Mve U Kristu La Ngu U A Inja Kpa?

“Ka nyi ia lu ikyav i sha mve Wou la man i mkurtara?”—MAT. 24:3.

1. Ka mpin u injaa u nyi mbaapostoli mba Yesu pine unu?

 MBAAPOSTOLI mba Yesu unyiin yange ve pine orvesen ve mpin shighe u lu lamen a ve sha Uwo u Olev ve tseegh la anyom kar hegen nôngo u kuman dubu uhar nahan. Ve pine un ér: “Ka nyi ia lu ikyav i sha mve Wou la man i mkurtara?” (Mat. 24:3) Mbaapostoli mban yange ve ter asember a injaa ahar ken mpin ve ne . Asember shon yô ka “mve Wou” man ‘mkurtar.’ Inja i asember ne ér nyi?

2. Inja i ishember i ‘mkur’ la jim ér nyi?

² Sé vande timen sha ishember i ‘mkurtar’ la cii ve se mase timen sha i “mve” la ye. Mba yer ishember ne ken zwa Grika ér syn·teʹlei·a. Inja i ishember ne ér “mkur,” man i̱ tese ‘shighe u kwagh a zulum u been’ yô, kpa inja i ishember i ken zwa Grika i i yer ér te’los, i i ze kwagh môm a ishember i tesen ‘shighe u kwagh a zulum u been’ la di ér “m-bee.” Se fatyô u tesen mkposo u asember a ahar ne sha kwaghôron u i ne ken Iyou i Tartor la. Kwaghôron ka una zulum u been yô or u nan kwaghôron ka nan kera lam kpishi ga, ka nan kohol iyol i kuren kwaghôron u nan la sha u umbur mbaungwan atôakaa a vesen a nan ter ken kwaghôron u nan la man er i doo u vea yar tom a kwaghwan shon yô. Kpa m-bee u kwaghôron yô ka shighe u or u nan kwaghôron nan hongo sha tsembe kera la. Kape ishember i “mkurtar” i í yar tom a mi ken Bibilo la kpa i til sha ityough ki shighe u mtim u tar a mgbôghom ne zan zan zum u a mase timin je la.

3. Ka akaa a nyi a lu eren sha shighe u mve u Yesu nee?

³ Inja i ishember i “mve,” i mbaapostoli pine la di ér nyi? Ka ishember i ken zwa Grika i í yer ér pa·rou·siʹa la i gem i̱ ér mve ken zwa Tiv ye. * Pa·rou·siʹa u Kristu shin mve na la yange hii shighe u i ver Yesu tor sha ken inyom i 1914 la, man shighe ne ngu zan hemen zan zan hegen, shi una za hemen zan  zan shighe u una va tim mbaaferev sha shighe u “zegecan” la. (Mat. 24:21) Akaa kpishi nga eren ken shighe u mve u Yesu ne, er “ayange a masejime” a tar u bo ne man mkohol u kohol mba i tsough ve kua mnder u i lu nderen ve, nan ve uma sha la nahan. (2 Tim. 3:1; 1 Kor. 15:23; 1 Tes. 4:15-17; 2 Tes. 2:1) A fatyô u kaan ér shighe u i yer ér “mkurtar” (syn·teʹlei·as) ne gba zua vea shighe u mve u Kristu (pa·rou·siʹa) la.

Gôgô Shighe

4. Shighe u mve u Yesu la ngu kwagh môm a shighe u akaa a á lu eren sha ayange a Noa la nena?

⁴ Er ishember i pa·rou·siʹa ne i̱ lu shighe u karen gôgônan yô, kwagh ne zua sha kwagh u Yesu ôr sha kwagh u mve na la. (Ôr Mateu 24:37-39.) Fa wer Yesu yange kar shighe u mve na la sha anshighe u kpuaa, er shighe u Mngerem ma Deemee va sha ayange a Noa la nahan ga. Kpa kar shighe u mve na la sha gôgô shighe u yange za zan zan ve Mngerem ma Deemee mase van la. Gôgô shighe ne lu shighe u Noa lu gban tso shi lu pasen kwagh zan zan Mngerem ma Deemee kar van la. Anyom yange kar imôngo shighe u Noa lu eren akaa ne la. Nahan kape shighe u mve u Kristu la kpa a we akaa a a lu eren zan zan shighe u zegecan la ker je la.—2 Tes. 1:6-9.

