Er Kwagh U Una Na Uma Wou Una Hemba Lun A Inja Yô

“Hanma kwagh u a lu a iôôn tsô yô, a̱ wuese TER.”—PASALMI 150:6.

1. Pase er gumor ugen yange ker kwagh u una na uma na una hemba lun a inja yô.

 ORGEN vese ken tar u Korea, mba yer un ér Seung Jin, a kaa ér: “Yange m hen tom tweregh sha ci u sarem u wasen ior. Shi m nenge mer icivir man inyaregh ki me lu ortwer ve me zua a mi la kia nam msaanyol. * Er m va mase kaven mer mbatwerev ka ve wase ior er ve fetyô la tseegh yô, lanem ishima kpishi. Tsô m de tom tweregh m nyôr tom u shien ivue sha akaa, kpa tom ne wase mbagenev yum ga, nahan m nenge mer m lu eren kwagh u saan mo iyol tswen. Tom ne kpa duem ishima, tsô m nyôr tom tica, kpa ica i gbe ga yô, m nenge mer m lu tesen mbayevmakeranta akaa a mimi a m fa la tsô, m lu tesen ve kwagh u una na ve msaanyol u mimi ga.” Seung Jin lu keren kwagh u una na uma na una hemba lun a inja yô, er ior kpishi ve lu eren nahan.

2. (a) Inja i u lun a awashima ken uma ér nyi? (b) Er nan ve se fe ser Orgban se ngu a awashima u a ne ve a ver se sha tara?

² Inja i u lun a awashima u mimi ken uma yô, ka u fan ityôkyaa i se lu uma la man kwagh u se we ishima u eren ken uma man er i hii ve se lu eren un yô. Uumace vea fatyô u lun a imba awashima ne kpa? Vea fatyô yum! Orgban se na se mfe man imoshima man tahav mbu henen sha kwagh, nahan kwagh ne tese ér ngu a awashima u dedoo u veren se sha tar. Aluer se mba eren sha akaa a Orgban se a soo la yô, se lu a awashima u mimi.

3. Awashima u Aôndo a lu a mi sha ci u uumace la wa nyi man nyi keregh?

³ Bibilo pase ér awashima u Aôndo a lu a mi sha ci wase la wa akaa ker kpishi. U tesen ikyav yô, gbenda u kpilighyol u i er se la tese ér mimi je, Aôndo ngu a dooshima u tangen iyol ga. (Pasalmi 40:5; 139:14) Nahan, aluer se mba tesen mbagenev dooshima u tangen iyol ga, er Aôndo nahan yô, se mba eren kwagh sha awashima u Aôndo. (1 Yohane 4:7-11) Shi aluer se mba eren sha akaawan a Aôndo yô, aa wase se u eren kwagh sha awashima na u sha dooshima la.—Orpasenkwagh 12:13; 1 Yohane 5:3.

4. (a) Gba u se er nyi ve se lu a awashima u mimi? (b) Ka kwagh u hemban cii u nyi hanmaor nan soo u zuan a mini?

 ⁴ Aôndo shi yange wa ishima ér uumace cii ve lu saan saan shi ve lu ken bem ayol a ve kua akaa agen a á gbe la kpaa. (Genese 1:26; 2:15) Nahan kanyi i gbe u se er ve se lu saan saan shi se lu ken mkpeyol man ken beme? Er wanye u kiriki ka nan soo ér mbamaren mba nan ve lu vea nan sha er a saan nan iyol shi a kpe nan iyol nahan, se kpaa aluer se soo ser se fa awashima u uma jim yô, gba u se ya ikyar i dedoo a Ter wase u sha la. (Mbaheberu 12:9) Aôndo bugh se gbenda u lun vea na er wan a ter nahan, gadia a na se ian i kporom hen a na shi ongo mbamsen asev kpaa. (Yakobu 4:8; 1 Yohane 5:14, 15) Aluer se mba “zenden vea Aôndo” sha jighjigh shi se hingir akar a na yô, se na a saan Ter wase u sha la iyol shi se wuese un kpaa. (Genese 6:9; Anzaakaa 23:15, 16; Yakobu 2:23) Man ka kwagh u hemban cii u hanmaor nan soo je ne. Orpasalmi nger ér: “Hanma kwagh u a lu a iôôn tsô yô, a̱ wuese TER.”—Pasalmi 150:6.

Awashima u Uma Wou jim Kanyi?

