Hanma Ityumugh Ki I Var Sha Ci U Vihin Ne Iyol Cii Ikyôr Ia Lagh Ki Ga

“Hanma ityumugh ki i var sha ci u vihin we iyol, ikyôr ia lagh ki ga.”—YESAIA 54:17.

1, 2. Kwagh u yange er Mbashiada mba Yehova mba ken tar u Albania la tese ér kwagh u i er ken Yesaia 54:17 la ka mimi nena?

 ANNONGO u Mbakristu mba cian kwagh ga lu ken tar u iwoogh ugen ken imbusutariyan i Yuropa ken anyom a karen ken ijime la. Gomoti u tar la, u mbanyiman Aôndo lu ityough sha mi la nôngo kpoghuloo ér una tim Mbakristu mban. I er ve ican tsung, i gbihi ve ken afo a mbakwarev shi mbaabaver kpa wa ve mbaaie iyol, nahan kpa i fatyô u timin ve kera ga. Mbakristu mban lu unô? Lu Mbashiada mba Yehova mba ken tar u Albania. Er taver ve u kumban imôngo shi pasen kwagh ken tar la nahan kpa, ve taver ishima ken anyom a i lu tôvon ve a ican la cii, nahan kwagh ne va a icivir sha Mbakristu shi ior wuese iti i Yehova kpaa. Ken inyom i 2006, zum u Mbashiada mba ken tar la lu tseghan afishi ve a he yô, Orshiada ugen u a civir Yehova ica i gbe yô, kaa wener: “Satan una nôngo kwagh nan nan kpa mayange una hemba ga, Yehova una za hemen u hemban!”

² Kwagh ne tese ér ityendezwa i Aôndo a er a ior nav ken Yesaia 54:17 la ka i mimi. Ivur la kaa ér: “Hanma ityumugh ki i var sha ci u vihin we iyol, ikyôr ia lagh ki ga; hanma zwa u ua mough ua hendan a we sha ijir kpaa, ú hemba u.” Akaa a á vande eren ior mba Yehova la, tese ér tar u Satan ua fatyô u eren kwagh môm u una yange mbatomov mba Yehova Aôndo mba ve tsegh ayol a ve sha ci na la u civir un ga.

Satan Ta Num Sha a Vese kpa A Hemba Ga

3, 4. (a) Ka nyi man nyi i lu ityumugh ki Satana? (b) Diabolo ta num sha a vese kpa a hemba ga nena?

³ Ityumugh ki i var sha u vihin mbacivir Aôndo sha mimi iyol yô ka atindi a i we sha u cirin tom ve la man ayôôso a ikpelaior i toron asema man purusu man ‘afer’ a ior ve ‘eren ve  ve gem ve suur sha tindi’ la. (Pasalmi 94:20) Sha kpôô yô, er Mbashiada mba Yehova ve lu henen ngeren ne zan a mi ave ne je mba ‘karen’ jighjigh u Mbakristu mba mimi mban ve ne Aôndo la ken ityar igen.—Mpase 2:10.

⁴ U tesen ikyav yô, afishi a Mbashiada mba Yehova a ken tar ugen kaa ér mbacivir Aôndo mba ken tar la ka vea due u pasen ior kwagh yô, i ta num sha a ve; i er kwagh ne a ve ken inyom i môm tseegh kuma kwa 32. Heela tseegh ga, udasenda kôr Mbashiada kuma kwa 59 zum u ve lu pasen kwagh ken igbar yô za wuhe. Ken ve yô lu mbabeenyol man agumaior, nomso man kasev kpaa. I tôô mbagenev ken ve foto shi i cagh ihiange i ahôaveegh a ve shin takerada, maa i za wuhe ve er ka mbaiv nahan. Mbagenev di i anger ve ér a vihi ve iyol. Ken tar ugen di, i kôr Mbashiada mba Yehova i za wuhe, i ya ve zwa ijirigh shi i gbidye ve acin kposo kposo hemba kwa 1,100. Sha iyange i Mbashiada mban kohol u umbur ku u Yesu la tseegh i er akaa a i ter sha heen ne a ve hemba kwa 200! Nahan kpa, jijingi u Yehova wase ior nav mba ken ityar ne kua mba ken ityar igen kpaa u waren mbamzeyol mba vesen mba ve tagher a mi ne. (Sekaria 4:6) Mayange je ishimavihin i mbaihyomov la ia cir mbawuese Yehova zwa ga. Sha mimi yô, se mba a vangertiôr ser ma ityumugh i môm tsô kia bunde awashima u Aôndo ga.

