U Wa Iyol U Ngu Keghen Iyange I Yehova Kpa?
U Wa Iyol U Ngu Keghen Iyange I Yehova Kpa?
“Iyange i vesen i TER mgbôghom, ngi van fefa je.”—SEFANIA 1:14.
1-3. (a) Bibilo i ôr kwagh u iyange i Yehova nena? (b) Ka “iyange i TER” i nyi se tagher a mi ken hemenee?
IYANGE i vesen i Yehova ka iyange i ahwa 24 ga. Ka gôgô shighe u Yehova una tim mbaaferev yô. Iyange la i cier mba ve civir Aôndo ga la iyol, gadia ka iyange i ime man i iyughugh man i ishimavihin man iyange i ican man i myôhôr kpaa. (Yesaia 13:9; Amoshi 5:18-20; Sefania 1:15) Kwaghôron u profeti u Yoel kaa ér: “Wuu, wuu! iyange la! gadia iyange i TER mgbôghom ve, ia va er mtim u a dugh hen Uhembanagee nahan.” (Yoel 1:15) Nahan kpa sha iyange i vesen la, Aôndo una yima “mba ve lu a mimi ken ishima” la.—Pasalmi 7:10.
2 Ishember i “iyange i TER” la ngi ôron kwagh mtim u Yehova tim mbaaferev sha ashighe kposo kposo la. U tesen ikyav yô, gar u Yerusalem yange tagher a “iyange i TER” zum u Mbababilon va ta num sha mi ken inyom i 607 Cii man Shighe u Yesu la. (Sefania 1:4-7) Ken inyom i 70 Shighe u Yesu la kpa Aôndo tim tar u Mbayuda mba ve venda Wan na la; yange de Mbaroma va ta num sha a ve, tim ve cii. (Daniel 9:24-27; Yohane 19:15) Bibilo shi tsengaôron kwagh u “iyange i TER” igen i una ‘nôngo ityav a akuraior cii’ yô. (Sekaria 14:1-3) Icighan jijingi u Aôndo mgbegha apostoli Paulu ôr kwagh u iyange la ér i zua sha m-ande u Kristu, u hii zum u i ver Yesu Tor sha ken inyom i 1914 la. (2 Mbatesalonika 2:1, 2) Ikyav tese wang ér iyange la i mgbôghom kpishi, nahan ivur i sha inyom i 2007 i Mbashiada mba Yehova la ngi sha inja kpen kpen. Ivur shon yô ka Sefania 1:14, i kaa ér: “Iyange i vesen i TER mgbôghom.”
3 Er iyange i vesen i Aôndo i mgbôghom yô, doo u ú wa iyol hegen je u keghen i. U wa iyol nena? Ka nyi kwagh nahan i doo u ú seer eren sha er u wa iyol u kegh a kegh iyange i Yehova laa?
Kohol Nen Iyol
4. Yesu yange kohol iyol lu keghen ikyaren i vesen i nyi?
4 Zum u Yesu Kristu lu ôron kwaghôron u profeti sha kwagh u mkur u tar ne yô, a kaa a mbahenen nav ér: “Kohol nen iyol.” (Mateu 24:44) Shighe u Yesu ôr mkaanem man la, un iyolna kpa kohol iyol lu keghen ikyaren i vesen i una tagher a mi yô, ikyaren ne lu ku na u ú paa se cii la. (Mateu 20:28) Gbenda u Yesu kohol iyol la tese se nyi?
5, 6. (a) Aluer Aôndo doo se ishima kua mbawanndor a vese yô, kwagh ne una wase se u kohol iyol keghen iyange i Yehova nena? (b) Ka ikyav i nyi Yesu a ver se sha kwagh u soon mbawanndor a vese?
5 Yehova yange doo Yesu ishima tsung kua atindiakaa Na a perapera kpaa. Mbaheberu 1:9 ôr kwagh u Yesu ér: “Perapera doo U ishima, U gema U nyagh mvende u vendan atindi la. . . . Ka nahan man Aôndo Wou haa U mkurem ma iemberegh hemba mbakwav Wou ye.” Yesu yange soo Ter na u sha la, ka nahan ve za hemen u civir un sha mimi ye. Se kpa aluer Yehova doo se ishima, nahan se mba ungwan imo na yô, una koso se. (Pasalmi 31:23) Dooshima man ikyo i wan ne ia wase se u kohol iyol keghen iyange i vesen i Yehova la.