5. Aluer se har ishima yase cii sha inyaregh ki keren yô, se mba eren kwagh sha kwaghfan ga sha ci u nyi?

⁵ Aôndo shi yange wa ishima ér se nengen sha iyol yase man tsombor wase sha inja. Kwagh ne wa u se kuren mbamgbe asev mba sha iyol man mba ken jijingi la kpa ker. Nahan kpa, aluer se mba kuren mbamgbe mban yô, gba u se er kwagh sha kwaghfan sha er asaren a taregh man akaa ase aa imbishi akaa a ken jijingi, a a hembe lun a inja la ga yô. (Mateu 4:4; 6:33) Kwagh ka a er i vihi yô, ior kpishi na uma ve jimin cii sha u keren inyaregh. Nahan kpa, aluer se har uma wase cii sha u keren inyaregh ser se kure mbamgbe asev yô, se mba eren kwagh sha kwaghfan ga. Ibaver i i sember tôvon ior mba lun a inyaregh kpishi ken tar u Ashia ve i zough a mi la tese ér mbanyarev mban kpishi “za iti shi er akaa kpishi sha inyar, nahan kpa mba ken mkpeyol ga shi mba a mbamzeyol mbagenev kpaa.”—Orpasenkwagh 5:11.

6. Ka kwaghwan u nyi Yesu a we sha kwagh u zendan inyaregh ityôô?

⁶ Yesu yange ôr kwagh u “icugh i inyar.” (Marku 4:19) Inyaregh ka kwagh u icughugh nena? Ka kwagh u icughugh sha ci u ka i lu inja er kia na or msaanyol nahan, kpa ka gbilin tsô. Tor Solomon nger ér: “Or u inyaregh ki doo nan ishima yô, mayange inyaregh kia kuma nan ga.” (Orpasenkwagh 5:10, The New English Bible) Kpa, or nana fatyô u zendan inyaregh ityô shi civir Aôndo a ishima i mômô? Ei, nana fatyô ga. Yesu kaa ér: “Or môm môm ngu u nana fatyô u eren uter uhar tom ga; gadia nana kôr ugen ihyom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.” Ka inyaregh Yesu yange wa mbahenen nav kwagh ér ve koso shin tar ga, yange kaa a ve ér ve koso “akaa a injaa sha,” inja na yô, ve lu a iti i dedoo vea Aôndo u a ‘fe kwagh u a gbe ve je er ve lu a sôn Un ga’ la.—Mateu 6:8, 19-25.

7. Se fatyô u kôron ave sha “uma u a lu uma jim la” nena?

⁷ Apostoli Paulu yange nger Timoteu u lu ikyar na u tom la washika, wa un kwagh sha kwagh u inyaregh ki zendan la taver taver. Á kaa a na ér: “Mba ve lu mbanyarev yô, . . . wa ve kwagh wer, ve̱ ver ishima sha Aôndo u A ne se akaa cii wuee sha u se̱ er kwagh a mi yô. . . . ve̱ naan iwua, ve̱ panden kwagh ve̱ naan mbagenev kpaa, nahan man vea wa imagh ki dedoo sha ci ve ayol a ve ken hemen ye, sha u vea kôr ave sha uma u a lu uma jim la” yô.—1 Timoteu 6:17-19.

“Uma u A Lu Uma Jim La” Kanyi?

8. (a) Er nan ve ior kpishi ve soo inyaregh ki keren man icivir yumu? (b) Kanyi kwagh ambaaior la a fe ga?

⁸ Ior kpishi hen ér inja i ishember i “uma u a lu uma jim” la yô, ka uma u mkpeyol man u msaanyol. Magazin ugen u tôôn abaver u ken tar u Ashia kaa ér: “Ior mba ve nengen senema shin akaa a i tesen sha Televishen ka ve lu a isharen sha akaa a ve nengen a mi la shi ve henen sha akaa a alaghga vea lu a mi la kpaa.” Mbagenev kpishi har uma ve jimin cii sha u  keren inyaregh man icivir. Mbagenev ker inyaregh man icivir je vihi iyev vev man mkpeyol ve kua icombor ve shi ta akaa a ken jijingi kpa kera. Ka ior kpuaa tseegh ve fe ér uma u mkpeyol man u msaanyol la ka “jijingi u taregh” ye, man jijingi ne ka mhen u vesen u a lu hemen ior umiliôn shin tar shi a lu mgbeghan ve u hendan a Aôndo man awashima na sha ci wase yô. (1 Mbakorinte 2:12; Mbaefese 2:2) Kape i lu ve ior kpishi i saan ve iyol nyian ga je la.—Anzaakaa 18:11; 23:4, 5.