Hanma Zwa u U We Se Aie Iyol Cii Se Hemba U

5. Ka zwa u aiegh u nyi yange u mough ahendan sha mbacivir Yehova mba ken derianyom u hiihii laa?

⁵ Yesaia yange tsengaôron ér ior mba Aôndo vea hemba hanma zwa u ua mough ua hendan a ve cii. Ken derianyom u hiihii la, ior zer ôron akaa a kpeegh sha iyol i Mbakristu ér mba mbaaferev. Mkaanem ma ken Aerenakaa 16:20, 21 la pase se akaa a yange i waan ve iyol yô. Ijiir la kaa ér: “Ior mban . . . mba nan anzughul ken gar wase ne je doo ga; mba tesen aeren a a doo her a vese u sé ngohol man u sé wa a ikyo kpaa ga yô; gadia se a yasegh se mba Mbaromanu je.” Sha shighe ugen la, mbakwaghaôndo mba hendan a mbadondon Kristu lu mgbeghan mbatamen mba ken gar ugen ijime kaan ér: “Ior mba ve vihi tar cii ne, ve va heen kpaa, . . . mba eren akaa a hendan a atindi a Shisar.” (Aerenakaa 17:6, 7) Yange i yila apostoli Paulu ér “or u ifer” shi i kaa ér ngu orhemen u nongo u ú lu vihin ior “sha num u moughon sha won cii” yô.—Aerenakaa 24:2-5.

6, 7. Kanyi i lu gbenda môm u Mbakristu ve hembe mbaaie mba i we ve iyol laa?

⁶ Ka nahan ve nyian kpa ior ve ôron akaa a vihin tsung sha Mbakristu mba mimi shi ve we ve mbaaie iyol shi ve vihin ve iti kpaa ye. Se fatyô u kaan ser se hemba akaa a i ôron sha a vese ne sha ci u nyi?—Yesaia 54:17.

⁷ Ashighe kpishi ieren i dedoo i Mbashiada mba Yehova la ka i tese ér akaa a i we ve iyol ne cii ka mimi ga. (1 Peteru 2:12) Mbakristu ka vea eren akaa a a tese ér mba kuran atindi a tar ve shi mba ior mba dedoo, mba ve we mbagenev ikyo yô, kwagh ne a tese ér akaa a i we ve iyol la cii mimi ngu sha mi ga. Ieren yase i dedoo i lamen sha ci wase. Ashighe kpishi, mbagenev ka vea nenge er se taver ishima se lu eren akaa a dedoo yô, ishima i mgbegha ve ve wuese Ter wase u sha la shi ve pase er uma u mbacivir un la a hembe doon yô.—Yesaia 60:14; Mateu 5:14-16.

8. (a) Ashighe agen ka se pase mbagenev kwagh u mtil wase u a har sha Ruamabera la nena? (b) Se mba dondon ikyav i Yesu sha u hemban hanma zwa u u mough ahendan a vese la nena?

