange na apostoli Peteru nger ne ma vough, ma kaa ér: “Se mba keghen Usha mba hev je man tar u he u perapera una tema ker yô, sha ityendezwa Na la.”—2 Peteru 3:13.
16. I ver “Usha mba hev” kera kpaa nena, shi a fatyô u kaan ér mba kohol ior mba vea lu “tar u he” la nyian nena?
16 Sha kpôô yô, i ver “Usha mba hev,” mba ve lu gomoti u Aôndo, u a lu sha ikyev i Kristu la kera kpaa. Mba vea kohol vea hingir imaagh ki “tar u he” la di ka ior mba i sar ve u fan kwagh u Aôndo la, ve kpaa mba kohol ve ken ayange a masejime ne. I hila kohol iorov zurum miliôn utaankaruhar nahan ken ityar er 235 nahan, i kohol ve ken atôônanongo a kuman er 100,000 nahan. Ior umiliôn umiliôn mba i kohol ve ne mba henen perapera man aeren a vough a Yehova, nahan dooshima u Kristu u ve lu a mi la kange ve, mba ken mzough tar sha won cii. Mzough ve ne ngu ilian ga, shi a hii ica i gba hegen. Mzough ne hemba nyityô mzough u ior mba ve lu sha ikyev i Satan cii. Dooshima man mzough ve ne ka mule u ashighe a hemban doon cii a se va ember ken tar u he u Aôndo la; hen shighe la, a hemen tar sha perapera man sha mimi.—Yesaia 2:2-4; Yohane 13:34, 35; Mbakolose 3:14.
Satan Una Hemba Ga
17. Er nan ve num u Satan una mase tan sha ior mba Aôndo la ua lu gbilin kwagha?
17 Ica a gba ga tsô, Satan man mbadondon un vea mough num sha mbacivir Yehova ér vea tim ve kera. (Esekiel 38:14-23) Kwagh ne kpa ka môm ken akaa a Yesu yila ér, “zegecan . . . i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga.” (Mateu 24:21) Satan una hemba kpa? Mayange ga cii. Mkaanem ma Aôndo kaa a vese ér: “Kwagh u mimi doon TER ishima, man shi te mba i doo Un a ve la kera ga. Mba koson ve gbem, kpa tsombor u mbaerenafer yô, á tim ve kera. Mbaperapera vea ya dyako u tar, vea lu ken u gbem.”—Pasalmi 37:28, 29.
18. (a) Aôndo una er nan sha num u Satan una ta sha ior Nav laa? (b) Er nan ve i doo u ú hide u gbidye kwar sha kwagh u i kaa ér ieren i mimi ia dumbur shin tar laa?
18 Num u Satan man nongoior na vea ta sha ior mba Yehova la a lu ilyahan i masetyô i Satan una laha Yehova je la. Yehova tsengaôron sha ikyev i profeti Sekaria ér: “U nan bende a ven yô, nan bende a hongorshe [Wam] je” ve. (Sekaria 2:8) Ka inja er or ngu nalegh hôwe ér nana kuma hongorshe u Yehova nahan. Yehova una wa ave ikyum una kenger a kenger ga, kpa una kar a aferaior la kera ave ave je. Ka ior mba Yehova ve hembe lun a dooshima sha tar nyian cii ye, mba ken mzough man ken bem shi mba kor tindi kpaa. Nahan Satan una ta num sha ve kpa a lu sha mi ga cii. Mayange je, Yehova u ‘kwagh u mimi a doon’ un la una na Satan ian ga cii. Una ta ikyaa a ior nav, una tim mbaihyomov vev cica cii, ieren i mimi ia dumbur hen shighe la, shi mba ve civir Aôndo u mimi cii vea zua a myom. Akaa a Aôndo una va er ken hemen la ka akaa a sagher iyol kpen kpen!—Anzaakaa 2:21, 22.
Ú Na Mlumun Wer Nyi?
• Er nan ve ieren i nzughul a mbagenev la i dumbur nyian yum nahana?
• Yehova una sôr mbamzeyol mba ieren i nzughul a mbagenev i ve a mi shin tar la nena?
• Ka nyi i hembe doon we ken kwaghngeren ne sha kwagh u i kaa ér perapera una hemba ifer laa?
[Study Questions]
[Picture on page 9]
Ifer yange i dumbur shighe u mngerem ma deemee lu a va ga la, ken “ayange a masejime” ne kpa kwagh kaha ga
[Picture on page 10]
Ken tar u he u Aôndo la, ieren i mimi man perapera vea kar a tile sha ityough ki ifer