Ne Kuma U Ngohol Tartor

“Ka ikyav i ijirôron i mimi i Aôndo i tesen er ne kuma tartor u Aôndo u ne lu yan ican sha ci u u la.”—2 TES. 1:5.

1, 2. Ka awashima u nyi Aôndo a lu a mi sha kwagh u ijirôronô, man ka an nana ôr i?

 AOSTOLI PAULU yange lu ken gar u Atene ken inyom i 50 la. Er ishima za un iyol kpishi sha ieev mbi í lu civir ken gar la yô, a pase ve kwagh sha kwaghfan. A kure kwaghôron na sha mkaanem ma alaghga ma kor mbafanaôndoga mba ve lu ungwan a na la ken ishima yô. A kaa ér: “[Aôndo] ngu pasen ior sha hanma ijiir cii er ve̱ gema ishima, gadia A ver iyange i Una ôr tar cii ijir sha mimi, sha Or u A ver nan yô; sha kwagh ne yô, A na ior cii ikyav i mimi sha mnder u A nder Un shin mbakpenev la.”—Aer. 17:30, 31.

² Nahan doo u se hen sha kwagh u iyange i Aôndo a ver sha u ôron uumace ijir la zulee. Ka or u Paulu ter iti na shighe u lu nan kwaghôron ken Atene ga la una ôr ijir ne ye, kpa se fa ser or shon ka Yesu Kristu u i nder un shin ku la. Yesu una kure mbagenev ijir una na ve uma, kpa mbagenev yô una tim ve.

3. Yehova ya ikyur a Aberaham sha ci u nyi, man ka an nan er tom u vesen sha u kuren ikyuryan shono?

³ Iyange i Jirigh la ia tôô anyom 1,000. Yesu u a lu Tor u Tartor u Aôndo la una ôr ior ijir ken iti i Yehova, kpa una ôr i tswen ga. Yehova tsua ior mbagenev ér ve tema tor a Yesu imôngo shi ve ôr ijir sha shighe u iyange i jirigh i ia tôô anyom dubu la. (Nenge Luka 22:29, 30.) Yehova yange wa imagh ki Iyange i Jirigh la shighe u er ityendezwa a orjighjigh Aberaham la. A er ityendezwa ne anyom kar hegen war kuman 4,000. (Ôr Genese 22:17, 18.) A shi nan kpa, ityendezwa la yange i̱ hii ken inyom i 1943 C.S.Y. (Cii man Shighe u Yesu) la. Kpa Aberaham yange fa kwagh u ikyuryan la ia er sha ci u uumace la tsembelee ga. Nahan kpa, se mba sha ayange ne se kav er vor u Aberaham u i er kwagh u ú ken ikyur i Aôndo ya a Aberaham la u lu eren tom u vesen sha u kuren awashima u Aôndo u ôron uumace cii ijir la yô.

4, 5. (a) Ka an nan lu vegher u vesen u vor u Aberaham laa, man a ôr kwagh u Tartor ér nyi? (b) Ka hanma shighe nahan mbajighjigh lu a ishimaverenkeghen i yan dyako u Tartor u sha?

⁴ Ka Yesu a lu vegher u vesen u vor u Aberaham ye, man yange hingir Mesiya u i tende zwa la shin Kristu sha shighe u i shighe un mkurem sha icighan jijingi ken inyom i 29 la. (Gal. 3:16) Yange gba u Yesu una pase ikyurior i Mbayuda loho u dedoo u Tartor ken anyom atar man tiônôô a a dondo la. Shighe u i kôr Yohane u Eren Batisema i za wuhe kera la, Yesu tese ér mbagenev vea tema tor a na sha Tartor u sha la, a kaa ér: “Sha ayange a Yohane  u eren batisema zan zan hegen ne, mba eren a tartor u Sha sha igyosor; mbaeren kwagh sha igyosor kpaa mba ngohol u sha agee.”—Mat. 11:12.

⁵ Kwagh ka a er i doo yô, cii man Yesu ôr kwagh u mba vea ‘ngohol’ Tartor u sha la yô, a kaa ér: “Mimi je, M kaan ne ne, mba kasev ve mar ve cii, or môm je mough u nan hembe Yohane u eren batisema icivir ga; nahan kpaa, or u ken tartor u Sha u nan hembe gban ijime la nan [hemba] un.” (Mat. 11:11) Yange ôr kwagh la sha ci u nyi? Lu sha ci u mbajighjigh lu a lu a ishimaverenkeghen i yan dyako u Tartor u sha la ga zan zan shighe u i haa ve icighan jijingi sha iyange i Pentekosti u inyom i 33 la. Kpa Yohane u eren batisema kpe cii shighe la ye.—Aer. 2:1-4.

