U Ngu Suen Hemen U Yehova Kpa?
U Ngu Suen Hemen U Yehova Kpa?
“Kaa a akuraior wer: TER tema tor.”—PASALMI 96:10.
1, 2. (a) Ka kwagh u doon tsung u nyi yange er ken uwer u Oktoba inyom i 29 sha shighe u Yesu laa? (b) Kwagh u yange er la lu Yesu a inja nena?
KEN inyom i 29 shighe u Yesu la kwagh u doon tsung er, u lu a vande eren ga yô. A shi nan kpa lu uwer u Oktoba ken inyom la kwagh shon er ye. Orngeren Ivangeli Mateu kaa wener: “Tsô er i er Yesu batisema kera yô, A due shin mnger fese, maa i bugh Sha man [Yohane u Eren Batisema] nenge a Jijingi u Aôndo lu senen er ikyungugh nahan, va tema sha [Yesu]. Imo due Sha, kaa er: Ngun ka Wan Wam u ishima ishima, u i doom a Na yum yô.” Kwagh u i er heen ne ka môm ken akaa kpuaa a mbangeren Ivangeli mba unyiin mbara cica cii ve er kwagh sha mi yô.—Mateu 3:16, 17; Marku 1:9-11; Luka 3:21, 22; Yohane 1:32-34.
2 Mtem u icighan jijingi tema sha Yesu ken igbar la tese ér Yesu ka u i shigh Un mkurem la, inja na yô ka Mesiya shin Kristu. (Yohane 1:33) “Vor” u yange i tôndo zwa ér ngu van la va nyôr ve! Or u Satan una cagh un ikishinguhar, un di una cagh orihyom u vesen u Yehova man u mtemtor u Yehova ityough la va hen Yohane u Eren Batisema. (Genese 3:15) Hii shighe la je, Yesu fa doo doo ér gba u una nôngo kpoghuloo una kure awashima u Yehova sha kwagh u hemen na man Tartor na kpaa.
3. Yesu yange wa agoyol sha tom u yange gba u una er sha u kenden a hemen u Yehova sha la nena?
3 Er “Yesu . . . iv a Icighan Jijingi [yô], A mough hen Yordan, A hide; tsô Icighan Jijingi yem a Na ken taaikyôngo” sha er una za wa agoyol u hiin tom u he u i na un la yô. (Luka 4:1; Marku 1:12) Yesu tsa ken taaikyôngo ayange 40, nahan lu a shighe u una hen sha kwagh u imbwase i Satan kaa Aôndo ér a kuma u hemen ga la vighe vighe man sha tom u yange gba u una er sha u kenden a hemen u Yehova sha la. Imbwase i Satan ne bende a mbatyomov mba shaav cii man hanma or shin tar kpaa. Nahan yô se time nen sha tom u Yesu er sha mimi la, nahan se fa kwagh u i gbe u se er ve se kpa se kende a hemen u Yehova sha yô.—Yobu 1:6-12; 2:2-6.
Satan Hendan a Hemen u Yehova ken Igbar
4. Satan yange due a ahendan a a va a mi sha hemen u Aôndo la ken igbar nena?
4 Satan yange nenge er akaa a se ter sha heen ne lu eren yô. Fese nahan Satan ta num sha vegher u vesen u “vor” u “kwase” u Aôndo u sha ikyav la. (Genese 3:15) Satan mee Yesu kwa tar, kaa a na ér a er kwagh u i lu inja er a hemba doon sha ci na yô, i de lu ishima i Ter na ga. Imeen i sha utar la yange i hemba duen a ahendan a Satan va a mi sha hemen u Aôndo la ken igbar cii. Satan tese Yesu “ityartor i sha won cii kua icivir i i,” been yô a kaa a Yesu sha igbongor ér: “Akaa ne cii me na U, aluer Wea gure inya, Wea civir mo yô.” Yesu yange fa doo doo er “ityartor i sha won cii” lu sha ikyev i Diabolo yô, nahan Yesu er kwagh u tese vegher u un til sha ikyaa i mtemtor ne yô; a kaa ér: “Yem kera, Satan, gadia i nger er: Civir Ter, Aôndo wou, ka Un tseegh er Un tom ye.”—Mateu 4:8-10.