9. Uumace vea nôngo nan nan kpa vea fatyô u eren nyi ga, man ka sha ci u nyi?

⁹ Gema di mba ve ne ayol a ve u eren akaa sha ci u mkpeyol u ior, er u been a ijen man angev kua ior mba ve nzughul a mbagenev la di ye? Tom u injaa u ve eren la man mne u ve ne ayol a ve sha u wasen mbagenev la wase ior kpishi. Er ve lu nôngon kwagh kpoghuloo nahan kpa, vea kôrcio u sôron hanma kwagh shin tar ér u lu guda shin u doo ga. Sha ci u nyi? Sha ci u “tar cii ngu sha ikyev i Orbo,” ka Satan je la, man á soo ér tar u doo cuku kpaa ga.—1 Yohane 5:19.

10. Mbajighjigh vea ember “uma u a lu uma jim la” hanma shighe?

¹⁰ Aluer or ngu a ishimaveren sha uma u ken hemen ga yô, mlu u nan vihi kpen kpen! Paulu nger ér: “Aluer ka sha uma u hegen ne tseegh man se lu a ishimaverenkeghen sha Kristu yô, se hemba kôron mhôônom a ior cii.” Mbagenev mba ve ne jighjigh a uma u hegen ne tseegh la ka ve kaa ér, “Se gbaa yan nen akaa man akaa tsô, gadia kper se mba kpen.” (1 Mbakorinte 15:19, 32) Kpa se yô, se mba a ishimaveren, “se mba keghen Usha mba hev je man tar u he u perapera una tema ker yô, sha ityendezwa [i Aôndo] la.” (2 Peteru 3:13) Hen shighe la Mbakristu vea ember “uma u a lu uma jim la,” ka “uma u tsôron” je la, a lu sha gayô a lu shin tar sha ikyev i gomoti u Aôndo u una hemen sha dooshima la.—1 Timoteu 6:12.

11. Er nan ve i lu kwagh u injaa kpishi u eren tom sha u suen Tartor u Aôndo?

¹¹ Ka Tartor u Aôndo tseegh ua fatyô u sôron mbamzeyol mba uumace ye. Kwagh u a hembe doon cii u or nana er yô, ka u eren ishima i Aôndo sha u suen Tartor na. (Yohane 4:34) Aluer se mba eren nahan yô, se kôr ikyar i dedoo vea Ter wase u sha la. Shi a saan se iyol er se lu shilen tom ne vea anmgbianev asev mba nomso  man mbakasev umiliôn imôngo, mba ve lu a ishimaveren i môm a vese la.

De Akaa Agen a Kar Ú sha u Eren Kwagh u Vough

12. Pase er uma u hegen ne a lu kposo a “uma u a lu uma jim la” yô.

¹² Bibilo kaa ér, tar u hegen ne “ngu karen kera kua isharen i u kpaa.” A tim tar u Satan ne kera gburu gburu kua ior mba keren ér vea za ati man mba zendan inyaregh ityô mbara cii, “kpa u nan eren ishima i Aôndo yô, nan ngu lun gbem sha won.” (1 Yohane 2:15-17) “Uma u a lu uma jim” la, ka uma u tsôron u se va zua a mi ken Tartor u Aôndo je la. Uma la ka u been mayange ga shi a kuma sha nyityôkwagh i se de ser i kar se hegen sha u civir Aôndo la. Uma ne ngu kposo a inyaregh ki or fe kwagh u ki ga la man iengem man iember i gbilinigh i tar u ne la.