6 Yange i fa Yesu ér ka or u tesen mbagenev dooshima. ‘Mhôônom kôron Un a ior tsung, sha ci u i tumbur a ve, ve sambe wuee er iyôngo i i lu a orkuran i ga nahan.’ (Mateu 9:36) Nahan Yesu pasen ior loho u dedoo, vough er se kpa dooshima a mgbeghan se se pasen mbawanndor a vese loho u dedoo nahan. Se mba eren tom wase u Mbakristu u pasen kwagh la kpoghuloo gadia Aôndo doo se ishima kua mbawanndor a vese kpaa, nahan kwagh ne ngu wasen se u wan agoyol sha ci u iyange i vesen i Yehova la.—Mateu 22:37-39.
7. Ka nyi ia na se iember sha shighe u se lu keghen iyange i Yehova ne?
7 Yange doo Yesu u eren ishima i Yehova. (Pasalmi 40:8) Aluer se kpa doo se u eren ishima i Aôndo yô, a saan se iyol u eren un tom. Shi se eren ior iyua er Yesu nahan, nahan a saan se iyol sha mimi. (Aerenakaa 20:35) Sha mimi yô, “iember i [se] ember TER la ka agee a [ase] je.” Ka iember ne ia na ve se hemba wan agoyol sha ci u iyange i vesen i Aôndo la ye.—Nehemia 8:10.
8. Er nan i doo u se seer kporom hen Yehova sha u eren msen hen a na hanma shighee?
8 Yesu eren msen hen Aôndo kpoghuloo nahan kwagh ne wase un u wan agoyol sha ci u ameen a a tagher a mi la. Lu eren msen shighe u Yohane er un batisema la. Shi yange tsa sônon Aôndo kaka cii ve mase tsuan mbaapostoli nav ye. (Luka 6:12-16) Man gema msen u Yesu er a ishima na i môm hen tugh mbu kpernan sev av ve i wua un la di ye? Ka hanma or u ôron Bibilo je nana ôr kwagh u msen ne ve a doo nan ga? (Marku 14:32-42; Yohane 17:1-26) Ú eren msen hanma shighe er Yesu nahan kpa? Eren msen hen Yehova hanma shighe, shi wea eren msen yô de torough a torough ga. Sôn Yehova a̱ na u icighan jijingi na a̱ hemen we, shi aluer ú nenge wer icighan jijingi tese u kwagh u ú er yô er kwagh shon fese. Ka hange hange u se ya ikyar a Ter wase u sha la kangenaa sha shighe u iyange i vesen i Aôndo i mgbôghom shi ican i ngee yum ne. Nahan yô, seer kporom hen Yehova sha u eren msen hen a na hanma shighe.—Yakobu 4:8.
9. Doo u a gba se ishima u tseghan iti i Yehova sha ci u nyi?
9 Yange gba Yesu ishima u tseghan icighanti u Yehova la, nahan kwagh ne kpa wase un u kohol iyol sha ci u ameen. A tese mbahenen nav ér vea eren msen hen Aôndo yô, ve kaa ér: “I̱ tsegha iti You.” (Mateu 6:9) Aluer sar se tsung u tseghan iti i Yehova yô, se nôngo se palegh nyityôkwagh i ia va a ilyahan sha iti shon cii. Sha nahan yô se hemba wan agoyol sha ci u iyange i vesen i Yehova la.
Gba u Ú Gema Uma Wouwee?
10. Doo u se tôv uma wase sha ci u nyi?
10 Aluer gba u iyange i Yehova ia va kper nahan, ia bur u a buru? Doo u hanma wase nana tôv uma u nan nana nenge aluer gba u nana sôr aeren a nan yô. Ayange a uma wase vese ga, shi or fe kper ga, nahan gba u hanma iyange yô, hanma wase nana lu tsevaa ken jijingi. (Orpasenkwagh 9:11, 12; Yakobu 4:13-15) De se time sha akaa agen a alaghga a gba u se ver ishima sha mi ken uma wase yô.