5. Mkaanem ma i nger ken Mpase ityough 6 mara tese ér mve u Yesu la ka gôgô shighe nena?

⁵ Akaaôron a profeti a ken Bibilo tese wang ér mve u Kristu la ka di shighe u una va sha u va timin mbaaferev la tsô ga, kpa ka gôgô shighe u una kar naleghaa yô. I ôr kwagh u Yesu ken takerada u Mpase ér a henda nyinya u pupuu shi i na un tsar u sha ityou kpaa. (Ôr Mpase 6:1-8.) Yange mba ne Yesu tor ken inyom i 1914 yô, i ôr kwagh na ér a due “lu hemban, man lu sha u una hemba kpaa.” Takerada u Mpase shi tese ér mbaanyinyav mbagenev a anyinya a ve ukala kposo kposo dondo sha a na. Mbaanyinyav mban cii tile sha ityough ki ityav mbi nôngon man ijen i gban kua ubombauangev, man akaa ne cii nga eren ken gôgô shighe u i yer un ér “ayange a masejime” ne. Se mba nengen er akaaôron a profeti ne a lu kuren sha ayange a ase ne nahan.

6. Mpase ityough 12 wase se u fan nyi sha kwagh u mve u Kristuu?

⁶ Mpase ityough 12 seer tan iwanger sha mver u i ver Tartor u Aôndo sha la. I ôr se kwagh u ityav mbi yange mbi gba sha la hen ijiir ne. Mikael, u a lu Yesu Kristu u a lu hemen sha la, kua mbatyomov nav yange ve nôngo ityav a Diabolo kua azôv a na. Nahan i gbihi Satan Diabolo man azôv a na cii shin tar. Ijiir la kaa a vese ér, er i gbihi Diabolo shin tar yô ishima vihi un tsung, gadia “a fa er shighe na a kera vese ga yô.” (Ôr Mpase 12:7-12.) Nahan yô, yange mba veren Tartor u Kristu sha yô maa gôgô shighe u kwagh “tser” tar man mba ve tem shin u la maa dondo.

7. Kanyi i er ken Pasalmi ityough ki sha uhar laa, man ijiir la ôr kwagh u ian i nyi?

⁷ Takerada u pasalmi kpa ôr kwaghôron u profeti sha kwagh u veren Yesu Tor sha Uwo u Shion sha. (Ôr Pasalmi 2:5-9; 110:1, 2.) Nahan kpa, i ôr ken pasalmi ne ér i na utor mba tar ne shighe gôgônan ér ve wa ayol a ve sha ikyev i hemen u Kristu. I wa ve kwagh ér ve “lu a mfe” shi ve ‘ungwa ityesen’ kpaa. Sha mimi yô, “mba ve suur sha [Aôndo]” sha u civir Yehova kua Tor u a ver la “cii [a] saan ve iyol.” Nahan i na utor mba tar ne kua mba ve lu sha ikyev ve la cii ian hen shighe la ér ve lumun mtemtor u Yesu la.—Ps. 2:10-12.

Er Se Fa Akav la Yô

8, 9. Ka unô vea nenge a ikyav i mve u Kristu shi vea fa inja na?

⁸ Zum u Mbafarishi pine Yesu shighe u  Tartor ua va yô, Yesu kaa a ve ér, “ka sha mnenge u sha ashe” man tartor u Aôndo ua va er ve henen la ga. (Luka 17:20, 21) Mbananjighjighga cii vea fatyô u kaven mve ne ga. Vea kav ga cii! Gadia ve lumun ér Yesu ka Tor ve kpaa ga. Tsô, ka unô vea fa akav a tesen mve u Kristu la man mluainja u mve na shono?

⁹ Yesu za hemen ér mbahenen nav vea nenge a ikyav i sha mve na la wang, vough er “inyiar ka i nyiar i wanger vegher ugen u Sha zan zan i mande vegher ugen u Sha nahan.” (Ôr Luka 17:24-29.) Mateu 24:23-27 wase se u fan er kwagh u i er ken Luka heen ne ka kwagh u mve u Kristu jighilii.

Kov u U Nenge a Akav La

10, 11. (a) I vande pasen kwagh u “kov” u i er kwagh u ú ken Mateu 24:34 la nena? (b) Mbahenen mba Yesu yange ve fa ér ka unô ve lu ken “kov” shon laa?