I Na Vor u Aberaham la Ishô

6, 7. (a) Yange gba u tsombor u Aberaham ua hingir “er asan a Sha” nahan sha nyi gbenda? (b) Aberaham yange zua a iveren nena, man vor na la kpa zua a iveren i i lu kwagh môm a i na la sha nyi gbenda?

⁶ Yange i kaa a Aberaham ér tsombor na ua seer ngeen “er asan a Sha” man er waarawa u shin kpezegemnger nahan. (Gen. 13:16; 22:17) Inja na yô sha shighe u Aberaham la, taver kpishi u uumace fan iyenge i mba vea kohol vea lu vor na la. Kpa shighe kar yô i mase pasen iyenge i vor na u ken jijingi ne. Dugh Yesu kera yô, gba u iyenge ne ia kuma iorov 144,000.—Mpa. 7:4; 14:1.

⁷ Mkaanem ma Aôndo ôr kwagh u jighjigh u nan u Aberaham ér: “[Aberaham] na TER jighjigh, tsô A gema kwagh ne hingir perapera na je.” (Gen. 15:5, 6) Orumace môm kpa nan ngu perapera za bee ga. (Yak. 3:2) Nahan kpa, er Aberaham na Aôndo jighjigh tsung yô, Yehova eren kwagh a na vough er ka orperapera nahan, je yô a yila un ér huror na kpaa. (Yes. 41:8) Mba ve kohol ve hingir vor u Aberaham u ken jijingi vea Yesu imôngo la kpa kape í yer ve ér mbaperapera je la, man kwagh ne va ve a averen je hemba a Aberaham la.

8. Ka averen a nyi a lu sha ci u mba ve lu vor u Aberaham laa?

⁸ I na Mbakristu mba i shigh ve mkurem la ishô sha ci u ve na nagh ku ipaa ku Yesu la jighjigh. (Rom. 3:24, 28) Sha mnenge u Yehova yô, i pase ve sha ikyev i isholibo i tuhwa, shi ve kuma u a shighe ve mkurem sha icighan jijingi vea hingir ônov mba Aôndo mba ken jijingi, ka anmgbianev mba Yesu Kristu je la. (Yoh. 1:12, 13) I ya ikyur i he a ve shi ve hingir ikyurior i he, ka “Iserael u Aôndo” je la. (Gal. 6:16; Luka 22:20) Akaa a i er a ve ne cii na ve icivir i vesen kpen kpen. Er Aôndo a er akaa ne cii sha ci u Mbakristu mba i shigh ve mkurem la yô, ishimaverenkeghen ve ka u lun uma gbem sha won shin tar ga. Gadia saan ve iyol u za hemen vea Yesu imôngo sha, sha Iyange i Jirigh la, nahan ve gbihi ishimaverenkeghen i va lun uma gbem sha won shin tar la.—Ôr Mbaromanu 8:17.

9, 10. (a) Ka hanma shighe yange i hii shighen Mbakristu mkurem sha icighan jijingi, man lu nyi i lu keghen ve? (b) Ka iwasen i nyi Mbakristu mba i shigh ve mkurem mbara zua a mi?

⁹ Sha iyange i Pentekosti u inyom i 33 la, i na uumace mbajighjigh mbagenev ian i za hemen vea Yesu sha shighe u Iyange i Jirigh la. Yange i er mbahenen mba Yesu mba kuman  er iorov 120 nahan batisema sha icighan jijingi ve hingir Mbakristu mba hiihii mba i shighe ve mkurem yô. Kpa batisema ne lu kwagh u hiihii u una na ve vea zua a uma u tsôron sha di tsô. Hii shighe la je, gba u vea civir Yehova sha jighjigh, shin er Satan una tôv ve a atsan atô kposo kposo nahan kpaa. Cii man ve zua a tsar u uma sha yô, saa vea lu jighjigh zan zan a ar ken ku.—Mpa. 2:10.

¹⁰ Sha ityôkyaa ne yô, Yehova ngu nan Mbakristu mba i shigh ve mkurem mban ishimataver i kwagh a gbe ve a mi yum la sha Mkaanem nam kua sha ikyev i tiônnongo kpaa. U tesen ikyav yô, apostoli Paulu yange nger Mbakristu mba i shigh ve mkurem mba ken Tesalonika la, ér: “Ne fa er se lu wan ne kwagh er ter ka a eren a ônov nav nahan, se lu taver hanmô wen ishima, se lu pasen ne ser, zende wen u̱ kuma Aôndo u A yer ne u zan ken tartor Na man iengem Na” la.—1 Tes. 2:11, 12.