⁸ Ka aeren a ase a Mbakristu la tseegh a pasen mtil wase u a har sha Ruamabera la ga. Ashighe agen ka se ôr kwagh gbar gbar sha u pasen mtil wase ne. Gbenda môm u se eren kwagh ne yô ka u zamber a gomoti man mbaatejir ér ve wase se. (Eseter 8:3; Aerenakaa 22:25-29; 25:10-12) Zum u Yesu lu shin tar la, ashighe agen a hendan kwagh a mba ve puun un la ken igbar, a pase er akaa a ve we un iyol la cii a lu mimi ga yô. (Mateu 12:34-37; 15:1-11) Se kpa ka sea zua a ian i pasen mbagenev jighjigh wase u nan wanger wanger yô, se dondo ikyav i Yesu la. (1 Peteru 3:15) Yô, mayange se de nen ser tar-nahan u mba se ze makeranta a ve imôngo man mba  hen ijiir tom yase shin anmgbianev asev mba nan jighjigh ga u yange se u pasen mimi u Mkaanem ma Aôndo ga.—2 Peteru 3:3, 4.

Yerusalem Una Hingir “Iwen i Yuhwan”

9. “Iwen i yuhwan” i i er kwagh u i ken Sekaria 12:3 la tile sha ityough ki hanma Yerusalem, man ka unô ve til sha ityough ki Yerusalem ne shin taraa?

⁹ Kwaghôron u profeti u Sekaria ta se iwanger sha ityôkyaa i akuraior a sha won cii a hendan a Mbakristu mba mimi yô. Sekaria 12:3 kaa ér: “Sha iyange la, Me er Yerusalem una hingir ior cii iwen i yuhwan.” Ka hanma Yerusalem kwaghôron u profeti ne a lu ôron kwagh naa? Kwaghôron u profeti u Sekaria sha kwagh u Yerusalem ne ngu ôron kwagh u “Yerusalem u Sha,” u a lu Tartor u sha u Mbakristu mba i shigh ve mkurem vea za hemen la. (Mbaheberu 12:22) Asande a mbayandyako u Tartor u Mesiya mban mba shin tar ne her. Ve man “iyôngo igen” i i lu akar a ve la mba wan ior kwagh ér ve wa ayol a ve sha ikyev i Tartor u Aôndo er shighe a lu her ne. (Yohane 10:16; Mpase 11:15) Akuraior a sha tar dondo kwaghwan ne kpa? Yehova ngu suen mbacivir un sha mimi nyian nena? Se seer timen sha inja i kwagh u i nger ken Sekaria ityough 12 ne tsô se zua a mlumun sha mbampin mban. Aluer se er nahan yô, se lu a vangertiôr ser ‘ikyôr ia lagh ityumugh’ ki i var sha ci u vihin mbatomov mba Aôndo mba i shigh ve mkurem la iyol ga, kua akar a ve a a tsegh ayol a ve sha ci u Aôndo la kpaa ga.

10. (a) Mba tôvon ior mba Aôndo a ican sha ci u nyi? (b) Kanyi i er mba ve lu nôngon ér vea tôô “iwen i yuhwan” ne kera laa?

¹⁰ Sekaria 12:3 kaa ér akuraior ‘vihi iyol tsung.’ Ve vihi iyol nena? Aôndo na zwa ér i pase loho u dedoo u Tartor ne. Nahan Mbashiada mba Yehova mba eren tom ne kpoghuloo. Kpa myer u ve lu yôôn ér ka Tartor tseegh ua yima uumace la hingir akuraior cii “iwen i yuhwan.” Ve nôngo ér vea tôô i kera sha u yangen tom u pasen kwagh u Tartor la, kpa ve kan shio. Nahan akuraior ne “vihi ayol a ve tsung.” Er ve kan shio u yangen mbapasenkwagh u Tartor mban yô, ve gema ve va ahenge shi ve vihi iti ve kpaa. Vea fatyô u cirin mbacivir Aôndo mba mimi mban zwa ga, gadia ian i civirigh i ve lu a mi i yôôn “Icôronloho u Dedoo” u Tartor u Mesiya u Aôndo cii man mkur u tar ne la doo ve ishima tsung. (Mpase 14:6) Orkuran gaadi ken tar ugen ken Afrika yange nenge er i lu eren mbacivir Yehova ican yô, nahan a kaa ér: ‘Ne mba gbe vihin shighe wen tôvon ior mban a ican tsô. Mayange vea yina ishima ga. Vea seer a seer iyenge.’

