Ve Kuma U A Za A Ve Hen Ambor A Mngerem Ma Umam
Ve Kuma U A Za A Ve Hen Ambor A Mngerem Ma Umam
“Waniyôngo . . . Una hemen ve, Una za a ve hen ambor a mngerem ma umam.”—MPA. 7:17.
1. Mkaanem ma Aôndo yila Mbakristu mba i shigh ve mkurem la ér nyi, man ka tom u nyi Yesu a ne ve?
MKAANEM ma Aôndo yila Mbakristu mba i shigh ve mkurem mba ve lu nengen sha akaa a Kristu a shin tar la ér “wanakiriki u jighjigh man u fan kwagh.” Shighe u Kristu va sôr “wanakiriki” ne ken inyom i 1918 la, a nenge mba i shigh ve mkurem, ve lu shin tar la lu eren tom u nan “kwaghyan sha ashighe ashighe” la vough. Yesu, u a lu Ter ve la nengen nahan yô doo un, nahan a “wa akaa a na cii sha ikyev” ve. (Ôr Mateu 24:45-47.) Sha nahan yô, mba i shigh ve mkurem mbara mba eren mba ve civir Yehova a ve imôngo ve lu shin tar la tom cii ve vea mase ngohol dyako ve sha ye.
2. Akaa a Yesu la wa nyi man nyi kere?
2 Ter shin orya ngu a tahav mbu eren hanma kwagh u a soo cii a akaa a a lu a na yô. Akaa a Yesu Kristu u Yehova a ver un Tor la wa akaa a Tartor a a lu shin tar la cii ker. Akaa ne wa “zegeikpelaior” i apostoli Yohane nenge a i̱ ken mpase la kpa ker. Yohane pase kwagh u ikpelaior ne ér: “Nenge, zegeikpelaior lu, ma or fatyô u ôron i iyenge ga, ve due ken hanma ikyurior man hanma nongo man hanma nongoior man hanma zwa kpaa. Ve tile sha ishigh ki ikyônough ki torough kira man sha ishigh ki Waniyôngo ve haa akondo a pupuu iyol shi ve lu a andar a avilegh sha ave.”—Mpa. 7:9.
3, 4. I na zegeikpelaior icivir i vesen i nyi?
3 Yesu yange yila mba ve lu ken zegeikpelaior la ér ka “iyôngo igen.” (Yoh. 10:16) Ishimaverenkeghen ve yô, ka u lun uma gbem sha won shin tar ken paradiso. Mba a vangertiôr ér Yesu “una za a ve hen ambor a mngerem ma umam” shi “Aôndo Una ese ve mliam sha ashe kera cii.” Er ve lu a ishimaverenkeghen ne yô, “ve ôô uriga vev ken awambe a Waniyôngo, ve kungu ve.” (Mpa. 7:14, 17) Ve na nagh ku Yesu la jighjigh nahan sha ishigh ki Aôndo yô mba a ‘uriga mba pupuu.’ I na ve ishô, ve hingir akar a Aôndo er Aberaham nahan.
4 Er Aôndo a ne zegeikpelaior i iyôngo igen i i lu seer a seer la ishô yô, mba a ishimaverenkeghen i va waren mtim u tar ne shighe u zegecan una va la. (Yak. 2:23-26) Vea fatyô u kporom hen Yehova shi ve cii mba a ishimaverenkeghen i va waren Armagedon. (Yak. 4:8; Mpa. 7:15) Mba eren kwagh ve kposo ga kpa mba eren kwagh er Tor ve u sha man anmgbianev vev mba i shigh ve mkurem ve lu shin tar la ve tese nahan.
5. Zegeikpelaior ngi wasen anmgbianev mba Kristu mba i shigh ve mkurem la nena?
5 Mbakristu mba i shigh ve mkurem mbara tagher a ahendan ken tar u Satan ne shi vea za hemen u tagher a mi kpaa. Nahan kpa, vea fatyô u suur sha iwasen i zegeikpelaior i i lu akar a ve la. Er Mbakristu mba i shigh ve mkurem mbara ve vese iyenge ga nahan kpa, hanma inyom yô, iyenge i zegeikpelaior ka i seer udubu imôngo. Mba i shigh ve mkurem mban vea fatyô u nengen sha tom u atôônanongo a Mbakristu a a kom 100,000 tar sha won cii ne ayol a ve ga. Gbenda môm u mba ve lu iyôngo igen la ve lu wasen mba i shigh ve mkurem yô, i tsua mbagenev ken zegeikpelaior mba ve eren sha atindiakaa a Bibilo la mba mbatamen ken tiônnongo. Mba wasen u nengen sha Mbakristu umiliôn imôngo mba i we sha ikyev i “wanakiriki u jighjigh man u fan kwagh” la.