11. U wa ishima wer u ôron Bibilo nena?
11 Kwagh u vesen môm u i doo u se ver ishima sha mi yô, ka kwaghwan u “wanakiriki u jighjigh” ka a shi wan se ér se ôron Bibilo ayange ayange la. (Mateu 24:45) U fatyô u ôron Bibilo jimin cii ken inyom i môm, hii ken Genese zan zan Mpase shi gbidyen kwar sha akaa a u lu ôron la kpaa. Aluer u ngu ôron ityouv mbi Bibilo inyiin hanma iyange yô, u fatyô u ôron mtom ma Bibilo ma ma lu 1,189 la cica cii been ken inyom môm. Hanma tor u Iserael yô, yange gba u nana ôron Tindi u Yehova sha “ayange a uma u nan cii.” A shi nan kpa, lu kwagh u Yosua er je ne. (Duteronomi 17:14-20; Yosua 1:7, 8) Nahan doo u mbatamen mba ken tiônnongo kpa vea ôron Mkaanem ma Aôndo ayange ayange, gadia kwagh ne una wase ve vea tese “ityesen i dedoo la.”—Titu 2:1.
12. Er iyange i Yehova i mgbôghom yô, doo u ú er nyi?
12 Er iyange i Yehova i mgbôghom yô, doo u kwagh ne una mgbegha u u zaan mbamkombo mba Mbakristu hanma shighe shi u nyôron iyol ken akaa a i eren ker la kpoghuloo. (Mbaheberu 10:24, 25) U eren nahan yô, u tsaase mfe wou u yôôn Tartor; u lu oryôôn Tartor u nan keren mba i sar ve u zuan a uma u tsôron shi nan wasen ve kpaa yô. (Aerenakaa 13:48) Shi u fatyô u seer eren ityom ken tiônnongo sha igbenda igen kpaa, er u wasen mbabeenyol shi wan mbayev mba kiriki kwagh nahan. Ityom ne ia na u msaanyol kpen kpen!
Mlu Wou Vea Mbagenev
13. Ka mbampin mba nyi i doo u se pine ayol a ase sha kwagh u haan orhe iyolo?
13 Er iyange i Yehova i mgbôghom kpishi yô, u nenge wer doo u u nôngo kwagh a hemba ave a tse sha er u “haa . . . orhe iyol u i gbe un sha inja i Aôndo ken perapera u mimi man mtsegh u mimi” la ga he? (Mbaefese 4:20-24) Aluer u ngu a aeren a Aôndo yô, mbagenev vea nenge ér u ngu ‘zenden sha Jijingi u Aôndo’ shi u ngu a ityamegh ki jijingi shon kpaa. (Mbagalatia 5:16, 22-25) Akaa nga a we man tsombor wou ne eren sha u tesen ner ne haa orhe iyol je kpa? (Mbakolose 3:9, 10) U tesen ikyav yô, i fa ne ér ne mba eren erdoo a anmgbianev enev mba ken Kristu kua mbagenev kpa? (Mbagalatia 6:10) U henen Ruamabera hanma shighe yô, kwagh ne una wase u ú lu a aeren a Aôndo a aa wa u agoyol sha ci u iyange i Yehova yô.
14. Er nan i doo u or u nan lu nôngon ér nana lu a ieren i kôron iyol tsaha nana sôn icighan jijingi u Aôndo?
14 Aluer u nyoon ishima fele, nahan u nenge wer gba u ú seer lun a ieren i kôron iyol tsaha yô, u er nena? Ieren ne ka vegher u ityamegh ki jijingi ki icighan jijingi u Aôndo una wase u ú lu a mi yô. Nahan yô, sôn Aôndo a na u icighan jijingi na, er Yesu yange kaa ér se eren nahan, wener: “Sôn nen, á na ne; ker nen, né zua a mi; mande nen uwegh, á bugh ne. . . . Aluer ne mba ne lu mbaaferev je kpaa ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?”—Luka 11:9-13.