13. Nom man kwase ugen yange ve de akaa agen kar ve sha u eren kwagh u vough nena?

¹³ Hen ase sha kwagh u Henry man Suzanne ne. Ve na ityendezwa i Aôndo jighjigh a ishima i môm ér hanma or u nan ver Tartor u Aôndo hiihii ken uma u nan cii yô, Una wase nan. (Mateu 6:33) Er ve fe kwagh ne nahan yô, ve nyôr ya u taver ishe ga sha er a kera lu ve cii vea eren tom u sha tôndo vea kimbin ya ga yô. Ve er kwagh ne sha er vea hemba lun a ian i pasen kwagh u Tartor shi vea eren ityom i Aôndo igen vea ônov vev mbakasev mba uhar mbara yô. (Mbaheberu 13:15, 16) Nahan kpa, taver huror ve u ishima ishima ugen kpishi u kaven kwagh u ve er ne. Huror ve ne kaa a Suzanne ér: “Aluer u soo u nyôron ya u injaa yô, a gba u u de akaa agen a a kar u.” Kpa Henry man Suzanne yô fa ér aluer ve ver Yehova hiihii ken uma ve yô, vea zua a “ityendezwa sha uma u hegen ne kua uma u a lu van la kpaa.” (1 Timoteu 4:8; Titu 2:12) Mbayev vev mbakasev mbara vese hingir mba eren tom u pasen kwagh hanma shighe. Tsombor ne jimin cii nenge ér kwagh môm saa u ga; kpa ve gema ve zua a akaa a dedoo kpishi sha u keren uma u a lu “uma jim” la.—Mbafilipi 3:8; 1 Timoteu 6:6-8.

‘Lu er Kwagh Zua U a Tar Ga Nahan’

14. Aluer se hunde ishima sha kwagh u a lu u vesen ken uma la yô, ka akaa a vihin a nyi nahan aa tser se?

¹⁴ Aluer se hunde ishima sha kwagh u a lu u vesen ken uma wase la shi se ta “uma u a lu uma jim la” kera yô, kwagh a tser se. Kwagh a tser se sha ci u ‘anzughul a nyian ishima man inyaregh man ugurgurmbaakaav mba uma ne vea gema a imbishi se.’ (Luka 8:14) Aluer se de isharen i inyar man “akaa a nyian ishima a uma ne” ya tor ken a vese yô, isharen shon ia na se uve ityough ken akaa a taregh. (Luke 21:34) Kwagh ka a er i vihi yô, mbagenev de isharen i lun mbanyarev i i dumbur nyian ne ya tor ken ve, nahan “ve tsume ve undu jighjigh u nan, ve kuma ayol a ve sha atsan atô kposo kposo” shi ve ta mlu ve u dedoo vea Yehova la kpa kera. Nenge imba kwagh u vihin tsung u a er ve ne sha wono, gadia ve “kôr uma u tsôron” la ga.—1 Timoteu 6:9, 10, 12; Anzaakaa 28:20.

15. Ka sha nyi gbenda nahan tsombor ugen lu er ‘kwagh zua u a tar ga nahana,’ man kwagh ne wase ú nena?

¹⁵ Paulu kaa ér, “mba kwagh a zough ve a tar kpaa ve̱ lu er kwagh zua ve a u ga nahan.” (1 Mbakorinte 7:31) Keith man Bonnie dondo kwaghwan ne. Keith kaa wener: “M hingir Orshiada u Yehova shighe u m zurum u been makeranta u sôron anyi la. Yange gba u me tsua kwagh u me er yô. Luun er yange mea soo yô ma m hii u sôron ior kpishi anyi zuan a inyaregh ngôgh, kpa m nenge yô kwagh ne ma wa mciviraôndo wase agbe. Nahan m soo u lun a mbauangev kpishi ga sha er me seer lun a shighe u eren akaa a ken jijingi a tsombor wase shi nengen sha mbamzeyol vev mba ken ishima mbara kpaa yô, gadia se lu a mbayev mba kasev utaan. Er se zuan a inyaregh kpishi hanma shighe gayô, se hen u vihin inyaregh sha inja, nahan kwagh môm banen se ga. Tsombor wase cii lu ken mzough shi saan u iyol kpaa. Ken masejime yô, se cii se hingir u eren tom u pasen kwagh hanma shighe. Ônov asev mba kasev vôso noov saan saan, utar ken a ve mar mbayev vev. Icombor ve kpa ngi saan saan sha ci u hemba gban ve ishima u eren ishima i Yehova.”

 Awashima u Aôndo a̱ Hemba Gban We Ishima

16, 17. Ka unô i er kwagh u mfe u ve lu a mi la ken Bibilo, man i umbur ve nena?