6. Yange i tsengaôron ér iyôngo igen la ia sue Mbakristu mba i shigh ve mkurem la nena?
6 Profeti Yesaia tsengaôron iwasen i iyôngo igen i i lu akar a Mbakristu mba i shigh ve mkurem la vea wase ve sha gbashima la. A kaa ér: “TER ngu kaan nahan er: Iwengeoron i Igipiti, man ikyav mbi kasuav mbi Etiopia kua Mbasabea, ugôgômbaiorov la, vea per vea va her a we, vea hingir mba ou kpaa, vea dondo u ijime.” (Yes. 45:14) Mbakristu mba ve lu a ishimaverenkeghen i lun shin tar la mba eren tom a nongo u wanakiriki la kua Mbahemenev mba shin Tine, shi mba dondon hemen ve kpaa. Iyôngo igen i i lu “iwengeroron” la ngi suen tom u pasen kwagh tar sha won cii, ú Kristu a we mba i shigh ve mkurem ve lu shin tar sha ikyev la sha akaa a ve lu a mi cii man sha agee a ve kpaa.—Aer. 1:8; Mpa. 12:17.
7. Mba tesen zegeikpelaior u va eren nyi?
7 Er zegeikpelaior ne i lu suen anmgbianev vev mba i shigh ve mkurem la yô, mba tesen i er ia lu imaagh ki nongo u uumace ú he u ua lu shighe u Armagedon una kar kera la. Gba u imaagh kin kia taver shi mba ve lu imaagh kin ne vea wa iyol vea kegh a kegh u eren sha imo i Orvesen ve a ishima môm. Hanma Orkristu yô nan ngu a ian i tesen ér Kristu Yesu u a lu Tor la una fatyô u eren tom a nan. Aluer nan ngu nan Yesu jighjigh shi nan ngu ungwan un hegen yô, nan ngu tesen ér nan wa iyol nan kegh a kegh u va eren sha hanma kwagh u Tor una ôr ken tar u he la cii.
Zegeikpelaior Tese Jighjigh u Nan
8, 9. Iyôngo igen la ngi tesen jighjigh u nan nena?
8 Iyôngo igen i i lu akar a nongo u Mbakristu mba i shigh ve mkurem la tese jighjigh u nan sha igbenda kposo kposo. Hiihii yô, mba suen mba i shigh ve mkurem la sha u pasen loho u dedoo u Tartor u Aôndo. (Mat. 24:14; 28:19, 20) U sha uhar yô, mba eren sha akaa a Mbahemenev mba Shin Tine ve ôr la cii a ishima môm.—Heb. 13:17; ôr Sekaria 8:23.
9 Kwagh u sha utar yô, mba ve lu nongo u zegeikpelaior la mba suen anmgbianev vev mba i shigh ve mkurem la sha u eren sha atindiakaa a perapera a Yehova a we la cii. Mba nôngon u lun a “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.” (Gal. 5:22, 23) Nyian ne, kwagh hemba gban ior u eren “aeren a iyolough” a u lun a aeren a i ter sha heen ne. Nahan kpa, mba ve lu nongo u zegeikpelaior la kange ishima u nyaghen “idya man hôngor man ijimba i eren, man u civir akombo man ahir a eren man ihyom i kôron man iyongo i keren man iwuhe man ishima i nyoon man u wan iyol you ikyo tseegh, man u hendan akaa, man mbampav, man mtôm man ihyundugh ki msôrough man ugurgurmbaakaav kua ambaakaa ne cii.”—Gal. 5:19-21.
10. Mba ve lu nongo u zegeikpelaior la kange ishima u eren nyi?
10 Er se yen yô, ka i taver se u umen ityamegh ki jijingi la shi palegh aeren a iyolough shi hendan a ameen a tar u Satan u ve a mi la. Nahan kpa, se kange nen ishima sha er mbamyen asev shin akaa a se tagher a mi aa a yangen se u dondon Yesu la shin angev mbu na jighjigh wase a vôr shin dooshima u se lu a mi hen Yehova la a ndôhôr ga. Se fa ser Yehova una kure ityendezwa na i a er u va kuran zegeikpelaior sha shighe u zegecan la.