15. Aluer iyongo zua u a anmgbian ugen nahan ú er nena?
15 Aluer iyongo zua u a ma anmgbian nahan u er nena? Nôngo hime nen iyongo la sha er bem una lu ken tiônnongo kua mzough kpaa yô. (Pasalmi 133:1-3) Er kwagh u Yesu a we se ken Mateu 5:23, 24 shin Mateu 18:15-17 la. Aluer iyange ngi been we a ishima i vihin her yô, nôngo sôr ikyaa i í lu inya la. Ashighe kpishi ka sea de or u nan er se kwaghbo la kwaghbo u nan yô, iyongo i bee. Paulu nger wener: “Lu nen sar sar ayol a en, zungwen nen mhôônom, de nen ayol a en kwaghbo, er Aôndo kpaa A de ne ken Kristu nahan.”—Mbaefese 4:25, 26, 32.
16. Ka sha nyi gbenda nahan nom man kwase vea zungwen ayol a ve mhôônomo?
16 Gba u nom man kwase vea zungwen ayol a ve mhôônom shi ashighe agen je yô vea deen ayol a ve kwaghbo kpaa. Shighe u ú nenge wer gba u orya wou shin kwase wou una seer doon we ishima shi u eren kwagh a na sha mhôôn yô, sôn Aôndo a wase u shi dondo kwaghwan u Mkaanem nam sha er u er nahan keng keng yô. Gba u ú er kwagh u una wase u ú dondo kwaghwan u ken 1 Mbakorinte 7:1-5 la sha er u pande ishimanyian shi u var a orya wou shin kwase wouwe? Sha mimi yô, doo u nom man kwase vea ‘zungwen ayol a ve mhôônom’ sha gbaa ne.
17. Aluer or er isholibo i vesen yô ka nyi i doo u nana eree?
17 Man zum u ú er isholibo i vesen di ye? Sôr kwagh u u er la a atimbir shio. Ker iwasen hen mbatamen mba ken Kristu kpee, i de bundu ga. Vea er msen sha ci wou shi vea wa u kwagh u una wase u ú hide u taver ken jijingi yô. (Yakobu 5:13-16) Er msen hen Yehova sha gbenda u tesen wer u gema ishima. U er nahan ga yô, imoshima you ia zer zan we iyol. Zum u Davidi er isholibo yô, ishima za un iyol kpishi kpa er pase Yehova asorabo a na yô, pever un iyol. Davidi nger wener: “Saan or u i de nan kwaghbo u nan la iyol, man i cir isholibo i nan kpaa yô. Saan or u TER A ne nan ibo sha ifer i nan ga la, iyol; shi nan lu a icugh ken ishima i nan kpaa ga yô.” (Pasalmi 32:1-5) Yehova den mba ve gem asema sha mimi la asorabo a ve.—Pasalmi 103:8-14; Anzaakaa 28:13.
De Hingir Or u Tar Ne
18. Doo u ú nenge tar ne nena?
18 Sha kpôô yô, we kpa u ngu veren ashe keghen tar u he u doon tsung u Ter wase u sha a tende zwa a mi la. Nahan yô, u nengen tar u uumace mba ve civir Aôndo ga ne nena? Satan “tor u tar ne” yange lu a ma ityôkwagh sha Yesu Kristu ga. (Yohane 12:31; 14:30) Mimi yô, we kpa u soo wer Diabolo man tar na ne u lu a ma ityôkwagh sha a we ga. Yô, er tom sha mkaanem ma apostoli Yohane man, ma kaa ér: “Tar u̱ de kera doon ne ishima ga shin akaa a lu shin tar tsô kpaa ga.” U eren nahan ka kwagh u dedoo, gadia “tar . . . ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”—1 Yohane 2:15-17.
19. Mba taver agumaior a ken Kristu ishima ér a̱ eren nyi?
19 U ngu wasen ônov ou sha er vea ‘kura ayol a ve wang sha kwagh u taregh’ kpa? (Yakobu 1:27) Satan soo u tsuwen ônov ou er orkôronishu ka nan tsuwe ishu shin kungwa nahan. I tim mbamzough mba agumaior kposo kposo sha er agumaior a̱ eren kwagh a tar u Satan ne ityô yô. Nahan kpa, mbacivir Yehova vande mban ken mzough u i lu un tseegh una war mtim u tar u bo ne yô. Nahan mba taver agumaior a ken Kristu asema ér a ‘eren tom u Ter ngegh je.’ (1 Mbakorinte 15:58) Gba u mbamaren mba civir Aôndo vea wase ônov vev u eren akaa a aa na ve msaanyol man mkom shi Aôndo kpa una zua a icivir yô; i lu akaa a aa wase ve u wan ago sha ci u iyange i Yehova yô.