¹⁶ Bibilo ôr kwagh u ior mba ve er ishima i Aôndo man mba ve er ga yô. Mbaganden man mbayev man ior mba ve dugh sha ajiir kposo kposo shi mbamlu vev kpa ve lu kposo kposo kpa vea fatyô u henen kwagh hen ior mba shon. (Mbaromanu 15:4; 1 Mbakorinte 10:6, 11) Nimrodi yange mar zegegar, kpa mar gar ne sha u hendan kwagh a Yehova. (Genese 10:8, 9) Nahan kpa, ior mbagenev kpishi lu a inja i dedoo. U tesen ikyav yô, Mose yange ker ér una hingir ityagheror u Igipiti una zua a icivir ga. Kpa, tom u Aôndo hemba gban un ishima a “akaa a injaagh a Igipiti cii.” (Mbaheberu 11:26) A̱ shi nan kpa ortwer Luka yange sôr Paulu man mbagenev iangev vev. Kpa Luka hemba wasen mbagenev sha u eren tom u ivangeli shi ngeren Bibilo. Gema Paulu di yô, i fa un ér ka Orfanatindi ga, kpa i fa un ér ka ormishen, “apostoli u atôatyev.”—Mbaromanu 11:13.

¹⁷ Davidi kpa i fa un ér ka kurutya shin or u kuhwan kwagh shi dughun atsam ga, kpa i fa un ér ka ‘or u sha ishima i Aôndo vough.’ (1 Samuel 13:14) Se fa Daniel ser ngu or u eren tom u gomoti u vesen ken Babilon ga, kpa se fa un ser ngu profeti u jighjigh, u eren tom u Yehova; Eseter di se fa un ser ngu torkwase u Pershia ga, kpa se fa un ser ngu kwase u taver ishima shi lun a jighjigh u nan; shi se fa Peteru man Anderia man Yakobu kua Yohane ser mba ior mba fan ishu kôron ga, kpa se fa ve ser mba mbaapostoli mba Yesu. U hemban cii yô, se fa Yesu ser ka “orgbanakaa” shin orkapinta ga, kpa se fa un ser “ngu Kristu.” (Marku 6:3; Mateu 16:16) Ior mban cii fa wanger wanger ér, nyityô mfe shin inyaregh shin icivir shin ian i ve lu sha mi cii kpa, gba u vea na uma ve jimin cii sha u civir Aôndo, a lu sha u keren akaa a taregh ga. Yange ve fa ér tom u u hembe doon shi u hembe lun a inja cii u vea er yô, ka u ve lun nomso man kasev mba civir Aôndo.

18. Gum Orkristu ugen kange ishima ér una er nyi a uma naa, man a mase kaven nyi?

¹⁸ Seung Jin, u se vande ôron kwagh na la kpa yange mase kaven ér kwagh môm hemba u civir Aôndo ga. A kaa ér: “M kera na uma wam jimin cii sha u eren tom tweregh shin tomavee shin tom ticaa ga, kpa m kange ishima mer me er Aôndo tom er m tsegha iyol yam hen a na mer me er nahan. Hegen ne, m ngu eren tom ape ior mba tesen ior Bibilo ve lu kpishi ga yô, sha er me wase ve, ve fa gbenda u zan ken uma u tsôron yô. Yange m hen mer, u eren tom u pasen kwagh hanma shighe la ka tom u taver yum ga. Kpa uma hemba taver mo hegen cii, sha ci u m ngu nôngon u kôôm aeren a am shi tsaase mfe wam sha er me er tom a ior mba ve dugh sha ajiir kposo kposo yô. M nenge mer kwagh môm hemba u se eren ishima i Yehova ga.”

19. Se er nan ve uma wase una hemba lun a inja?

¹⁹ I na se Mbakristu mfe u una va se a uma u tsôron yô, shi se mba a ishimaverenkeghen i va zuan a myom kpaa. (Yohane 17:3) Nahan, mayange je se de ser ‘mngohol u se ngohol mrumun u sha mhôôn u Aôndo la, a lu gbilinkwagh ga.’ (2 Mbakorinte 6:1) Se wuese nen Yehova sha ayange man anyom a injaa a se lu uma ne cii. Se pase nen ior mfe u una va ve a msaanyol u mimi hegen shi una va ve a uma u tsôron la. Aluer se mba eren nahan yô, mkaanem ma Yesu ôr ne ma a kure sha a vese. Á kaa ér: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Nahan uma wase una hemba lun a inja cii.

[Footnote]

Ú Fatyô u Pasen Kpa?

• Kanyi i lu kwagh u hemban ken uma cii u se fatyô u zuan a mini?

• Aluer se har ishima yase cii sha u keren inyaregh yô, se mba eren kwagh sha kwaghfan ga sha ci u nyi?

• “Uma u a lu uma jim” u Aôndo a tende zwa la kanyi?

• Se na uma wase sha u eren ishima i Aôndo nena?

[Study Questions]

[Pictures on page 18]

Gba u Mbakristu vea de akaa agen aa kar ve sha u eren kwagh u vough