Hemen U Yehova Man Tartor U Aôndo

“We TER, U kuma ivesen man agee man iengem man mhembe man icivir . . . We TER, U kuma u teman tor.”—1 KRONIKU 29:11.

1. Yehova kuma u lun Tor u Hemban sha won cii sha ci u nyi?

 “TER ver ikyônough Nagh ki torough dông sha Usha, tartor Na kpaa ngu sha won cii.” (Pasalmi 103:19) Mkaanem ma orpasalmi man pase mimi u vesen ugen sha kwagh u mtemtor. Er i lu Yehova Aôndo a gbe akaa cii yô, a kuma u lun Tor u Hemban sha won cii.

2. Daniel pase ijiir i ken jijingi i Yehova a hemen la nena?

² Or nana fatyô u gban lun tor tsô ga, saa ior vea lu mba nana hemen ve yô. Yehova yange hii hemen na sha akaauma a ken jijingi a a gba la. Yange hii gban Wan na u môm-môm la, been yô a gba mbatyomov mbagenev akum akum. (Mbakolose 1:15-17) Anyom nga kar udubu udubu yô, i tese profeti Daniel er Yehova a hemen sha yô. Daniel kaa ér: “Er m lu kenger her yô, i ver mkônom ma torom; or u tsan sha won kar za tema . . . ior udubu dubu lu eren Un tom, man dubu pue kwa dubu pue tile sha ishigh Nagh.” (Daniel 7:9, 10) Yehova, “or u tsan sha won” la hemen tsombor u vesen u ônov nav mba ken jijingi mba ve eren kwagh sha inja sha inja shi ve lu “mbatomov” mba eren ishima na ne anyom ngee je gande ôron.—Pasalmi 103:20, 21.

3. Yehova yange samber a hemen na yisa sha won cii nena?

³ Shighe kar yô, Yehova samber a hemen na, gadia a gba sha won u a kehe shi a we kperegh kperegh ne, kua tar wase ne kpaa. (Yobu 38:4, 7) Aluer or tile shin tar kenger sha yô, nana nenge er asan man akaa agen a sha kwavaôndo a lu sha ajiir a a vough vough yô, nahan alaghga a lu nan inja er gban ngan tsô, or wa a atindi ga nahan. Nahan kpa, orpasalmi kaa ér: “[Yehova] kaa man i gba ve . . . A ver ve er ve̱ lu heregh gbem sha won, A wa tindi u mô ve môm una per ga yô.” (Pasalmi 148:5, 6) Hii sha mhii je Yehova ngu hemen akaa cii, gadia ngu tesen akaa a ken jijingi er aa eren hanma kwagh vough vough yô, shi kôôm sha man tar wase ne kpaa.—Nehemia 9:6.

4. Yehova hemen uumace nena?

 ⁴ Aôndo yange gbe mbamaren asev mba hiihii mbara yô, hii u hemen sha gbenda ugen kpaa. Yehova yange na uumace hanma kwagh u una na ve mkpeyol man msaanyol yô shi wa uzendenya mba shin tar cii sha ikyev ve, inja na yô na ve tahav mbu hemen. (Genese 1:26-28; 2:8, 9) Kwagh ne tese ér Aôndo hemen sha gbenda u dedoo, u wasen mba a lu hemen ve la shi ne ve icivir kpaa. Luun er Adam man Ifa yange vea ze hemen u dondon hemen u Yehova yô, ma ve lu uma gbem sha won ken paradiso shin tar.—Genese 2:15-17.

5. U pase gbenda u Yehova a hemen akaa a á gbe la nena?

⁵ Akaa a se hen ne cii tese se nyi? Hiihii yô, Yehova ngu hemen akaa a á gbe la cica cii hii sha mhii je. Kwagh u sha uhar yô, Aôndo hemen sha gbenda u wasen mba a lu hemen ve la shi ne ve icivir kpaa. U masen yô, aluer se sue hemen u Aôndo yô se zua a msaanyol man mkpeyol u tsôron. Ka nahan ve ishima i mgbegha Tor Davidi u ngise hemen Iserael la ôr kwagh u i nger shin heen ne ye, wener: “We TER, U kuma ivesen man agee man iengem man mhembe man icivir, akaa a Sha man a shin tar cii ka a Ou; We TER, U kuma u teman tor, U ngu ityough sha akaa cii.”—1 Kroniku 29:11.

Ityôkyaa Ngi i Aôndo Una Ver Tartor Keng-nee?