¹⁰ Iyoukura vande pasen ken ijime ér ken derianyom u hiihii la ‘kov ne,’ u i er kwagh u ú ken Mateu 24:34 la lu “kov u Mbayuda mba sha shighe la mba ve na Yesu jighjigh ga la.” * Kwagh ne ngu sha mi sha ci u ajiir agen a Yesu a er kwagh u “kov” ken Bibilo cii ka sha gbenda u bo, man sha ajiir kpishi Yesu yar tom a ishemberti i “ifer” la u ôron kwagh u kov shon. (Mat. 16:4; 17:17; Mar. 8:38) Iyoukura la pase ér sha ayange a ase ne yô, kwaghôron u Yesu la ngu kuren sha “kov” u ifer u mba nan jighjigh ga, mba vea nenge akav a tesen “mkurtar” (syn·teʹlei·a) shi vea lu uma zan zan shighe u m-bee (teʹlos) shin mtim u tar ne la.

¹¹ Yesu yange una ôron kwagh u “kov” sha gbenda u bo yô, i lu aferaior a sha ayange a na la a lamen a ve shin a ôron kwagh ve ye. Kpa, ishember i “kov” i i lu ken Mateu 24:34 la tile sha ityough ki aferaior a sha ayange a Yesu la tseeghelee? Umbur wer mbahenen mba Yesu unyiin yange ve za hen a na ve “tseegh.” (Mat. 24:3) Er Yesu kera ter ishember i “kov ne” sha gbenda u bo shighe u lu lamen a ve la ga yô, mbaapostoli mbara yange vea fa je ér ve man mbahenen mbagenev mba ken “kov” shon u ua kar kera ga zan zan “akaa ne cii aa er” la.

12. Kwagh u ijiir ne i er la tese ér ka unô Yesu lu lamen a ve shighe u lu ôron kwagh u “kov” laa?

¹² Sé kure ikyaa nahan sha ci u nyi? Ka sha u gbidyen kwar sha kwagh u Yesu ôr la zulee. Er i nger ken Mateu 24:32, 33 nahan, Yesu kaa ér: ‘Hen nen injakwagh ne sha kon u tur. Zum u gbaa na ka una leghem una hôm ikya yô, ne fa je ner, wangernyom mgbôghom ve. Kape ne kpaa, shighe u né nenge akaa ne cii aa eren yô, fa nen ner, a mgbôghom ve, nangem sha hunda je’ la. (Nenge Marku 13:28-30; Luka 21:30-32.) Shi i ôr ken Mateu 24:34 ér: ‘Mimi je M kaan ne ne, kov ne ua lu a kar kera ga saa akaa ne cii aa er ve.’

13, 14. Se fatyô u kaan ser “kov” u Yesu ôr kwagh u ú ne lu mbahenen nav sha ci u nyi?

 ¹³ Yesu kaa ér a lu mbahenen nav mba a va shighe ve mkurem sha icighan jijingi mbara vea kav “akaa ne cii” shighe u vea nenge a mi la ye. Er ivur i dondon la i tese nahan, Yesu lu ôron kwagh u mbahenen nav shighe u kaa ér: “Kov ne ua lu a kar kera ga saa akaa ne cii aa er ve” la.

¹⁴ Mbananjighjighga vea nenge a akav ne kpa vea kav ga, kpa mbahenen mba Yesu yô vea nenge akav ne shi vea kav kpaa. Vea “hen” inja i akav ne sha u veren ishima sha akaa a aa lu eren la shi vea “fa” inja i á kpaa. Nahan vea mase kaven ér a “nangem sha hunda je.” Er Mbayuda mba banen a jighjigh man Mbakristu mba jighjigh mba i shighe ve mkurem mbara nenge mkur u mkaanem man hii u kuren sha derianyom u hiihii la nahan kpa, lu mbadondon un mba i shighe ve mkurem mbara tseegh ve hen kwagh sha akaa a a lu eren la shi ve fa inja i akaa shon kpaa ye.

15. (a) Ka unô ve kohol ve hingir “kov” u ainge u Yesu ôr kwagh u ú laa? (b) Se fatyô u pasen mhii man mkur u “kov ne” ga sha ci u nyi? (Nenge akwati u a lu sha peeji 25 la.)

¹⁵ Nyian kpa mba ve fe mimi sha kwagh u Aôndo ga mbara hen ér ve nenge a ikyav i mve u Yesu la sha “mnenge u sha ashe” ga. Ka ve hen ér akaa cii nga her di er a lu sha ayange a tsuaa la nahan. (2 Pet. 3:4) Kpa anmgbianev mba Kristu mba jighjigh mba i shigh ve mkurem mba ve lu sha ayange ne yô ve nenge akaa a a lu eren ne shi ve fa inja i a kpaa, vough er vea nenge a inyiar kpa vea fa nahan. Mbakristu mba i shigh ve mkurem mban cii kohol hingir “kov” u ainge, u ua kar kera ga “saa akaa ne cii aa er” * la. Kwagh ne tese ér anmgbianev mba Kristu mbagenev mba i shigh ve mkurem mbara vea lu uma shin tar zan zan shighe u zegecan u i tsengeôron la una hii.

