Yesu Kristu Lu Ormishen U Hemban Cii

“Mo yô, M fa Un; gadia M due her a Na, man ka Un kpaa A tindim ye.”—YOH. 7:29.

1, 2. Inja i ishember i mishen la ér nyi, man ka an nan lu Ormishen u hemban ciili?

 KA WEA ungwa ishember i “ormishen” la nahan kanyi ka i va u ken ishima? Ior kpishi ka ve hen ér ka mbamishen mba Mbakristu Mbaaiev mba ka ve wa ave sha akaa a patii man akaa a inyar a tar u ve lu her la. Kpa er u lu Orshiada u Yehova yô, alaghga u hen wer ka mbamishen mba Mbahemenev mba Shin Tine ve tindi ve ken ityar kposo kposo ér ve za pase loho u dedoo ker la. (Mat. 24:14) Mbamishen mban ka ve yar tom a shighe ve kua agee a ve aa iyoltangen shio sha u eren tom u civirigh ne, nahan ve wase ior sha er vea kporom hen Yehova Aôndo shi vea ya ikyar i dedoo vea na yô.—Yak. 4:8.

² I nger ishember i “ormishen” man i “mbamishen” la ken Icighan Bibilo ga. Nahan kpa ishember i ken zwa Grika i í gem ken Mbaefese 4:11 ér “mbaivangeli” la, a fatyô u geman i kpaa ér “mbamishen.” Yehova ka Orivangeli u hemban cii, kpa se fatyô u yilan un ser Ormishen u hemban cii ga, sha ci u ma or tindi un ga. Man Yesu Kristu kpa ôr kwagh u Ter na u sha la ér: “M due her a Na, man ka Un kpaa A tindim ye.” (Yoh. 7:29) Yehova yange tese ér tar u uumace doo un ishima sha gbenda u hemban cii sha u tindin Wan na u môm môm la shin tar. (Yoh. 3:16) Se fatyô u yilan Yesu ser Ormishen u hemban cii sha ci u ityôkyaa i môm i yange i tindi un shin tar yô lu sha u a va “pase mimi.” (Yoh. 18:37) Yange pase loho u dedoo u Tartor zan zan kar kuren, man hegen kpa se mba zuan a iwasen sha tom na la. U tesen ikyav yô, sea lu mbamishen shin sea lu ga kpa, se fatyô u dondon gbenda u yange pasen kwagh la ken tom wase.

3. Ka mbampin mba nyi se time sha mini?

³ Tom u Yesu er sha u pasen loho u Tartor la na yô se fatyô u pinen ser: Yesu yange tagher a nyi ken tom na u pasen kwagh laa? Kanyi yange i wase un ve fa ityesen yumu? Man lu nyi i wase un ve za ikyura ken tom na?

Yesu lu a Ishima i Eren Tom hen Ijiir i Vande Lun Her Ga Yô

4-6. Shighe u Yesu va shin tar la ka mbamgem mba nyi nahan yange tagher a mi?

⁴ Alaghga a gba u mbamishen mba ainge kua Mbakristu mba ve yem sha ajiir a kwagh a hembe gban sha mbapasen kwagh u Tartor la vea gema uma ve sha er una zua sha u hen ijiir i ve lu za eren tom her la, aluer tar la ua lu a inyaregh kpishi er u ve nahan ga kpaa. Nahan kpa Yesu yange hemba geman mlu na a hanma ormishen ugen cii, gadia yange undu sha, ape lu vea Ter na kua mbatyomov mba ve civir Yehova a ishima i wang la va shin tar. (Yobu 38:7) Sha mimi yô shighe u Yesu lu sha la kaha a shighe u lu hen atô u uumace mbaasorabo ken botar ne la. (Mar. 7:20-23) Shi yange gba u Yesu una wa ishima a anyiman a mbahenen nav mba ishima ishima. (Luka  20:46; 22:24) Kpa, Yesu hemba hanma mzeyol u tagher ishigh a mi shin tar cii.

⁵ Yesu yange hii u lamen zwa u uumace sha ivande ga kpa hii u henen u shighe u lu iyev la. Nenge imba la sha wono, Yesu kera lu or u vesen, u hemen mbatyomov sha ga, kpa lu anye u henen a hen kwagh! A bunde kera kera kpa Yesu lam zwa môm ken “ijô i ior” lamen sha shighe u lu shin tar la. Man zwa ne kaha kposo a ‘zwa u mbatyomov mba Shaav’ la. (1 Kor. 13:1) Yesu yange fa akaaôron a dedoo hemba hanma or cii.—Luka 4:22.