6. Hemen u Aôndo zua vea Tartor na nena?

⁶ Er Yehova, Tor u Hemban cii la a lu hemen hii shighe u yange gba akaa la je zan zan nyian yô, ityôkyaa shi ngi i una ver Tartor keng-nee? Tor gbe hemen tsô ga, ka nan lu a gbenda u nana hemen yô. Nahan yô, Tartor u Aôndo ka gbenda u Aôndo a hemen akaa a á gbe la sha won cii yô, inja na yô ka kwagh u a yaren tom a mi u hemen yô.

7. Yehova yange due a gbenda u he u hemen sha ci u nyi?

⁷ Yehova hemen sha igbenda kposo kposo sha ashighe kposo kposo. Yange ikyaa igen ngi ve inya yô Yehova shi due a gbenda u he u una gema hemen yô. Lu shighe u Satan, wan u Aôndo u ken jijingi u hembanato bume Adam man Ifa ve̱ venda hemen u Yehova la. Ihyembeato ne lu gbenda u hendan a mtemtor u Aôndo. Nena yô? Satan yange kaa a Ifa ér una ya ityamegh ki kon u i ta ve icin sha mi la kpa una “kpe je ga,” nahan lu kaan ér Yehova ka Aôndo u mimi ga, a kuma u se suur sha a na ga. Satan shi kaa a Ifa ér: “Aôndo fa iyange i né ya [u] la, iyange la ashe aa bugh ne, né hingir er Aôndo nahan, né gba fan kwagh u dedoo man kwagh u bo.” Nahan yô, Satan lu kaan ér aluer Adam man Ifa per tindi u Aôndo shi mba sha tseeneke ve yô a hemba kpen ve iyol. (Genese 3:1-6) Kwagh ne lu imbwase i kaan Aôndo ér a kuma u hemen ga shi hemen na ua doo ga. Tsô Yehova er nena?

8, 9. (a) Ior ka vea hemba ato nahan tor nan er a ve nena? (b) Zum u i hemba ato ken Eden la Yehova er nena?

⁸ Ior ka vea hemba ato hen tar u tor nan lu hemen nahan i er a ve nena? Mba ve fe akaa a mbayiase yô, alaghga vea umbur ashighe a yange kwagh er nahan yô. Ka a lu tor u fan kwagh je kpa nan gbe ungwan ato sha ikyaa ne nahan ga, ka nan ôr mbahembanato mbara ijir nan na ve ibo. Maa nan tsua or nan tindi ér nana za wua ve sha er bem una lu yô. Yehova kpa yange er kwagh u tesen ér mbahembanato mbara gande un ave ga, gadia a ôr ve ijir ave ave la je. A kure Adam man Ifa ijir ér ve kuma u zuan a uma u tsôron ga shi A zenda ve ken sule u Eden la kera.—Genese 3:16-19, 22-24.

⁹ Yehova ngur ôron Satan ijir yô, a pase  gbenda u he u una gema hemen yô, lu gbenda u una va a bem man mzough sha won cii yô. Aôndo kaa a Satan ér: “Me ver ihyom hen atô wou vea kwase, man hen atô u vor wou a vor na kpaa, u ua cagh u ityough, we di kpaa ú cagh u ikishinguhar.” (Genese 3:15) Nahan Yehova pase awashima na ér una na “vor” ugen tahav ua tim Satan man akum a na shi ua tese er hemen u Yehova u doo yô.—Pasalmi 2:7-9; 110:1, 2.

10. (a) Ka unô ve lu “vor” u kwase laa? (b) Paulu ôr kwagh u mkur u kwaghôron u profeti u hiihii la nena?

¹⁰ “Vor” ne lu Yesu Kristu kua nongo u mba vea za tema tor a na sha la. Ka ve ve kohol ve lu Tartor u Mesiya u Aôndo ye. (Daniel 7:13, 14, 27; Mateu 19:28; Luka 12:32; 22:28-30) Nahan kpa, yange i pase kwagh ne fele ga. Gbenda u yange gba u kwaghôron u profeti u hiihii la una kure sha mi la lu “kwaghmyer u . . . lu ken iuv hii sha ashighe a tsuaa la je zan zan” yô. (Mbaromanu 16:25) Ior mba Aôndo mba tsuaa mbara lu keghen shighe u a pase “kwaghmyer” ne anyom imôngo, sha er kwaghôron u profeti u hiihii la una kure sha gbenda u ua kende a hemen u Yehova sha yô.—Mbaromanu 8:19-21.

