Lu A Aeren A Aa Wase Ú U Geman Ior Hingir Mbahenen La
Lu A Aeren A Aa Wase Ú U Geman Ior Hingir Mbahenen La
“Za nen, za gema nen akuraior cii a̱ hingir mbahenen.”—MATEU 28:19.
1. Ka mfe man aeren a nyi gba u mbacivir Aôndo mbagen mba sha ashighe a tsuaa la vea lu a mi?
ASHIGHE agen a gba u ior mba Yehova vea lu a mfe man aeren a aa wase ve ve vea er ishima na ye. U tesen ikyav yô, Aberaham man Sara yange ve undu gar u Ur u lu yôughyôugh la sha imo i Aôndo, nahan gba u vea lu a mfe man aeren a aa wase ve u tsan ken tenti yô. (Mbaheberu 11:8, 9, 15) Shi yange gba u Yosua una taver ishima shi una suur sha Yehova shi una fa Atindi a na ve una hemen Mbaiserael una yem a ve ken Tar u Ityendezwa ye. (Yosua 1:7-9) Heela tseegh ga, jijingi u Aôndo yange nyôôso mfe u Besalel man Oholiabi sha er vea er tom u maan tabernakel shi vea nenge sha u tsembelee yô.—Ekesodu 31:1-11.
2. Ka mbampin mba sha kwagh u geman ior hingir mbahenen mba nyi i gbe u se time sha mi?
2 Uderimbaanyomov mba kar yô, Yesu Kristu kaa a mbadondon un ér: “Za nen, za gema nen akuraior cii a̱ hingir mbahenen, . . . tesen nen ve u kuran akaa a M we ne kwagh sha mi cii.” (Mateu 28:19, 20) Er i gbe je ka hiin je ior ve lu sha ian i civirigh i eren imba zegetom ne je ne. Ka aeren a nyi i gbe u se lu a mi ve se fatyô u geman ior hingir mbahenene? Se lu a aeren shon nena?
Aôndo a Doo Ú Ishima Tsung
3. Tindi u i we ér se gema ior ve hingir mbahenen la na se ian i eren nyi?
3 Saa Yehova una doo se ishima tsung ve se pasen ior kwagh na shi se taver ve asema ser ve civir Aôndo u mimi ye. Yange Mbaiserael vea kuran atindi a Aôndo sha ishima i môm shi vea naan un iniav mbi dedoo shi vea wuese un sha atsam yô, ve lu tesen ér Aôndo doo ve ishima. (Duteronomi 10:12, 13; 30:19, 20; Pasalmi 21:13; 96:1, 2; 138:5) Er se lu mbageman ior hingir mbahenen yô, se kpa se mba kor atindi a Aôndo, shi se mba tesen ser Aôndo doo se ishima sha u pasen ior mbagenev kwagh na man mbaawashima nav kpaa. Gba u se pasen ior kwagh gbar gbar shi se tsua asember a injaa a se pase ve kwagh u ishimaverenkeghen i Aôndo a ne se la sha mimi yô.—1 Mbatesalonika 1:5; 1 Peteru 3:15.
4. Er nan ve saan Yesu iyol u tesen ior kwagh u Yehova?
4 Yange saan Yesu iyol kpishi u pasen ior mbaawashima mba Aôndo man kwagh u Tartor na kua kwagh u mcivir u mimi kpaa, gadia Yehova doo un ishima tsung. (Luka 8:1; Yohane 4:23, 24, 31) Ka nahan ve Yesu kaa ér: “Kwaghyan Wam yô, ka u Me er ishima i u A tindim la, Me kure tom Na vough kpaa” ye. (Yohane 4:34) Mkaanem ma orpasalmi man kure sha Yesu. Ma kaa ér: “Doom u eren ishima You, Aôndo wam; atindiakaa a Ou ngam ken ishima. M yôô loho u dedoo u kwagh u perapera ken zegemkohol; nenge, m kusu zwa wam ga, TERE, U fa.”—Pasalmi 40:8, 9; Mbaheberu 10:7-10.
5, 6. Ka ieren i vesen i nyi i gbe u mbageman ior hingir mbahenen vea lu a mini?