11. Aôndo kure ityendezwa i a er ken Sekaria 12:4 la nena?

¹¹ Ôr Sekaria 12:4. Yehova tôndo zwa ér una pir mba ve mough num a ior nav mba ve pasen kwagh u Tartor sha ishima i tseen la ashe shi una ta ve “mciem iyol” vea hingir tumburuu. Man a kure ityendezwa na ne. U tesen ikyav yô, mbaahendanev mba ken tar ugen u i cir mcivir u mimi yô kan shio u yangen ior mba Aôndo kwaghyan u ken jijingi. Pipa i tôôn abaver igen ken tar la senge ér Mbashiada  mba Yehova lu nyôron a ityakerada i pasen Bibilo ken tar la ken umbolombolo! Nahan ityendezwa i Aôndo er a mbatomov nav mba jighjigh ér: “Me bugh ashe Am . . . Me pir hanma nyinya u akuraior cii ashe” la kure sha mi vough. Ishimavihin i mbaihyomov mba Tartor la ka i na ve anzughul nahan ve kera fa gbenda u vea kar ve vea yange mbatomov mba Aôndo ga. Se mba a vangertiôr ser Yehova una kura nongoior na jimin cii shi una na ve mkpeyol kpaa.—2 Utor 6:15-19.

12. (a) Yesu yange haa usu sha tar nena? (b) Asande a mba i shigh ve mkurem la haa usu sha tar ken jijingi nena, man kanyi i dugh kere?

¹² Ôr Sekaria 12:5, 6. Ishember i “mbahemenev mba ikwe i Yuda” la tile sha ityough ki mba ve lu ashe a ior mba Aôndo la. Yehova na ve gbashima sha er vea nengen sha akaa a Tartor na a shin tar yô. Sha shighe ugen la Yesu kaa a mbahenen nav ér: “M va sha u Me haa usu sha tar.” (Luka 12:49) Man sha mimi yô, yange haa usu sha tar. Tartor u Aôndo lu kwagh u vesen u Yesu pasen ior sha gbashima yô. Kwagh ne va a anyiman kpishi ken tar u Mbayuda jimin cii. (Mateu 4:17, 25; 10:5-7, 17-20) Kape mbadondon Kristu mba sha ayange ase ne kpa ve lu haan usu sha tar ken jijingi vough er “gbande u lun a usu ken atô u ikyon, man er ikyaghusu ken atô u aile a uyia nahan” je la. Takerada u i yer ér The Finished Mystery * la yange u pon atseregh a Mbakristu Mbaaiev ken inyom i 1917 la. Nahan ishima vihi mbahemenev  mbaadua kpen kpen. Semberee ne kpa, Abaver a Tartor Namba 37, a a lu a itinekwagh ér “Mkur u Kwaghaôndo u Aiegh Mgbôghom Ve!” la na ior kpishi ian i lumun Tartor u Aôndo shin vendan u.

I Yima “Utenti mba Yuda”

13. Ishember i “utenti mba Yuda” la tile sha ityough ki unô, man Yehova una yima ve sha ci u nyi?

¹³ Ôr Sekaria 12:7, 8. Ken tar u Iserael u ngise la tenti lu kwagh u hanma or ken tar la nôngo u fan yô, ashighe agen mbakuranilev man mbasulev ve tsaan ker. Nahan aluer mbaihyomov va ta num sha Yerusalem yô, a lu mba tsan ken utenti mban num la ua hii benden a ve, vea ker iwasen ye. Ishember i “utenti mba Yuda” la tese ér asande a mba i shigh ve mkurem mba sha ayange ase ne mba ken sule sha ikyav, mba ken ugirgar ga. Ve tile kura sha akaa a Tartor u Mesiya la a mciem shio. Yehova u akum a sha una “vande yiman utenti mba Yuda,” gadia Satan ngu tan num sha ve kpoghuloo.