11. Ka akaa a nyi Satan a lu yaren tom a mi sha er una na jighjigh wase a vôrô?
11 Nahan kpa, se mba kuran hanma shighe sha ci u se fa ser orihyom wase jighilii yô ka Diabolo, man memen ga. (Ôr 1 Peteru 5:8.) Ka a yar tom a mbavendan mimi man mbagenev sha u tsung se ér se na jighjigh ser atesen a se dondon la ka a mimi ga. Kpa ayom a na la nga wasen un ga. Kape tôvacan kpa ashighe agen ka a va a mgbejime sha tom u pasen kwagh ne je la, kpa jighilii yô, ka a gema a taver a taver jighjigh u nan u mba i lu tôvon ve a ican la. Nahan Satan ngu hemban yaren tom a kwagh u a hen ér una hemba wasen un u nan sha er jighjigh wase una vôr yô. Kwagh shon ka iyol kpen. Yange i ta Mbakristu mba sha derianyom a hiihii la icin sha kwagh ne ér: “Ver nen ishima sha [Kristu] u A taver ishima sha imbaanyiman i mbaasorabo sha iyol Na la.” Sha ci u nyi? “Sha u uma wen u ken ishima la a̱ de kera vôron ga, ishima kpaa, i̱ de yen ne ga” yô.—Heb. 12:3.
12. Kwaghwan u Bibilo la taver mba iyol i kpe ve la nena?
12 I lu nahan iyol kpe ú u civir Yehova vee? Ashighe agen ka i lu u er u fe kwagh môm ityô ga yôô? Aluer ka zayol wou ne yô, de ne Satan ian we a yar tom a mbamhen mban sha u yangen we u civir Yehova ga. Bibilo i henen sha gbashima man msen u eren man u zan mbamkombo kua u lun a Mbakristu imôngo la una taver jighjigh wou u nan, nahan ‘ishima a kera yina u ga.’ Yehova tôndo zwa ér una wase mbacivir un vea hide a taver agee, man ityendezwa na ka i bunden ga. (Ôr Yesaia 40:30, 31.) Hemba veren ishima sha akaa a Tartor. Palegh akaa a vihin shighe la kpa gema ver ishima sha u wasen mbagenev. Nahan u fatyô u wan ishima shin er iyol ia kpe u nahan kpaa.—Gal. 6:1, 2.
A Yima Ve ken Zegecan A Nyôr a Ve ken Tar u He
13. Ka tom u nyi u lu keghen mba vea war Armagedon laa?
13 Armagedon una karen kera yô, a gba u a tese mba ve lu perapera ga mba a nder ve kpishi la igbenda i Yehova. (Aer. 24:15) Shi a gba u a tese ve kwagh u nagh ku ipaan ku Yesu la; heela tseegh ga, shi a tese ve vea na ku jighjigh sha er vea zua a averen yô. Nahan vea venda atesen a kwaghaôndo u aiegh a yange ve lumun a mi la shi vea gema uuma vev kpaa. Shi vea haa orhe iyol u a lu ikyav i fan Mbakristu mba mimi la. (Ef. 4:22-24; Kol. 3:9, 10) Mba ken iyôngo igen mba vea war Armagedon la vea lu a tom u eren kpishi. A lu kwagh u saan iyol kpishi u civir Yehova ken tar u mbamzeyol vea kera lu ga la.
14, 15. Pase kwagh u una za hemen hen atô u mba vea war zegecan man mbaperapera mba a va nder ve la.
14 Mbacivir Yehova mba jighjigh mba yange ve kpe cii Yesu va shin tar la kpa vea hen akaa kpishi sha shighe la. Vea hen kwagh u Mesiya u ityendezwa, u ve ver ashe a na kpa ve nenge a na sha won ga la. Shighe u ve lu a kpe ga la, ve tese ér ve lumun ityesen i Yehova. Nenge er a lu kwagh u saanyol man ian i civirigh u wasen ve la sha wono! U tesen ikyav yô, a saan se iyol u pasen Daniel er akaaôron a profeti a yange nger kpa kav ga la kure sha mi vough yô.—Dan. 12:8, 9.