5 Ior mba ve sember fan mimi u ken Bibilo kpa ashighe agen dooshima u Aôndo ka a mgbegha ve ve pase mbagenev kwagh u Yehova man Tartor na vangertiôr je i kôr ve sha mtema, nahan ve hingir u timen ken Ruamabera. (Yohane 1:41) Kwagh u vesen u a ne ve se eren tom u geman ior hingir mbahenen yô, ka mdoo u Aôndo a doo se ishima la. Nahan se ôron nen Mkaanem ma Aôndo nduuruu shi se gbidyen kwar sha mi sha er una za hemen u doon se ishima yô.—1 Timoteu 4:6, 15; Mpase 2:4.
6 Yesu Kristu yange gba uwer u tesen ior kwagh ga, sha ci u Yehova doo un ishima je ka u tunan ga. Kpa ka cii kwagh u na ve pasen ior kwagh u Tartor tsema tsema la ga. Nahan lu nyi igen i na ve Yesu fa u geman ior hingir mbahenene?
Wa Mbagenev Ikyo sha Dooshima
7, 8. Yesu yange nengen ior nena?
7 Kwagh u ior yange gba Yesu ishima shi waan ve ikyo kpaa. Shighe u lu sha, lu or u “fan tom” u Aôndo la je kpa doo un a ônov mba iorov. (Anzaakaa 8:30, 31) Shighe u Yesu lu shin tar la, mhôônom kôron un a ior tsung shi naan ve mmem kpaa. (Mateu 11:28-30) Yesu yange eren a ior sha dooshima man sha mhôôn er Yehova nahan, aeren a na ne doo mbagenev je ve hingir mba civir Aôndo u mimi. Yesu yange waan ior ikyo shi fa mbamlu vev kpaa, nahan ior kposo kposo keghen ato a na.—Luka 7:36-50; 18:15-17; 19:1-10.
8 Orgen yange pine Yesu kwagh u una er ve una zua a uma u tsôron yô, “Yesu gem kenger un yô, a doo Un ishima.” (Marku 10:17-21) I ôr kwagh u ior mbagenev mba Yesu tese ve ken gar u Betani la ér: “Marta man anngô na u kwase kua Lasaru ve doo Yesu ishima.” (Yohane 11:1, 5) Yesu yange wa ior ikyo tsung je yô sha shighe na u memen kpa a tese ve kwagh. (Marku 6:30-34) Yesu waan ior ikyo sha dooshima tsung, nahan kwagh ne na yô hemba fan u geman ior hingir mba civir Aôndo a hanma or cii.
9. Ka ieren i nyi Paulu lu a mi sha u eren tom u geman ior hingir mbahenen laa?
9 Apostoli Paulu kpa kwagh u ior mba pasen ve kwagh la gba un ishima kpishi. U tesen ikyav yô, yange kaa a ior mba ken Tesalonika, mba ve hingir Mbakristu la ér: “Kape se kpaa, er ne sar se yum yô, kera doo se u nan ne Loho u Dedoo u Aôndo tseegh ga, kpa zan zan kua uma wase je kpaa, gadia ne hingir mbadoon se ishima kpishi.” Er Paulu wase ve sha dooshima yô, mbagenev ken Tesalonika ‘gema her Aôndo, ve undu akombo, sha u vea er Aôndo u uma tom’ yô. (1 Mbatesalonika 1:9; 2:8) Aluer kwagh u ior gba se ishima er Yesu man Paulu nahan yô, a saan se iyol tsung u nengen er loho u dedoo u se pasen la ua kôr “mba i ver ve sha u ve̱ zua a uma u tsôron” la sha mtema yô.—Aerenakaa 13:48.
Lu a Ieren i Tangen Iyol Ga La
10, 11. Er nan ve i gbe u se lu a ieren i tangen iyol ga shighe u se lu eren tom u geman ior hingir mbahenen laa?
10 Mba ve eren tom u geman ior hingir mbahenen cii mba a ieren i tangen iyol ga. Kwagh hemba gban ve u lun mbainyarev ga. Yesu kaa a mbadondon un ér: “Ka ican tsô, u mba ve lu a inyaregh kpishi vea nyôr sha tartor u Aôndo.” Cier mbahenen Nav iyol sha kwaghôron Na la, kpa Yesu shi kaa a ve ér: “Mbayev, u nyôron sha tartor u Aôndo ka ican tsô. U ornyar a̱ nyôr sha tartor u Aôndo yô, guda u rakumi á kar hen ihyura i anura.” (Marku 10:23-25) Yesu yange wa mbadondon un kwagh ér ve de lu a akaa kpishi ga, sha er vea hemba veren ishima sha tom u geman ior hingir mbahenen yô. (Mateu 6:22-24, 33) Ieren i tangen iyol ga la i wasen se u geman ior hingir mbahenen nena?