“Kuran Nen”

16. Kanyi i gbe u mbahenen mba Kristu cii vea eree?

¹⁶ Gba u se fa akav a tesen mve u Yesu la maa se tema a tema ga. Yesu shi seer kaan wener: ‘Kwagh u M kaan ne ne, M ngu kaan ior  cii Mer: Kuran nen.’ (Mar. 13:37) Sea lu mba i shigh ve mkurem shin sea lu mba ken zegeikpelaior kpa, gba u se cii se ver ishima sha kwagh ne nyian. Hii shighe u i ver Yesu Tor sha ken inyom i 1914 la zan zan nyian, anyom kar hemba 90. Er alaghga a taver se u kurannahan kpa, gba u se kohol ayol a ase shi se kuran kpaa. Aluer se fa ser Kristu ngu hemen ken Tartor na hegen, kpa se fatyô u nengen a na ga yô, kwagh la una wase se se kuran. Mfe ne shi una umbur ser ér kera shi ica ga tsô una va sha u va timin mbaihyomov nav “hen shighe u [se] ver ishima ga la.”—Luka 12:40.

17. Er se fe inja i mve u Kristu yô se hemba mban a ishima i eren nyi, man doo u se kange ishima u eren nyi?

¹⁷ Er se fe inja i mve u Kristu yô se hemba mban a ishima i eren kwagh torough torough cii. Se fa ser Yesu va shi ngu hemen ken Tartor na hii ken inyom i 1914 la, kpa se fatyô u nengen a na ga. Ica a gba ga tsô una va sha u timin mbaaferev shi van a mbamgem mba doon shin tar ne cii. Nahan doo u se hemba kangen ishima ser se er tom u Yesu yange tsengaôron kwagh u ú la sha ishima i tseen cii. Yange kaa ér: ‘Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur shin m-bee u tar ne [teʹlos] una kuma ye.’—Mat. 24:14.

[Footnotes]

Ú Na Mlumun Wer Nyi?

• Er nan ve se fe ser mve u Yesu la ka shighe u karen gôgônana?

• Ka unô ve fe akav a tesen mve u Yesu man inja i á?

• Ka unô ve kohol ve hingir “kov” u ainge u i er kwagh u ú ken Mateu 24:34 laa?

• Se fatyô u pasen mhii man mkur u “kov ne” jighilii ga sha ci u nyi?

[Study Questions]

[Box on page 25]

Se Fatyô u Pasen Mhii man Mkur u “Kov Ne” Kpa?

Mba hembe yaren tom a ishember i “kov” la sha u ôron kwagh u ior mba anyom a ve a lu kwagh môm ga, kpa ve lu hen shighe môm yô. U tesen ikyav yô, i kaa a vese ken Ekesodu 1:6 ér: ‘Tsô Yosev kpe a anngôôv nav kua kov la cii.’ Anyom a Yosev man a anngôôv nav lu kwagh môm ga, kpa ve cii ve lu uma hen shighe môm. Anngôôv mba Yosev mba i vande maren ve a na la kpa yange ve lu ken ‘kov la.’ Ve mbagenev je yô ve hemba tsan a Yosev kpaa. (Gen. 50:24) Yosev lu vesen a mbagenev ken “kov la,” er Benyamin nahan, nahan alaghga ve lu uma hen shighe u Yosev kpe kera yô.

Nahan shighe u i lu ôron kwagh u ior mba ve lu uma hen ma shighe man í ter ishemberti i “kov” yô, a fatyô u pasen mhii man mkur u kov shon jighilii ga, saa di u ôron shighe u ior mba ken kov shon ve lu uma la tsô. Sha nahan yô, shighe u Yesu ôr kwagh u “kov ne” er i nger ken Mateu 24:34 la, lu tesen mbahenen nav er vea fa shighe u “ayange a masejime” aa kure ga. Kpa Yesu za hemen pase ér vea fa “iyange la man shighe la” ga.— 2 Tim. 3:1; Mat. 24:36.

[Picture on pages 22, 23]

Yange mba ne Yesu tor ken inyom i 1914 yô, i ôr kwagh na ér ngu “hemban”

[Picture on page 24]

‘Kov ne ua lu a kar kera ga saa akaa ne cii aa er ve’