15 Er mba a nder ve la vea hen akaa kpishi hen a vese nahan kpa, se lu a mbampin kpishi mba pinen ve. Vea pase se akaa a i ter ken Bibilo kpa i er kwagh u a vindi vindi ga la. Hen er se hemba henen kwagh u Yesu hen anngô na, Yohane u Eren Batisema yô. Akaa a se hen sha ikyev i mbashiada mba jighjigh mbara la aa wase se se hemba fan Mkaanem ma Aôndo a er se fe ma hegen ne. Mbacivir Yehova sha jighjigh mba ve kpe mbara vea zua a “mnder u hemban doon” la, kua mba ken zegeikpelaior mba ve kpe ken ayange a masetyô a tar ne la kpaa. Yange ve hii u civir Yehova ken tar u Satan hemen u la. A doo ve kpishi u zan hemen a mcivir u Yehova ken tar u he ape ahendan aa kera lu ga la.—Heb. 11:35; 1 Yoh. 5:19.
16. Kwaghôron u profeti tese ér Iyange i Jirigh la ia za hemen nena?
16 Sha shighe u Iyange i Jirigh la, a bugh uihyurenmbaruamabera. A yar tom a uihyurenmbaruamabera mban kua Bibilo sha u ôron mbaumav cii ijir sha u fan aluer vea kuma u zuan a uma u tsôron yô. (Ôr Mpase 20:12, 13.) Sha mkur u Iyange i Jirigh la, hanma or yô nana lu a ian i tesen or u nan te ikyaa a nan sha kwagh u or u nan kom u hemen sha won cii la. Hanma or nana lumun u wan iyol i nan sha ikyev i Tartor u Aôndo, nahan den ér Waniyôngo a hemen nan a za a nan hen “ambor a mngerem ma umam” kpa? Shin nana venda u wan iyol i nan sha ikyev i hemen u Tartor u Aôndo? (Mpa. 7:17; Yes. 65:20) Hen shighe la hanma or cii nana tsua u dondon hemen u Aôndo shin vendan, kpa isholibo man mbaaferev vea yange or u tsuan kwagh u nana er ga. Or môm nana kera lu a ian i gban ahon sha ijirôron i Yehova ga. Kpa a lu mbaaferev tseegh a tim ve gbem sha won ye.—Mpa. 20:14, 15.
17, 18. Mbakristu mba i shigh ve mkurem man mba ve lu iyôngo igen la cii mba a ishimaverenkeghen i nyi sha shighe u Iyange i Jirigh laa?
17 Nyian ne, i na Mbakristu mba i shigh ve mkurem la ishô ér ve kuma u ngohol Tartor, nahan mba a ishimaverenkeghen i va teman tor sha Iyange i Jirigh la. Vea zua a ian i civirigh kpen kpen. Ishimaverenkeghen ne mgbegha ve u dondon kwaghwan u Peteru wa anmgbianev vev mba sha derianyom u hiihii la. A nger ér: “Seer nôngon nen u taver a taver myila u i yila ne la man mtsough u i tsuwa ne la, gadia aluer ne er nahan yô, né kera nôngo gbev mayange ga. Gadia ka nahan man á hemba nan ne u nyôron tartor u tsôron u Yesu Kristu, Ter wase man Oryiman wase enger enger ye.”—2 Pet. 1:10, 11.
18 Doo mba ve lu ken iyôngo igen mbara kpishi er anmgbianev vev mba i shigh ve mkurem mbara ve lu a imba ishimaverenkeghen la yô. Nahan ve kange ishima u suen ve. Er ve lu azende a Aôndo nyian yô, kwagh ne mgbegha ve u seer civir Aôndo. Sha shighe u Iyange i Jirigh la, Yesu una hemen ve una za a ve hen ambor a mngerem ma umam, nahan a doo ve kpishi u dondon gbendatesen u Aôndo la. Ken masejime yô, vea kuma u civir Yehova shin tar gbem sha won.—Rom. 8:20, 21; Mpa. 21:1-7.
Ú Umbur Kpa?
• Akaa a Yesu la wa nyi man nyi kere?
• Mba ve lu iyôngo igen la mba wasen anmgbianev vev mba i shigh ve mkurem mbara nena?
• Ka ityom i injaa man ishimaverenkeghen i nyi i lu keghen mba ve lu iyôngo igen laa?
• Ú nenge Iyange i Jirigh la nena?
[Study Questions]
[Picture on page 25]
Mba ve lu iyôngo igen la ôô uriga vev ken awambe a Waniyôngo, ve kungu ve
[Picture on page 27]
Kanyi ú ver ishima u va henen hen mbajighjigh mba a nder ve laa?