5. Ka tom u taver u nyi yange gba u Yesu una eree?
5 Akaa a Yesu eren ken uma na la tese wang ér hemba gban un ishima u suen hemen u Yehova. Yesu fa wener gba u una lu jighjigh zan zan zum u Satan una mgbegha ior vea wua un la, ka nahan man una tese ér Aôndo kuma u hemen sha won cii ye. Yange i tsengaôron kwagh u ku u Yesu ne ér a cagh “vor” u kwase la ikishinguhar. (Mateu 16:21; 17:12) Shi gba u Yesu una pase er Tartor u Aôndo u lu kwagh u Yehova una yar tom a mi u timin Satan, orhembanato la shi van a bem man mzough hen akaauma cii yô. (Mateu 6:9, 10) Yesu kure tom u taver u i na un ne nena?
“Tartor u Aôndo Mgbôghom Ve”
6. Yesu yange tese ér Aôndo una ‘vihi aeren a diabolo kera’ sha ikyev i Tartor na nena?
6 Ken mhii u tom u Yesu la, a za “nyôr ken Galilia gba ôron Loho u Dedoo u Aôndo, kaan er: Ayange kuma, tartor u Aôndo mgbôghom ve.” (Marku 1:14, 15) Shi a kaa ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:18-21, 43) Yesu zende sha iniembe man igbanger i tar la cica cii “lu ôron kwaghaôndo, pasen Loho u Dedoo u tartor u Aôndo.” (Luka 8:1) Yesu er ityom i ageegh kpishi; yange koso ikpelaior shi yange ijeverahumbe shi bee ior angev shi nder mbakpenev kpaa. Uivande mba Yesu er mban tese ér Aôndo una fatyô u sôron akaa a vihin shi been a ican i ihyembeato i ken Eden la i ve a mi la, nahan una ‘vihi aeren a diabolo kera.’—1 Yohane 3:8.
7. Yesu yange tindi mbadondon un ér ve er nyi, man ve er kwagh shon nena?
7 Er Yesu soo u pasen loho u dedoo ne tsema tsema yô, a kohol mbadondon un mbajighjigh a tese ve u eren tom ne. Hiihii yô, a yila mbaapostoli nav mba 12 mbara a “tindi ve er ve̱ za ôr kwagh u tartor u Aôndo.” (Luka 9:1, 2) Shighe kar yô a tindi mbagenev 70 wener ve za pase ior ér: “Tartor u Aôndo mgbôghom a ven.” (Luka 10:1, 8, 9) Mbahenen nav mba za hidi yô, ve gba ôron un er ve er tom u pasen kwagh u Tartor la doo doo yô, tsô Yesu kaa a ve ér: “M nenge Satan sen sha aôndo, gba er inyiar nahan.”—Luka 10:17, 18.
8. Akaa a Yesu er ken uma na jimin cii tese nyi?
8 Yesu er tom u pasen ior kwagh u Tartor la kpoghuloo, mayange de ér ian i pasen ior kwagh i kar un ga. Yange gba uwer ga cii, lu eren tom tugh man atetan, shi kwagh gba un a akaa a nan ior mkpeyol ken uma kpaa ga. A kaa ér: “Atsôngo nga a ijô, inyon i sha kpaa ngi a aya; kpa Wan u or yô, ngu ape suur ityough ga.” (Luka 9:58; Marku 6:31; Yohane 4:31-34) Shighe u i kôr Yesu ér a wua un la a ôr kwagh a Pontiu Pilatu vangertiôr ér: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye.” (Yohane 18:37) Akaa a Yesu er ken uma na jimin cii tese ér a va sha u va lun ortesen uhemban shin or u eren uivande shin Oryiman u wasen mbagenev tseegh ga, kpa a va sha u eren ishima i Yehova, tor uhemban sha won cii la man sha u pasen er Aôndo una er ishima na sha ikyev i Tartor na yô.—Yohane 14:6.