11. Ka ngeren u nyi Yehova a ne mba ve lu “Iserael u Aôndo” laa?

¹¹ Shighe u Yehova tsua tiônnongo u Mbakristu mba i shigh ve mkurem la anyom kar hemba 60 yô, a nenge ér doo u a nger kwagh u tom u Yesu er shin tar la kua gbenda u Yehova eren kwagh a Mbakristu mba i shigh ve mkurem mba sha derianyom u hiihii la man akaa a á wa ve la kpaa. Yehova maa seer Ruamabera u Mbakristu u ken Zwa Grika la sha Ruamabera u ken Zwa Heberu u vande lun la. Yange i nger Ruamabera u ken Zwa Heberu la sha ci u ikyurior i Iserael i sha marami la shighe u ve ya ikyar i dedoo vea Aôndo la. Ruamabera u Mbakristu u ken Zwa Grika la di i nger un sha ci u “Iserael u Aôndo,” ka mba i shigh ve mkurem ve lu anmgbianev mba Kristu man ônov mba Aôndo mba ken jijingi je la. Nahan kpa, mba ve lu marnya u Iserael ga kpa vea fatyô u zuan a iwasen sha u ôron Ruamabera u ken Zwa Heberu la. Mbakristu mba i shigh ve mkurem ga mbara kpa kape vea fatyô u zuan a iwasen kpishi sha u ôron Ruamabera u Mbakristu u ken Zwa Grika shi dondon akaawan a ker je la.—Ôr 2 Timoteu 3:15-17.

12. Kanyi Paulu umbur Mbakristu mba i shigh ve mkurem mbara?

¹² Yange i na Mbakristu mba sha derianyom u hiihii la ishô shi i shighe ve mkurem sha icighan jijingi sha er vea kuma u yan dyako ve sha yô. Mkurem ma i shigh ve la tese ér ve tema tor sha Mbakristu mbagenev mba i shigh ve mkurem ve lu shin tar her la ga. Ikyav tese ér kwagh ne yange hungur Mbakristu mbagenev mba tsuaa mbara, nahan ve gba keren ati a zan ken tiônnongo. Nahan Paulu kaa a ve ér: “Ne ide kera ve, ne hingir mbanyarev kera ve, ne ya tor, kpa se lu ga. Ma ne ye tor, se kpaa ma se ye tor a ven imôngo.” (1 Kor. 4:8) Paulu maa umbur mba i shighe ve mkurem sha ayange a na la, ér: “Ka er se mba yan tor sha kwagh u jighjigh wen u nan ga, kpa se mba eren tom a ven imôngo sha ci u né ember yô.”—2 Kor. 1:24.

I Zua a Iyenge i Í Tsengaôron la Cii

13. Hii ken inyom i 33 la je i za hemen u tsuan mba i shigh ve mkurem mbara nena?

¹³ Ka sha derianyom u hiihii la tseegh yange i tsua Mbakristu mba i shigh ve mkurem mba ve lu iorov 144,000 la ga. Yange i za hemen u tsuan ve sha shighe u mbaapostoli la, man a̱ shi nan kpa i tsua iorov kpuaa tseegh ken uderimbaanyomov mba ve dondo la. Nahan i za hemen u tsuan mba i shigh ve mkurem mbara zan zan sha shighe wase ne kpaa. (Mat. 28:20) Kpa Yesu hiin u hemen sha ken inyom i 1914 yô, i kera timbir u kohol mba i shigh ve mkurem la ga.

14, 15. Kanyi i er sha shighe wase ne sha kwagh u mba i shigh ve mkurem laa?

¹⁴ Kwagh u hiihii u Yesu er shighe u hii u hemen sha yô, a kar a hanma kwagh u lu hendan a hemen u Aôndo sha la cii kera. (Ôr Mpase 12:10, 12.) Been yô, a ver ishima sha u kohol asande a mba 144,000 mba vea za tema tor a na imôngo ken Tartor na la. Ken atô u kwavanyom u sha 1930 la nahan, tom u kohol  asande a mba i shigh ve mkurem ne zulum u kuren, man sar mba ve lu ngohol loho u dedoo u i lu pasen la u yemen sha ga. Jijingi lu eren shiada vea jijingi ve ér mba ônov mba Aôndo ga. (Nenge Mbaromanu 8:16.) Kpa yange ve fa ér mba ken “iyôngo igen” i i lu a ishimaverenkeghen i lun uma gbem sha won ken paradiso shin tar la. (Yoh. 10:16) Nahan inyom i 1935 la karen yô, tom u pasen kwagh cii hemba lun sha u kohol “zegeikpelaior” i apostoli Yohane nenge a i ken mpase u sha mnenge, i ia va war “zegecan” la.—Mpa. 7:9, 10, 14.

