Shighe U I Yegher Mbakristu Er Uwua Nahan Yô

CII man Yesu kpe yô, a ta mbahenen nav icin ér: “Nenge, Satan norom sha u una yegher ne er uwua nahan.” (Luka 22:31) Inja i kwaghôron u Yesu ne ér nyi?

Sha ayange a Yesu la, uwua u sundan lu tom u ican kpishi. Mba eren tom sunda yange vea sundan iyiagh ken atev cii yô, ve gbire u sha vande u gbiren iyiagh sha mi la gayô zendenya a kpela agbur a unde a mi sha iyiav mbira a kume samuyia la, nahan sam u due kposo imough di shi i due kposo. A been heela yô, i tôô tser i gba peer samuyia la. Sam la u hiden u haan sha vande, kpa imough yô ahumbe a purugh a mi i za haan ica je. Nahan i mase tsaan sam ne sha lalia sha er a kase inya a haa kera kua ambaakaa la yô.

Satan yange ta num sha mbahenen mba Yesu mba sha ashighe a tsuaa la je gba uwer ga, vough er Yesu ôr nahan, shi ngu tan num sha a vese nyian kpaa. (Ef. 6:11) Sha kpôô yô, ka hanma ican i se tagher a mi cii Satan a lu uwer sha mi ga. (Orpa. 9:11) Nahan kpa, Satan ngu nôngon sha afatyô na cii ér una vihi mtil sha mimi wase. U tesen ikyav yô, alaghga una mee ser ér se wa ityough u zendan inyaregh ityô shin se er iemberyolough i bo shin se nyôr iyol ken aeren a ijimbagh. Shi una fatyô u meen se sha ikyev i mba se henen makeranta a ve imôngo shin mba se eren tom ijiir i môm gayô mba hen tsombor wase mba ve lu Mbashiada mba Yehova ga la ér ve tuur se ken ijime se hen makeranta kpishi shin se er tom kpoghuloo sha er se lu yôughyôugh yô. Shi Satan una fatyô tôvon se a ican ér se de u civir Aôndo. Igbenda igen kpa ngi kpishi i Satan a yaren tom a mi sha u yegher se er uwua nahan yô.

Tsô, se hendan a orihyom u ageegh ne nena? Sha tahav asev tseegh yô, se fatyô u hendan a na ga. Er Satan a hembe se agee ica nahan kpa, se fa ser Yehova di hemba un agee yem zende zende. Aluer se suur sha Yehova a ishima i môm shi se er msen hen a na kpoghuloo ser a na se kwaghfan shi a na se agee kua ishimataver, shi se suur sha akaawan a na a ishima yase cii yô, una na se agee a hendan a ameen a Satan la.—Ps. 25:4, 5.

Shighe u se tagher a imeen yô, gba u se lu a mfe u “paven kwagh u dedoo a kwagh u bo” sha er se gba ken ayom a Satan ga yô. (Heb. 5:13, 14) Yehova una na se mfe u paven kwagh u dedoo a kwagh u bo. Nahan nyityô kwagh je i a er kpa se var a kwagh u dedoo. Aluer se dondo akaawan a Yehova yô, una wase se u eren sha ishima i se kange ser se er kwagh u vough la.—Ef. 6:10.

Satan soo u yegher se er uwua nahan. Kpa sha tahav mbu Yehova yô, se hendan a na shi se tile dông sha jighjigh u nan kpaa. (1 Pet. 5:9) Mkaanem ma Yehova taver se ishima ér se ‘hendan a Diabolo tsô una yevese se.’—Yak. 4:7.