11 Gba u se nôngo kwagh tsung ve se tese ior akaa a Yesu wa se kwagh sha mi la cica cii ye. Orkristu u i sar nan u geman ior hingir mbahenen yô, ka nan nôngo u henen Bibilo a or u i sar nan u fan mimi la ken hanma sati. Mbapasen kwagh u Tartor mbagenev de tom u uke u ve eren hanma shighe la, mba eren tom ugen u ua na ve ian i seer keren mba i sar ve u fan mimi yô. Mbakristu mbagenev udubu imôngo hen zwa ugen sha er vea pase mba ve lamen zwa ugen, ve lu hen haregh ve la loho u dedoo yô. Mbagenev di undu uya vev yem sha ajiir agen shin ken ityar igen sha er vea za er tom u sunda ne kpoghuloo yô. (Mateu 9:37, 38) Ka ieren i tangen iyol ga i ve lu a mi la i ne ve ve er akaa ne ye. Kpa ka ieren i tangen iyol ga la tseegh i gbe u or a lu a mi ve nana fa u geman ior hingir mbahenen ga.
Waan Ishima kpa De Vihin Shighe Ga
12, 13. Er nan ve i lu hange hange u se waan ishima ken tom u geman ior hingir mbahenen nee?
12 Ishimawan ka ieren igen i i wasen se u geman ior hingir mbahenen yô. Gba u se er tom wase u Mbakristu ne torough torough, nahan kpa, ka i tôô shighe u geman or hingir orhenen. Sha ityôkyaa ne yô gba u se waan ishima. (1 Mbakorinte 7:29) Yesu yange waan ishima a Yakobu u lu ngô vea na la. Er Yakobu fa kwagh u tom u pasen kwagh u Yesu la tsembelee nahan kpa, alaghga kwagh ugen yange un u hingir orhenen u Yesu. (Yohane 7:5) A shi nan kpa Yesu yange kpe ayange kar kpuaa, kpa i lu a er Pentekosti u inyom i 33 ga tsô Yakobu hingir orhenen, gadia Ruamabera kaa ér yange kohol ngô na man anmgbianev nav man mbaapostoli sha u eren msen. (Aerenakaa 1:13, 14) Yakobu yange za ikyura sha u geman ior hingir mbahenen, nahan ken masejime yô lu a ityom i vesen ken tiônnongo u Kristu.—Aerenakaa 15:13; 1 Mbakorinte 15:7.
13 Er mbasulev ka ve wa ishima a iyiav vev nahan, kape Mbakristu kpa ka ve wa ishima ve tese ior kure kure sha er vea fa Mkaanem ma Aôndo shi Yehova una doo ve ishima shi vea lu a aeren a Kristu je la. Yakobu nger ér: “Wa nen ishima zan zan m-ande u Ter. Nenge orsule ka nan kegh iyiagh ki taregh ki injaagh, nan wa ishima a mi zan zan ura u he man shi u masetyô u nôô sha mi. Ne kpaa, wa nen ishima nahan, taver nen asema a en gadia m-ande u Ter mgbôghom ikyua ikyua je.” (Yakobu 5:7, 8) Yakobu lu taver mba ve civir Aôndo a na imôngo la ishima ér ve ‘wa ishima zan zan m-ande u Ter.’ Yesu yange una tese mbahenen nav kwagh man vea kav kwagh shon ga yô, a wa ishima a ta ve iwanger shin a ôr ve injakwagh sha u tan ve iwanger. (Mateu 13:10-23; Luka 19:11; 21:7; Aerenakaa 1:6-8) Hegen u Ter a lu a vese ne, se kpa gba u se waan ishima er se lu nôngon ser se gema ior ve hingir mbahenen ne. Gba u se wa ishima ve se kôr cio u tesen mba ve hingir mbadondon Yesu sha shighe wase ne ye.—Yohane 14:9.