⁶ Nenge ase igbenda igen i yange akaa lu Wan u Aôndo kposo shighe u va shin tar la. Er Yesu ya dyako u isholibo hen Adam ga nahan kpa, A hingir orumace vough er mba vea va hingir “anmgbianev” nav shin mbadondon un mba i shigh ve mkurem la nahan. (Ôr Mbaheberu 2:17, 18.) Hen tugh mbu masetyô mbu a wua Yesu la a kera sôn Ter na ér a tindi un a “akum a mbatyomov mba Shaav” ga. Kpa shighe u lu Mikael, Ortyom u Tamen sha la hemen mbatyomov kpishi. (Mat. 26:53; Yuda 9) Yesu yange er uivande kpishi; nahan kpa, akaa a yange una lu sha ve ma er la ma hemba akaa a a er shighe u lu shin tar la.

7. Mbayuda yange ve er a atindi a i na ve la nena?

⁷ Shighe u Yesu lu “Imo,” lu sha la, alaghga lu un lu Orshua u Aôndo, u hemen Mbaiserael ken taaikyôngo ye. (Yoh. 1:1; Eks. 23:20-23) Yange ve ‘ngohol atindi sha ave a mbatyomov mba Shaav je, kpa ve wa a ikyo ga.’ (Aer. 7:53; Heb. 2:2, 3) Mbahemenev mba kwaghaôndo u Mbayuda mba sha derianyom u hiihii la fa inja i atindi la ga. U tesen ikyav yô, hen ase sha kwagh u tindi u Iyange i Memen la. (Ôr Marku 3:4-6.) Mbangeren man Mbafarishi yange ve “kera wa akaa a a hembe lun a inja ken atindi la ikyo ga, er: ijirôron man mhôônom ma zungwen man jighjigh u nan” nahan. (Mat. 23:23) Nahan kpa, Yesu gba uwer u pasen ve mimi ga.

8. Yesu una wase se sha ci u nyi?

⁸ Yesu lu a ishima i eren tom u i tindi un la. Ior yange ve doo un ishima kpishi, man soo u wasen ve a ishima na i môm kpaa. Ma shighe môm kpa hide ijime u eren tom u ivangeli ga. Nahan er Yesu tile sha jighjigh hen Yehova shighe u lu shin tar la yô, “A hingir itine i myom u tsôron sha ci u mba ve ongo imo Na la cii.” Heela tseegh ga, er “un iyol Na ican er Un, sha imeen i i lu meen Un la, ka sha ci u nahan man A fetyô u wasen mba i lu meen ve [er se nahan] la ye.”—Heb. 2:18; 5:8, 9.

I Tsaase Yesu Nahan A Fa Ityesen

9, 10. Cii man Yesu va shin tar yô ngohol ityesen i nyi?

⁹ Mbahemenev mba Shin Tine sôr ian ver sha er a tsaase Mbakristu mba ainge cii ve a mase tindin ve ér ve za er tom mishen ye. Yesu Kristu kpa yange ngohol ityesen nee? Een, yange ngohol ityesen, kpa za makeranta u mbatesen kwaghaôndo cii ve mase hingir Mesiya ga; shi hen kwagh sha ikyev i mbahemenev mba kwaghaôndo mba zan ati kpaa ga. (Yoh. 7:15; nenge Aer. 22:3.) Tsô er nan ve Yesu fa ityesen yumu?

¹⁰ Er Maria, ngô u Yesu man Yosev, u lu ter-ikyoson na la tese un nahan kpa, lu Yehova u a hembe fan ityesen la tese un sha er una er tom na u pasen kwagh la tsema tsema ye. Shi Yesu iyolna kaa ér: “M gba ôron kwagh sha tahav Av ga; kpa ka Ter u A tindim la je, A nem tindi sha kwagh u Me kaa man shi Me ôr kpaa ye.” (Yoh. 12:49) Fa wer Aôndo yange na Wan na akaa jighilii a una tese yô. Yesu yange ver ishima ungwa akaa a Ter na wa un la cii ve mase van shin tar ye. Ma ityesen i hemban doon a i Yesu ngohol la je kpa ngi ga.

11. Yesu yange dondo gbenda u Ter na eren kwagh a uumace la kighir nena?

¹¹ Yesu ya ikyar i dedoo vea Ter na hii shighe u Aôndo gba un sha hiihii la je. Shighe u Yesu lu sha la, a nenge er Yehova eren kwagh a uumace yô, nahan a fa gbenda u Aôndo nengen ve la. Yesu yange tese ér uumace doo un ishima vough er Aôndo nahan, ka sha ityôkyaa ne ve Yesu u í er kwagh na ér ka kwaghfan la kaa ér: “Doom a ônov mba iorov tsung” ye.—Anz. 8:22, 31.