“Bee ve”
9. Satan yange va mase caghen “vor” u kwase u Aôndo u sha ikyav la ikishinguhar nena?
9 Akaa a Yesu yange er sha u suen Tartor la cii doo Orihyom, Satan Diabolo ga. Satan nôngo acin imôngo sha ikyev i “vor” na u shin tar la ér una wua “vor” u kwase u Aôndo u sha ikyav la. Vor na la lu mbahemen tar man mbakwaghaôndo mba sha ayange la. Satan man ior nav mban an vanger a Yesu, hii shighe u i mar un la zan zan shighe u yem sha la. Ka ker shighe u urahe ken inyom i 33 sha shighe u Yesu la yô, shighe kuma u a na Wan u or sha ikyev i Orihyom ér a cagh un ikishinguhar. (Mateu 20:18, 19; Luka 18:31-33) Ityakerada i Ivangeli tese ér Satan yange yar tom a ior kposo kposo, hii sha Yuda Isekarioti peregh sha upristi mba tamen man mbangeren man Mbafarishi kua Mbaroma, nahan ve na Yesu ibo, ve er un ican zan zan ve wua un sha kon u mtsaha.—Aerenakaa 2:22, 23.
10. Ku u Yesu kpe sha kon u mtsaha la yange u kure nyi kwagh i vesene?
10 Ka wea hen sha ican i Yesu ya sha kon u mtsaha zan zan kar kpen ku u nyoon tsung la nahan, kanyi ka i va u ken ishima? Alaghga ka u umbur nagh ku ipaan ku Yesu na sha ci u uumace mbaasorabo a iyol tangen shio la. (Mateu 20:28; Yohane 15:13) Alaghga gbenda u Yehova tese se dooshima u vesen sha u nan wan na sha ci wase la ua kpiligh we iyol kpen kpen. (Yohane 3:16) Adooga a lu u ken ishima er lu torutya u Mbaroma u yange kaa ér: “Mimi je, Ngun lu Wan u Aôndo” la nahan. (Mateu 27:54) Ka mbamhen mba dedoo mba vea fatyô u van or ken ishima je ne. Nahan kpa umbur mkaanem ma Yesu mase ôron sha kon u mtsaha la. A kaa ér: “Bee ve.” (Yohane 19:30) Lu nyi i bee? Yesu yange er akaa kpishi zum u lu uma shin tar la shi ku na kpa wase sha igbenda kpishi, nahan kpa ityôkyaa i a va shin tar jim jim yô lu sha u va karen a ilyahan i Satan va a mi sha hemen u Yehova la kera ga he? Gadia i tsengaôron ér er a lu “vor” la yô, una ya ican tsung sha ikyev i Satan sha er una kar a ilyahan sha iti i Yehova kera yô. (Yesaia 53:3-7) Akaa ne cii lu tom u kiriki ga, kpa Yesu er a cica cii. Sha kpôô yô, a bee tom u i na un la!
11. Yesu una mase kuren kwaghôron u profeti u yange i ôr ken sule u Eden la nena?
11 Jighjigh u Yesu man mimi na la na yô, i nder un shin ku, kera lu orumace ga, kpa hingir “jijingi u nan a na uma.” (1 Mbakorinte 15:45; 1 Peteru 3:18) Yehova yange tôndo zwa a Wan na u a ver un sha ian i vesen la ér: “Temam ken uwegh ku yanegh, zan zan Me gema mbaihyomov Ou vea hingir We kwagh u pendan angahar sha mi.” (Pasalmi 110:1) “Mbaihyomov” mban yô ka Satan u yange hii ihyembeato la man mba ve lu “vor” na la cii. Er Yesu Kristu a lu Tor u Tartor u Mesiya u Yehova la yô, una hemen gbenda sha u timin mbahembanato cica cii, mba ve lu sha la man mba shin tar kpaa. (Mpase 12:7-9; 19:11-16; 20:1-3, 10) Ka hen shighe la kwaghôron u profeti u ken Genese 3:15 la una mase kuren sha mi ye, kua msen u Yesu yange tese mbadondon un la kpaa. A kaa ér ve eren msen ér: “Tartor Wou u̱ va, i̱ er ishima You shin tar kpaa vough er i eren i Sha nahan.”—Mateu 6:10; Mbafilipi 2:8-11.
Yesu Ver Se Ikyav I Se Dondo Yô
12, 13. (a) Ior mba lumun loho u dedoo u Tartor la nyian nena? (b) Aluer se soo u dondon ikyav i Yesu ver la yô, ka mbampin mba nyi nahan i doo u se pine ayol a ase?