14. Er se lu wan ishima a ior nahan kpa, se er kwagh a shighe wase sha inja nena?
14 Sea waan ishima a ior mba se hii u henen Bibilo a ve la kpa, gba u se fa ser mbagenev kpishi mkaanem ma Aôndo ma a ume atam ken ve ga. (Mateu 13:18-23) Ka sea wase ve sha afatyô wase cii yô, se de u henen kwagh a ve, se ker ior mbagenev mba mimi u ken Bibilo a hembe gban ve ishima yô. (Orpasenkwagh 3:1, 6) Ior mba mimi u ken Bibilo a doo ve tsung je kpa alaghga a gba u a wase ve doo doo ve vea gema mbamhen vev man aeren a ve man akaa a a hembe gban ve ishima la ye. Se mba we ishima a ior vough er Yesu kpa waan ishima a mbahenen nav mba taver ve u lun a mnenge u vough la nahan.—Marku 9:33-37; 10:35-45.
Fa Igbenda i Tesen Ior Kwagh
15, 16. Er nan i doo u wan agoyol tsembelee shi tesen ior kwagh sha gbenda u taver ga shighe u se lu eren tom u geman ior hingir mbahenen laa?
15 Gba hange hange u Aôndo una doo se ishima shi kwagh u ior kpa una gba se ishima shi se lu a ieren i tangen iyol ga shi se waan ishima ve se fatyô u eren tom u geman ior hingir mbahenen ne tsembelee ye. Shi gba u se fa igbenda i tesen ior kwagh kpaa, sha er ia wase se u ôron ior kwagh sha gbenda u taver ga yô. U tesen ikyav yô, akaaôron a Yesu Kristu, u a lu Ortesen u Hemban la yange a doo ior kpishi sha ci u a ôr a sha gbenda u taver ga. Alaghga u umbur mkaanem ma Yesu yange ôr ne, ér: “Koson nen akaa a injaa sha ci wen Sha.” “De ne nen iwa icighankwagh ga.” “Mfe zua a ishô sha aeren a na ve.” “Na nen Shisar akaa a a lu a Shisar yô, Aôndo kpaa na nen Un akaa a a lu a Aôndo yô.” (Mateu 6:20; 7:6; 11:19; 22:21) Nahan kpa Yesu ôron ior akaa tiônôô tseegh ga. Yange a tese ior kwagh wang shi a ta ve iwanger sha kwagh i kôr inya sha shighe u a nenge ér doo u una er nahan yô. Ú dondo gbenda u Yesu tesen ior la nena?
16 Kwagh u una wase se u ôron kwagh wang man sha gbenda u taver ga yô, ka u wan agoyol tsema tsema. Orpasenkwagh u nan we agoyol ga yô, ka nan lam kpishi. Nahan, atôakaa a vesen a saa, sha ci u nan soo ér nana ôr hanma kwagh u nan fe sha itinekwagh i nan lu lamen sha mi la. Kpa orpasenkwagh u nan we iyol tsembelee yô, ishima i lun nan sha kwagh u or u nan lu tesen la shi ka nan hen sha itinekwagh i nan lu timen sha mi a nan la nahan nan tese kwagh u i gbe u nana tese la tseegh. (Anzaakaa 15:28; 1 Mbakorinte 2:1, 2) Ka nan hen sha akaa a or u henen Bibilo la nan vande fan la, kua akaa a i gbe u nana kume acin sha mi shighe u ve lu henen kwagh la kpaa. Alaghga orpasenkwagh shon nana fa akaa a injaa agen kpishi sha itinekwagh i ve lu timen sha mi la, kpa aluer nan soo ér kwaghôron u nan la a wanger yô, nana ôr akaa a a lu hange hange la tseegh.
17. Se wase ior u gbidyen kwar sha akaa a ken Ruamabera nena?
17 Yesu yange ôron ior akaa a mimi tseegh ga kpa wasen ve u gbidyen kwar sha kwagh kpaa. U tesen ikyav yô, yange pine Shimon sha shighe ugen la ér: “U hen nana, Shimon? Ka unô man utor mba tarev ve sav akaa man ve ngohol kpandegh hen ve, ka hen ônov vev shinii, ka hen mbavannya?” (Mateu 17:25) Ashighe agen yô, a doo se kpishi u pasen kwagh u Bibilo i er je yô, a gba u se kôr iyol tsaha ve se fatyô u nan or u se lu henen kwagh a nan la ian i wan zwa sha kwagh u i lu henen la ye. Jighilii yô, doo u se pinen ior mbampin kpishi ga. Kpa se fatyô u wasen ve u fan akaa a ken Ruamabera a i er ken ityakerada yase i i pase akaa a ken Bibilo la sha u ôron ve anzaakaa a dedoo shi pinen ve mbampin sha kwaghfan sha er vea lam yô.