12, 13. (a) Yesu hen nyi sha gbenda u Ter na eren kwagh a Mbaiserael laa? (b) Yesu yange yar tom a ityesen i í na un la nena?

 ¹² Kwagh ugen u Yesu hen sha ikyev i Ter na yô, yange nengen gbenda u Ter na sôron mbamzeyol mba taver la. U tesen ikyav yô, hen ase sha gbenda u Yehova eren kwagh a Mbaiserael mba hembanato la. Nehemia 9:28 kaa ér: “Kpa er ve zua a mmem kera yô, shi ve er kwaghbo sha ishigh Yough [Yehova], nahan U na ve sha ikyev i mbaihyomov vev Wer, ve̱ ya tor sha a ve; nahan kpaa zum u ve hide ve zamber a We yô, U ungwa ve Sha; acin imôngo je U yima ve sha mhôônom Ou ma zungwen.” Er Yesu lu eren tom vea Yehova sha shi lu nengen gbenda u eren kwagh a uumace la yô, un kpa hingir u lun a ieren i mhôônom kôron un a ior mba eren kwagh a ve la.—Yoh. 5:19.

¹³ Yesu er sha ityesen i a ngohol hen Ter na la, nahan eren kwagh a mbahenen nav sha mhôôn. Hen tugh mbu Yesu una kpe la, mbaapostoli mba ve doo un ishima yum la cii “undu Un yevese.” (Mat. 26:56; Yoh. 13:1) Apostoli Peteru je yô nyiman Kristu kwa tar je. Nahan cii kpa, Yesu na mbaapostoli nav mbara ian i hiden hen a na. A kaa a Peteru ér: “M er msen sha ci wou sha u jighjigh wou u nan a̱ de yen ga yô; we kpaa, shighe u ú gema ishima yô, taver anmgbianev ou asema.” (Luka 22:32) Ka sha “mbaapostoli man uprofeti” i wa imaagh ki Iserael u ken jijingi ye, shi awen a i we imaagh ki Yerusalem u He la kpa nga a ati 12 a mbaapostoli mba jighjigh mba Waniyôngo, Yesu Kristu. Man zan zan nyian kpaa, Mbakristu mba i shigh ve mkurem mbara man “iyôngo igen” i i lu akar a ve la mba zan ikyura ken tom ve u pasen loho u dedoo u Tartor ne sha tahav mbu Aôndo man sha hemen u Wan na u môm môm la.—Ef. 2:20; Yoh. 10:16; Mpa. 21:14.

Gbenda u Yesu Tesen Kwagh La

14, 15. Ityesen i Yesu la kaha kposo a i mbangeren man Mbafarishi sha nyi igbenda?

¹⁴ Yesu yange yar tom a ityesen i a ngohol la sha u tesen mbadondon un nena? Aluer se tôô gbenda u Yesu tesen ior la se kar sha u mbahemenev mba kwaghaôndo u Mbayuda tesen la yô, se nenge wang er ityesen i Yesu hemba i ve yem zende zende yô. Mbangeren man Mbafarishi yange ve ‘gema kwaghôron u Aôndo hingir gbilin sha aeren a ve’ la. Kpa Yesu yô ôron kwagh sha tahav nav ga, yange tesen ior mkaanem shin loho u Aôndo hanma shighe cii. (Mat. 15:6; Yoh. 14:10) Se kpa ka kwagh u i doo u se eren je la.

¹⁵ Kwagh ugen kpa ngu u a ne ve Yesu hemba fan ityesen a mbahemenev mba kwaghaôndo yô. Yange ôr kwagh u mbangeren man Mbafarishi ér: “Akaa a ve kaan ne cii, er nen a, waan nen a ikyo kpaa, kpa de eren nen er ve eren nahan la ga; gadia ka ve kaa a kaa kwagh, kpa ve eren sha mi ga.” (Mat. 23:3) Yesu eren sha kwagh u tesen ior la. De se nenge ase ikyav i i tese mimi u kwagh ne yô.

16. Hii nan ve ú fatyô u kaan wer Yesu yange er sha kwaghwan na u a lu ken Mateu 6:19-21 laa?

¹⁶ Yesu yange wa mbahenen nav kwagh ér ve ‘koso akaa a injaa sha ci ve Sha.’ (Ôr Mateu 6:19-21.) Man Yesu iyol na yô er sha kwagh u wa mbahenen nav ne kpa? Een, gadia a ôr kwagh na sha mimi ér: “Atsôngo nga a ijô, inyon i sha kpaa ngi a aya; kpa Wan u or yô, ngu ape suur ityough ga.” (Luka 9:58) Yesu lu a uma u akuma akuma. Yange hemba veren ishima sha u pasen loho u dedoo u Tartor shi tese sha ieren na er i doo u palegh ishimanyian i or ka nan zua a mi sha u koson akaa a injaa a nan shin tar la. Kpa Yesu gema tese er i hembe doon u koson  akaa a injaa sha ci wase sha, “ape ivina shin nduran ve vihin kwagh ga, mbaiv kpaa ve iin ga la.” Nahan u ngu dondon kwaghwan u Yesu la sha u koson akaa a injaa sha ci wou sha kpa?