¹⁵ Nahan kpa ken anyom a karen ne, hii ken kwavanyom u sha 1930 la je, ka asande a ior kpuaa tseegh i tsough ve ér ve yem sha ye. Sha ci u nyi? Sha ci u ashighe agen yô, a tsua ve sha u ve tile sha ityough ki mba i shigh ve mkurem mba ve kera til sha mimi ga la. (Nenge Mpase 3:16.) Paulu kpa ôr kwagh u ior mba ve undu mimi mba un fa ve doo doo yô. (Fil. 3:17-19) Ka unô Yehova una tsua ve ér ve tile sha ityough veve? Ngula ka Yehova a fe ye. Kpa ka ior mba ve sember van ken mimi Yehova una tsua ga, ka ior mba ve civir Yehova sha mimi ica i gbe, er mbahenen mba Yesu ôr kwagh ve shighe u hii mkombo u Umbur ku na la nahan. *—Luka 22:28.

16. Se mba a iwuese sha kwagh u mba i shigh ve mkurem mbara sha ci u nyi, man se mba a vangertiôr se nyi?

¹⁶ Kpa, ikyav tese ér ka mba yange i tsua ve u yemen sha, hii ken kwavanyom u 1930 la cica cii i tsough ve ér ve tile sha ityough ki mba ve undu mimi la ga. A shi nan kpa Yehova soo ér Mbakristu mba i shigh ve mkurem mbara ve lu a vese ken ayange a masejime a tar ne zan zan mtim u “Zegebabilon.” * (Mpa. 17:5) Nahan se mba a vangertiôr ser a kohol iorov 144,000 cii sha shighe u Yehova a ver la, shi vea tema tor ken Tartor kpaa. Shi se fatyô u nan Mkaanem ma profeti jighjigh ser, zegeikpelaior i i lu ngeen seer a seer ne ia tile sha mimi her. Ica a gba ga tsô ia due ken zegecan i i lu van sha tar u Satan ne, ia nyôr ken tar u he u Aôndo saan saan.

I Kohol Mba Vea Lu Gomoti u Aôndo u Sha la Zurum u Been

17. Kanyi i er ken 1 Mbatesalonika 4:15-17 man Mpase 6:9-11 sha kwagh u Mbakristu mba i shigh ve mkurem, ve lu jighjigh zan zan ve kar kpen laa?

¹⁷ Hii ken inyom i 33 la je, Mbakristu mba i shigh ve mkurem udubu imôngo tese jighjigh u nan taveraa shi ve wa ishima a atsan zan zan ar ken ku. Mbakristu mban kuma u ngohol Tartor nahan ve ngohol injar ve sha kpaa, man ikyav tese ér ve ngohol injar ve ne shighe u Kristu tema tor ica lu a gba ga la.—Ôr 1 Mbatesalonika 4:15-17; Mpase 6:9-11.

18. (a) Asande a mba i shigh ve mkurem ve lu shin tar her la mba a vangertiôr ér nyi? (b) Iyôngo igen la ngi nengen Mbakristu mba i shigh ve mkurem mbara nena?

 ¹⁸ Asande a mba i shigh ve mkurem ve lu shin tar her la mba a vangertiôr ér aluer mba jighjigh zan zan ar ken ku yô, ica a gba ga tsô ve kpa vea ngohol injar ve. Iyôngo igen i i lu umiliôn imôngo la ka ia hen sha kwagh u jighjigh u nan u anmgbianev vev mba i shigh ve mkurem la yô, ve lumun a mkaanem ma apostoli Paulu nger anmgbianev nav mba i shigh ve mkurem mba ken Tesalonika la. A kaa ér: “Se mba tan ihyagh [a] ven ken iniongo i Kristu i Aôndo sha ishima yen i wan man jighjigh wen u nan ken mbamtev mba i lu tôvon ne a atsan man atsan a ne lu taver ishima sha mi la cii. Ka ikyav i ijirôron i mimi i Aôndo i tesen er ne kuma tartor u Aôndo u ne lu yan ican sha ci u u la.” (2 Tes. 1:3-5) A kohol mba vea lu gomoti u Aôndo u sha la a bee sha shighe u or u masetyô ken mba i shigh ve mkurem mbara nana mase kpen la. Shighe la a lu shighe u saanyol sha kua shin tar kpaa.

[Footnotes]

Ú Fatyô u Pasen Kpa?

• Lu nyi Aôndo pase Aberaham i i gbe i zough sha Iyange i Jirigh laa?

• Yange i na Aberaham ishô sha ci u nyi?

• Ishô i í ne ônov mba Aberaham la va ve a nyi?

• Mbakristu cii mba a vangertiôr ér nyi?

[Study Questions]

[Picture on page 20]

Yesu yange taver mbadondon un asema ér ve ker Tartor u sha la sha gbashima

[Picture on page 21]

Yehova yange hii u tsuan mbagenev mba vea lu vor u Aberaham la sha iyange i Pentekosti u inyom i 33 la

[Pictures on page 23]

Doo iyôngo igen la kpishi er Mbakristu mba i shigh ve mkurem mbara ve lu a ve imôngo ken ayange a masejime ne nahan