I Pase “Kwaghmyer” la Kure Kure

11. Yehova yange pase Aberaham nyi kwagha?

¹¹ Er shighe lu karen yô, Yehova hii u pasen avegher kposo kposo a “kwaghmyer u tartor u Aôndo” la kure kure. (Marku 4:11) Aberaham, u yange i yila un ér “ikyar u Aôndo” la lu môm ken ior mba Yehova pase ve kwagh ne yô. (Yakobu 2:23) Yehova tôndo zwa a Aberaham ér Una er un una “hingir ikyurior i vesen.” Shighe kar yô, Aôndo shi pase Aberaham ér: “Utor kpaa vea due ken we” shi “akuraior a sha won cii aa zua a iveren ken tsombor [shin vor] wou.”—Genese 12:2, 3; 17:6; 22:17, 18.

12. Vor u Satan yange u due ken igbar shighe u i tim tar sha mnger kera la nena?

¹² Sha shighe u Aberaham la nahan, uumace hii u hemen ayol a ve shi kighir mbagenev kera kpaa. U tesen ikyav yô, Bibilo ôr kwagh u Nimrodi, wan u Noa u kov u sha utar la ér: “Ka un je hii lun nomor sha tar ye. Un lu ortato u ageegh [u hendan kwagh a] TER.” (Genese 10:8, 9) Sha kpôô yô, Nimrodi man mbagenev mba ve ver ayol a ve tor la cii lu sha ikyev i Satan. Yange ve hingir vor u Satan kua mba ve dondo ve ityô la kpaa.—1 Yohane 5:19.

13. Kanyi Yehova yange tsengaôron sha zwa u Yakob?

¹³ Er Satan lu nôngon ér una ver utor mba hemen uumace nahan kpa, Yehova lu kuren awashima na la her tsô. Yehova yange pase sha zwa u Yakob, wan u wan u Aberaham wener: “Tôgh kua kar hen Yuda  kera ga, gbough ku ortaregh kpaa kua kar hen atô u angahar a na kera ga, zan zan Un u ku lu ku Nagh la, Una va; ka Un akuraior aa ungwan imo Na ye.” (Genese 49:10) Kwaghôron u profeti ne tese ér un u a lu a ian i ngohol “tôgh” man “gbough ku ortaregh” shin hemen “akuraior” shin uumace jimin cii la ngu van. Or shon yô ka ana?

“Zan Zan Un u Ku Lu Ku Nagh la, Una Va”

14. Ka ikyur i nyi Yehova ya a Davidi?

¹⁴ Ka orkuranilev Davidi, wan u Yese, Yehova yange hii tsuan ken tsombor u Yuda ér a lu tor sha ior nav ye. * (1 Samuel 16:1-13) Shin er Davidi er asorabo nahan kpa, a sue hemen u Yehova sha mimi nahan Yehova lumun un. Yehova ya ikyur a Davidi nahan ikyuryan ne seer tan iwanger sha kwaghôron u profeti u ken Eden la. A kaa ér: “Me ver wan [shin vor] wou ken ijime you u una due ken iyol you je yô, Me taver tor na.” Nahan kpa wan shin vor ne ua saa sha Solomon, wan u Davidi u una tema tor sha ityough nagh la ga, gadia ikyuryan la kaa ér: “Me ver ikyônough nagh ki torough kia lu gbem.” Ikyur i Aôndo ya vea Davidi la i pase wang ér “vor” u Tartor u i tôndo zwa ér ua va la ua due ken tsombor u Davidi.—2 Samuel 7:12, 13.

15. Er nan ve a fatyô u kaan ér tartor u Yuda yange u lu ikyav i Tartor u Aôndo?

¹⁵ Davidi yange hii tsombor u ator a pristi u tamen tseghan a sha icighan mkure la. Sha nahan yô ator la lu mba i shigh ve mkurem shin umesiya. (1 Samuel 16:13; 2 Samuel 2:4; 5:3; 1 Utor 1:39) I kaa ér ve tema sha ikyônough ki torough ki Yehova, ve tema tor sha ci na ken Yerusalem. (2 Kroniku 9:8) Sha nahan yô, tartor u Yuda yange u tile sha ityough ki Tartor u Aôndo, inja na yô u lu gbenda u Yehova hemen yô.