18. “Ityesen i dedoo” shin igbenda i injaa i tesen ior kwagh la wa nyi man nyi kere?
18 Ruamabera ôr kwagh u “ityesen i dedoo” shin igbenda i injaa i tesen ior kwagh. (2 Timoteu 4:2; Titu 1:9) Mfe u tesen or kwagh ne saa sha u wasen or u se henen kwagh a nan la u kôron atôakaa a vesen ken ityou tseegh ga. Kpa gba u se wase or u se henen Bibilo a nan la sha er nana fa mkposo u mimi man aie man kwagh u dedoo man u bo kua kwaghfan man ibumegh yô. Aluer se mba eren akaa ne shi se mba nôngon ser Yehova a doo or u se lu henen kwagh a nan la ishima yô, nana nenge er i gbe kpee u nana ungwan Un yô.
Eren Tom u Geman Ior Hingir Mbahenen la sha Gbashima
19. Mbakristu cii mba wasen u geman ior hingir mbahenen nena?
19 Nongo u Kristu ka mzough u geman ior hingir mbahenen. Or ka nana hingir orhenen u he yô, ka Orshiada u Yehova u nan zough a nan shi nan wase nan u fan kwagh u Bibilo i tese la tseegh ka i saan nan iyol ga. Shighe u wanye nan saa, ior ve lu keren nan yô, ka ior mbara jimin cii ka ve zua a nan ga, ka i lu or môm tseegh nan nenge a nan ye. Kpa shighe u i zough a wanye la i va ne mbamaren mba nan yô, ka i saan hanma or u nan ker nan la cii iyol. (Luka 15:6, 7) Kape tom u geman ior hingir mbahenen la kpa i lu tom u or môm tseegh ga je la. Mbakristu jimin cii ka ve wase u keren mba alaghga vea hingir mbahenen mba Yesu la. Shi or u he ka nana hii u van mbamkombo ken Iyou i Tartor yô, Mbakristu mba ve lu hen mkombo la cii ve taver nan ishima ér nana za hemen a mcivir u mimi. (1 Mbakorinte 14:24, 25) Nahan saan Mbakristu cii iyol er iorov udubu imôngo ve lu hingir mbahenen mbahev hanma inyom yô.
20. Aluer u soo u tesen mbagenev mimi u ken Bibilo yô, u er nyi?
20 A doo Mbakristu mba jighjigh kpishi u tesen ior kwagh u Yehova man mcivir u mimi. Alaghga mbagenev vea nôngo sha afatyô ve cii kpa vea kanshio u eren kwagh ne. Aluer ka zayol wou ne yô, za hemen u eren kwagh u una na Yehova una seer doon we ishima yô, shi kwagh u ior kpa a doo u ishima shi lu a ieren i tangen iyol ga shi waan ishima shi seer tsaase igbenda you i tesen ior kwagh la kpaa. U hemban cii yô, pase Aôndo isharen you i tesen ior mimi la ken msen. (Orpasenkwagh 11:1) Mfe u ú fe wer hanma kwagh u ú fetyô u eren ken mcivir u Yehova cii wasen ken tom u geman ior hingir mbahenen la a̱ taver we ishima.
Ú Fatyô u Pasen Kpa?
• Tom u geman ior hingir mbahenen ne ka u kar mdoo u Aôndo a doo se ishima la nena?
• Ka aeren a nyi i gbe u or u geman ior hingir mbahenen nana lu a mini?
• “Ityesen i dedoo” shin igbenda i injaa i tesen ior kwagh la wa nyi man nyi kere?
[Study Questions]
[Picture on page 20]
Mbakristu mba tesen ér Aôndo doo ve ishima tsung sha u geman ior hingir mbahenen
[Picture on page 22]
Kwagh u mbagenev gba mbapasenkwagh ishima sha ci u nyi?
[Picture on page 23]
Ka aeren a nyi i gbe u Orpasenkwagh nana lu a mini?
[Picture on page 24]
Ka i saan Mbakristu cii iyol u nengen er ve lu geman ior hingir mbahenen yô