Mbampin mba Mbaôron Takerada Ne Ve Pin La

Doo u Mbakristu vea nenge ikyôr eren nena?

Bibilo yange ikyôr eren ga. (Duteronomi 14:4, 5, 9, 20; Mateu 17:27; Yohane 21:6) Nahan kpa, doo u Mbakristu mba ve eren ikyôr vea time sha akaawan agen a Ruamabera a er sha kwagh ne yô.

Aôndo yange na Noa kua tsombor na ian i wuan ishôso yan aluer ve sôngo i ve har awambe kera yô. (Genese 9:3, 4) Tindi ne tese ér doo u a eren a uma u ishôso sha inja, gadia a due hen Aôndo. Sha nahan yô, Mbakristu mba gbe wuan uzendenya tsô sha u eren anumbe shin keren msaanyol ga, shi mba eren a ve dang dang kpaa ga.—Anzaakaa 12:10.

Shi kwagh ugen u i doo u se nenge sha mi yô ka ieren yase. Mbaapostoli mba yange ve lu mbakôronishu la yange vea kôr ishu a ngee yô i kuma ve. Nahan kpa, ikyav cuku tese ér ve taan ihyagh ér ve fa ishu kôron ga shin ve gbaan gesa u kôron ishu sha u tesen ér mba ior mba numben a mi ga ze. Shi yange ve zendan uzendenya ve wuan sha u keren iember kpaa ga.—Pasalmi 11:5; Mbagalatia 5:26.

Doo u se pine ayol a ase ser: ‘M veren mbagenev ikyav i dedoo sha u nengen uma er Yehova kpa a nengen uma la kpa? M hembe henen shin ôron kwagh u ikyôr erene? Ieren yam i tese ér m hemba soon ikyôr eren a tom u Aôndo? Ikyôr eren na yô m hingir u biishi a ior mba ve civir Aôndo ga shinii, shin i na yô m ta tsombor wam kera?’—Luka 6:45.

Alaghga mba ve eren ikyôr sha u keren kwaghyan vea nenge ér ka kwaghbo u undun ityom i Aôndo shighe u yaren ikyôr ga. Nahan kpa, aluer se lumun ser akaa agen a hemba gban se ishima a ityom i Aôndo ga yô, se mba tesen ser se na Aôndo jighjigh shi se suur sha a na kpaa. (Mateu 6:33) Kwagh ugen yô, Mbakristu mba kor atindi a “Shisar” a we sha kwagh u ikyôr eren la, shin aluer gomoti hendan a ior ér ve kuran a ga je kpaa.—Mateu 22:21; Mbaromanu 13:1.

Mbagenev vea fatyô u kôôm mhen u ve lu a mi sha kwagh u ikyôr eren la sha er una zua sha gbenda u Yehova a nengen ikyôr eren yô. (Mbaefese 4:22-24) Nahan kpa, doo u se tese icivir sha akaa a mbagenev ve tsough u eren la. Apostoli Paulu wa kwagh u vough sha kwagh ne, ér: “Sé kera na anmgbian anzughul ga shin ityôkyaa i nôngon gbev kpaa ga.” (Mbaromanu 14:13) Aluer se mba eren a mbagenev sha dooshima shi se mba nan ve icivir yô, se soo ser bem a gba ken tiônnongo shi se soo u eren kwagh u doon un u a gbe se, a lu imbor i hanma uma la.—1 Mbakorinte 8:13. *

[Footnote]