16. Kanyi yange i due ken hemen u ator a Yuda laa?

¹⁶ Tor u Yuda yange nana de ér Yehova a hemen nan kua ior mba nan yô, Yehova a kura ve shi a ver ve doo doo kpaa. U tesen ikyav yô, zum u Solomon tema tor la, bem man mkpeyol ngee je gande ôron; nahan kwagh ne tsenga tesen er Tartor u Aôndo ua hemen ve a lu yô. Zum la Satan una kera nzughul a ior ga shi a kende a mtemtor u Yehova sha kpaa. (1 Utor 4:20, 25) Kwagh ka a er i vihi yô, ator a ken tsombor u Davidi la er kwagh u Yehova kaa ér a eren la ga, nahan ior gba civir ieev shi eren idya kpaa. Ken masejime yô, Yehova de Mbababilon va tim tartor la ken inyom i 607 C.S.Y. (Cii man Shighe u Yesu) la. Er kera kpa Satan lu keren gbenda u puun hemen u Yehova yô, lu inja er a hemba a hemba je nahan.

17. Er i hemba tartor u tsombor u Davidi nahan kpa lu nyi i tese ér Yehova lu hemen here?

¹⁷ Mhembe u i hemba tartor u Iserael u ken imbusutarimese shi i va hemba tartor u tsombor u Davidi la lu ikyav i tesen ér Yehova kan shio u hemen ga, kpa tese er Satan ka una mee uumace vea hemba Aôndo ato vea lu sha tseeneke ve ve kwagh a tser ve yô. (Anzaakaa 16:25; Yeremia 10:23) Yehova yange er kwagh u tesen ér un ngu hemen her, gadia a kaa a profeti Esekiel ér: “Sagh atsar kera, bugh idyer i tor kpaa; . . . Mtim, mtim, Me tim un kera; kwagh ne kpaa una kera va ga, zan zan un u i lu kwagh na jim, una kar van, u Me na un yô.” (Esekiel 21:26, 27) Mkaanem man tese ér “vor” u yange i tôndo zwa ér ua va la, “un u i lu kwagh na jim” la lu a va ga.

18. Ortyom Gaberiel yange kaa a Maria ér nyi?

 ¹⁸ De se nenge ase nen kwagh u anyom yange kar kuma er 600 nahan ve er yô. Yange i tindi ortyom Gaberiel hen Maria, iniunkwase i ken Nasareti, angar u ken Galilia ken imbusutarimese i tar u Palesetina. A kaa ér: “Nenge, ú va wa iyav, ú mar wan u nomso, ú ii Un iti wer Yesu. Un, Una lu Zegeor, á yilan Un er Wan u Uhembansha; Ter Aôndo kpaa Una na Un ikyônough ki torough ki Ter Na Davidi. Una lu tor ken ya u Yakob gbem sha won; tartor Na kpaa ua bee mayange ga.”—Luka 1:31-33.

19. Ka akaa a doon a nyi a sôôn erenee?

¹⁹ Shighe u a pase “kwaghmyer” la mgbôghom ve. Lu u ica a gba ga tsô un u a lu vegher u vesen u “vor” u yange i tôndo zwa a mi la una va. (Mbagalatia 4:4; 1 Timoteu 3:16) Satan una cagh un ikishinguhar. “Vor” la di ua gema a cagh Satan ityough, inja na yô ua tim un man ior nav cica cii. Shi una tese ér ka Tartor u Aôndo ua sôr akaa a vihin a Satan a er la cica cii shi ua kende a hemen u Yehova sha ye. (Mbaheberu 2:14; 1 Yohane 3:8) Yesu una er kwagh ne nena? Ka ikyav i nyi Yesu a ver se? Se zua a mbamlumun sha mbampin mban ken ngeren u a dondo ne.

[Footnote]

Ú Fatyô u Pasen Kpa?

• Yehova kuma u lun Tor u Hemban sha won cii sha ci u nyi?

• Er nan ve Yehova wa ishima ér una ver Tartoro?

• Yehova pase “kwaghmyer” la kure kure nena?

• Er i hemba tartor u tsombor u Davidi nahan kpa lu nyi i tese ér Yehova lu hemen here?

[Study Questions]

[Picture on page 5]

Kanyi kwagh Yehova yange tsengaôron sha ikyev i Aberaham?

[Picture on page 7]

Mhembe u i hemba tartor u Davidi la lu ikyav i tesen ér Yehova kan shio u hemen ga nena?