14. Yehova kor mba ve lu “utenti mba Yuda” la nena, man ngu wasen ve sha er vea hingir seelee ga nena?

¹⁴ Sha kpôô yô, akaa a Yehova a vande eren a ior nav la tese ér ngu kuran mbaôron kwagh u Tartor mba i shigh ve mkurem ve lu ken “utenti” ken sule la. * Ngu wasen ve sha er vea hingir “seelee” ga yô, inja na yô ngu nan ve agee man ishimataver vough er Davidi u lu tor u fan ityav la nahan.

15. Yehova una “ker u timin akuraior cii” sha ci u nyi, man una er kwagh ne hanma shighe?

¹⁵ Ôr Sekaria 12:9. Yehova una “ker u timin akuraior” jimin cii sha ci u nyi? Sha ci u mba hendan a Tartor u Mesiya kpoghuloo. Er ve lu nzughul a ior mba Aôndo shi ve lu tôvon ve a ican yô, Aôndo una ôr ve ijir a tsaha ve. Ica a gba ga tsô mbatomov mba Satan mba shin tar vea mase tan num sha mbacivir Aôndo mba mimi, nahan kwagh ne una va a ityav mbi Bibilo i yer ér Armagedon la. (Mpase 16:13-16) Orjir Uhemban Cii la una mough a nôngo kwagh sha ci u mbacivir un shi una tsegha iti na hen akuraior cii.—Esekiel 38:14-18, 22, 23.

16, 17. (a) Kanyi i lu ‘dyako u mbayev mba TERE’? (b) Er Satan a lu tan num sha a vese kpa se yen ishima ga yô, kwagh ne tese ér nyi?

¹⁶ Satan ngu a ityumugh i môm ki kia fatyô u panden jighjigh u nan u ior mba Aôndo sha tar cii shin ndôhôr gbashima ve ga. Bem u se lu a mi sha ci u se fa ser Yehova ngu suen se la ka “dyako u mbayev mba TER.” (Yesaia 54:17) Or môm tsô nana fatyô u ngohol bem u se lu a mi ne sha agee shin vihin mlu wase u kundu kundu la ga. (Pasalmi 118:6) Satan una za hemen u numun ior ér ve hendan a vese shi ve er se ican kpaa. Kpa aluer se wa ishima a aheen yô, kwagh ne una tese ér jijingi u Aôndo tema sha a vese. (1 Peteru 4:14) Mba pasen loho u dedoo u Tartor u Yehova a ver la sha tar jimin cii. Mbaahendanev mba tan ior mba Aôndo “awen a ken mzu” a sha ikyav er ityumugh ki a fatyô u gbidyen or a mi naná hume nahan. Nahan kpa sha tahav mbu Yehova yô, awen a i lu tan ve la nga nyoon ve ga. (Sekaria 9:15) Or môm nana fatyô u yangen asande a mba i shigh ve mkurem la man akar a ve a mimi la ga!

¹⁷ Se mba veren ashe keghen shighe u a yima se, Diabolo una kera ta num sha a vese mayange ga la. Sha mimi yô, ityendezwa i í er a vese ér ‘hanma ityumugh ki i var sha ci u vihin se iyol yô, ikyôr ia lagh ki ga; hanma zwa u ua mough ua hendan a vese sha ijir kpaa, se hemba u’ la suur se asema kpen kpen!

[Footnotes]

Ú Na Mlumun Wer Nyi?

• Kanyi i tese ér ikyôr lagh akaa a Satan a var sha ci u vihin se iyol la ga?

• Yerusalem u sha la hingir “iwen i yuhwan” nena?

• Yehova yima “utenti mba Yuda” nena?

• Er se lu mgbôghom a Armagedon yô, u ngu a vangertiôr wer nyi?

[Study Questions]

[Pictures on page 23]

Ior mba Yehova mba ken tar u Albania yina ishima ga shin er Satan ta num sha a ve nahan kpaa

[Picture on page 25]

Yesu yange venda mbaaie mba i wa un iyol la

[Pictures on page 26]

Hanma ityumugh ki i var sha ci u vihin mba yôôn loho u dedoo iyol cii, ikyôr ia lagh ki ga