Aeren a Yange Na Ve Ior Soo u Ungwan Loho u Yesu Yô

17. Ka aeren a nyi yange na ve Yesu lu orivangeli u fan ityesen yumu?

¹⁷ Ka aeren a nyi yange na ve Yesu lu orivangeli u fan ityesen yumu? Kwagh ugen yô ka gbenda u nengen ior mba tesen ve la. Aeren a Yehova a doon agen a Yesu kpa lu a mi yô lu iyol hiden a mi ijime man dooshima kua mhôônom ma zungwen. Nenge er aeren a Yesu ne yange na ior soo u ungwan loho na yô.

18. Se fatyô u kaan ser Yesu yange hide a iyol na ijime sha ci u nyi?

¹⁸ Er Yesu lumun u van shin tar yô, a “gema iyol Na hingir gbilin er A tôô mlu u ortom, A hingir kwagh môm a ior la.” (Fil. 2:7) Ieren ne lu i hiden a iyol ijime. Kwagh ugen yô, Yesu yange nenge ér un hemba ior ga. Yange henen ér, ‘m due sha m ve shin tar ye, nahan hanma or cii nana̱ ungwan imo yam’ ga. Yesu yange zenden yôôn ér ka un Mesiya je ne, er umesiya mbaaiev ve eren nahan la ga. Ashighe agen je yô, a kaa á ior ér ve de pasen mbagenev or u un lu shin ôron ve kwagh u un er sha ci ve kpaa ga. (Mat. 12:15-21) Yesu yange soo ér ior ve nenge akaa a un er la nahan ve tsua a ishima ve ér vea dondo un. Er Yesu ver ishima ér mbahenen nav ve lu er mbatyomov mba shaav mba lun vough mba vande lun vea ve sha imôngo la ga yô, doo mbahenen nav kpishi.

19, 20. Yesu yange wase ior sha ci u ve doo un ishima shi mhôônom kôron un a ve nena?

¹⁹ Yesu Kristu shi tese dooshima, man dooshima ka ieren i vesen i Ter na u a lu sha la. (1 Yoh. 4:8) Lu dooshima mgbeghan Yesu ve tesen ior ye. U tesen ikyav yô, nenge ase er kwagh u gum ornyar ugen yange doo un ishima yô. (Ôr Marku 10:17-22.) Kwagh u gum ornyar la “doo Un ishima” nahan soo u wasen un, kpa gum ornyar la venda u undun akaa a lu a mi la va dondon sha Kristu.

²⁰ Mhôônom ma zungwen  lu ieren igen i i na ve ior soon u ungwan ityesen i Yesu yum yô. Er mba ve lumun ityesen na la kpa lu uumace mba yinan yô, ve lu a mbamzeyol kpishi. Yesu fa kwagh ne, nahan zungwen ve mhôônom ken ityesen na shi kunya kpa kôron un a ve. U tesen ikyav yô, sha shighe ugen la, Yesu man mbaapostoli nav cii er tom kpoghuloo je yô ve lu a ian i yan kwagh tsô kpaa ga. Kpa, shighe u Yesu nenge ikpelaior va kohol her a na yô er nena? ‘Mhôônom yange ma kôr Un a ve sha ci u ve lu er iyôngo i i lu a orkuran i ga yô. Tsô A hii u tesen ve akaa kpishi.’ (Mar. 6:34) Yesu fa er ior mba un pasen ve kwagh la kôr kunya yô, nahan tesen ve sha afatyô na cii shi eren uivande sha er una wase ve yô. Mbagenev hingir mbahenen nav sha ci u aeren a na la, mbagenev yô lu sha ci u akaaôron a na la.

21. Se hen nyi ken ngeren u a dondo nee?

²¹ Se seer henen kwagh u tom u Yesu shin tar la ken kwaghhenen u a dondo ne. Ka igbenda igen i nyi se seer dondon Yesu Kristu u a lu Ormishen u hemban cii laa?

Ú Kaa Wer Nyi?

• Cii man Yesu va shin tar yô ngohol ityesen i nyi?

• Ka sha nyi gbenda nahan Yesu hemba fan ityesen a mbangeren man Mbafarishi?

• Ka aeren a nyi yange na ve ior soo u ungwan loho u Yesu?

[Study Questions]

[Picture on page 15]

Yesu yange tese ikpelaior kwagh nena?