Ver Ishima sha Uma u ken Paradiso La
20. Doo u se ver ishima u va zuan a uma u tsôron sha ci u nyi?
20 Aluer u ngu veren ishima u va zuan a uma u tsôron yô, u fatyô keghen iyange i Yehova la a ishima i kundu kundu. (Yuda 20, 21) Er u lu veren ashe a uma u tsôron ken Paradiso yô, u ngu a ishimaveren wer ú hide ú hingir gumor u lun a gbong gbong iyol shi ú lu a shighe u eren akaa a dedoo shi henen kwagh u Yehova gbem sha won. Jighilii yô, u za hemen u henen kwagh u Aôndo gbem sha won sha ci u uumace fa di “akaa a ken kpe u aeren a Na [shin ve fa aeren a Aôndo kpuaa] tsô.” (Yobu 26:14) Kwagh ne doo kpen kpen!
21, 22. Ka nyi nahan alaghga se va hen sha ikyev i mba a nder ve laa, man ve di vea hen nyi hen a vese?
21 Ior mba a va nder ve ken Paradiso la vea pase se akaa a ngise a se fe tsembelee ga la. Enoki una pase se er yange un ôr mbavendan Aôndo loho u Yehova sha ishimataver yô. (Yuda 14, 15) Se fa keng ser, Noa kpa una ôr se er yange un gba tso yô. Aberaham man Sara vea pase se er yange ve undu ijiir ve i kundu kundu ken gar u Ur ve lu tsan ken utenti ve ishima lu ve ker yô. Nenge ase er Eseter kpa una pase se vighe vighe er yange un vihi awashima u bo u Haman, un war ior nav yô. (Eseter 7:1-6) Yona una ôr se er yange un lu ken iyav mbu zege ishu ayange atar yô. Yohane u Eren Batisema di una pase se er lu un ken ishima zum u er Yesu batisema la. (Luka 3:21, 22; 7:28) Nenge er se hen akaa a doon kpishi sha wono!
22 Sha shighe u Kristu una hemen anyom dubu môm la, alaghga a na u ian i icivirigh i tesen mba a nder ve shin ku la “mfe u . . . Aôndo.” (Anzaakaa 2:1-6) Ka sea nenge er ior ve lu zuan a mfe u Yehova Aôndo shi ve lu eren sha mi nahan, i saan se iyol je i zua ga! Kpa nenge ase er u zua a iember ken hemen zum u Yehova una ver iniôngon you i tesen ior mbayiase mba a va nder ve, mba vea ngohol ityesen you ave ahar la yô!
23. Kanyi i doo u se kange ishima se eree?
23 Er se yen yô, se fatyô u teren akaa a dedoo a Yehova a lu eren a ior nav hegen la cica cii ga. (Pasalmi 40:5) Se wuese akaa a ken jijingi a Aôndo a ne se la kpishi je. (Yesaia 48:17, 18) Yô, se shire nen Aôndo tom sha shighe u se lu keghen iyange i Yehova ne a ishima yase cii, aluer mlu wase una lu nan nan kpaa.
U Na Mlumun Wer Nyi?
• Kanyi i lu ‘iyange i TERE’?
• Ú kohol iyol sha ci u iyange i Yehova nena?
• Alaghga a gba u se gema uma wase hen shighe u iyange i Aôndo i mgbôghom yum ne nena?
• Kanyi ú lu veren ashe a mi zum u iyange i Yehova ia kar kera laa?
[Study Questions]
[Picture on page 14]
Yesu yange wa agoyol sha ci u ameen
[Picture on page 17]
Ian i a na se i tesen mba a nder ve shin ku mfe u Yehova la ka zege kwagh kpen kpen!