12 Er Yesu tsengaôron nahan, mba pasen loho u dedoo u Tartor ne ken ityar kposo kposo nyian. (Mateu 24:14) Nahan ior umiliôn imôngo tsegha ayol a ve sha ci u Aôndo. Girim ve iyol u nengen akaa a dedoo a Tartor ua va er la. Mba veren ishima u va lun uma gbem sha won ken paradiso shin tar, ken bem man mkpeyol shi mba ôron mbagenev kwagh u ishimaverenkeghen ve ne saan saan. (Pasalmi 37:11; 2 Peteru 3:13) U ngu môm ken mbayôôn Tartor mbanaa? Aluer u ngu yô, ka kwagh u dedoo je u lu eren ye. Nahan kpa, kwagh ugen ngu u i doo u se cii se hen sha mi yô.
13 Apostoli Peteru nger wener: “Kristu kpaa ya ican sha ci wen, A ver ne ikyav je sha u né dondo Un ijime yô.” (1 Peteru 2:21) Ka gbashima u Yesu lu a mi u pasen ior kwagh shin ityesen i Yesu fa yum la Peteru ôr kwagh sha mi ken ivur ne ga, kpa lu ican i Yesu ya la. Peteru yange nenge akaa a Yesu er yô, nahan a fa er Yesu wa iyol u yan ican sha er una wa iyol na sha ikyev i hemen u Yehova shi una tese er Satan a lu or u aie yô. Nahan se dondo ikyav i Yesu la nena? Se pine nen ayol a ase ser: ‘M wa iyol u yan ican kpishi sha ci u hemen u Yehova sha er me sue u shi me na u icivir kpa? Akaa a m eren man ishimatseen i m lu a mi i pasen kwagh la tese ér gbam ishima kpishi u suen hemen u Yehova kpa?’—Mbakolose 3:17.
14, 15. (a) Yange i wa Yesu kwagh shami ga shi i soo u veren un tor nahan a er nena, man er nahan ér nyi? (b) Ka ikyaa i nyi i doo u se umbur hanma shighe? (Za zwa sha ngeren u a lu a itinekwagh ér “Ta Ikyaa a Yehova” la kpaa.)
14 Hanma iyange yô, ka se tagher a ameen a vesen man a kiriki kua akaa a i gbe u se tsua u eren yô. Kanyi ia wase se u fan kwagh u se eree? U tesen ikyav yô, ka sea tagher a imeen i eren kwagh u una vihi mlu wase vea Aôndo nahan se er nena? Shighe u Peteru kaa a Yesu ér a̱ de lumun ér kwagh a tser un ga la Yesu er nena? Yesu gema kaa ér “hirem ken ijime kera, Satan, . . . u we ikyo sha akaa a a lu a Aôndo ga, saa a ior tsô.” (Mateu 16:21-23) Ka sea zua a ian i zan hemen ken kpenga shin hen ijiirtom yase, man a gba u mzehemen la una yange se u eren akaa a ken jijingi nahan, se er kwagh er Yesu nahan kpa? Er Yesu kav er ior mba ve nenge uivande nav mbara ve “sôôn . . . kôron Un sha apera, nan Un tor nahan yô,” a kar hen a ve kera fese.—Yohane 6:15.
15 Er nan ve Yesu hen a hen kwagh u una er sha akaa a i ter sha heen ne man sha akaa agen kpaa ga? Sha ci u yange nenge ér kwagh ngu inya hemba mkpeyol na shin akaa agen a á doo sha ci na yô. Yange soo u eren ishima i Ter na shi kenden a hemen u Yehova sha, aluer nyi kwagh ia er je kpaa. (Mateu 26:50-54) Nahan aluer se mba umbur ikyaa i i lu inya la hanma shighe er Yesu nahan ga yô, alaghga se hide ijime shighe se tagher a imeen yô. Sha ci u nyi? Sha ci u a taver Satan u kôron se sha ayom a na la ga; a fa u geman kwagh u bo hingir er u dedoo nahan, gadia ka kwagh u yange er zum u a mee Ifa je la.—2 Mbakorinte 11:14; 1 Timoteu 2:14.
16. Ityôkyaa i vesen i se wasen mbagenev yô ka nyi?
16 Ka sea due kwaghpasen yô, se lam a ior sha akaa a a gbe ve ishima la shi se tese ve kwagh u Bibilo i er la kpaa. Ka gbenda u dedoo u se wase ior vea lu a isharen i henen Bibilo je ne. Nahan kpa awashima wase jighilii yô, ka u wasen ior ve fa kwagh u Bibilo i tese shin akaa a dedoo a Tartor u Aôndo ua va er la tseegh tsô ga. Gba u se wase ve ve̱ fa ikyaa i i lu inya sha kwagh u hemen u Yehova la. Aluer ve fa ikyaa ne nahan vea hingir Mbakristu mba mimi shi vea tôô “kon u mtsaha” vea ya ican sha ci u Tartor kpa? (Marku 8:34, NW) Vea lumun u kohol mba ve suen hemen u Yehova la sha er vea tese er Satan a lu oraie man ormsende je he? (Anzaakaa 27:11) I na se ian i civirigh i wasen ayol a ase man mbagenev u eren nahan.—1 Timoteu 4:16.
Shighe u Aôndo Una “Hoghom Cii ken Hanma Or Cii Yô”
17, 18. Aluer se mba eren kwagh u a tese ér se mba sha ci u hemen u Yehova yô, ka shighe u doon u nyi se fatyô u veren ashe a mini?
17 Er se lu nôngon sha afatyô wase hegen sha u eren tom u pasen kwagh shi eren inja i i tese ér se sue hemen u Yehova la yô, shi se mba veren ashe keghen shighe u Yesu Kristu “Una gema tartor Una na Aôndo Ter” la kpaa. Kwagh ne una er hanma shighee? Apostoli Paulu pase ér: “Zum u Una gema tartor Una na Aôndo Ter, er A vande timin tarkuran cii kera man tahav kua agee cii kpaa. Gadia ka u Una ya tor keng, zan zan Una gema mbaihyomov Nav cii, vea lu shin angahar a Na. . . . Wan kpaa Una gema iyol Na Una wa sha ikyev i Un u A gem akaa cii A wa sha ikyev Na la, sha er Aôndo Una hoghom cii ken hanma or cii yô.”—1 Mbakorinte 15:24, 25, 28.
18 Shighe u Aôndo “Una hoghom cii ken hanma or cii” la á lu shighe u doon kpen kpen! Hen shighe la Tartor ua er kwagh u i ver u ér u er la. Mbahendan a hemen u Yehova cii a tim ve kera. Nahan bem man mzough una hide a lu sha won cii. Er orpasalmi yange ôr nahan, akaauma cii a wa icam ér: “Na nen TER icivir i i kom sha iti Na yô . . . Kaa a akuraior wer: TER tema tor, tar kpaa u taver je, ua kera tenger ga. Una ôr akuraior ijir sha mimi.”—Pasalmi 96:8, 10.
Ú Fatyô u Nan Mlumun Kpa?
• Ikyaa i hemen u Yehova lu Yesu kwagh u vesen nena?
• Lu nyi kwagh i vesen nahan kwaghpasen u Yesu man ku na la wase u erene?
• Ka sha igbenda i nyi nahan se fatyô u dondon ikyav i Yesu sha u tesen ser se mba ken vegher u hemen u Yehova?
[Study Questions]
[Box/Pictures on page 11]
TA IKYAA A YEHOVA
Anmgbianev kpishi ken tar u Korea man mba sha ajiir agen kpaa fa ér shighe u Mbakristu ve tagher a ameen a taver tsung yô, doo u vea umbur ityôkyaa i i meen ve yô.
Orshiada ugen u yange i wuhe un ken purusu sha ikyev i gomoti u tar u Soviet la pase kwagh u yange wase ve ve wa ishima yô. A kaa ér, “yange se wa ishima sha ci u se fa ikyaa i yange i hii ken sule u Eden la, ka ikyaa i ian i Aôndo i hemen je la. . . . Yange se fa ser se zua a ian i tesen ser se ta ikyaa a mtemtor u Yehova. . . . Kwagh ne na se agee shi wase se u tilen dông kpaa.”
Orshiada ugen ôr kwagh u wase un man Mbashiada mbagen mba i wuhe ve imôngo ken afo a mbakwarev yô. A kaa ér, “Yehova lu suen se. Shin er uma taver nahan kpa, se lu tsevaa sha er se vihi mlu wase vea Yehova ga yô. Yange se taver ayol a ase asema hanma shighe, se umbur ayol a ase ser se ta ikyaa a Yehova sha kwagh u or u nan kom u hemen sha won cii la.”
[Picture on page 8]
Yesu kende a hemen u Yehova sha shighe u Satan mee un la nena?
[Picture on page 10]
Er nan ve Yesu kaa ér “bee ve”?